Egipteb ǃnâ hâ Jodeǁîn ǃoa hâ sîǂkhanis
1 “Jerusalems tsî Judeab tsîra di Jodeǁîna xu Egipteb ǃnâ hâ ǃgâsan ǃoa, kai tawedes.
2 “Ab Eloba ǃgâiba du tsî ǁîb di ǂgomǂgomsa ǃoaba-aogu Abrahammi, Isaki tsî Jakob tsîgu ǀkhab ge dī ǃgaeǀhaosa ǃkhōǀgaipe. 3 Ab mâ-i sadu di-i hoa-e ǁîba i nî ǀgoreǀî-ū turab ǀkha ǀoaǀoa, î du ǁîb di ǂâisa ǀaexase ǂgaob tsî ǀoms ǀkha dī. 4 Ab sado īǁkhāsib ǁîb di ǂhanub tsî mîmāde ǁnâuǃās dib tsî ǂkhîb tsîna mā, 5 sadu ǀgorede ǃeream, ǁoren âdo ǀûba tsî tsūǀkhāb di ǁaeb ǃnâ tā aoxū du. 6 Sida ge nēsi sado Judeab ǃnâ ra ǀgoreba.
7 “ǀGuikaidisi tsî ǃnanidisikhoeseǀaǁî kurib, Demetriub ǀGamǁîb ge Siriab di gao-ao ib, ǃnâ da ge ǃgôaǃgondi tsî ǃgomsigu sida ǂama ge nē kurigu ǃnâ hāgu, Jasonni ge ǃAnu ǃHūb ǃnâ ǂgaeǂgui-aoga mâǃoa gu xa ge xoaba du. 8 Jasonni tsî ǁîb khoegu tsîn ge Tempeli dao-amde ǂhubi tsî ǀhapio khoena ge ǃgam. O da ge ǃKhūb ǃoa ge ǀgore tsîb ge ge ǁnâu-am da. Ûitsama xūn tsî ǃhoron tsîna ǁguiba, ǃamǀaede Tempeli ǃnâ ǃam tsî da ge ǃanu perega ge ǁguiǂui. 9 ǁNā-amaga da ge sadu tsîn nî Kislefǁkhâb ǃnâ ǁHaodi ǁÂudīb khami ī ǁâudība tsēdi ǃkhaisa ra ǂgan du.
Aristobulub ǃoa hâ sîǂkhanis
Gao-aob Antioxub di ǁōb
10 “Jerusalems tsî Judeab di Jodeǁîn, Jodeǁîn di ǀapemāǃnans tsî Judab tsîda xu, Aristobulub pristergu ôananôaguba xu hâb, gao-aob Ptolemib di ǁgauǃnâ-aob tsî Egipteb di Jodeǁîn tsîna ǃoa hâ tawedes, ǃgâi ǂurusib ǀguiba da ra ǁkhoreba du.
11 “Sida ge Eloba kai ǃaoroxasiga xub ge sâu da tsî gao-aob ǃoagu sida mâxōǀkhā 12 tsî ǁnā khākhoena sida ǃanu ǃāsa xu doeǁgaǂui xui-ao ra gangan. 13 Gao-aob Antioxub ge Persiab ǃnâ danhe ǁoa khami ī toroǂnubis ǀkha ge hā, xawe ǁgôa-elos Naneas di tempeli ǃnâ pristergu di ǀhôagaosib ǃaroma ǃâdi ǃnâ ge ǃgaoǃāhe. 14 Gao-aob Antioxub ge ǁîb di ǂgomǂgomsa ǀapemā-aogu ǀkha, elos ǀkha ǃgame tsîb nî ǃgameb ǀkhaexūn ase ǃgomǀgausa tempelǁuiba ūga tempeli ǃoa ge ǃgû. 15 Pristergu ge ǁuiba ǁguiǂuis khaoǃgâ gu ge ǁîb tsî ǀnîgu ǁîb khoegu diga tempeli ǃnâ ǁuiba nî ǀhaoǀhaose ge ǂgâ. Xawe gu ge pristerga dao-amde ǁîb ǃgâb ai ǂganam 16 tsî gu ge ǂganǃgâsa dao-ams, ǂganǃgâsase ǂnôa i dao-amsa xu ǁîb tsî ǁîb khoegu tsîna ge ǀuiǁhom. ǁNās khaoǃgâ gu ge khoegu di sorode ǃgaoǃā tsî danade ǃauga ge mâ i khoen ǁga gere ao. 17 Eloba da ge ǁnā ǂkhabadī-aogab ge ǁkhara ǃkhais ǃaroma ra koa.
