Sa namma khoen ǀkhats ga ǃhoao ǃûi
1 Tā ǃgôaǃgôasa khoe-e ǁgoaǂui, ǀnîsits ǁî-i di ǀgaib ǃnâ nî ǁnā xuige. 2 Tā ǃkhū hâ khoeb ǀkha ǂkhabagu, ǁîb sa ǃoagu khoena ǁamaǃkhuni ǁkhā xuige. ǃHuniǀurib ge ǂgui khoena ge hîkākā tsî gao-aogu tsîna ge ǀhôagaoǃnâ kai. 3 Kaise ra ǃhoa khoe-i ǀkha ǂnoagus ge oli-e ǀaes ai ǁhōs ǁkhās khami ī. 4 Tā ǂūǁoa khoe-i ǀkha xoregu, ǁî-i sa aboxaga mîǁgaiǁgai ǁkhā xuige. 5 Tā ǀnai ǁoreba xu ūdawasen hâ khoe-e ǀau. Hoada a ǀhapixa ǃkhaisa ǂâis ǃnâ ūhâ. 6 Tā khoe-e kaira i hâ ǃkhais ǃaroma ǃgôaǁnâ; ǀnîn sada din tsîn ra ǁkhāti kaira xuige. 7 Tā khoe-i xare-i di ǁōb ǂama ǃgâiaǂgao, î hoada nî ǁō ǃkhaisa ǂâis ǃnâ ūhâ.
8 Gā-ai khoen ge mî hâ i xūna tā sora. ǁNāpa xuts nî ǁnaetigu tsî kai khoegats nî ǃoaba ǀgauba ǁkhāǁkhāsen xuige ǁîn di ǂkhoamîde ǁkhāǁkhāsen. 9 ǁÎn ge ǁîn ais ai ge hâ ina xu ǁkhāǁkhāsen xuige kaikhoen ra mî xūn ai ǂâisa ǂnûi. Sats ge ǁîna xu nî ǁkhāǁkhāsen ǁkhā tsîn ge ǁîna satsa nî ǁgauǃnâ, mâtits ǃereamsa ǂhâbats ga ǁaeb ǃaroma nî ūhâ ǃkhaisa.
10 Tā ǁore-ao-e ǃnāsase i nî ǁore ga ǂgaoǂgaoǃnâ. ǁÎ-i di ǁoren ge ǀaes ǃnâts ra oli-e ǂnâ tsî khau kaisen ǃkhais khami tsûsa ǁkhā. 11 Tā i ǀgapiǂâixa khoe-e ǁaiǁai tsi. ǁÎ-i ge sa ǂhunuma mîde daba tsî sa ǃoagu a sîsenū ǁkhā. 12 Tā sats ǃgâ-ai ǀgaisa khoe-e, xū-i xare-e ǀkhupi. ǁNāsats ga dī, o tā mā-oahe tsi ǃkhaisa ǃâubasen. 13 Tā khoe-i xare-i di ǀkhupimarisa sa hōǂgās xa ǃnāsase mâǂgâba. Tsîts ga ǁnāti-ī ǀkhupimarisa mâǂgâba, ots ge mā-oas ǃaroma nî ǂhomisen. 14 ǁÎb di ǂanǂansasib xa ǃaromahe hâseb nî dan xuige, tā ǁhōba ǀgoraǃgâ-aob aiǃâ sī-ū. 15 Tā ǁgauoǃnâ-i ǀkha ǃgûǁare, ǃgomsib ǀguiba nî ǃaroma xuige. ǁÎ-i ge ǂgao-i ra khami gâ xū-e nî dī tsîts ge satsa ǁî-i ǀkha nî ǁō.
16 Tā ǃhaese ra ǁaixa khoe-i ǀkha ǂnoagu tamas ka io sakho ǀguri nî ǀhao ǃkhai-i ǃoa ǃgû. ǁÎ-i ge tari-e i ra ǃgam ǃkhai-i ǀkha ǁae tama hâ tsî nî satsa hui-ao-i ǀkhai ǃkhaib ai ǁnāǂam. 17 Tā gâre khoe-i xats nî ǀapemāhe ǃkhaisa ǂgan. ǁÎ-i ge sats xa i ra mîbahe xū-e ǂganǃgâsib ǃnâ ūhâ tide. 18 Tā ǂganǃgâsib ǃnâ nî ūhâhese ī xū-e ǃhaokhoe-i aiǃâ dī. Tare-e i ǁî-e aiǃâb ǃoa nî hā-ū ǃkhaisats ǀū xuige. 19 Tā sa ǂâide khoe-i xare-e ǂhaiǂhaiba. ǁNāsats ga dī, ots ge ǁkhāti ǃgâiaǂgaob di ǃēs tsîna aoxū ǁkhā.
