1 Makabergu 6 - KKG20 & HRR

Antioxub Epifaneb Hakaǁîb di ǁōb

1 Gao-aob Antioxub Hakaǁîb ge Mesopotamiab ǃnâ-ūb ǃkharugaru, hîa Persiab ǃnâ ǂnôa ǃās, Elimais hîa ǀhaiǀuri tsî ǃhuniǀuri ǃkhūsiba ūhâs xa ge ǁnâu. 2 Tempeli ge kaise ge ǃkhū hâ i. ǁÎb ge ǃhuniǀuri ǁkhau-ūdadi, ǁkhaiǁkhausaran tsî ǁâtanin, Masedoniab gao-aob Filipub di ôab Aleksanderi, Grikeǃhūba ge ǂguro ǂgaeǂgui hâ ib xa ge ǁnāpa ǁnāxūhen ǀkha ge ǀoamâ i. 3 Antioxub ge hā tsî nē ǃās ǃnâ ǁnāǂgâ tsîb ga xūna ǁkhâuǁnâ ǃkhaisa ge dītsâ, xaweb ge ǁanǂgā-aon ge tare-eb ra ǀape ǃkhaisa ǂanǃnâ bi amaga, ǃgâiǃgâ tama ge i. 4 Tsîn ge ǁîb ǃoagu torodī tsî ge mâǃoa bi. ǁÎb ge kai ǃhausens ǀkha ǂgae-oasen tsî Babilons ǃoa ge oa.

5 Sîsabe-i ge ǁîb ǃoa Persiab ǃnâ hā tsî ǁîb ge Judeab ǃnâ sîǂgā toroǂnubis ge danhe ǃkhaisa ge mîba bi. 6 Lisiab ge ǁîb di ǀgaisa toroǂnubis ǀkha, Jodeǁîn hîa ǀarosa ǁâtanin, ǀnî ǃkhamūxūn tsî dann ge toroǂnubide xun ge ǁkhâuǁnâ xūn ǀkha ge ǀgaiǀgaisen hâ ina xu ge ǃkhoeni. 7 Jodeǁîn ge “Ui-uisasib” tin ra ǂgai xū-e, Antioxub ge Jerusalems ǃnâ ǂnubi altarsa xu ge ūbē. ǁÎn ge ǁkhāti Tempela ǀnaib ge hâ i khami omǂnami tsî gao-aob di ǂhunuma ǃās Betsurs tsîna ǀgapi ǂnubiǂgoagu ǀkha ge omǂnami.

8 Nē ǃnuribab ge ǁnâu, ob ge gao-aoba burugâ tsî kaise ge ǃhuri, tsîb ge tsûaǂgaob xa ǀae hâse, ǁîb gere ǃâubasen khamin ge xūna ǃgû tama i amaga, kharob ai sī ge ǁgoe. 9 ǁÎb ge ǃoab xab ge kaise ǀgaisase ǃkhōhe xui-ao gaxuse ge ǀaesen. ǀUnis ai ǀguib ge ǁōb ra ǃkhaisa ge hōǃâ. 10 ǁÎb ge “Gao-aob di ǀHōsan” ti hâ ǂgaiǂamǀonsab ge mā hâ in hoana ǂgaiǀhao tsî ǁîn ǃoa ge mî: “ǁOm ǁoa ta ge a, tsîb ge ti ǂgaoba ǃoab tsî ǂâiǂhansens xa ǂkhabu hâ. 11 ǂGurosa ta ge nētikōse ta ge ti ǂgaeǂguis ǁaeb ǃnâ ǃgâi tsî ǀnamǀnamsa khoe i, hîa ra ti ǂama hā ǃgomsigu xa ra dîsen. 12 Xawe ta ge Jerusalems ǃnâ ta ge dī hâ i tsū xūn, Tempela xu ta ge ū ǀhaiǀuri tsî ǃhuniǀuri xapan tsî Judeab di ǁanǂgāsaben, hîa ta ge ǃaroma-i ose hîkākān xa ge ǂâi. 13 ǁNā-amaga ta ge tare-i ǃaroman nē tsū xūna tita ǀkha ra ī ǃkhaisa a ǂan tsî ta ge kai ǃoab ǀkha ǃhao ǃhūb ǃnâ ra ǁō.”

14 ǁNās khaoǃgâb ge ǁîb di ǂgomǂgomsa ǀapemā-aogu di ǀguib, Filipuba ǂgai tsî ǁîba hoaraga gaosib di ǂgaeǂgui-aose ge ǁgaumâi. 15 ǁÎb ge Filipuba krons, anaǂamsarab tsî gao-aosi ǀkhunuǂnûidas tsîna mā tsî ǁîb ôab Antioxub Koroǁîbab nî gaosis ǃaroma ǁkhāǁkhākhâi ǃkhaisa ge mîmā. 16 Gao-aob Antioxub ge ǀguikaidisi tsî hakadisikhoeseǀaǁî kurib ǃnâ ǁnāpa ge ǁō.

