1 Salomo wa ri ombara yOvaisrael avehe. 2 Nu imba mba ri ovahongore ve ovanane, owo mba:
Omupristeri Otjiuru wa ri Asarja, omuzandu wa Sadok.
3 Nu imba ovatjangere vouhona va ri ooElihoref na Ahija, ovazandu va Sisa.
Nomuṱakamise wovitjangwa vyouhona wa ri Josafat, omuzandu wa Ahilud.
4 Omuhongore wotjimbumba tjovita wa ri Benaja, omuzandu wa Jehojada.
Ovapristeri va ri ooSadok na Abiatar.
5 Omunane omunene wozongooneya zorukondwa wa ri Asarja, omuzandu wa Natan.
Omuyandjandunge wombara wa ri omupristeri Sabud, omuzandu wa Natan.
6 Omunane wondjuwo youhona wa ri Ahisar.
Omunane wovaungure voviungura vyoṋiṋikizire wa ri Adoniram, omuzandu wa Abda.
7 Salomo wa toorora ovarumendu omurongo na vevari ve rire ozongooneya zotukondwa mOisrael. Owo ave parura ombara nonganda ye, noviparure mbyaa ve isa motukondwa twomahi, auhe wawo wa ri nomayandjero wombaruriro moure womueze umwe mombura. 8 Omana wovanane wOtukondwa mba omurongo na vevari novotukondwa twomahi owo nga:
OBen-Hur wehi rozondundu ra Efraim;
9 na Ben-Deker wovihuro ooMakas na Saalbim na Bet-Semes na Elon na Bet-Hanan;
10 na Ben-Hesed wotjihuro Arubot; eye wa ri notjihuro Soko, nehi arihe ra Hefer;
11 na Ben-Abinadab ngwa kupire Tafat, omusuko wa Salomo, nu ngwa ri nehi arihe rozondunda ra Dor;
12 na Baana, omuzandu wa Ahilud, ngwa ri novihuro ooTaanak na Megido nehi arihe ra Bet-Sean, popezu notjirongo Saretan komukuma wokeyuva kokumuho kwotjirongo Jesreel, nga kovihuro ooAbel-Mehola na Jokmeam;
13 na Ben-Geber ngwa ri notjihuro Ramot mOgilead; eye wa ri novirongo vya Jair, omuzandu wa Manasse, mbya ri mOgilead; eye wina wa ri norukondwa rwehi ra Argob mObasan; avihe kumwe vya ri ovihuro ovinamasa omirongo hamboumwe mbya ri notumbo twomawe novipate vyongoporo;
14 na Ahinadab, omuzandu wa Ido, ngwa ri mu Mahanaim;
15 na Ahimaas ngwa kupire Basemat, omusuko warwe wa Salomo, nu ngwa ri mehi ra Naftali;
16 na Baana, omuzandu wa Husai, ngwa ri mehi ra Aser na motjirongo Bealot;
17 na Josafat, omuzandu wa Paruak, ngwa ri mehi ra Isakar;
18 na Simi, omuzandu wa Ela, ngwa ri mehi ra Benjamin;
19 na Geber, omuzandu wa Uri, ngwa ri mehi ra Gilead nda honaparerwa i Sihon, ombara yOvaamori, na Og, ombara ya Basan.
Nungwari mehi arihe ra Juda mwa ri ongooneya imwe uriri.
Ouvara nounongo wa Salomo
20 Ovajuda nOvaisrael va ri ovengi tjinene tjimuna eheke pomukuro wokuvare; owo va rya, ave nu nave yoroka. 21 Salomo wa honaparera omauhona aehe okuza konḓonḓu Eufrat nga kehi rOvafilisti nu nga komukuro wa Engipte. Ovandu avehe momauhona nga aave mu sutu ondjambi youhona, nu ave mu karere oure womuinyo we auhe.
22 Oviriwa Salomo mbya hepa meyuva rimwe, vya ri oruhere orunḓunḓura ozorita omayovi yetano, noruhere ozorita omayovi omurongo; 23 nozongombe omurongo nḓa ṋunisiwa, nozongombe omirongo vivari nḓaa ze ri mokuti, nozonyanda esere rimwe, na wina ozongoṱu nozonḓuno nozomenye, nozonḓera nḓa ṋunisiwa.
