Kalunga ta teya po Siria naIsrael
1 Omuwa ota ti: “Oshilando Damaskus itashi kala we olule; otashi ka ninga ondumba yomakulukuma. 2 Iilando yaSiria otayi ka hanagulwa po sigo aluhe. Otayi ka ninga omaunapelo goonzi nogoongombe, nokape na ngoka te dhi tidha mo. 3 Israel ota ka kala itaa vulu okwiipopila, naDamaskus otashi kanitha eipangelo lyasho. Aasiria mboka taa hupu ko ye na omwenyo, otaa ka sa nohoni ya fa Aaisraeli. Ongame, Omuwa Omunankondoawike, nde dhi popi.”
4 Omuwa okwa ti: “Esiku otali ya, uuna esimano lyaIsrael tali hulu po, nuuyamba we tau halakana po. 5 Israel ota ka fa epya lya teywa iilya, a fa epya molusilu lwaRafaim uuna lya teywa. 6 Aantu aashuushuka yowala taa ka hupa ko, naIsrael ota ka fa omuolivi gwa likolwa ooholivi, shila oku na owala oombali noondatu ndhoka dha hupile kuundjendja nenge ooholivi ndhoka dha hupile piitayi yopevi. Ongame, Omuwa Kalunga kaIsrael, nde dhi popi.”
Ehulilo lyiimenka
7 Esiku nge lya thikana, aantu otaa ka galukila komukwathi nokOmushiti gwawo, Kalunga kaIsrael omuyapuki. 8 Itaa ki inekela we iiyambelo ye yi tungu niikaha yawo yene, nenge yi itule iilonga yiikaha yawo — iiyelekela yoshikalungakiintu Asheera niiyambelo yiitsinino.
Iikunino yiinonoma
9 Esiku otali ya, uuna iilando ya kola tayi ka ninga ombuga notayi kumunwa po ya fa iilando mbyoka ya thigwa po kAahevi nokAayamori, sho ya fadhuka po Aaisraeli.
10 Israel, owa dhimbwa Kalunga ngoka e ku hupitha nokwe ku gamene a fa emanya lya kola. Peha lye owa tsike po iikunino yiinonoma, opo u longele iikalunga yokiilongo. 11 Ihe nando yi koke mbalambala yi sheneke, itayi ka likolwa sha. Otaku kala owala omukundu nuuvu waa shi kupangwa.
Iigwana yaatondi tayi ka sindwa
12 Iigwana iinankondo oya tsu ondumbo notayi ndundumitha ewi lyayo lya fa efuta, lya fa epupo lyomakuthikuthi omanene. 13 Iigwana otayi ndunduma ya fa omakuthikuthi, sho taga hedha ko, ihe Kalunga ote yi ganda, oyo notayi shuna. Ote yi tidha po ya fa ontsi kombanda yondundu, ya fa iiyagaya mokambiya. 14 Otayi tilitha aantu ongulohi, ihe ongula nge kwa shi, kayi po we. Shika osho oshipewa shashaa ngoka te tu yugu evi lyetu.
Damaskus naEfraim tai xunganekwa
1 Okuxunganekwa kwaDamaskus taku ti: “Tala, Damaskus otashi ka ekelwashi, kashi fi vali oshilando, otashi ningi oikulukuma, oshilando sha teka po. 2 Oilando yaAroer otai efiwa ndele tai ningi oulifilo woimuna, omo tai ombo, itai tewa mo. 3 Ndele Efraim ota kanifa ohotekuma yaye naDamaskus ouhamba waye, naAram noshixupe shaye yo otashi ka ningwa ngaashi etumbalo lovana vaIsrael, Omwene womatanga ovakwaita osho ta ti.”
4 “Ndele mefiku tuu olo etumbalo laJakob otali ka xutulwa neondoko lombelela yaye otali ka ngona. 5 Ndele tapa ka kala ngaashi oilya tai kwatwa komutei, neke laye ngeenge tali kwata omitwe doilya, heeno, otapa ka kala ngaashi omitwe doilya tadi toolwa mefilu laRefaim. 6 Ndelenee epupudululo tali ka kala mo, ngaashi olumono tali nyemwa; eengongo mbali ile nhatu moxulo, nhee, nhano, moitai yomuti omukadi. Omwene Kalunga kaIsrael osho ta ti.”
7 Mefiku tuu olo omunhu ota ka tala Omushiti waye nomesho aye taa ka tala Omuyapuki waIsrael, 8 ndele ita kala vali nokutalatala eealtari, oshilonga shomake aye; noita tale vali odo da hongwa kominwe daye nokutya, komiti domalupwelele daAsera nokeengudi detango. 9 Mefiku tuu olo oilando yaye ya pama otai ka fa omaputu aHevi naAmori, oya efiwa mokufaduka po kwOvaisraeli noya ninga ofuka. 10 Osheshi ove wa dimbwa Kalunga kexupifo loye, nowa li ino dimbulukwa emanya lehondamo loye. Onghee oto ka kuna oikunwa iwa, ndele to ka twika omiviinyu dokoilongo; 11 mefiku olo oto kunu, oto di kulifa, nomongula taku shi, oto dalifa ombuto yayo; ndelenee mefiku loudu oiteywa otai ningi okanduba kongaho, nouyehame itau veluka.
Euyaano loiwana
12 Woo euyaano loiwana ihapu, ngaashi engungumo lefuta, osho hava uyaana! Neweelelo loiwana ngaashi engungumo lomeva manenenene, osho hava uyaana! 13 Oiwana tai ngungutula ngaashi engungumo lomeva manene, ndele Ye ote i aneke, ndele tai i onhapo kokulekule; ndele tai halakanifwa ngaashi olungu tali i omhepo keemhunda, ngaashi omafo taa twalwa kokafudaela. 14 Tala, onguloshi oixuna yongaho! Ongula manga inaku sha, kave po vali. Eshi osho oshipewa shovahanauni vetu noshitukulwa shovatinhi vetu.
