Jopas di Jodeǁîn ge ra ǃgamhe
1 Jodeǁîn tsî Siriaǁîn ǁaegu ge hâ i ǂkhîb di ǃgaeǀhaos ge dītoahe, ob ge Lisiaba gao-aob ǃoa ge oa tsî Jodeǁîna ǁîn di ǂgarib ǃoa. 2 Xawe ǀnîgu ǀkharib di ǂgaeǂgui-aogu digu, Timoteub tsî Genaeub ôab Apoloniub tsî ǁkhāti Hieronimub tsî Demofoni tsîgu ge ǁîn ǂkhîb ǃnâ nî hâ ǃkhaisa ge ǂgao tama hâ i. ǁKhātib ge Siprus di ǂgaeǂgui-aob Nikanori tsîna ǁîn ǂkhîb ǃnâ nî ûi ǃkhaisa ge ǂgao tama hâ i.
3 ǁAubexa ǁnā ǁaeb ǃnân ge Jopas di khoena ui-uisa xū-e ǁîn ǃās di Jodeǁîn ǃoagu ge dī. ǁÎn ge khoexaǃnâse, Jodeǁîgu ǃoagu ǁgausen tsî ǁîgu tsî ǁîgu taradi tsî ǀgôan tsîna doe-omdi ǀkha nî ǃnarise ge ǁkhauǂui. 4 Hoaraga khoen ǃās din ge nēs ǃnâ māsen xui-aon ge Jodeǁîna tsū xū-e ge ǃâubasen tama hâ i tsî ǁkhauǂuisa ǃgâi ǂâisa xu ge ūǃoa. Xawe hurib ain ge ǂoa, on ge Jopas di khoena hoaraga ǀgamkaidisi khoen Jodeǁîn dina ge āǁō kai.
5 Judab ge nē ora dīb, ǁîb di horesa Jodeǁîn ǃoagu ge dīheb xab ge ǁnâu, o ǁîb khoega ge ǂanǂan. 6 Elob, ǂhanu-aib ǃoa gu ge ǀgores khaoǃgâ gu ge ǁîgu ǃgâsan di ǃgamaoga ge ǁnāǂam. Tsuxuǃgâb ai gu ge doe-ommâ-ais tsî hoaraga doe-omde ǃkhāǂhubi tsî ǁnāpa ge gau hâ in hoana ge ǃgam. 7 ǃĀs di dao-amdi ge ǃnau-amsa i, xui-aob ge Judaba ge ǂgae-oasen, xaweb ge ǀnî ǁaeb nî oahā tsî ǁnāpa ǁan hân hoana hîkākā ǃkhaisa ge mîǁgui.
8 Judab ge Jamnias khoen ra Jodeǁîn ǁnā ǃās ǃnâ ǁan hânan nî ǃgam ǃkhaisa ǀapeǀapesa ge ǁnâu. 9 ǁNā-amagab ge Jamniasa tsuxuba ǁnāǂam tsî doe-ommâ-ais tsî doe-omdi tsîna ge ǃkhāǂhubi. Nē ǀaeb di ǁhabub ge Jerusalems kōse, korodisi kilometergu di ǃnūsiba ge mûhe ǁkhā i.
Judab di dandi Gileadǀkharib ǃnâ
(1 Makabergu 5:9-54)10 ǁAubexa gu Judab tsî ǁîb khoegu tsîna Jamniasa xu ǀgam kilometerkha Timoteub ǃoagu nî ǃkhamse hâ, hîa gu ge koroǀoadisis xa ǃnāsa Arabiaǁîga, korokaidisi hātoroǃkhamaogu xa mâxōǀkhāhe hâse ǁîga ge ǁnāǂam. 11 Kaiseb ge ǃkhamma ǀgaisa i, xawe gu ge Elob di huib ǀkha ǁnā khoega ge dan. ǁNā khoen hîa ge danhen ge Jodeǁîn ǀkha khoexagusisa ge dī tsî ǁîna ûitsama xūna nî mā tsî hoa xūn ǃnâ Judaba mâxōǀkhā ǃkhaisa ge mîmâi. 12 Judab ge ǂgui ǀgaugu ain a hui ǁkhā, tib ge ǂâi hâ i xui-ao ǁîn ǀkha ǂkhîba dīsa ge māsen. ǂKhîban ge dīs khaoǃgân ge Arabiaǁîna ǁîn di tentomdi ǃoa ge oa.