24 Salomo wa honaparera omahi aehe wokomukuma wokongurova kwonḓonḓu Eufrat, okuza kOtifsa nga kOgasa. Ozombara azehe zomahi nga za ri kehi ye; neye wa kara nohange momahi aehe nge mu kondoroka. 25 Ombara Salomo ngunda a ri nomuinyo, Ovajuda nOvaisrael avehe okuza kOdan nga kOberseba va kara nokuhinatjipo; eṱunḓu arihe ra ri nomivite nomikuyu vyaro.
26 Salomo wa ri noviunda 40,000 vyoukambe we womatemba wovita, noukambe 12,000 oukavirwa. 27 Ozongooneya ze zotukondwa mba omurongo na vevari aave eta, auhe momueze we, oviriwa mbyaa vi hepwa i ombara Salomo na imba avehe mbaa ve ri mondjuwo ye youhona, nu kaave kaerisa otjiṋa. 28 Ongooneya aihe wina aa i etere orukondwa rwe ovirya nomahozu poṋa pu mavi heperwa koukambe womatemba wovita noukavirwa.
29 Nu Ndjambi wa yandja ounongo ounene nomirya nozondunge ozengi tjinene ku Salomo mbi ha sora okusasanekwa. 30 Ounongo we wa ri ounene tjinene pu imbwi wozonongo zehi rokomuhuka na inḓa za Engipte. 31 Eye wa ri onongo tjinene povandu avehe, nangarire pu Etan, Omuesra, na Heman na Kalkol na Darda, imba ovazandu va Mahol; ondangu ye ya tandavara momahi aehe kominda avihe. 32 Eye wa tya omiano 3,000, nomatangero we ya ri eyovi na yetano. 33 Eye aa imbi omiti novihape okuisira kotupapa twa Libanon nga komuti ohisop mbu hapa kekuma rangamwa otjitungwa; nu wina aa imbi ovinamuinyo nozonḓera, novikokozoke, nozohi. 34 Nozombara mouye auhe za zuva ounongo we, naze hindi ovandu okukemupuratena.
1 Salomo wa ri ombara yOvaisrael avehe. 2 Nu imba mba ri ovahongore ve ovanane, owo mba:
Omupristeri Otjiuru wa ri Asarja, omuzandu wa Sadok.
3 Nu imba ovatjangere vouhona va ri ooElihoref na Ahija, ovazandu va Sisa.
Nomuṱakamise wovitjangwa vyouhona wa ri Josafat, omuzandu wa Ahilud.
4 Omuhongore wotjimbumba tjovita wa ri Benaja, omuzandu wa Jehojada.
Ovapristeri va ri ooSadok na Abiatar.
5 Omunane omunene wozongooneya zorukondwa wa ri Asarja, omuzandu wa Natan.
Omuyandjandunge wombara wa ri omupristeri Sabud, omuzandu wa Natan.
6 Omunane wondjuwo youhona wa ri Ahisar.
Omunane wovaungure voviungura vyoṋiṋikizire wa ri Adoniram, omuzandu wa Abda.