ǀAes ge Nehemiab di ǁguibasa ra ǂhubiǂui
18 “ǀGamdisikoroǀaǁî tsēs Kislefi dis ai da ǃAnusib ǁÂudība, ǁHaodi ǁÂudība da ra ǁâudī khami nî ǁâudī. Nēsa sado ǂâiǂâiǃnâs a ǂhâǂhâsa, î du sado tsîna ǁâudī, ti da ge ra ǂâi. Nē ǀgaub ai du ge Nehemiab ge Tempeli tsî altars tsîrab ge ǁkhawa ǂnubikhâi tsî ǁguibade dī, os ge ǀaesa hā ǀgauba nî ǂâiǂâisen. 19 Sida di aboxagu ge Persiab ǃoa ǃkhōsabese gere sîbēhe ǁaeb ǃnâ gu ge ǀnî eloǃaoǃgâxa pristerga ǀaesa altarsa xu ū tsî ǂganǃgâsib ǃnâ ǂnâsa tsaus ǃnâ ge sâu. ǁÎgu ge ǀaesa khoe-i xare-i xas tātsē hōhe tide kō ǃgâise ge sâu. 20 ǂGui kurigu khaoǃgâ, Eloba i ge ǃgâiba, ob ge Persiab di gao-aoba Nehemiaba Jerusalems ǃoa ge sî-oa tsîb ge Nehemiaba ǁnā pristergu di ôananôaguba ǁnā ǀaesan nî ôa ǃkhaisa ge mîba. ǁÎn ge ǀaesan hō tama, xawen ge âu oli-i khami i xū-e hō, ti sige ge mîba. Ob ge Nehemiaba an ǀnî-e ǃkhākhâi tsî ǁîb ǃoa hā-ū ti ge mî. 21 ǁGuibahe nîse ī xūn hoan ge altars ai ǁguitoahe, ob ge ǀaen tsî ǁguibahe nîse i xūn ai gu nî oli-e ǂnâ ǃkhaisa pristerga ge mîmā. 22 ǁNās ge dītoahes khaoǃgâ ǁaero-e ǃkharu tsîs ge soresa ǃâudi ǃgâba xu ǂoaxa tsî altars ai ge ǁgoe i xūn hoana ge ǂhubi. Hoaraga khoen ge burugâ hâse nē ǃkhaisa gere ǃgapaǀî. 23 Tsî ǀaes ra ǁguibasa ǂhubiǂui hîab ge ǀgapipristeri Jonatanna khoen ǀkha ǀgores ǃnâ ge ǂgâ tsîb ge Nehemiab tsî hoaraga khoena ǁnās ai ge ǃeream.
Nehemiab di ǀgores
24 “Nehemiab di ǀgores ge nēti ge hâ i: ‘ǃKhū Elo hoa xūn di Kuru-aotse, sats ge buruxa, ǀgaisa, ǀkhomxa tsî a ǂhanu-ai. Sats ǀguits ge gao-ao tsî a ǃgâi. 25 Sats ǀguits ge tsauraǃnâ tsî a ǂhanu-ai. Sats ge hoaǀgaixa tsî a ǀamo tsî hoaǁae Israelǁaesa tsūǀkhāgu xu a huiǂui ǁkhā. Sats ge sida aboxana sa ǀō-aisa ǁaese ge ǁhûiǂuibasen. 26 Nē ǁguibas Israelǁaes ǃaroma da ra ǁguibasa ūǃoaba da re. Sa ǁhûiǂuisabena sâu, î ǃanuǃanu da re. 27 ǁNān hîa khobose ǃhao ǃhūb ǃnâ hâna ǃnora kai, î sida khoen hîa ǀgaruǀgaruhe hâna ǀhaoǀhao. Sida khoen tsūse sîsenūhe tsî ra ǃharaxūhena ǀkhomxa, î di hoaraga ǁaede sats a sida Elo ǃkhaisa ǂan. 28 ǀKhomoǃnâ tsî ǁîǂâixa khoen hîa gere sida ǁgâiǀāna ǁkhara, 29 î ǁnās khaoǃgâ sa khoena sa ǃanu ǃhūb ǃnâ Moseb ge mî khami ǃgaoǃgao.’
Persiab di kaesari ge ǀaes xa ra ǁnâu
30 “ǁNās khaoǃgâ gu ge pristerga ǁnaetsanade ge ǁnae. 31 ǁGuibas ge ǂhubiǂuis khaoǃgâb ge Nehemiaba ǃgau ge oli-i nî ǀnî kai ǀuidi ai ǂnâhe ǃkhaisa ge mîmā. 32 ǁNā ǁaeb ǂûb aib ge ǀaeǁhabuba ge khâi, xaweb ge altars ai ge hâ i ǀaesa xu ge hā ǁhabub xa ge ǀarihe.
33 “Nē ǂhôas ge hoa ǀkhāgu ǃoa ge khoraǂuisen. Pristergu ge ǃhao ǃhūb ǃoa gu nî sîbēhes aiǃâ, altarǀaesa sâuhe hâ i ǃkhaib ǃnâ i ge oli-e hōhe ǃkhaisab ge Persiab di gao-aoba ge ǁnâu. ǁKhātib ge Nehemiab tsî ǁîb di ǀhōsagu tsîn ge nē oli-e ǁguibasa altars ai ǂhubis ǃaroma sîsenū ti ge ǁnâu. 34 Gao-aob ge nē ǃkhaisa ôaǃnâ, tsîb ge amas asa ǂanǂuio, ǁnā ǃkhaiba ǁgâuǂnami tsî ǃanu ǃkhaib ase dī. 35 Nēs ge ǁîba ǀgaisa hōǂgās ase ge iba tsîb ge nē mari-i ǀkha ǁîba ǃgâiba khoe-i hoa-e ǀkhaexūna gere ǁamaba. 36 Nehemiab tsî ǁîb ǀhōsagu ge nē xū-e neftar ti ge ǂgai. Nē mîs ge ‘ǃanuǃanusens’ ti ra ǂâibasen, xawe ǂgui khoen ge nē xū-e ‘nafta’ ti ra ǂgai.