13 Judab ge ǁkhāti ǀgaisa ǂnubiǂgoagu ǀkha omǂnamihe hâ ǃās, Kaspins tsîna ge ǁnāǂam. ǁNā ǃās ǃnân ge ǂguiǃnâgu Jodeǁî tamana ge ǁan hâ i. 14 ǁAnǂgāsaben ge kaise ǁîn di ǂnubiǂgoagu di ǀgaib tsî ǂgui ǂûn hîan ge ūhâ in ai ge ǂgomǃgâ hâ i, tsî ǁnā-amaga Judab di khoega taotaosa ǀgaub ai ǁgoaǂui tsî ǃkhāǃkhā tsî ǀurisa ǀgaub ai ǁîgu ǃoagu gere ǃhoa. 15 Judab tsî ǁîb khoegu tsîn ge Hoaǀgaixa ǃKhūb hîa ge Josuab di ǁaeb ǃnâ Jerixosa torodī-ūxūn tsî ǁâtanin ose hîkākāba ǂgaiǀî tsî ǁnās khaoǃgâ nē ǀgaisa ǂnubiǂgoaga ge ǁnāǂam. 16 Elob di ǂâis ge i, amaga gu ge nē ǃāsa ge ūǂgā. Jodeǁîn ge ǁnātikō ǂgui khoena ge ǃgam tsîb ge ǀgūse ge ǁgoe i huriroba ǀaob xa ge ǀoa hâ i.
Judab ge Timoteub toroǂnubisa ra dan
(1 Makabergu 5:37-44)17 Kaspinsa xu gu ge ǀguikaidisikorodisi kilometerga Jodeǁî ǃās Karaks, Tobs ǀgūse ǁgoes tawa gu nî sīs kōse ge ǃgû. 18 Xawe gu ge Timoteuba ǀnaib ge ǀkhariba xu ǂoa hâ i xui-ao ǀhao-ū tama ge i. ǁÎb ge xū-i xare-e ǁnāpa ge dī ǁoa i tsî ǀgaisa toroǂnubis ǀguisa ǁnā ǃkhaib ai ge ǁnāxū. 19 Judab di ǀgam danakhoekha, Dositeub tsî Sosipateri hâkha ge nē toroǂnubisa ǁnāǂam tsî ǁnāpa ge hâ i disiǀoadisi khoegu hoaga ge ǃgam. 20 Judab ge ǁîb di toroǂnubisa ǃgubidi ǃnâ ge ǀgoraǂgā tsî Dositeub tsî Sosipateri hâkha mâb hoaba ǀguis di ǃereamsa ge mā tsî Timoteub hîa ge ǀguikaidisi tsî ǀgamdisiǀoadisi ǀnūtoroǃkhamaogu tsî ǀgamǀoadisi tsî korokaidisi hātoro-aoga ūhâ iba ǃnoesase ge ǃgôaǃgon. 21 Timoteub ge Judab ǁîba ǃgôaǃgonǃgoaxa ǃkhaisab ge ǂan, o taradi tsî ǀgôan tsîna aiǃâ ǁîn ge ūhâ i xūn ǀkha Karnaims ǃoa, ǁnā ǃās ge ǃhomgu ǁaegu ǂnôa i tsî ǃgomhōsa i xui-ao ge sî. 22 Xawe khākhoen ge ǂguro ǃâb Judab toroǂnubis diban ge mû, o i ge hoana ra mû Eloba xu hâ ai-e ǁîna ge ǃao kai tsîn ge ge ǃkhoeni. Hoa ǀkhāgu ǁgan gere ǃkhoeni amagan ge ǁîn di ǂhunuma khoen xa tsuihe tsî hoaǀkhāǀāgôagu ǀkhas tsîna gere ǃkhāhe. 23 Judab ge ǀû tamase ǁîna ǃgôaǃgon tsî ǁaubexa ǃnonadisiǀoadisi khoega ge ǃgam. 24 Timoteub ge Dositeub tsî Sosipateri di khoegu xa ǃkhōsis ǃnâ ge ūhe. ǁÎb ge kai ǀhôagaosib ǀkha, ǃnāsan ǁîgu ǀaokhoen din ǁîb di ǃkhōsis ǃnâ hâ tsî xū-i ga ǁîb ǀkha ī, o nî ǃgamhe ti ǁîga ge ǃhoaǁnâdana. 25 ǀUnis aib ge ǁîgu di ǃgâsanab ǃnorasase nî ǁaru kaisab ge mîmâis khaoǃgâ ǁîb tsîna ge ǁnāxūhe.
