Ondjuwo youhona ya Salomo
1 Salomo wina we ritungira ondjuwo youhona. Neye we i tunga moure wozombura omurongo nandatu. 2 Eye wa tunga Ondjuwo yOtjihwa tja Libanon, ndja ri noure wozometa omirongo vine na ine, nouparanga wozometa omirongo vivari na mbari, noutonga wozometa omurongo nandatu nohinga; eye we i tungira kotuteto tutatu twozongunḓe zotupapa, nomiti vyotupapa mbya tuwa kombanda yazo. 3 Noyo ya ri nomututu womiti vyotupapa, mbya ri kombanda yomatuwo nga tendekasana nu nga ri kozongunḓe; moruteto aruhe mwa ri ozongunḓe omurongo nandano, okutja azehe kumwe ozongunḓe omirongo vine nandano. 4 Komukuma auhe womakuma ayeyevari kwa ri otuteto tutatu twotuiho. 5 Omivero notuiho vya ri nozongambezero zotjisembatuwo, nu pa ri otuteto tutatu twotuiho mekuma arihe, tu twa hungamasana.
6 Tjazumba otja tunga ondjuwo onene yozongunḓe, ndja ri noure wozometa omirongo vivari na mbari, nouparanga wozometa omurongo nandatu nohinga. Oyo ya ri nomahitiro nga ri nomututu mbwa ri kozongunḓe.
7 Salomo wina wa tungire Etuwo rOtjihavero tjOuhona, nu ndaari isanewa kutja ondjuwo yombanguriro, eye maa pangurire oviposa. Oyo ya teterwa nomiti vyotupapa okuza pehi nga komututu.
8 Nondjuwo Salomo omuini maa tura, ndja ri morupanda kongotwe yondjuwo yombanguriro, ya tungirwe tjimuna ozondjuwo zarwe. Eye wina wa tungira omukazendu we, ingwi omusuko wombara ya Engipte, ondjuwo ndja sana ku indji oye omuini.
9 Ozondjuwo azehe nḓa puna orupanda orunene za tungwa nomawe omawa nga kondwa otja komasanekero, okuza komazikameno nga kozohingo; nomikuma vyawo vyopendje novyomoukoto vya konderwe novikonde. 10 Inga omazikameno ya ungurirwe nomawe omanene tjinene, nga ungurirwa motjitoto tjomazukuriro, tjiva nga ri noure wozometa ndatu nohinga na tjiva nga ri noure wozometa ine. 11 Nu kombanda yomazikameno nga kwa tuwa omawe omawamawa, nga kondwa otja komasanekero, nomiti vyotupapa. 12 Orupanda rwondjuwo youhona, na indwi orunene rwondjuwo ya Muhona, netuwo rayo romahitiro vya ri nomakuma nga tungirwe noruteto rumwe rwomiti vyotupapa kotuteto tutatu peke twomawe nga hongwa.
Oviungura vya Hiram
13 Ombara Salomo wa hinda ombuze komurumendu worive Hiram wotjihuro Tirus. 14 Hiram wa ri omurumendu onongo moviungura vyokuhambura ongoporo. Ihe ngwa koka wa ri Omutirus, nu wina wa ri omurumendu onongo moviungura vyokuhambura ongoporo; ina wa ri owomuhoko wa Naftali. Hiram wa ri omunazondunge, nu wa ri nondjiviro moviungura vye. Eye wa itavera komaisaneno wombara Salomo okurira omutjevere woviungura avihe vyongoporo.
Ozongunḓe mbari zongoporo
(2Eku 3:15-17)15 Hiram wa hamburire ozongunḓe mbari zongoporo; aihe ya ri noutonga wozometa hambondatu nomukondoroka wozometa ndano nohinga, ne ze twa pomahitiro wondjuwo ya Muhona. 16 Eye wina wa hamburire oviuru vivari vyongoporo, atjihe tja ri noutonga wozometa mbari, ne vi twa kombanda yozongunḓe. 17 Otjiuru tjongunḓe aihe tja harekerwe nourenga wouketanga mbwa wozewa mumwe. 18 Neye wina wa twako otuteto tuvari twozondenya zongoporo kourenga mbwi.
