Gao-aob ge Mordekaiba ǃgôasiba ra mā
1 [1] ǁNā tsuxub ǃnâb ge ǃKhūba ǂomsa gao-aoba xu ūbē, ob ge gao-aoba xoa-aob âb nî ǂhanusi ǂkhanis tsēkorobe ra ī xūn ra xoaǃnâhesa ǂgâxa-ū tsî khomaiba bi ǃkhaisa ge mîmā. 2 [2] ǁÎb ge mâtib ge Mordekaiba, gao-aoba ǃnariǃgams ǀapes, ǀgam ǂammâisakha gao-ommi ǃûi-aose gere ǃoabakha xa dīhe hâ isa ǂhaiǂhai ǃkhais di ǃnuriba ge khomaiba bi. 3 [3] Ob ge gao-aoba ge dî: “Mâ ǃgôasib tsî mādawa-amsab ge Mordekaiba nēsab ge dīo māhe?”
O gu ge sîsenaoga “Xū-i xare-ets ge ǁîba dība tama hâ” ti ge ǃeream.
4 [4] Gao-aob ra Mordekaib di ǃgâidīb xa dîǃnâ, hîab ge Hamanna omǂnamib ǃnâ ge ǂgâxa. ǁÎb ge Mordekaib nî kurutoahe go ǂgāhaib ai ǂgāmâihe ǃkhaisab gao-aoba nî ǂganse ge ǂgâxa.
“Tari-e ǁnāpa omǂnamib ǃnâ hâ-e?” tib ge gao-aoba ge dî.
5 [5] O gu ge sîsenaoga “Hamanni ge; ǁîb ge satsa nî mûse ǃâu hâ” ti ge ǃeream.
“ǂGai bi” tib ge gao-aoba ge mî.
6 [6] Ob ge gao-aoba Hamanni ǃoa ge mî: “ǃGôasiba ta ra mā ǂgao khoeb ge hâ. Nē khoeba tare-e ta nî dība?”
Ob ge Hamanna ǁîb ǃnâ ge ǂâi: “Tari-eb kha gao-aoba ǃgôasiba ra mā ǂgao, ti tama ta ka io.”
7-8 [7-8] Tsîb ge ǁîba gao-aoba ge ǃeream: “An gao-aob ǃgāna tsaura lapi-anaǂamsarab, sats ǂûts ra anaba nē khoeba hā-ūba. An sats ra ǃgapi hāba hā-ū. 9 [9] Ob kom gao-aoba ǀgapi ǃharodi ǃnâ hâ khoegu ǀguiba nî ǂgai, îb ǁîba ǁnā saraba ǁnā khoeb gao-aob xa ǀnamheba ana, îb hāb ai ǃgapi hâse ǃās di danaǃganni ǃnâ ǃgûma-ūhe. Ab ǁnā khoeb nē khoeba hāb ai ǃgapi hâba ra ǂgaeǂguiba ‘Nēti i ge gao-aob xa ra ǃgôasiba māhe khoeb hoab ǀkha nî dīhe!’ ” ti garu ǂanǂan.
10 [10] Ob ge gao-aoba Hamanni ǃoa ge mî: “ǃGâisets ge go ǃhoa! ǁNān hoana Mordekaib, Jodeǁîb ǀgapi ǃharosa gao-ommi ǃnâ ūhâba dība, î tā xū-i xare-e ǁnāxūǂui.”
11 [11] Hamanni ge anaǂamsarab tsî hāb tsîna ū tsî saraba Mordekaiba ge ana. Hamanni ge Mordekaiba hāb aib ǃgapi hâse ǃās di danaǃganni ǃnâ ǂgaeǂgui tsî “Nēti i ge gao-aob xa ra ǃgôasiba māhe khoeb hoab ǀkha nî dīhe!” ti khoena gere ǂanǂan.
12 [12] Mordekaib ge sîsenni âb ǃoa ge oa tsîb ge Hamanna ǃnoesase danas âba taob xa ǃgū-ai hâse ǁîb oms ǃoa ge oa. 13 [13] ǁÎb ge ǁîb taras, Seres tsî ǀhōsan tsîna ǁîb ǀkha ge ī xūn hoana ge mîba. On ge ǁîna ǁîb ǃoa ge mî: “Sats ge Mordekaib ǃoagu ǁkhāsib âtsa go ǂoaǃnâ. ǁÎb ge a Jodeǁî tsîts ge ǁîba mâǃoa ǁkhā tide tsî ǁîb aiǃâ nî ǁnā, ûitsama Elob ǁîb ǀkha hâ xui-ao.”
Hamanni ge ra ǃgamhe
14 [14] Noxopan ra ǃhoa hîa kha ge gao-ommi ǂammâisakha hā tsî ǃnoesase Hamanna Esters di ǂûǁares ǃoa ge ǃgû-ū.