17 Lisiab ge gao-aob ge ǁō ǃkhaisab ge ǁnâu, o ǂkham Antioxuba gao-aose ǁîb îb di soas ǃnâ ge ǁgaumâi. ǁÎb ge Antioxuba ǂkhamsisa xu ge kaikai hâ i tsî ǁîba Eupator ti ge ǀonǂgai.

Siriaba xu hâ ǀasa ǁnāǂamdi

(2 Makabergu 13:1-262 11:22-26)

18 ǁKhā ǁaeb ǃnâ gu ge Jerusalems di ǁkhui-ommi tawa ge hâ i khākhoega Tempeli ǂnamipe Israelǁîna gere ǁkhae. Khākhoegu ge mâ ǀgau-i hoa-i ai ǁîna tsûtsûsa dītsâ tsî Jodeǁî tamana gere ǂkhâǃnâ. 19 Ob ge Judaba khākhoega xub nî ǃnora ǃkhaisa mîǁgui tsî ǁîb di khoen hoana ǂgaiǁare, în ǁkhui-omma xāǂgā. 20 Hoaraga khoen ge ǀhao tsî ǀguikaidisi tsî korodisiǁî kurib ǃnâ ǁkhui-omma ge xāǂgā tsî ǁkhuiǂgō-omgu tsî torodī-ūxūna ge kuru.

21 ǀNî khoegu nē xāǂgās ǃnâ ge hâ i gu ge eloxoresa Israelǁîn ǀkha ǀhao hâse ǃkhoeni tsî gao-aob tawa sī tsî ge mî: 22 “Mâtikō ǁaebats sada ǃgâsan ǃoagu ge dīhenats nî ǀkhaos aiǃâ nî ǃâu? 23 Sida ge sa îba ǃoaba, ǁîb ǂgaoǀkhāde dī tsî ǁîb mîmāde ra ǁnâuǀnam ǂgao. 24 Xawe tare-e i ge sida harebeba? Sada ǃgâsagu ǂûgu ge ge sada khākhoe kai. ǁÎgu ge ǃgam ǁkha gu as kōse sada khoena ǃgam tsî sada xūna ge ǃnariǀhana da. 25 Xawe sada ǀguida gu ge tsûtsû tama hâ. ǁÎgu ge ǁkhāti ǁîn ǂnamipe ǁgoe ǃhūgu tsîna ge ǁnāǂam. 26 Tsî gu ge nēsi Jerusalems ǃnâ mâ ǁkhui-omma xāǂgā tsî ǁîba gu nî ū ǃkhaisa ra ǀapeǀape. ǁÎgu ge ǁkhāti Tempeli tsî Betsurs tsîra ge omǂnami. 27 Nēsits ga ǃhaese ǁkhae tama io, o gu ge ǂgui xūna noxopa nî dī tsîts ge ǁîga ǁkhae ǁkhā tide.”

28 Gao-aob ge nēsab ge ǁnâu, o kaise ge ǁaixa. ǁÎb ge hoaraga toroǂnubis di ǃkhōdana-aogu, hātoroǃkhamaogu di danakhoegu tsî ǁîb di ǂgomǂgomsa ǀapemā-aogu tsîna ge ǂgaiǀhao. 29 ǁKhātib ge ǀkhupitoroǃkhamaoga ǀnî ǃhūgu tsî Grike ǃnāǃnuide xu ge ǃgae. 30 ǁÎb di toroǂnubis ge ǃgôab ǃnâ ǀguikaiǀoadisi ǀnūtoroǃkhamaogu, ǀgamdisiǀoadisi hātoroǃkhamaogu tsî torodīs ǃaroma ǁkhāǁkhāsa ǃnonadisiǀgamǀa ǂkhoagu tsîna ge ūhâ i. 31 Gao-aob tsî ǁîb toroǂnubis tsîn ge Idumeab ǃnâ-ū ǃkharu, Betsursa ge xāǂgā tsî ǁnāpa gaxuse ge ǃkham. ǁÎgu ge torodī-ūxūn tsî mâ-aidāga ge kuru, xawe gu ge ǁkhauba-aoga ǁkhoaǂgaoxase ǃkham tsî ǃāsa xu ǂoaxa tsî mâ-aidāga ge ǂhubiǁnâ.

