Gā-aisib di koas
1 Hoa gā-aisib ge ǃKhūba xu ra hā
tsî ǀamose ǁîb ǀkha hâ.
2 Tari-e ǀnanub di ǁgamron tamas ka io huri-ammi di ǃhūba a ǃgôa ǁkhā?
Tari-e ǀamosib di tsēde a ǃgôa ǁkhā?
3 ǀHomma mâtikōseb a ǀgapi? ǃHūbaiba mâtikōseb a hara?
Huriba mâtikōseb a ǃgam? Gā-aisiba mâtikōseb a kai?
Tari-e ǁnāsa a ǂanǂui ǁkhā?
4 Gā-aisib ge xūn hoan aiǃâ ge ǂnubihe;
ǁnâuǃāb ge ǀnaisa xu ge hâ i.
6 Khoe-i xare-e Gā-aisib mâpa xu ra ǃhui ǃkhaisa ǀnai ǁgauhe i ge hâ i?
Khoe-i xare-e ǁî-i di gā-aisiba ǁnâuǃā ǁkhā i a?
8 ǁNāpab ge ǀGuib hîa gā-aib ǀguiba hâ
tsî da ge ǃaoǃgâsib ǀkha ǁîb di trons aiǃâ nî mâ.
9 ǃKhūb ǂûb ge Gā-aisiba ge kuru;
tsî ǁîb a ǃgâi ǃkhaisa ge mû,
tsîb ge kurub ge xū-i hoa-e Gā-aisib ǀkha ge ǀoaǀoa.
10 ǁÎb ge khoe-i hoa-e ǁîb di ǀkhommi ǃoa Gā-aisiba ge mā,
xawe ǁnān ǁîba ǀnamnab ge ǃnāǂamsa ǀkhaeb Gā-aisib diba ge mā.
11 ǃKhūbats ga ǃaoǃgâ, ob ge ǃgôasib tsî ǂnīsasib tsîna nî sa;
sats ge dâb tsî ǃgâiaǂgaob tsîkha nî māhe.
12 ǃKhūbats ga ǃaoǃgâ, ob ge ǂgaob âtsa nî ǃgâiaǂgao;
sats ge gaxu tsî dâxa ûiba nî māhe.
13 ǃKhūbats ga ǃaoǃgâ, ots ge ǃgâiǃgâxa ǁōba nî ǁō
tsîn ge khoena ǁōtsēs âts ai sats xa ǃgâise nî ǃhoa.
14 ǃKhūba ǃaoǃgâs ge ǂguro dāǃharos Gā-aisib ǃoa hâsa.
Gā-aisib ge ǂgomǂgomsanna ǁgûsi ǁhās ǃnân hâ hîa ge māhe.
15 Gā-aisib ge aibekam ǁaeba xu sada ǀkha hâ
tsî hā nî surigu ge ǁîb ai nî mûmâinǃgâ.
16 ǃKhūba ǃaoǃgâs ge dīǀoaǀoasa Gā-aisiba;
tsîb ge ǁîb di ǂûn ǀkha ǁîna ǀoasase ra ǁâǁâ
17 tsî ǁîn di hoaraga omdi tsî sâuǃnâǃkhaiga
ǂgaogu ra tura xūn hoan ǀkha ra ǀoaǀoa.
18 ǃKhūba ǃaoǃgâs ge Gā-aisib di ǃkhās
hîa ǂkhîb tsî ǃgâi ǂurusib ǀkha ra ǁharesa.
19 Gā-aisib ge ǂans tsî ǁnâuǃāb tsîna ǀnanub khami ra sî
tsî ǁnān hîa ra ǃkhōǃoan di ǃgôasiba ra ǀaroǃnâ.
20 ǃKhūba ǃaoǃgâs ge a Gā-aisib di ǃnoma;
ǁîb di ǂhonagu ge a gaxu ûi.
ǁKhaesens
22 ǃAroma-i ose ǁaixas ge ǂhanu tama hâ; ǁnās satsa a hîkākā ǁkhā xui-ao. 23 ǃÂu, î ǂhanu ǁaeb nî hās kōse ǃnūǃnâxa, egats ge ǁnāsats ge dī ǃkhais xa nî ǃgâiaǂgao. 24 ǃNō, ǂhanu ǁaeb ǃhoats nîb nî hās kōse. Sa ǃgâi ǂūxasib ǃaromats ge ǂanǂansasiba nî ǃkhōǃoa.
Gā-aisib tsî Eloba ǃaoǃgâs
25 Gā-aisib di ǁuiǂgaes ǃnân ge gā-ai mîxūna hâ, xawe ǁore-aon ge ǁnān Elob di ǂhanub ǃoa ra ûina ra ǃharaxū. 26 Gā-ai ǂgaots kao, ǃKhūb di mîmāde ǃkhōǀgaipe, îb ǁîba Gā-aisiba ǃnāǂamsasib ǃnâ mā tsi. 27 ǃKhūba ǃaoǃgâs ge a Gā-aisi tsî a ǁkhāǁkhāsen. ǃKhūb ge îǂhôasib tsî ǃgamǃgamsens xa ra ǂkhîǂkhîhe. 28 Sa ǂgoms di sîsenǀgaub ǃnâ ǂgomǂgomsa re. ǃKhūbats ga ǀgoreǀîo, sa hoaraga ǂgaob ǀkha ǁnāsa dī. 29 Mîts ra xūna ǃûisen, î tā ǀgamaixa. 30 Tā ǀgapiǂâixa, ǀnîsits nî ǁnā tsî tao xuige. ǃKhūb ge sa ǂganǃgâsiga nî ǂhaiǂhai tsî sinagogeb ǃnâ hân hoan aiǃâ nî ǃgamǃgam tsi, sats ge ǁnāpa ǃKhūba ǃaoǃgâba ūhâba tamase, xawe ǀgamaixase hā xui-ao.
