1 tsî ǀhōsats nîs ǃās ǃnâ khākhoe kai. Tsū khoesets a ǂansas ge taosasiba ra hā-ū. Tsî nēsan ge gāxaǃnâ tsî ǂgomǃgâhe ǁoa khoena anu hâ. 2 Tā ǂkhaba turagu hîa ǀaes di ǁhabugu khami hîkākā tsi ǁkhāgu xa danhe. 3 Sats ge ǂnâsa hai-i, ǂhonagu tsî ǂû-i tsîna ūhâ tama-i khami nî ǃgau. 4 ǂKhaba turagu ge nî hîkākā tsi tsîts ge sa khākhoen xa nî âiǂuihe xūse nî i.
Khoexaǃnâsib
5 Khoen ǀkhats ga ǀgauxa tsî khoexaǃnâse ǃhoa, ots ge ǂgui ǀhōsana nî hōbasen tsîn ge khoena sats ǃoa khoexaǃnâse nî tanisen. 6 ǂGuina xu khoexaǃnâ tawedede ūǃoa, xawe ǀoadisina xu ǀgui khoe-i ǀgui-i di ǀapemāsa ū. 7 ǀHōsanats ga kurubasen, o tā ǃhaese ǁîna ǂgomǃgâ; ǁîn ra mâti sats ǃoa ǁgausen ǃkhaisa ǃgâise ǁapoǁapo. 8 ǀNî khoen ge ǁîn ǃgâib ǃoa i ra aiǃgûs kōse ǀgui nî sa ǀhōsa, xawe ǃgomsib ǃnâts ga ǂgâ, o mâxōǀkhā tsi tide. 9 ǀNî ǀhōsan ge ǁîn ǀkhats ga ǂnoagu, o nî ǃhui tsi tsî nau khoena nē ǂnoagus xa nî mîba, satsa taotaos ǃaroma. 10-11 ǀNîn ge sa tāb tawa, xūn a ǃgâis kōse nî ǂnû. ǁÎn ge sats ǀkha sa sommi khami nî hâ tsî mîmāde sa sîsenaona nî mā, xawe ǃgomsib ǃnâ mâxōǀkhā tsi tide. 12 Sa mâsib ga khao-oa, on ge sa ǃoagu nî dabasen tsîts ge ǀgui ǃkhai-i ais tsîna ǁîna hō tide.
13 Sa khākhoena xu hâbē, î sa ǀhōsana ǃûisen. 14 Îǂhôa ǀhōsa-i ge ǃnorasa sâuǃkhai-i khami ī; ǀgui-ets ga hō, ots ge ǁuiba go hō. 15 ǂGomǂgomsa ǀhōsa-i khami ǃgôaǃgôasa xū-i ge a ǀkhai. 16 Îǂhôa ǀhōsa-i ge satsa ǃgâi ǂurusib ǃnâ ra ūhâ sōǀôa-i khami ī. ǃKhūba ra ǃaoǃgân ǀguin ge ǁnāti-ī ǀhōsa-e hō ǁkhā. 17 ǃKhūba ra ǃaoǃgâ khoe-i ge ama ǀhōsasisa a hōbasen ǁkhā, ǁî-i ǁkhā i khami i ǁî-i di ǀhōsana ra sîsenū amaga.
Gā-aisiba xu ǁkhāǁkhāsen
18 Ti ôatse, ǂkhamts a hîa Gā-aisiba ǃgôaǃgâsa ǁkhāǁkhāsen, ots ge kairats ga sīo, ǁîba noxopa hō ǁkhā. 19 Gā-aisibats ga hōǂgao, ots ge ǃhanaǂgā-aob ǃgâi ǃgaos ǃaroma ǃkhāǃkhuri tsî ǃkhomma ra tsoros ǁkhās khami, ǀgaisase nî sîsen. 20 ǁNâuǀnamoǃnâ khoen ge Gā-aisib di ǂgaoǀkhādi xa kaise karosabahe tsî ǁnāpa xu ǃhaese ra ǁnāǁgôa. 21 Gā-aisib di ǂgaoǀkhādi ge ǃgommi hîats ra tani ǂgaob xa ǃnāsase a ǃgom tsî di ge ǃhaese ǀguiǀkhāb ai ra ǁguihe. 22 “Tanisens” ge tanisents nî ti ǀgui ra ǂâibasen tsî ǂgui khoen ge hâ tanisen ǁoana.
23 Ti ôatse, ǃgâ te re, î ti ǀapemāsa ū. 24 Gā-aisib di khedega sa ǃgorora tsî ǃaos ai ǃgae re. 25 Gā-aisiba sa ǃhōs ai tani, î ǁîb di ǂgaoǀkhādi xa tā ǂkhîoǃnâ. 26 Gā-aisiba sao, î sa ǂgaob hoab ǀkha ǁîb daoga ǃkhōǀgaipe. 27 ǃGû, î ǁîba sī ôa, ob ge ǁîba sats ai nî ǂhaiǂhaisen. ǁÎba ǃkhōǀgara, î tā ǁnāxū bi. 28 ǀUnis aits ge gā-aisibats ga ǃkhōǃoa, o ǂkhîba nî hō. ǁKhātits ge ǁîb xa ǃgâiaǂgaob ǀkha nî ǀoaǀoahe. 29-30 Khobosis di ǁgauǁgaudi gā-aits nîs aiǃâts ge ūhâ idi ge nēsi nî gao-aosi ǁkhāsib di ǁgauǁgau. ǁÎb di khedegu, sa ǃgorodi aits ūhâgu ge nî sâu tsi. Tsî ǃaos ai hâ jokhoes ǁîb disats ge îsa anaǂamsarab khami nî ana. 31 Sats ge Gā-aisiba ǂkhaisa krons khami nî ǀgapa.
32 Ti ôatse, ǂgaots kao, ots ge ǁkhāǁkhāsen ǁkhā. ǁNātits ga mîǁgui, ots ge gā-ai ǁkhā. 33 ǃGâsats ga ǀnam, ots ge ǁkhāǁkhāsen tsî nî gā-ai. 34 Kai aogu hâ ǃkhaib ǃoa ǃgû; ǁnāpa gā-ai khoeba hōbasen, î ǁîb ǀkha hâ. 35 ǂGomsa ūhâ khoen ga ǃhoa, o ǃgâ î mâ gā-ai mîs hîa ra mîhes hoasa ǃkhōǀgara. 36 Gā-ai khoebats ga hō, o ǃnauǁgoaga khâi, î ǁîba sari, î soa-ets ga hō ǁaeb hoaba ǁîb oms tawa sī.
37 Hoaǁae ǃKhūb di mîmāde ǁkhāǁkhāsensa ǁaeba ūhâba, î ǁîdi xa ǂâiǂâisen. ǁÎb ge ôats ra mûǂgāǀgaub tsî gā-aisib tsîkha nî mā tsi.