7 Salomo wa toorora ovarumendu omurongo na vevari ve rire ozongooneya zotukondwa mOisrael. Owo ave parura ombara nonganda ye, noviparure mbyaa ve isa motukondwa twomahi, auhe wawo wa ri nomayandjero wombaruriro moure womueze umwe mombura. 8 Omana wovanane wOtukondwa mba omurongo na vevari novotukondwa twomahi owo nga:
OBen-Hur wehi rozondundu ra Efraim;
9 na Ben-Deker wovihuro ooMakas na Saalbim na Bet-Semes na Elon na Bet-Hanan;
10 na Ben-Hesed wotjihuro Arubot; eye wa ri notjihuro Soko, nehi arihe ra Hefer;
11 na Ben-Abinadab ngwa kupire Tafat, omusuko wa Salomo, nu ngwa ri nehi arihe rozondunda ra Dor;
12 na Baana, omuzandu wa Ahilud, ngwa ri novihuro ooTaanak na Megido nehi arihe ra Bet-Sean, popezu notjirongo Saretan komukuma wokeyuva kokumuho kwotjirongo Jesreel, nga kovihuro ooAbel-Mehola na Jokmeam;
13 na Ben-Geber ngwa ri notjihuro Ramot mOgilead; eye wa ri novirongo vya Jair, omuzandu wa Manasse, mbya ri mOgilead; eye wina wa ri norukondwa rwehi ra Argob mObasan; avihe kumwe vya ri ovihuro ovinamasa omirongo hamboumwe mbya ri notumbo twomawe novipate vyongoporo;
14 na Ahinadab, omuzandu wa Ido, ngwa ri mu Mahanaim;
15 na Ahimaas ngwa kupire Basemat, omusuko warwe wa Salomo, nu ngwa ri mehi ra Naftali;
16 na Baana, omuzandu wa Husai, ngwa ri mehi ra Aser na motjirongo Bealot;
17 na Josafat, omuzandu wa Paruak, ngwa ri mehi ra Isakar;
18 na Simi, omuzandu wa Ela, ngwa ri mehi ra Benjamin;
19 na Geber, omuzandu wa Uri, ngwa ri mehi ra Gilead nda honaparerwa i Sihon, ombara yOvaamori, na Og, ombara ya Basan.
Nungwari mehi arihe ra Juda mwa ri ongooneya imwe uriri.
Ouvara nounongo wa Salomo
20 Ovajuda nOvaisrael va ri ovengi tjinene tjimuna eheke pomukuro wokuvare; owo va rya, ave nu nave yoroka. 21 Salomo wa honaparera omauhona aehe okuza konḓonḓu Eufrat nga kehi rOvafilisti nu nga komukuro wa Engipte. Ovandu avehe momauhona nga aave mu sutu ondjambi youhona, nu ave mu karere oure womuinyo we auhe.
22 Oviriwa Salomo mbya hepa meyuva rimwe, vya ri oruhere orunḓunḓura ozorita omayovi yetano, noruhere ozorita omayovi omurongo; 23 nozongombe omurongo nḓa ṋunisiwa, nozongombe omirongo vivari nḓaa ze ri mokuti, nozonyanda esere rimwe, na wina ozongoṱu nozonḓuno nozomenye, nozonḓera nḓa ṋunisiwa.
24 Salomo wa honaparera omahi aehe wokomukuma wokongurova kwonḓonḓu Eufrat, okuza kOtifsa nga kOgasa. Ozombara azehe zomahi nga za ri kehi ye; neye wa kara nohange momahi aehe nge mu kondoroka. 25 Ombara Salomo ngunda a ri nomuinyo, Ovajuda nOvaisrael avehe okuza kOdan nga kOberseba va kara nokuhinatjipo; eṱunḓu arihe ra ri nomivite nomikuyu vyaro.
26 Salomo wa ri noviunda 40,000 vyoukambe we womatemba wovita, noukambe 12,000 oukavirwa. 27 Ozongooneya ze zotukondwa mba omurongo na vevari aave eta, auhe momueze we, oviriwa mbyaa vi hepwa i ombara Salomo na imba avehe mbaa ve ri mondjuwo ye youhona, nu kaave kaerisa otjiṋa. 28 Ongooneya aihe wina aa i etere orukondwa rwe ovirya nomahozu poṋa pu mavi heperwa koukambe womatemba wovita noukavirwa.
29 Nu Ndjambi wa yandja ounongo ounene nomirya nozondunge ozengi tjinene ku Salomo mbi ha sora okusasanekwa. 30 Ounongo we wa ri ounene tjinene pu imbwi wozonongo zehi rokomuhuka na inḓa za Engipte. 31 Eye wa ri onongo tjinene povandu avehe, nangarire pu Etan, Omuesra, na Heman na Kalkol na Darda, imba ovazandu va Mahol; ondangu ye ya tandavara momahi aehe kominda avihe. 32 Eye wa tya omiano 3,000, nomatangero we ya ri eyovi na yetano. 33 Eye aa imbi omiti novihape okuisira kotupapa twa Libanon nga komuti ohisop mbu hapa kekuma rangamwa otjitungwa; nu wina aa imbi ovinamuinyo nozonḓera, novikokozoke, nozohi. 34 Nozombara mouye auhe za zuva ounongo we, naze hindi ovandu okukemupuratena.