19 Imbi oviuru vyozongunḓe vya ungurirwe tjimuna ozongara zozonyanga zokuti; novyo vya ri noutonga wozometa mbari, 20 nu vya tuwa kombanda yotjiuru otjiputuputu tji tja ri kombanda yourenga wouketanga. Pa ri ozondenya omasere yevari motuteto tuvari okukondoroka otjiuru atjihe.
21 Hiram wa zika ozongunḓe mbari nḓa pomahitiro wondjuwo ya Muhona; indji yokeyuva kokumuho ya rukwa Jakin, nu indji yokeyuva kokunene ya rukwa Boas. 22 Nu kombanda yozongunḓe kwa ri oviuru mbya ungurwa tjimuna ozongara zozonyanga zokuti. Komuhingo mbwi oviungura vyozongunḓe otji vya manuka.
Oruungu rwOngoporo
(2Eku 4:2-5)23 Hiram wa ungurire oruungu rwomeva rwongoporo oruputuputu ndwa ri noukoto wozometa mbari, nonduvakaṋa yomokati yozometa ine nohinga, nomukondoroka wozometa omurongo nandatu. 24 Okukondoroka omukuro wopendje worungora rworuungu kwa ri otuteto tuvari twomakungu wongoporo, tu twa hamburirwa kumwe noruungu. 25 Oruungu ndwi rwa hamburirirwe komatambo wozondwezu zozongombe zongoporo omurongo na mbari nḓa tara pendje, ndatu nḓa tara keyuva kokunene, nandatu kongurova, nandatu keyuva kokumuho, nandatu komuhuka; novikondambunda vyozondwezu vya hungamasanene. 26 Noutindi womukuma woruungu wa ri nozosentimeta hambombari nohinga; norungora rwarwo rwa ri tjimuna indwi rwotjinwino, ndwa tinyukira pendje tjimuna ongara. Indwi oruungu rwa ri nomurya wozorita mangara 40,000.
Outemba wOngoporo
27 Hiram wina wa ungurire outemba omurongo wongoporo; akehe ka ri noure wozometa mbari, nouparanga wozometa mbari, noutonga wometa imwe nohinga. 28 Owo wa ungurirwe povivangwa mbya ri nomikuma vine mbi ṱeki pamwe, nu mbya hwekwa mouti. 29 Kovivangwa na kouti kwa ri oviserekarera vyozongeyama novyozondwezu zozongombe novyovakerubi; nu kehi nokombanda yozongeyama nozondwezu zozongombe novakerubi kwa ri nourenga wotuzenga. 30 Okatemba akehe ka ri noviryo vine vyongoporo noviṱize vyoviryo vyongoporo. Kovikoro vine kwa ri oviṱize vyongoporo ku kwa hamburirwa otjiyaha tjomeva; oviṱize mbi vya harekerwe nourenga wotuzenga. 31 Kombanda yotjiyaha tjomeva kwa ri orungora oruputuputu. Orwo rwa hivire kombanda oure wometa ohinga okupita mokatemba, nozosentimeta omurongo na hambondatu okupunda mokatemba. Otjinyo tjotjiyaha hi tja harekerwe okukondoroka. 32 Imbi oviryo vyokatemba akehe vya ri noutonga wozosentimeta omirongo hamboumwe na hamboumwe; ovyo vya ri kehi yovivangwa, noviṱize vyoviryo vya ri otjiṋa tjimwe na inga okatemba. 33 Oviryo vya ri tjimuna imbi vyomatemba wovita; oviṱize vyoviryo novipangiṋe nomiti nozongundu, avihe mbi vya hamburirwe pongoporo. 34 Kovikoro vine vyokatemba akehe kwa ri oviṱize mbya hamburirwa kumwe nokatemba. 35 Kombanda yokatemba akehe okukondoroka kwa ri norungora ndwa ri noutonga wozosentimeta omirongo vivari na mbari, oviṱize novivangwa vyako vya ungurirwa kumwe. 36 Imbi oviṱize novivangwa vya harekerwe noviserekarera vyovakerubi novyozongeyama novyomavare, ngamwa apehe pu pa ri oruveze ku vyo, nourenga wotuzenga mbwa kondoroka. 37 Komuhingo mbwi outemba mbwi omurongo otji wa ungurwa; owo auhe wa sanene, nu wa ṱekire pamwe, nu wa ri nondungiro imwe.
