Tobiti ge Tobiaba ra ǀapemā
1 ǁKhā tsēs aib ge Tobita, Rages Mediab ǃnâ ǁgoes tawab ge Gabaeli tawa ǁnāxū mari-e ge ǂâihō. 2 Ob ge ǁîb ǃnâ ge ǂâi: “ǃKhūba ta go nēsi ǁō ta nî ǃkhaisa ǂgan, o ta ge ti ôab Tobiaba nî ǂgai tsî ǁnā mari-i xa nî mîba.”
3-4 Tobiti ge Tobiaba ǂgai tsî ge mî: “Ti ôatse, tita ga ǁō, o ǃamku ǁkhōsa dība te re. Tsî titats ga ǁkhōs khaoǃgâ sa îsa ǃgôasiba mā re. Ûis hâs kōse ǁîsa ǃkhōǂhomi, î ǁōs kao ti xōǀkhā ǁkhō si re. ǂÂis ǃnâ ūhâ, ǁîs ge sats ǃhūbaib ai nî hāga, ǂgui ǃgomgu ǃnâ ge ǃkharu. ǁNā ǃkhais ǃaroma dītsâ, î ǁîsa ǂkhîǂkhî, î tā ǁîsa nî ǂkhîoǃnâ kai xū-i xare-e dī.
5 “Sa ûitsēdi hoade ǃKhūb, sada Eloba ǂâis ǃnâ ūhâ. Tā ǂanapega ǁore tamas ka io ǁîb mîmāde ǁnâuǀnamoǃnâ. Hoaǁae ǂhanuna dī, î tā ǂkhaba xū-i ǃnâ amǃnâxa. 6 ǂHauǃnâ ûiba ûi, ots ge dīts ra xūn hoan ǃnâ nî ǃgâiǃgâ.
7 “Khoen ga Eloba ǂgomǂgomsase ǁnâuǀnam, xawe a ǀgâsa, ots ge māǂgaoxase ǁîna nî mā. ǀGâsan di ǂhâsigats ga kō-īǀkhā, ob ge Elob tsîna ǁkhāti sa ǂhâsiga nî kō-īǀkhā. 8 ǁKhāts a ǀgaub hoab ai māde mā re. ǂGuisets ga ūhâo, ǂguise mā. ǀOrosets ga ūhâ xawe xūro-e mā. Māde māsa tā îganǀgē. 9 ǀGâsanats ga hui, ots ge ega ǂhâsib ǃnâts ga hâ, o naun xa nî huihe. 10-11 ǀGâsana xūna mās ge ǁōb di ǃkhae ǃhūbaib ǃnâ ǂgâsa xu nî sâu tsi. ǀGâsana ǃkhōǂhomis ge a ǃgâi ǁguibaǃnôa, Hoan xa ǀGapi Eloba ǃgâibasa.
12 “Ti ôatse, ǂanbasen î tā ǀai-aodi ǀkha ǁgoe. Hoan ǃgâ-ai sada ǃhaos di khoesa ǃgame, sada a kēbo-aogu di suri xuige. Tā sada ǃhaos di tama khoesa ǃgame. ǂÂis ǃnâ ūhâ, sada di aibekam aboxagu Noaxi, Abrahammi, Isaki tsî Jakob tsîgu ge ǀaokhoedi ǀkha ǃgame ǃkhaisa. Elob ge ǁîga ǀgôan ǀkha ge ǀkhae tsîb ge ǁîn suriba Israelǁîǃhūba nî ǀumi. 13 Ti ôatse, sa ǂhunuma ǀaokhoena ǀnam. Tā kaise ǂnīsase tsâ tsî ǁîdi ǀguis ǀkha ǃgames ǃaromats a ama-ai ti ǂâi. ǁNāti ī ǂnīsasib ge kai ǁgaoǁgaosib tsî hîkākās, sa ǂhunuma ûib dis ǃoa ra ǂgaeǂgui tsi, ǀopesasib khoen kaise ǀgâ tsî nî ǃâ ǃkhaisa ra ǃaromas ǁkhās khami.
14 “Sa sîsenaona tsēs hoasa matare, î tā mataresa nau tsēs kōse mâiǂui. Nē ǀgaub ai Eloba ǃgôa, ob ge ǁîba nî mādawa-am tsi. Hoaǁae ǃgâise tanisen re. 15 Sats ra dī-ūhe ǂgao khami nau khoe-i tsîna dī-ū re.
“Tā ǀhorots nîs kōse ǃnāsa ǂauxûiba ā, îs āsa tā ǁnaetib ase ī.
16 “ǃÂsana ǂû-e mā, î ǁnān hîa a ǀōǀkhāna ana. ǂHâbasa-i as xats ga ǃnāsase ūhâo, māǂgaoxase mā tsî ǁnāsa ǃgâiaǂgaob ǀkha dī.
17 “ǂHanu-ain di ǀgui-i ga ǁō, o ǀaokhoena ǂû-e ǂhomiba, xawe ǁore-ao-i ga ǁō, o ǁnāsa tātsē tsîna tā dī.
18 “Gā-ai khoen di ǀapemāsa ū, î ǃgâi ǀapemā-e tā tātsēs tsîna ǂkhā.
19 “ǃKhūb sa Eloba hoaǁae koa; ǂgan bi, îb sa daoga ǂhanuǂhanu tsî sa ǃgangu ǂâibasendi âtsa ǃgâiǃgâ kai. ǀGui ǁaes tsîn ge ǁîs ǂûs ǃnâ ǁnâuǃāba ge ūhâ tama hâ i; xaweb ge ǃKhūba a hoa ǃgâi xūn di mā-ao, ǁîb di ǃgâiǃgâibasens ǃoa. Xuige nēsisa ti ôatse nē mîmāde ǂâis ǃnâ ūhâ, î ǁîde tā ǀuru.
20 “Ti ôatse, kai ǃgôab di mari-e ta ge Gabaeli, Gabriab ôab, Mediab ǃnâ ǂnôa ǃās Rages ǃnâ ǁan hâb tawa ǁnāxū, ǃkhaisa ta ge ra ǂanǂan tsi. 21 Nēsi khom a ǀgâsa, xawe tā ǂâiǂhansen. Eloba ǁnâuǀnam, ǁoreba ǂgōsen tsîts ga ǁîb mûǁae ǃgâina dī, ob ge sa ǀkha ǂkhî tsî nî ǃgâiǃgâ kai tsi.”
