Ombara Hiskija ma ningire ondunge ku Jesaja
(2Ozo 19:1-7)1 Mokamanga ombara Hiskija tja za nokuzuva omaserekarerero wawo otja nyondorora ozombanda ze moruhoze, a zara ozombanda zomakutu na i kondjuwo ya Muhona. 2 Eye wa hinda Eljakim, omunane omunene wondjuwo youhona, na Sebna, omutjangerepo wouhona, nOvapristeri Oviuru komuprofete Jesaja, omuzandu wa Amos. Owo wina va zarere ozombanda zomakutu. 3 Ombuze ndje ve raera okukayandja ku Jesaja, oyo ndji: “Ndinondi oro eyuva romihihamo; eṱe matu verwa nu matu yambururwa. Tu ri otja omukazendu ngwe rirongerere okukapanduka, nungwari ngu hi nomasa okutjita nao. 4 Ombara yOvaasirie ya hinda omuhongore wayo omunene okuyamburura Ndjambi omunamuinyo. Muhona, Ndjambi woye, nga zuve omayamburiro nga, nu nga vere imba mbe ye hungira. Opu mo sokukumbira ovandu vetu ku Ndjambi, imba mba hupa.”
5 Jesaja tja zuva ombuze ndji yombara Hiskija, 6 otja yarura eziriro ndi a tja: “Muhona me ku tjivisa kutja o ha tirisiwa i Ovaasirie nomahungiriro wawo wokutja Muhona ke nokumuyama. 7 Muhona ma tjiti kutja indji ombara i zuve ondangu, ndji mai tjiti kutja i yaruke kehi rayo oini, nu Muhona me keizepaisira ngo.”
Ovaasirie mave hindi omatandero warwe
(2Ozo 19:8-19)8 Omuhongore wOvaasirie wa zuva kutja ombara Sanherib wa za mOlakis na karwisa otjihuro tjopopezu Libna; eye opa ira ngo okukahungira na ye. 9 Kwa zuvaka ombuze kOvaasirie kutja otjimbumba tjovarwe vOvaengipte tjaa tji hongorerwa i Tirhaka, ombara ya Etiopie, tje ya okuverwisa. Nombara tji ya zuva nai, arire tji ya hindi orutuu ku Hiskija, ombara ya Juda, 10 okumuraera nai: “Ndjambi ku u riyameka we ku raera kutja ove ko nokuwira momake wandje; nungwari ngoo wovisiwa i ye. 11 Ove wa zuva ozombara zOvaasirie tji ze tjita komahi ngamwa aehe ngu maze vanga okunyona. Nu mo ripura kutja, tjiri, mo yenene okuhena are? 12 Ootate mukururume va nyonene ovihuro ooGosan na Haran na Resef, nu va zepere ovandu va Eden, mba turire mOtelasar, nu kapa ri omukuru wawo ngwa sorere okuveyama. 13 Ozombara zovihuro ooHamat na Arpad na Sefarwajim na Hena na Iwa ze ri pi?”
14 Ombara Hiskija wa kambura orutuu kovahindwa ne ru rese. Eye wa ya kondjuwo ya Muhona, a katwa orutuu ndwi mbo momurungu wa Muhona, 15 na kumbu a tja: 16 “Muhona Omunamasaaehe, Ndjambi wa Israel, ngu u haama kotjihavero tjoye tjouhona kombanda yovakerubi, ove erike oove Ndjambi, ngu u honapara kombanda yomauhona aehe mouye. Ove wa utire eyuru nehi. 17 Nambano, Muhona, tu zuvira, nu tara ku imbi mbi mavi tjitwa ku eṱe. Puratena komambo aehe Sanherib ngu ma hungire okuyamburura ove, ngu u ri Ndjambi omunamuinyo. 18 Eṱe atuhe matu tjiwa, Muhona, kutja ozombara za Asirie za yandeka oviwaṋa ovingi, aze tjiti omahi wavyo okurira ongaango, 19 naze ningiririsa oomukuru vavyo vovisenginina mbe ha ri oomukuru oparukaze, nungwari mba ri oviserekarera vyomiti nomawe uriri, mbya ungurirwe i omake wovandu. 20 Nambano, Muhona, Ndjambi wetu, tu yama kOvaasirie kokutja oviwaṋa avihe mouye vi tjiwe kutja oove erike ngu u ri Ndjambi.”