38 Hiram wina wa ungurire oviyaha omurongo vyomeva, tjimwe kokatemba akehe peke. Otjiyaha atjihe tja ri nonduvakaṋa yomokati yozometa mbari, nu tja ri nomurya wozorita mangara 800. 39 Eye wa twa outemba utano komukuma wokeyuva kokumuho kwondjuwo ya Muhona; noukwao utano komukuma wokeyuva kokunene. Nungwari indwi oruungu orunene rwomeva we ru zika motjituwo tjondjuwo ya Muhona pokati komukuma wokeyuva kokumuho nowokomuhuka.
Oviṋa avihe kumwe Salomo mbya ungurira ondjuwo ya Muhona
(2Eku 4:11—5:1)40 Norukwao Hiram wa ungurire ozonyungu novihupuro noviyaha. Komuhingo mbwi otja manena ombara Salomo oviungura avihe kondjuwo ya Muhona. Imbi eye ombya ungura:
41 Ozongunḓe mbari noviuru vivari vyazo,
nouyaha uvari mbwa wozewa otja ouketanga,
umwe kotjiuru tjongunḓe aihe;
42 nozondenya omasere yane kouyaha mbwi uvari mbwa wozewa, okutja otuteto tuvari twozondenya okuvandeka otjiuru tjongunḓe aihe;
43 noutemba omurongo puna
oviyaha vyawo omurongo,
notenga yomeva;
44 noruungu orunene puna ozondwezu zozongombe omurongo na mbari ku rwa zikwa;
45 nozonyungu novihupuro noviyaha.
Oviṋa mbi avihe Hiram mbya ungurira ombara Salomo kondjuwo ya Muhona vya ri ovyongoporo ndja keṋakeṋisiwa. 46 Oviṋa mbi avihe ombara ye vi hamburirira motjana tja Jordan, poṋa pu pe hamburirwa pokati ka Sukot na Saretan. 47 Salomo ka rakizire kutja ondjinda yoviṋa mbi vyongoporo i sanekwe, ovyo tjinga avya ri ovingi tjinene; ondjinda yongoporo kai na pu ya sanekwa.
48 Salomo wina wa ungurisa oviungurise vyongoldo mbi kondjuwo ya Muhona: Otjipunguhiro, notjiriro tjOzomboroto zOmaraisiro, mbya tuwa ongoldo; 49 novikurameno omurongo vyomamunine mbya ungurwa nongoldo ongohoke, nu mbya tuwa pomahitiro wOtjoupakeyapuke, vitano kokunene na vitano kokumuho; nozongara, nomamunine, novikonde vyozongoze zomamunine; 50 noviyaha, notuvyo, novitjuma, novikangero vyomatwimisiro novyomuriro mbya tuwa ongoldo ongohoke; noviṱize vyongoldo vyomivero vyOtjouyapukeyapuke, na imbi vyetuwo enene rokomurungu rondjuwo ya Muhona.
51 Ombara Salomo tja mana oviṋa avihe vyondjuwo ya Muhona otja twa oviyandjewa oviyapuke avihe vya ihe David momatuwo wayo wovihuze, okutja osilveri nongoldo noviungurise vyarwe.