Judab ge ǀnî hâ dandi tsîna ra hōbasen
(1 Makabergu 5:45-54)26 Sao raseb ge Judaba ǃās Karnaims tsî tempeli, elos Atargatis dib tsîna ǁnāǂam tsî ǀgamdisikoroǀaǀoadisi khoena ǃgam 27 tsî ǃās tsî tempeli tsîna ge hîkākā. ǁNās khaoǃgâb ge omǂnamisa ǃās Efrons, Lisiab tsî ǃkharagaǃnâgu ǁaedi ge ǁanǃnâ hâ isa ge ǁnāǂam. ǀGaisa ǂkham khoegu ge ǁâtanin âga ū tsî ǂnubiǂgoab ais ai mâ tsî ǁkhoaǂgaoxase ge ǃkham. ǂGui torodī-ū xūn tsî ǁâtanin tsîn ge ǃās ǃnâ ge sâuhe hâ i. 28 Xawen ge Jodeǁîna huib ǃaroma ǃKhūb hîa ge ǁîb khākhoen di ǀgaiba khôab ǃoa ge ǀgore. ǃĀsa ūǀhana tsî gu ge ǁaubexa ǀgamdisikoroǀaǀoadisi khoena ge ǃgam. 29 ǁNāpa xu gu ge Betsans, hîa ǀguikaidisi tsî ǀgamdisi kilometerga Jerusalem di ǀapas ǃnâ ǁgoes ǃoa ge ǃnoe. 30 ǁNāpa ge hâ i Jodeǁîn ge mâtin ge ǁnā ǃās di khoena ǃgōsase ǃgom ǁaegu ǃnâ ǁîna ǃgâise sîsenū ǃkhaisa Judaba ge mîba. 31 Judab tsî ǁîb khoegu ge ǁnā khoena gangan tsî ge ǂgaoǂgaoǃnâ, în ǃaruǀîǀgui Jodeǁîn ǀkha ǃgâise dī. Tsî gu ge ǁnāpa xu Jerusalems ǃoa ge ǃgû tsî ǃGaos di ǁÂudīb aiǃâ ǁnāpa ge sī.
Judab ge Gorgiaba ra dan
32 ǃGaos di ǁÂudīb khaoǃgâ gu ge Judab tsî ǁîb khoegu tsîna Idumeab di ǂgaeǂgui-aob Gorgiab, 33 hîa ge ǁîga ǃnonaǀoadisi hātoroǃkhamaogu tsî hakakaidisi ǀnūtoroǃkhamaogu ǀkha ǃoab ǃoa ǃnoesase ge dāǁnâ. 34 Nē torob ǃnân ge ǀoro Jodeǁîna ge ǃgamhe. 35 Ob ge Tobs di Jodeǁîb, ǀgaisa hāǃgapi-aob, Dositeub ti ge ǀon hâ iba, Gorgiaba anaǂamsarab âb ai ǃkhō tsî ûitsamaseb ge ǂhâba bi hâ i xui-ao ǁîba ge ǃkharabē. Xaweb ge Trasiaǁî hātoroǃkhamaogu di ǀguiba, Dositeub ǃoa ǃgapi sī tsî ǁîb ǁôaba ge ǁhāǁnâ. Nē ǀgaub aib ge Gorgiaba ǃnora tsî Marisas ǃnâ ge sī.
