1 Sa ǁōǁoasa gagas ge ǁîn hoan ǃnâ hâ 2 tsîts ge sa ǃoagu ge ǁorena tsaurase ra hui-unu. Sats ge ǁîna dīn ra xūn xa ǂâiǂâiǃnâ tsî ra ǃkhâikhom, în ǁnā ǀgaub ai ǁîn di ǂkhaba dīga ǁnāxū tsî sats ǃKhūtsa ǂgomǃgâ.
Kanaanǁîn di ǁoren
3-4 Gaxu ǁae-i ǃkharu hâse ge sa ǃanu ǃhūb ǃnâ ǁan hâ i khoenats ge ǁîn gere dī ǃaorosa xūn, ǃgaidīb tsî ǃanuoǃnâ ǀgoreǀîdi ǃaroma ge ǃhuisa i. 5 ǁÎn ge ǀkhomoǃnâse ǀgôarona ǃgam tsî khoen di ǁgan-i tsî ǀaob tsîna ǂû tsî gere ā. ǁÎn ǂganǃgâsa ǃoabadi ǀkha ge tsoatsoa 6 ǁîdi ǃnân ge ǁgûna, ǁîn di ǂhunuma ǀgôan, huisen ǁoana gere ǃgamde. ǁNā-amagas ge sida aboxagu nî ǁîna hîkākāsa ge mā-am, 7 îb nē ǃhūb, hoa ǃhūgu xa satsa ǃgomǀgausababa sa khoen di ama-ai hâǃkhai kai. 8 Xawets ge nēs tsîn ǃnâ ǁîn tsîn a khoe xui-ao, ǁîn di khākhoena ra ǀkhomxa. Sats ge sa toroǂnubis aiǃâ, khākhoenan nî ǁaeb ǀkha hîkākā ga ǃkhā ra xoxona ge sîǂui. 9 ǁNā eloxoresa khoena torob ǃnâ hîkākās ǃaromats ge sa ǂhanu-ai khoen ǀguina ga mā-am hâ. Sats ge ǁîna ǁnātimîsi ǁaixa ǀgurun tamas ka io ǀgui ǁkhō mîmās ǀkha ga hîkākā hâ. 10 Sats ge ǁîn tsî ǁîn di aboxagu hoaragase ǂkhaba tsî tātsēs tsîna dī-unusen tide ǃkhaisats a ǂan, xawes tsîna ǁîna ǃhobasenn nîga ǁaeb ǀkha gere ǁkhara. 11 ǁÎn di hoaraga ǃhaos ge tsoatsoasa xu ge ǀâxarehe hâ i tsî ǁînats ga ǁîn ǁoren ǃaroma ǁkhara tama hâ i, xawes ge ǁnāsa ǁînats gere ǃao ti ǂâibasen tama hâ.
Elob ǀguib ge a Gao-ao
12 Sats ge ǁnā ǂkhaba khoena ge kuru tsî i ge ǀgui khoe-i tsîna ǁîna ra ǁkhaubase ǃhoa tide tamas ka io ǁînats ge hîkākā ǃkhais ǃaroma satsa ǀgoraǃgâ tide. ǀGui khoe-i tsîn ge dīts ge xūn xa dî tsi tamas ka io sa ǀgoraǃgâsa ǁgoaǂui ǁoa. 13 Hoaraga xūn ge sa sâub ǃnaka hâ tsî i ge ǀnî elo-i, ǁî-i aits nî ǂhanuts a ǃkhaisa ǁgau-i xare-e a ǀkhai. 14 ǀGuis khami ī gao-ao-i tamas ka io ǂgaeǂgui-ao-i, ǃhūbaib ai hâ-i ge ǂhanuoǃnâsets ge nē khoena ǁkharase a ǀhapimā tsi ǁoa. 15 Sats ge a ǂhanu-ai tsîts ge mâ xū-i hoa-e ǂhanu-aise ra ǂgaeǂgui. Sats ge tātsēs tsîna sa ǀgaib ǀgoraǃgâs diba, ǁkharaba anu tama khoe-i ai ge sîsenū tama hâ i. 16 Sa ǀgaib ge a ǂhanu-aisib di tsoatsoa tsîts ge ǁîba, sats a hoan di ǃKhū xui-ao ǀkhommats khoe-i hoa-e nî ǁgause a sîsenū ǁkhā. 17 Khoen ga sa ǀgaib a dīǀoaǀoasa ǃkhais xa îganǀgē, ots ge sa ǀgaiba ra ǁgau tsî mâ-i hoa-i sa ǀgaiba ǂan xawe ra kākāsen-e ra ǁkhara. 18 Hoaraga xūnats dī ǁkhā ǀgaibats ūhâ xawes tsînats ge a ǀkhomxaǃnâ ǀgoraǃgâ-ao. ǂGaots ra ǁae-i hoa-i aits ge sida ǃoagu, ǂgaots ra xū-i hoa-e dī ǁkhā, xawets ge ǁnās ǃās ǃnâ sida, kai ǃnūǃnâxasib ǀkha ra ǂgaeǂgui.
19 Dīts ge xūn ǀkhats ge sa khoena, ǂhanu-ai khoe-i nî ǁkhāti ǃgâis tsîna hî ǃkhaisa ge ǁkhāǁkhā. Sats ge sa khoena ǁîn di ǁorena xun nî ǃhobasen ǃkhais di mā-ams ǀkha, ǃnāǂamsa ǃâubasensa ge mā. 20 Sats ge sa khoen di khākhoena ǁkharas ǃnâ kaise ǂōrisa tsî ge ǃnūǃnâxa i; ǁōban anu hâ ǁaeb tsîn aits ge ǁîna ǁîn di ǂkhaba daoga xu oas di ǃēsa gere mā. 21 Xawets ge sa khoena kaise ǁkhōse ge ǀgoraǃgâ ǁîn aboxagu ǀkhats ǃgaeǀhaodi, ǁînats ǃgâi xūna nî mās dide mîmâi hâ hîa.
22 Sidats ge ra ǁkhara, xawe sida khākhoenats ge sida xa disiǀoadisi ǃnāde ǃnāsase ra ǁkhara, nauna da ga ǀgoraǃgâ, o da sa ǃgâisib xa nî ǂâi tsî sida ga ǀgoraǃgâheo ǀkhomma nî ǃâubasen ǁkhāse.
Egipteǁîn di ǁkharab
23 Sats ge ǁnān hîa gâsib ǃnâ ǂkhabase gere ûina, ui-uisa xūn hîan gere ǀgoreǀîn ǀkha ge tsûtsû. 24 ǁÎn ge amaba xu ǃnū tsî hoan xa ui-uisa ǀgurun tsî xamarina gere ǀgoreǀî. Tsîn ge ǂkham ǀgôaron khami supuse gere ǀhôagaoǃnâhe. 25 ǁNā-amagats ge ǁîna ǁîn di gâresib ǃaroma ge ǁkhara tsîs ge sa ǀgoraǃgâsa ǁîna gân khami ge ī kai. 26 Nēb ge ge supu ǁkhara i, xawe ǁnān hîa ge nēti ī ǃkhâikhomdi ai ǂâisa ǂnûi tama hâ in ge ǀoasa ǀgoraǃgâs Elob disan nî hōǃâ ǃkhaisa anu hâ. 27 ǁÎn gere elon ase ǃgapaǀî ǀgurun tsî xamarin ǀkhan ge ǁkharahe, on ge kaise ǃan tsî ǁnāb ǁîn gere ǂkhāb a ama Elo ǃkhaisa ge mûǂan. ǁNā-amagas ge ǀuni ǁkharaban ge tsâsa.