Ondjuwo youhona ya Salomo
1 Salomo wina we ritungira ondjuwo youhona. Neye we i tunga moure wozombura omurongo nandatu. 2 Eye wa tunga Ondjuwo yOtjihwa tja Libanon, ndja ri noure wozometa omirongo vine na ine, nouparanga wozometa omirongo vivari na mbari, noutonga wozometa omurongo nandatu nohinga; eye we i tungira kotuteto tutatu twozongunḓe zotupapa, nomiti vyotupapa mbya tuwa kombanda yazo. 3 Noyo ya ri nomututu womiti vyotupapa, mbya ri kombanda yomatuwo nga tendekasana nu nga ri kozongunḓe; moruteto aruhe mwa ri ozongunḓe omurongo nandano, okutja azehe kumwe ozongunḓe omirongo vine nandano. 4 Komukuma auhe womakuma ayeyevari kwa ri otuteto tutatu twotuiho. 5 Omivero notuiho vya ri nozongambezero zotjisembatuwo, nu pa ri otuteto tutatu twotuiho mekuma arihe, tu twa hungamasana.
6 Tjazumba otja tunga ondjuwo onene yozongunḓe, ndja ri noure wozometa omirongo vivari na mbari, nouparanga wozometa omurongo nandatu nohinga. Oyo ya ri nomahitiro nga ri nomututu mbwa ri kozongunḓe.
7 Salomo wina wa tungire Etuwo rOtjihavero tjOuhona, nu ndaari isanewa kutja ondjuwo yombanguriro, eye maa pangurire oviposa. Oyo ya teterwa nomiti vyotupapa okuza pehi nga komututu.
8 Nondjuwo Salomo omuini maa tura, ndja ri morupanda kongotwe yondjuwo yombanguriro, ya tungirwe tjimuna ozondjuwo zarwe. Eye wina wa tungira omukazendu we, ingwi omusuko wombara ya Engipte, ondjuwo ndja sana ku indji oye omuini.
9 Ozondjuwo azehe nḓa puna orupanda orunene za tungwa nomawe omawa nga kondwa otja komasanekero, okuza komazikameno nga kozohingo; nomikuma vyawo vyopendje novyomoukoto vya konderwe novikonde. 10 Inga omazikameno ya ungurirwe nomawe omanene tjinene, nga ungurirwa motjitoto tjomazukuriro, tjiva nga ri noure wozometa ndatu nohinga na tjiva nga ri noure wozometa ine. 11 Nu kombanda yomazikameno nga kwa tuwa omawe omawamawa, nga kondwa otja komasanekero, nomiti vyotupapa. 12 Orupanda rwondjuwo youhona, na indwi orunene rwondjuwo ya Muhona, netuwo rayo romahitiro vya ri nomakuma nga tungirwe noruteto rumwe rwomiti vyotupapa kotuteto tutatu peke twomawe nga hongwa.
Oviungura vya Hiram
13 Ombara Salomo wa hinda ombuze komurumendu worive Hiram wotjihuro Tirus. 14 Hiram wa ri omurumendu onongo moviungura vyokuhambura ongoporo. Ihe ngwa koka wa ri Omutirus, nu wina wa ri omurumendu onongo moviungura vyokuhambura ongoporo; ina wa ri owomuhoko wa Naftali. Hiram wa ri omunazondunge, nu wa ri nondjiviro moviungura vye. Eye wa itavera komaisaneno wombara Salomo okurira omutjevere woviungura avihe vyongoporo.
Ozongunḓe mbari zongoporo
(2Eku 3:15-17)15 Hiram wa hamburire ozongunḓe mbari zongoporo; aihe ya ri noutonga wozometa hambondatu nomukondoroka wozometa ndano nohinga, ne ze twa pomahitiro wondjuwo ya Muhona. 16 Eye wina wa hamburire oviuru vivari vyongoporo, atjihe tja ri noutonga wozometa mbari, ne vi twa kombanda yozongunḓe. 17 Otjiuru tjongunḓe aihe tja harekerwe nourenga wouketanga mbwa wozewa mumwe. 18 Neye wina wa twako otuteto tuvari twozondenya zongoporo kourenga mbwi.
