Tobiti koatsanas
1 Ob ge Tobita ǃgâiaǂgaob xa nēti ge ǀgore:
“ǀAmose ûi hâ Eloba koa re,
ǁnāb hîa ǀamose ra ǂgaeǂguiba koa re.
2 ǁÎb ge sada ǁkhara; tsî ǁkhāti ra ǀkhomxa.
ǁÎb ge sada ǁŌhân Hâǃkhaib ǁga ra sîǁgôa,
tsî ǁkhawa ûi hân di ǃhūb ǃoa ra oahā-ū.
Sada hoada ge ǁîb di ǀgaib ǃnaka mâ.
3 “Israelǁaese, ǃhaodi ǃnâ ǁîba gangan,
ǃhūsabeseb ge sî si ǃkhaidi ai;
4 ǁnāpas tsînab ge ǁîb di kai ǀgaiba ge ǁgau.
An ûitsaman hoana sa koasa ǁnâu.
ǃKhūb ge ǀamose a sada Elo tsî ǁGû.
5 “Sa eloxoresasib ǃaromab ra ǁkhara si,
xaweb ge ǀkhomxa si tsî ǁkhawa nî oaǀkhī-ū si,
ǁaedi, ǁîdi ǃnâb ge ǀgaruǀgaru si hâ ide xu.
6 “Sa hoaraga ǂgaob tsî ǀoms ǀkha ǁîb ǃoa dabasen,
îǂhôa ǁnâuǀnamxasib ǃnâ ǁîba ûiba.
Ob ge sa ǃoa, sasab nî huise nî dabasen
tsî ǃaruǀî gaugausen tide.
Elob ge dība sina ǂâis ǃnâ ūhâ re,
î sa hoaraga ǂgaob ǀkha gangan.
ǂHanu-ai ǃKhūba koa;
ǀamo Gao-aoba ǃgôasiba mā.
“ǃHūsabese ta ǃhao ǃhūb ǃnâ ǁan hâ,
hîas tsîna ta ǃKhūba nî gangan
tsî ǁîb di kai ǀgaib xa, ǁore-aon hoana nî ǃhoaba.
‘Sadu ǁorena xu dabasen, î Eloba ǃgâibana dī!
ǀNîsib ge ǁîba ǀkhomxaǃnâ
tsî nî ǀkhomxa si.’
7 “Tita ge ti Eloba koa tsî ǁîb di kaisib ǃnâ ra ǃgâiaǂgao;
ti ûib hoaragab ge ǀHommi Gao-aoba ǃgôasiba ra mā.
8 “A-i mâ-i hoa-e ǁîb kaisib xa ǃhoa
tsî Jerusalems ǃnâ ǁîb koatsanade ǁnae.
9 “Jerusalemse, sida Elob di ǃanu ǃāse,
ǁîb ge sa khoen di ǁoren ǃaroma nî ǁkhara si,
xaweb ge ǂhanuse ra dīn hoana nî ǀkhomxa.
10 ǁNā-amaga ǃKhūba gangan, ǁîb a ǃgâi xuige.
ǀAmo Gao-aoba koa.
Sa Tempeli ge ǁkhawa nî ǂnubikhâihe
tsîn ge sa khoena ǁkhawa nî ǃgâiaǂgao.
“Ab ǃKhūba sa ǃhūsaben hoana ǃgâiaǂgao kai,
ab sa khoen, ǃgomma ra tsâna ǃkhōǂhomi,
ǁaeb nî mā-ams kōse.
11 “Jerusalemse, sa ǃnâb ge hoaraga ǃhūbaiba ǃgāsase nî ǃnâba
tsî di ge ǂgui ǁaede, ǃnūseba xu sas ǃoa nî hā.
ǁÎdi khoen ge ǃKhūb sa Eloban ǃgôasiba nî māse nî hā;
tsîn ge ǀkhaexūna ǀHommi Gao-aoba nî hā-ūba.
Sa ǃgangu ǃnâ di ge ǂgui ǃhaode dâxa koatsanade nî ǁnae,
sa ǀons ge Elob di ǁhûiǂuisa ǃāse, ǀamose nî mâǃkharu.
12 Elob ge nî ǁkhara, ǁnān sa ǃoagu ra khâin hoan,
sasa hîkākā tsî sa ǂnubiǂgoaga ra khôaǁnân hoan,
sa ǂgō-omga khôaǁnâ tsî sa omde ra ǂhubin hoana.
Xawe sasa ǀnamn hoan ge ǀamose ǀkhaehesase nî hâ.
13 “ǃGâiaǂgao re Jerusalemse, sa ǂhanu-ai khoen ǃaroma;
ǁîn ge ǃhūsabesisa xu nî ǀhaoǀhaohe
ǀamo ǃKhūban nî koase.
14 “ǀKhaehesan ge ǁnān, sasa ǀnam
tsî sa aiǃgûs ǂama ra ǃgâiaǂgaona.
ǁNān hîa sa tsâb xa nēsi ra ǃoan
ge ǀguitsē nî ǃgâiaǂgao;
sa ǃgâiaǂgaob ge ǁîna ǀamose nî dâ kai.
15 “Tita ge ǃKhūb, kai Gao-aoba ra koa;
16 Jerusalems ge ǁkhawa nî ǂnubikhâihe
tsî ǀamos kōse nî ǁîb di ǁanǃkhai.
“Jerusalemse, mâtikōse ta kha nî ǃgâiaǂgao,
ti ôananôagub ga sa ǂkhaisiba mû ǁkhā
tsî gangansa ǀHommi di Gao-aoba māo.
“Sa dao-amdi ge safirdi tsî emeraldi ǀkha nî kuruhe,
tsî sa ǂnubiǂgoagu hoaga, ǃgomǀgausa ǀuidi ǀkha.
Sa ǂgō-omgu ge ǃhuniǀurib ǀkha nî kuruhe,
tsî ǁîgu di ǀgaiǀgaiǃnâ-ūxūna, ǃūmû ǃhuniǀurib ǀkha.
17 Sa ǃgangu ge robaindi tsî ǃgomǀgausa ǀuidi ǀkha nî ǂgapahe.
18 Dâxa tsanadi, sa ǁanǂgāsaben didi ge sa dao-amde-ū nî ǀōǂoaxa
tsîn ge sa omdi hoade xu khoena nî ǂgaiǂui:
‘ǃKhūba koa re! Israelǁaes di Eloba koa re!’
“Jerusalemse, Elob ge sa khoena nî ǀkhae
tsîn ge ǁîb di ǃanu ǀonsa ǀamose nî koa.”
Nē mîdi ǀkhab ge Tobita, koatsanas âba ge ǀamǀam.