32 Judab ge toroǂnubis âba ǁkhui-ommi Jerusalems tawa hâba xu ǂgae-oa tsî Betsexarias tawa hâǃkhaiba gao-aob di toroǃkhamaogu aiǃgûsa nî ǁkhaese ge dībasen. 33 Sao ra ǃnauǁgoagab ge gao-aoba ǁîb toroǃkhamaoga Betsexarias ǃoa ge ǃgû-ū, tsî gu ge ǁîga torob ǃaroma ǂhomisen tsî xâiǁnâde ge xâi. 34 ǁÎgu ge ǂkhoaga draibesap-i tsî murbaisap-e ra ǁgause torob ǃaroma ge aiǂhomi. 35 Nē ǂkhoagu ge ǀnūtoroǃkhamaogu di ǃnandi ǃnâ ge ǀgoraǂgāhe. ǀGuiǀoadisi toroǃkhamaogu, ǀuri saran tsî brons ǀgapadi ǀkha ge ǁkhaubasen hâ i gu di ǃnans hoas ge ǀgui ǂkhoaba ge māhe hâ i. Tsî mâ ǂkhoab hoab ge korokaidisi ǂoaǂamsa hātoroǃkhamaogu xa gere ǃgûǀkhāhe. 36 Nē toroǃkhamaogu ge hoaǁae ǂkhoagu ǀkha gere hâ. 37 ǂKhoagu ai gu ge ǀgaisa haiǂgō-omga, ǀō-aisa ǃgae-ū xūb ǀkha ge ǃgaemâihe hâ i. Mâ ǂgō-ommi hoab ǃnâ gu ge ǃnona ǁâtanisa khoegu, ǁnāpa xu gere ǃkhamgu tsî Indiaǁî ǂkhoaǃgapi-aob tsîna ge hâ i. 38 Lisiab ge ǃgau hâ ǃâb hātoroǃkhamaogu diba hoa ǀkhākha toroǂnubis dikha ai, khākhoena gu ga ǁnāǂam, o gu nî ǀnūtoroǃkhamaogu xa ǁkhaubahe ǁkhā ga ge hâ kai. 39 Sores di ǀkhâugu ge ǁîgu di brons tsî ǃhuniǀuri ǁkhaukhōdi ai gere ǂkhai tsî gu ge ǃhomga ǃamǀaedi khami gere ǃnâ. 40 ǀNî ǃâb gao-aob di toroǂnubis dib ge ǃnaugu ai tsî nau ǃâba ǂgāgu ai ge khoraǂuihe. ǁÎgu ge ǃgâi aiǃgûs tsî saogub ǃnâ ge hâ i. 41 Hoa khoen ge ǁâtanin tsî kai ǀgaisa toroǂnubis, hîa ǃgoaxas di ǂkhupiban ge ǁnâu, o kaise ge ǃao.

42 Judab tsî ǁîb di toroǂnubis ge torob ǀkha tsoatsoa tsî ǃkhammi ǃnâ ǃnanikaidisi toroǃkhamaogu gao-aob toroǂnubis diga ge ǃgam. 43 Eleasar Avaranni ge ǀgui ǂkhoab, nau ǂkhoagu hoagu xa kai tsî gaosi ǁkhau-ūdana ǁîb ai ūhâ ǃkhaisab ge mûo, gao-aob ǁîb ai ǃgapi hâ ti ge ǂâi. 44 Eleasari ge ǁîb khoenab nî sâu tsî ǀamo koahegomxasiba ge hōse ûib âba ge ǁguiba. 45 ǁÎb ge ǀnūtoroǃkhamaogu ǁaegu ge hâ i ǂkhoaba ǁkhoase ge ǃkhoeǂnôa. Tsîb ge amǀkhāb tsî ǁareǀkhāb ai ra garu ǃgamse, khoegu ǁaegu ge ǃkharu tsî gu ge khākhoetoro-aoga ǁîb aiǃâ, hoaǀkhāgu ai ge ǁnā-oa. 46 Tsîb ge ǂkhoab ǃnaka ǂgâ tsî ǁîba ge ǃkhāǃan, xaweb ge ǁîb ai ge ǁnā tsîb ge ǁîb tsîna ge ǁō. 47 Jodeǁîgu ge mâtis nē toroǂnubisa ǀgaisa tsîs ǁkhoaǂgaoxase ra ǃkham ǃkhaisa hōǃâ, o gu ge dabasen tsî ge ǃkhoeni.