19 Imbi oviuru vyozongunḓe vya ungurirwe tjimuna ozongara zozonyanga zokuti; novyo vya ri noutonga wozometa mbari, 20 nu vya tuwa kombanda yotjiuru otjiputuputu tji tja ri kombanda yourenga wouketanga. Pa ri ozondenya omasere yevari motuteto tuvari okukondoroka otjiuru atjihe.
21 Hiram wa zika ozongunḓe mbari nḓa pomahitiro wondjuwo ya Muhona; indji yokeyuva kokumuho ya rukwa Jakin, nu indji yokeyuva kokunene ya rukwa Boas. 22 Nu kombanda yozongunḓe kwa ri oviuru mbya ungurwa tjimuna ozongara zozonyanga zokuti. Komuhingo mbwi oviungura vyozongunḓe otji vya manuka.
Oruungu rwOngoporo
(2Eku 4:2-5)23 Hiram wa ungurire oruungu rwomeva rwongoporo oruputuputu ndwa ri noukoto wozometa mbari, nonduvakaṋa yomokati yozometa ine nohinga, nomukondoroka wozometa omurongo nandatu. 24 Okukondoroka omukuro wopendje worungora rworuungu kwa ri otuteto tuvari twomakungu wongoporo, tu twa hamburirwa kumwe noruungu. 25 Oruungu ndwi rwa hamburirirwe komatambo wozondwezu zozongombe zongoporo omurongo na mbari nḓa tara pendje, ndatu nḓa tara keyuva kokunene, nandatu kongurova, nandatu keyuva kokumuho, nandatu komuhuka; novikondambunda vyozondwezu vya hungamasanene. 26 Noutindi womukuma woruungu wa ri nozosentimeta hambombari nohinga; norungora rwarwo rwa ri tjimuna indwi rwotjinwino, ndwa tinyukira pendje tjimuna ongara. Indwi oruungu rwa ri nomurya wozorita mangara 40,000.
Outemba wOngoporo
27 Hiram wina wa ungurire outemba omurongo wongoporo; akehe ka ri noure wozometa mbari, nouparanga wozometa mbari, noutonga wometa imwe nohinga. 28 Owo wa ungurirwe povivangwa mbya ri nomikuma vine mbi ṱeki pamwe, nu mbya hwekwa mouti. 29 Kovivangwa na kouti kwa ri oviserekarera vyozongeyama novyozondwezu zozongombe novyovakerubi; nu kehi nokombanda yozongeyama nozondwezu zozongombe novakerubi kwa ri nourenga wotuzenga. 30 Okatemba akehe ka ri noviryo vine vyongoporo noviṱize vyoviryo vyongoporo. Kovikoro vine kwa ri oviṱize vyongoporo ku kwa hamburirwa otjiyaha tjomeva; oviṱize mbi vya harekerwe nourenga wotuzenga. 31 Kombanda yotjiyaha tjomeva kwa ri orungora oruputuputu. Orwo rwa hivire kombanda oure wometa ohinga okupita mokatemba, nozosentimeta omurongo na hambondatu okupunda mokatemba. Otjinyo tjotjiyaha hi tja harekerwe okukondoroka. 32 Imbi oviryo vyokatemba akehe vya ri noutonga wozosentimeta omirongo hamboumwe na hamboumwe; ovyo vya ri kehi yovivangwa, noviṱize vyoviryo vya ri otjiṋa tjimwe na inga okatemba. 33 Oviryo vya ri tjimuna imbi vyomatemba wovita; oviṱize vyoviryo novipangiṋe nomiti nozongundu, avihe mbi vya hamburirwe pongoporo. 34 Kovikoro vine vyokatemba akehe kwa ri oviṱize mbya hamburirwa kumwe nokatemba. 35 Kombanda yokatemba akehe okukondoroka kwa ri norungora ndwa ri noutonga wozosentimeta omirongo vivari na mbari, oviṱize novivangwa vyako vya ungurirwa kumwe. 36 Imbi oviṱize novivangwa vya harekerwe noviserekarera vyovakerubi novyozongeyama novyomavare, ngamwa apehe pu pa ri oruveze ku vyo, nourenga wotuzenga mbwa kondoroka. 37 Komuhingo mbwi outemba mbwi omurongo otji wa ungurwa; owo auhe wa sanene, nu wa ṱekire pamwe, nu wa ri nondungiro imwe.
