Esters ge ra gao-ao kai
1 [1] Egab ge gao-aob di ǁaiba ge ǁgôaxa. ǁÎb ge ǃaruǀîb ge Astins di ǀonsa ǂgai tama hâ i, xawe mâtib ge ǁîsa ǀgoraǃgâ ǃkhais ǀguisa gere ǂâiǂâisen. 2 [2] ǀNîgu, gao-aob ǀapemā-aogu digu ge ge mî: “Tare-i ǃaromats îsa oaxaedi, ǃgâi ǂūga ūhâde hōs ǃaroma ôaǃnâde dī tama hâ? 3 [3] Mâ ǀkharib gaosib dib hoab ǃnâts ge ǂammâisaga ǁgaumâi ǁkhā, î gu îsa oaxaede sa hâǃkhaib, ǁîdi nî hâǃnâse ib ǃoa Susas ǃnâ hā-ū. ǁÎde Hegaib, ǂammâisab, sa tarekhoede ra mûǂammi di kōǃgâs ǃnaka hâ kai, î di ǁîde anu-anusenxūn tsî ǂhâba di hâ xūn hoana māhe. 4 [4] ǁNās khaoǃgâ sats ǁîs xa ǃgâibahe ǂkham khoesa Astins di soas ǃnâ ǁhûi, î ǁîsa gao-aose mâi.”
Gao-aob ge nē ǀapes xa ǃgâibahe tsî ǁnāti ge dī.
5 [5] Susas ǃnâb ge Mordekai ti ge ǀon hâ Jodeǁîb, Jairi ôab, Benjaminni ǃhaos tsî Kisi tsî Simeib hâkha suriba xu hâba ge hâ i. 6 [6] ǁÎb ge Babilons gao-aob Nebukadnesari xa ge Jerusalemsa xu ūǃgûhe ǃkhōsaben ǁaegu ge hâ i. 7 [7] Mordekaib di kaikaiǀgôas Esters ge ǁîb omeb, Aminadab ôa ge isa. ǁÎs ge îsa ǀgôa ge isa tsîs ge ǁîs îra ge ǁōs khaoǃgâ kaiǀoas ges kōse Mordekaib xa ge kaikaihe.
8 [8] Gao-aob ge ǁîb di ǀasa mîmāsa a māǂui, o di ge ǂgui ǂkham khoedi, Esters tsîn ǁîdi ǃnâ hâde Susas ǃoa ge hā-ūhe. ǁÎs tsîn ge ǁkhāti gao-ommi ǃnâ, Hegaib ǁîdi hâǃkhaiba gere kōǃgâb di mûǂams ǃnaka ge hâ i. 9 [9] Hegaib ge Esters xa ge îxabahe tsî ǁkhāti ge ǃgâibahe. ǁÎb ge ǁae-i tsîna ǁore tamase îsasib ǃaroma ra dīhe sîsenni, sopoǂgās tsî ǀō-aisa ǂûmās dib ǀkha ge tsoatsoa. ǁÎb ge hû ǀgôadi gao-ommi dide ǁîsa nî sîsenbase ge ǁgaumâi tsîb ge ǁîs tsî ǁîs ǃkhōǂuisa sîsenaodi ǀkha ǀō-aisa hâǃkhaib ǃnâ ǃgâise gere sîsen.
10 [10] Mordekaib ǀapemās ais ge Estersa Jodeǁîs a ǃkhaisa ǂganǃgâsase ge ūhâ. 11 [11] Mordekaib ge mâ tsēs hoasa taren Esters ǀkha ra ī ǃkhaisab nî mûse, hâǃkhaib di omǂnamib aiǃâ gere ǃgûma.