36 Nē ǁaeb ai gu ge Esdriab ǂgaeǂguis ǃnaka gere ǃkham Jodeǁîga gaxuse ǃkham tsî tsau hâ i, xui-aob ge Judaba ǃKhūb ǃoa ǀgore tsî ge ǂgan, îb torob ǃnâb ǁîgu ǀkhāb ai hâ tsî ǁîga ra ǂgaeǂgui ǃkhaisa ǁgau. 37 Judab ge ǁgûsi gowab ǃnâ torob ǁnaetsana-e ǁnae tsî Gorgiab toroǃkhamaoga ǀūǂamse gu hâ hîa ge ǁnāǂam tsî gu ge ǁîga ge ǃkhoeni.
Torob ǃnâ ge ǃgamhe khoegu ǃaroma hâ ǀgoredi
38 Torob khaoǃgâb ge Judaba ǁîb di toroǃkhamaoga Adulams ǁga ge ǂgaeǂgui. Sabbattsēs aiǃâ ge ǂnôa i tsēs a xui-ao gu ge Jodeǁîn ǁnaetigu ǃoa ge ǃanuǃanusen tsî Sabbattsēsa ge khai. 39 Sao ra tsēs ai gu ge Judab tsî ǁîb khoega, ǁnās ge ǂhâbasa i xui-ao, ǁō ge toroǃkhamaogu di sorode ǀhaoǀhao tsî ǁîgu di ǀaokhoen di ǀhobadi ǃnâ ge ǁkhō. 40 Xawe ǁō ge hâ i khoeb hoab ai gu ge ǁîgu saragu ǃnaka ǂkhari īgu, Jamnias ǃnâ gere ǀgoreǀîhe elon digu, Jodeǁîn ge ǂhanub xa ǂkhāhe hâ iga ge hōhe. ǁNās ge tare-i ǃaroma gu ge nē khoega ǃgamhe ǃkhaisa ge ǂhaisa kai. 41 ǁÎgu ge ǃKhūb di ǀgaugu, ǂhanu-ai ǀgoraǃgâs hîa ge sâuhe hâ xūna ra ǂhaiǂhais tsîna koa 42 tsî nē ǁoreb nî hoaragase ǀariǂuihe ǃkhaisa ge ǀkhoma. ǁNās khaoǃgâb ge Judaba, tare-i ge ǁore gegu ǀkha ge ī ǃkhaisan ge aitsama mû xui-ao khoena ǃaruǀîn ǁore tide ǃkhaisa ge ǂgan. 43 ǁKhātib ge ǁîb khoegu ǃnâ ǁaubexa ǀgam kiloxramkha ǀhaiǀuriba ǀhaoǀhao tsî ǁoreǁguibas ǃaroma Jerusalems ǃoa ge sî. Judab ge nē ǃgâi ǃkhaisa, ǁō hân khâis ǃnâb gere ǂgom xui-ao ge dī. 44 ǁŌ hân nî ǁkhawa khâi ǃkhaisab ga ǂgom tama i hâ, os ge ǁō hâna ǀgorebasa gâ tsî a harebeoǃnâ. 45 ǃAruǀîb ge ǁnān tsamtsise ge ǁōn ge ǂhanu-ai mādawa-amsa hō ǃkhaisa ge hōǃâ. Nēs ge ge ǁîb di ǃanu tsî ǂhanu-ai ǂâi i. ǁNās ǃaromab ge ǁō hân ǃaroma ǁoreǁguibasa ǁîn tsîn nî ǁîn ǁorena xu ǃnora kaihe ga ge dī kai.