Ombuze ya Jesaja kombara
(2Ozo 19:20-37)21 Jesaja arire tja hindi ombuze okukaraera ombara Hiskija kutja Muhona wa zuva ongumbiro yombara, ne i ziri nai: 22 “Otjihuro tja Jerusalem matji ku yoro, Sanherib, nu matji ku nyekerere. 23 Mo ripura kutja wa yamburura nu wa nyekerera uṋe? Ove wa ri nokuhinondengero ku ami, ngu mbi ri Omuyapuke wa Israel. 24 Ove wa hinda ovakarere voye okuyamburura ami amo tja ove nomatemba woye aehe wovita mwa huura ozondundu inḓa ozonde tjinenenene za Libanon. Ove we rihiva amo tja ingo wa ka otupapa itwi oture tjinenenene, nomimbonde imbi omiwamiwa, nokutja wa kavaza kokwara kwomahwa, nga pita. 25 Ove we rihiva amo tja wa hupura ozondjombo nu wa nwa omeva momahi wozonganda, nokutja ozombaze zovarwe voye wovita za tomba onḓonḓu Nil nga tji ya kaha.
26 “Ko na pu wa zuvire kutja ami mbe ripura okuṱuna oviṋa mbi avihe rukuru are? Nu nambano ami mbe vi yenenisa. Mbe ku pa omasa okutjita kutja ovihuro ovinamasa vi rire ovitambatundu. 27 Ovandu mba turire mo kava ri nomasa; owo aave tira, nu va ri nohoṋi; va ri otja omahozu mokuti poo otja ozondombora nḓa hapa komututu wondjuwo, nu nḓe nyosiwa i ombepo ombyu yokomuhuka.
28 “Nungwari ami me tjiwa oviṋa avihe vyoye na imbi mbi u tjita, nokoṋa akuhe ku mo i; nu me tjiwa tji mo pirukire ami. 29 Ami mba zuva omaserekarerero womapirukiro nga nomeritongamisiro woye; nu nambano me hweke oruuri meyuru roye, nombate motjinyo tjoye, nu me ku yarura nondjira tjingeyo ndji ndji wa eta.”
30 Jesaja wa tja nai kombara Hiskija: “Ihi otjiraisiro tjaimbi mbi mavi tjitwa, otjo hi: Ombura ndji na indji ndji mai yende mo ri ovikokotwa mbi mavi rihapere ovini, nungwari mombura indji oitjatatu mo yenene okukuna ovikokotwa vyoye nokuvikonda, nu mo kunu omivite nokurya omandjembere wavyo. 31 Nu imba mba hupa mOjuda mave takavara tjimuna ovikunwa, mbi mavi nangananisa omize vyavyo mehi, navi eta ovihape. 32 Mamu kara ovandu mOjerusalem na kondundu Sion mbu mave hupu, orondu Muhona Omunamasaaehe wa zikamisa kutja oviṋa mbi vi tjitwe.
