ǂHanu-ain di ǃgoaxaǁaeb
1 Xawe ǂhanu-ai khoen ge Elob xa ra sâuhe, tsî tātsē khoe-i xa tsûtsûhe tide. 2 ǂHanu-ai khoen ra ǁō, ob go ǁîn di ǁōba ǁkhōǁkhōsa tsūǃgâ i tits ga ǂâi, ots ge ra ǂâisā. 3 ǁÎn ge sida xu ra ǃgû, xawes ge ǁnāsa tsūǃgâxa ǃkhai tama hâ. ǁNās ǀgui tamas, ǂhanu-ain ge ǂkhîb ǃnâ hâ. 4 ǁKharaban ge tsâ khami i ge mûsen ǁkhā, xawen ge ǁaposa ǃâubasens ǁōǁoasib disa ūhâ. 5-6 ǁÎn di ǀkhaegu hîan nî ǃkhōǃoagu ǀkha gu ga ǀgopeǀnōhe, o gu ge ǁîn di tsâga ge supu i. Elob ge ǁîna ǃhuniǀurib khami ǁganoms ǃnâ ǃâitsâ tsî ǁîb ǀkha hâsan anu ǃkhaisa ge hō. ǁÎnab ge ǁîba ra ǀgoreǀî khoen ra altars ai ǁguiba ǁguibadeb ra ǃkhōǃoa khami ge ǃkhōǃoa.
7 Elob ga ǂhanu-aina nî mādawa-amse hā, on ge nē ǂhanu-aina ǃnâihe hâ ǂnomn khami nî ǁhabutsoatsoa, tsî ǀaenanib khami ǃhoroǀgâba nî ǂhubi. 8 ǁÎn ge ǃhaodi tsî ǁaedi tsîna nî gaoǂam, tsîb ge ǃKhūba ǀamose nî ǁîn di Gao-ao. 9 ǁNān, Eloba ǂgomǃgâ tsî ge ǁîba ǂgomǂgomsase hâba in ge ǁîb daoga nî ǁnâuǃā. ǁÎn ge ǁîb ǀkha ǁîb di ǀnammi ǃnâ nî ûi, ǁîb ǃgâi tsî a ǀkhomxaǃnâ ǁhûiǂuib ge khoen ǃoa xui-ao.
ǂKhaba khoen di ǀams
10 Eloxoresan ge ǁîn di ǂkhaba ǂâidi ǃaroma nî ǁkharahe, Elob ǃoagu khâikhâisen tsîn ge ǂhanu xūna ǃharaxū amaga. 11 Gā-aisib kas, ǁkhāǁkhās kas hoasa ga ǃharaxū khoeb ge ǃgâiǃgâoǃnâ ûiba nî ūhâ. ǁÎb ge ǁî-i aib nî ǃâubasen xū-i xare-e ūhâ tama hâ. ǁÎb di sîsengu ge a harebeoǃnâ tsîb ge tātsē amabe xū-i tsîna amǁnâ tide. 12 ǃGameb ka taras ge ǃereamoǃnâse nî tanisen tsîn ge ǀgôan âba nî ǂkhabadī-ao kai. 13 ǁÎb di hoaraga ôananôagub ge nî ǀâxarexūhe.
Îǂhôasib di ǂhâǂhâsasib
ǀGoraǃgâtsēs aib ge Eloba ǁnâ khoes, ǀgôa-e ge hō ǁoa isa, ǃgamekhôas ǃnâs ga ǀhapixa tama io nî mādawa-am, tsîs ge ǀkhaehesa khoese nî ī. 14 ǁNā tsēs aib ge ǀgôa-i xare-e ge kuru ǁoa i khoeb tsîna, ǂhanubab ge ǁnâuǀnam hâ i tsî ǃKhūb ǃoagu ǂkhabadī tama hâ i xui-ao ǃgâiba nî ǃkhōǃoa. ǂGomǂgomsasib âb ǃaromab ge ǀgôa-i ǃgâ-ai ǀō-aisa xū-e nî mādawa-amhe: Hâǃkhai-e ǃKhūb di Tempeli ǃnâ. 15 ǂHanu-ai dīgu ge ǃgâi ǂûna ra tani hais khami ī. Gā-aisib ge ûitsama ǃnomab, hoaǁaen ǀasa ǁharena ǁîba xu ǁhai ǁkhāb khami ī.
16 Xawe ǃgamekhôas tamas ka io mā-amsa tama ǃgaeǁaresa xu ga ǃnae ǀgôan ge ǃoega nî ǁō. 17 Gaxusen ga ûi xawen ge khoena ǁîn xa harebeoǃnân a ti nî ǂâi. ǁÎn di kairasib ǃnâs tsînan ge ǃgôasi-e māhe tide 18 tsî ǂkhamsen ga ǁō, xawen ge ǀGoraǃgâtsēs ai ǃâubasen-i tamas ka io ǁkhaeǂgao-i tsîna ūhâ tide. 19 Mā-amsa tama ǃgaeǁaresa xu ǃnae hâ ǀgôan ge ǀams ai ǃgomma nî tsâ.
