1 [1] Tsî kha ge ǁnāti gao-aob tsî Hamanni tsîkha gao-aos ǀkha 2 [2] ǀgamǁî ǃnāsa sī nî ǂûse ge ǃgû. ǂAuxûiba ra āseb ge gao-aoba ǁkhawa ge mî: “Gao-aos Esterse, tare-es ǂhâba hâ? Mîba te re, os ge ǁî-e nî hō; ǃkhare ǃâb ti gaosib dib ka xawes tsîna ta ge nî mā si.”
3 [3] Os ge ge ǃeream: “ǃGôahesatse nēs ga ǃgâiba tsio, o ta ge ǃgamǃgamsens ǀkha ra ǂgan tsi, tita tsî ti khoen di ûib nî ti ǂgans ai sâuhe ǃkhaisa. 4 [4] Tita tsî ti khoen tsîda ge ǀnai hîkākāhes, ǃgamhes tsî khobosis ǃnâ ge ǁamaxūhe. Tita ge ǃhoahe i ra hîa sida hoada, ǀgôan tsîna ǃgôaǂgā hâse hîkākāhe tsî nî khobodīhe ǃkhaisa ge ǁnâu. Sida ǃoagu a khākhoe khoeb gao-aosi ǁnâuǃgâǃkhaib di ǃharos ǃnâ nî hâ ǃkhais ge ǂhanu tama hâ.”
5 [5] Ob ge Artaxerxeba “Tari-e ǁnāti ī xū-e ra dī ǂgao?” ti gao-aos Estersa ge dî.
6 [6] Os ge Estersa “Sida khākhoeb ge nē ǂkhaba khoeb Hamanna!” ti ge ǃeream.
Hamanni ge ǃaob ǀkha gao-aob tsî gao-aos hâra ǃoa ge kō. 7 [7] Gao-aob ge tāb tawab ge ǂnôa ipa xu khâi tsî gao-ommi di ǃhanab ǁga ge ǂoa. Hamanni ge ǁkhō mâsib ǃnâb hâ ǃkhaisa mûǂan tsî gao-aos tawa ge ǀkhomatsoatsoa. 8 [8] ǁÎb gao-aos ge ǁgoe-ai i sâ-aikharob ai aoǁguisen tsî ǀkhomheb nîse ra ǀkhoma, hîab ge gao-aoba ǃhanaba xu ge ǂgâxa. Nēsab ge mû, ob ge gao-aoba “Ti tarasats ti ǂhunuma gao-ommi ǃnâ ra ǀgaiǃkhō ǂgao?” ti ge ǂgaiǂui.
Nēsab ge ǁnâu, ob ge Hamanna ǃan hâse ge dabasen. 9 [9] Ob ge ǂammâisakha, gao-aob ǂhunuma ǃoaba-aokha di ǀguib, Bougatan ti ǀon hâba ge mî: “ǁNātikōse ī tsîb ge Hamanna ǁîb oms tawa ǂgāhaib, ǀgamdisiǀgamǀa meterga a ǀgapiba, Mordekaib hîa ge gao-aoba ǀapeǀhaos xa a ǂan kaibab nî ǂgāmâise ge kuru.”
“Hamanna ǁnā ǂgāhaib ai ǂgāmâi” tib ge gao-aoba ge mîmā.
10 [10] ǁNātib ge Hamanna Mordekaib ǃaromab ge kurub ǂgāhaib ai ge ǂgāmâihe. ǁNās khaoǃgâ ǀguib ge gao-aob ǁaiba ge ǁgôaxa.