33 “Imbi Muhona ombya hungirira ombara yOvaasirie a tja: ‘Oyo kai nokuhita motjihuro hi poo okuyaha otjiku nangarire tjimwe mu tjo. Kape novarwe wovita mbe notuvao, mbu mave ya popezu notjihuro ho, nu kape notumbo twomakoverero tu matu tungwa okukondoroka tjo. 34 Oyo ya yaruka nondjira tjingeyo ndji ndji ye ya na yo, nu kai nokuhita motjihuro hi. Ami, ngu mbi ri Muhona, mba hungire. 35 Ami me yeura otjihuro hi nu me tji yama mena rondjozikiro yandje omuini na mena romakwizikiro ngu mba tjita komukarere wandje David.’ ”
36 Omuengeri wa Muhona wa ya kozondanda zOvaasirie na kazepa ovarwe wovita 185,000. Nomuhuka omunene wependukirwa tjandje va rangavara mbo ava koka! 37 Sanherib, ombara yOvaasirie, otja womboroka, a huhunuka na yaruka kOninive. 38 Eyuva rimwe, eye ngunda ame rikotamenene mondjuwo onḓere yomukuru we Nisrok, ovazandu ve vevari Adramelek na Sareser arire tji ve mu zepa nomangaruvyo wawo, nave henene kehi ra Ararat. Omuzandu we warwe, Asarhadon, we mu pingena mouhona.
Ombara Hiskija ma ningire ondunge ku Jesaja
(2Ozo 19:1-7)1 Mokamanga ombara Hiskija tja za nokuzuva omaserekarerero wawo otja nyondorora ozombanda ze moruhoze, a zara ozombanda zomakutu na i kondjuwo ya Muhona. 2 Eye wa hinda Eljakim, omunane omunene wondjuwo youhona, na Sebna, omutjangerepo wouhona, nOvapristeri Oviuru komuprofete Jesaja, omuzandu wa Amos. Owo wina va zarere ozombanda zomakutu. 3 Ombuze ndje ve raera okukayandja ku Jesaja, oyo ndji: “Ndinondi oro eyuva romihihamo; eṱe matu verwa nu matu yambururwa. Tu ri otja omukazendu ngwe rirongerere okukapanduka, nungwari ngu hi nomasa okutjita nao. 4 Ombara yOvaasirie ya hinda omuhongore wayo omunene okuyamburura Ndjambi omunamuinyo. Muhona, Ndjambi woye, nga zuve omayamburiro nga, nu nga vere imba mbe ye hungira. Opu mo sokukumbira ovandu vetu ku Ndjambi, imba mba hupa.”
5 Jesaja tja zuva ombuze ndji yombara Hiskija, 6 otja yarura eziriro ndi a tja: “Muhona me ku tjivisa kutja o ha tirisiwa i Ovaasirie nomahungiriro wawo wokutja Muhona ke nokumuyama. 7 Muhona ma tjiti kutja indji ombara i zuve ondangu, ndji mai tjiti kutja i yaruke kehi rayo oini, nu Muhona me keizepaisira ngo.”
Ovaasirie mave hindi omatandero warwe
(2Ozo 19:8-19)8 Omuhongore wOvaasirie wa zuva kutja ombara Sanherib wa za mOlakis na karwisa otjihuro tjopopezu Libna; eye opa ira ngo okukahungira na ye. 9 Kwa zuvaka ombuze kOvaasirie kutja otjimbumba tjovarwe vOvaengipte tjaa tji hongorerwa i Tirhaka, ombara ya Etiopie, tje ya okuverwisa. Nombara tji ya zuva nai, arire tji ya hindi orutuu ku Hiskija, ombara ya Juda, 10 okumuraera nai: “Ndjambi ku u riyameka we ku raera kutja ove ko nokuwira momake wandje; nungwari ngoo wovisiwa i ye. 11 Ove wa zuva ozombara zOvaasirie tji ze tjita komahi ngamwa aehe ngu maze vanga okunyona. Nu mo ripura kutja, tjiri, mo yenene okuhena are? 12 Ootate mukururume va nyonene ovihuro ooGosan na Haran na Resef, nu va zepere ovandu va Eden, mba turire mOtelasar, nu kapa ri omukuru wawo ngwa sorere okuveyama. 13 Ozombara zovihuro ooHamat na Arpad na Sefarwajim na Hena na Iwa ze ri pi?”