48 Gao-aob tsî ǁîb di toroǂnubis ge aiǃgû tsî Jodeǁîn ǀkha Jerusalems tawa ǃkham tsî hoaraga Judeab tsî Jerusalems tsîna ge xāǂgā. 49 ǁÎb ge Betsurs di Jodeǁîn ega ge ǃāsa xu ǂoan ǀkha ǂkhîba ge dī. ǁÎn ge ǁnāpa i ge ǂâuna ǂû-e, ǁîn ǃaroma ǀkhai i, ǁnāb ge ǃhanagu ǃaroma sabbatkuri i xui-ao, ǃāsa ge ǁkhauba ǁoa i. 50 Gao-aob ge Betsursa ūbasen tsî toroǃkhamaoga, ǁîsa nî ǃûise ǁnāpa ge hâ kai. 51 ǁÎb ge Tempela ǂgui tsēde ge ǁgoeǂnami. Tsîb ge ǂgō-omgu, torodī-ūxūn, ǀaes tsî ǀuidi tsî ǂāga ra ǂnoadi tsî slengerdi tsîna ge kuru. 52 ǁKhaubasenaogu tsîn ge ǁkhāti khākhoegu dide nî mâǃoase, torob di ǃkhamūxūna ge kuru. Tsîb ge ǁnā ǀgaub ai ge toroba ǂomxa ǁaeba ge aiǃgû. 53 ǁNāb ge sabbatkuri i, tsîn ge Jodeǁî tamana xu ge ǃkhoeni tsî Judeab ǃnâ ǃhūsabese ge hâ i khoena, sâuhe ge hâ i ǂûn hoana hapu hâ i xui-ao i ge Tempeli di sâuǃnâǃkhaib ǃnâ ǂû-i xare-e ge ǀkhai i. 54 ǂÛn di ǃnubusib ge ge kai ǃgomsi-i tsîn ge ǂgui khoena ǁîn di ǂhunuma omdi ǃoa ge ǃkhoeniǀgora tsî gu ge ǀoro khoegu ǀguiga Tempeli ǃnâ ge hâǃgau.

55 Lisiab ge Filipub, hîa ge ǁōb nîs aiǃâ gao-aob Antioxub xa ǁîb ôabab nî gaosis ǃaroma ǁkhāǁkhākhâi ga ǁgaumâiheb 56 ge Persiab tsî Mediab tsîkha xu oahā ǃkhaisa ge ǁnâu. Filipub ge gao-aob di toroǂnubis ǀkha oahā tsî ǂhanubab nî ǃkhōǃkhuni ǃkhaisa gere ǀape. Lisiab ge nē ǂhôasab ge ǁnâu, 57 o ǃhaese bēb nîga ge ǂhomisen. ǁÎb ge ǂkham gao-aob, ǂgaeǂgui-aogu tsî khoegu tsîn ǃoa ge mî: “Tsēkorobe ge ge aiǃâb ǃoa ra ǂkhabu, ǂûxūn ge ra ǀoro tsî sige xāǂgā hâ ǃkhaib ge kaise a ǀgaisa. ǁNās ǀgui tamas, ǂhanub di xūn hîa ra ǁgâiba mān tsîn ai ge ge ǂâisa nî ǂnûi. 58 ǁNā-amaga a ge mîǀgui tsî nē khoegu tsî hoaraga ǁaes ǀkha ǂkhîba dī. 59 Sage ge ǁîna, ǁîn di ǂhanugu tsî ǁnaetigu ǃoan, ǀnain gere ûi khami nî ûi ǃkhaisa nî mā-am. Nē ǃgomsigu hoagu ge ǁîna ǁgoaǂui tsî da ge ǁîn di ǂhanugu tsî ǁnaetiga khôaǁnâ, o ge tsoatsoa.”

60 Nē ǂgans ge gao-aob tsî ǃkhōdana-aoga ge ǃgâiba. Lisiab ge Jodeǁîna ǂkhîba ge ǁgui-aiǃâ tsîn ge ge ūǃoa. 61 Gao-aob tsî ǃkhōdana-aogu ge ǁîga nūs ǀkha ge mîmâiba, on ge Jodeǁîna ǁîn di ǀgaisa hâǃkhaiba xu ge ǂoaxa. 62 Xaweb ge gao-aoba Sionǃhommi ai ǂoa tsîb ge nē ǃkhaib mâtikō ǀgaisase ǂnubisa ǃkhaisa a mûo, mîmâis âba ge khôa tsî ǂnubiǂgoagu Tempeli ǂnamipe hâgu nî khôaǁnâhe ǃkhaisa ge mîmā. 63 ǁNās khaoǃgâb ge ǁnāpa xu ǃnoesase ǂoa tsî Antioxs ǃoa ge oa. ǁNāpab ge ǁîba Filipuba ǃās di ǂgaeǂguis ǃnâ ge hō, xaweb ge ǁîb ǃoagu ǃkham tsî ǃāsa ǀgaib ǃnâ ge ū.