38 Hiram wina wa ungurire oviyaha omurongo vyomeva, tjimwe kokatemba akehe peke. Otjiyaha atjihe tja ri nonduvakaṋa yomokati yozometa mbari, nu tja ri nomurya wozorita mangara 800. 39 Eye wa twa outemba utano komukuma wokeyuva kokumuho kwondjuwo ya Muhona; noukwao utano komukuma wokeyuva kokunene. Nungwari indwi oruungu orunene rwomeva we ru zika motjituwo tjondjuwo ya Muhona pokati komukuma wokeyuva kokumuho nowokomuhuka.
Oviṋa avihe kumwe Salomo mbya ungurira ondjuwo ya Muhona
(2Eku 4:11—5:1)40 Norukwao Hiram wa ungurire ozonyungu novihupuro noviyaha. Komuhingo mbwi otja manena ombara Salomo oviungura avihe kondjuwo ya Muhona. Imbi eye ombya ungura:
41 Ozongunḓe mbari noviuru vivari vyazo,
nouyaha uvari mbwa wozewa otja ouketanga,
umwe kotjiuru tjongunḓe aihe;
42 nozondenya omasere yane kouyaha mbwi uvari mbwa wozewa, okutja otuteto tuvari twozondenya okuvandeka otjiuru tjongunḓe aihe;
43 noutemba omurongo puna
oviyaha vyawo omurongo,
notenga yomeva;
44 noruungu orunene puna ozondwezu zozongombe omurongo na mbari ku rwa zikwa;
45 nozonyungu novihupuro noviyaha.
Oviṋa mbi avihe Hiram mbya ungurira ombara Salomo kondjuwo ya Muhona vya ri ovyongoporo ndja keṋakeṋisiwa. 46 Oviṋa mbi avihe ombara ye vi hamburirira motjana tja Jordan, poṋa pu pe hamburirwa pokati ka Sukot na Saretan. 47 Salomo ka rakizire kutja ondjinda yoviṋa mbi vyongoporo i sanekwe, ovyo tjinga avya ri ovingi tjinene; ondjinda yongoporo kai na pu ya sanekwa.
48 Salomo wina wa ungurisa oviungurise vyongoldo mbi kondjuwo ya Muhona: Otjipunguhiro, notjiriro tjOzomboroto zOmaraisiro, mbya tuwa ongoldo; 49 novikurameno omurongo vyomamunine mbya ungurwa nongoldo ongohoke, nu mbya tuwa pomahitiro wOtjoupakeyapuke, vitano kokunene na vitano kokumuho; nozongara, nomamunine, novikonde vyozongoze zomamunine; 50 noviyaha, notuvyo, novitjuma, novikangero vyomatwimisiro novyomuriro mbya tuwa ongoldo ongohoke; noviṱize vyongoldo vyomivero vyOtjouyapukeyapuke, na imbi vyetuwo enene rokomurungu rondjuwo ya Muhona.
51 Ombara Salomo tja mana oviṋa avihe vyondjuwo ya Muhona otja twa oviyandjewa oviyapuke avihe vya ihe David momatuwo wayo wovihuze, okutja osilveri nongoldo noviungurise vyarwe.