12 [12] ǁNaetisase di ǂkhamkhoede îsasib ǃaroma gere dī sîsenni ge kuriba gere ǃkhōǂgā. ǁÎdi ge ǂguro ǃnani ǁkhâgu ǁaeba mire-oli-i ǀkha tsî sao ra ǃnani ǁkhâga soposenxūn tsî ǃgâihamxūn ǀkha gere sopoǂgāhe. 13 [13] ǁNās khaoǃgâs ge mâ ǂkham khoes hoasa ǁîs ǃaroma ǁgaumâihe hâ khoe-e māhe tsî ǁî-i ǀkha hâǃkhaiba xu gao-ommi ǁga ǃgû tsî gao-aob tawa gere sī-ūhe. 14 [14] ǁÎs ge tsuxuba ǁnāpa gao-ommi tawa sī tsî nau ǁgoaga ǀnî hâǃkhaib tarekhoedi dib ǃoa ūhe tsî ǁnāpa Hegaib, ǂammâisab di mûǂams ǃnaka gere ǁnāxūhe. ǁÎs ge ǁkhawa gao-aob xas ǀons âs ai ǂgaihe tama hîa ǁîb ǃoa ge ǃgû tama hâ i.
15 [15] Esters, Mordekaib ǁnaosab Aminadab ôas di ǁaeb, gao-aob tawas nî sīb ge ge ǀoa. ǁÎs ge hoa xūn Hegaib ge ǁîsa mîbana ge dī tsî i ge ǁîsa ga mû khoe-i hoa-e ǁîs xa ge ǃgâibahe i. 16 [16] Hûǁî kurib Artaxerxeb gao-aosis dib di disiǀgamǀaǁî ǁkhâb, Adari ǃnâs ge ǁîsa gao-aob tawa ge ǂgâ. 17 [17] ǁÎb ge Esters, nau oaxaedi xa ge ǃnāsase a ǃgâiba bisa ǀnam tsî gao-aosi kronsa ge ǀgapa. 18 [18] Gao-aob ge wekheb ǀgaiba ǂûǁaresa, ǁîb ǀapemā-aogu tsî ǁuiǃkhōmâi-aogu tsîgu ǃaroma dī tsî ǁnāti ǁîb tsî Esters hâra ǃgameba ge ǁâudī. ǁÎb ge ǁkhāti ǁgui-aimarina hoaraga gaosib ǃnâ ge ǀoroǀoro.
Mordekaib ge gao-aob ûiba ra sâu
19 [19] Mordekaib ge ǁnā ǁaeb ǃnâ ǀgapi ǁuiǃkhōmâi-aoǃharos ǃnâ ge ǁgaumâihe hâ i. 20 [20] Esters ge noxopa Jodeǁîs a ǃkhaisa ge ǂanǂan tama hâ i. Mordekaib ge ǁîsa ge mîba, îs tā ǀgui khoe-i tsîna ǁnāsa mîba. Tsîs ge ǂkhams ge i tsî ǁîb mûǂams ǃnaka hâ i, os gere ǁîba ǁnâuǀnam khami ge ǁnâuǀnam. ǁÎs ge Eloba ǀgoreǀî tsî Jodeǁî ǁnaetiga aoxū tamase, ǁîb mîmāde gere sîsenǂui.
21 [21] Gao-aob ge Mordekaiba ǀgapi ǃharos ǃnâ ǁgaumâi, o kha ge gao-ommi di ǂhunuma ǂammâisakha hîa ge gao-aob di danaǃûi-ao ikha ǁaixa tsî gao-aoba kha nî ǃnariǃgam ǃkhaisa ge ǀapeǀhao. 22 [22] Mordekaib ge nē ǃkhaisa ǁnâu tsî gao-aos Estersa gao-aobas nî nē ǀapeǀhaos xa mîba ǃkhaisa ge ǂgaoǀkhā. 23 [23] Gao-aob ge nē khoekha dîǃnâ tsî hoakha ge ǂgāmâi kai. Gao-aob ge Mordekaib di ǃgôasib ǃoas nî nē ǃkhaisa ǀuruhes tidese, gaosi xoaǁguigu ǃnâ xoamâihe ǃkhaisa ge mîmā.