14 Ombara Hiskija wa kambura orutuu kovahindwa ne ru rese. Eye wa ya kondjuwo ya Muhona, a katwa orutuu ndwi mbo momurungu wa Muhona, 15 na kumbu a tja: 16 “Muhona Omunamasaaehe, Ndjambi wa Israel, ngu u haama kotjihavero tjoye tjouhona kombanda yovakerubi, ove erike oove Ndjambi, ngu u honapara kombanda yomauhona aehe mouye. Ove wa utire eyuru nehi. 17 Nambano, Muhona, tu zuvira, nu tara ku imbi mbi mavi tjitwa ku eṱe. Puratena komambo aehe Sanherib ngu ma hungire okuyamburura ove, ngu u ri Ndjambi omunamuinyo. 18 Eṱe atuhe matu tjiwa, Muhona, kutja ozombara za Asirie za yandeka oviwaṋa ovingi, aze tjiti omahi wavyo okurira ongaango, 19 naze ningiririsa oomukuru vavyo vovisenginina mbe ha ri oomukuru oparukaze, nungwari mba ri oviserekarera vyomiti nomawe uriri, mbya ungurirwe i omake wovandu. 20 Nambano, Muhona, Ndjambi wetu, tu yama kOvaasirie kokutja oviwaṋa avihe mouye vi tjiwe kutja oove erike ngu u ri Ndjambi.”
Ombuze ya Jesaja kombara
(2Ozo 19:20-37)21 Jesaja arire tja hindi ombuze okukaraera ombara Hiskija kutja Muhona wa zuva ongumbiro yombara, ne i ziri nai: 22 “Otjihuro tja Jerusalem matji ku yoro, Sanherib, nu matji ku nyekerere. 23 Mo ripura kutja wa yamburura nu wa nyekerera uṋe? Ove wa ri nokuhinondengero ku ami, ngu mbi ri Omuyapuke wa Israel. 24 Ove wa hinda ovakarere voye okuyamburura ami amo tja ove nomatemba woye aehe wovita mwa huura ozondundu inḓa ozonde tjinenenene za Libanon. Ove we rihiva amo tja ingo wa ka otupapa itwi oture tjinenenene, nomimbonde imbi omiwamiwa, nokutja wa kavaza kokwara kwomahwa, nga pita. 25 Ove we rihiva amo tja wa hupura ozondjombo nu wa nwa omeva momahi wozonganda, nokutja ozombaze zovarwe voye wovita za tomba onḓonḓu Nil nga tji ya kaha.
26 “Ko na pu wa zuvire kutja ami mbe ripura okuṱuna oviṋa mbi avihe rukuru are? Nu nambano ami mbe vi yenenisa. Mbe ku pa omasa okutjita kutja ovihuro ovinamasa vi rire ovitambatundu. 27 Ovandu mba turire mo kava ri nomasa; owo aave tira, nu va ri nohoṋi; va ri otja omahozu mokuti poo otja ozondombora nḓa hapa komututu wondjuwo, nu nḓe nyosiwa i ombepo ombyu yokomuhuka.
28 “Nungwari ami me tjiwa oviṋa avihe vyoye na imbi mbi u tjita, nokoṋa akuhe ku mo i; nu me tjiwa tji mo pirukire ami. 29 Ami mba zuva omaserekarerero womapirukiro nga nomeritongamisiro woye; nu nambano me hweke oruuri meyuru roye, nombate motjinyo tjoye, nu me ku yarura nondjira tjingeyo ndji ndji wa eta.”
30 Jesaja wa tja nai kombara Hiskija: “Ihi otjiraisiro tjaimbi mbi mavi tjitwa, otjo hi: Ombura ndji na indji ndji mai yende mo ri ovikokotwa mbi mavi rihapere ovini, nungwari mombura indji oitjatatu mo yenene okukuna ovikokotwa vyoye nokuvikonda, nu mo kunu omivite nokurya omandjembere wavyo. 31 Nu imba mba hupa mOjuda mave takavara tjimuna ovikunwa, mbi mavi nangananisa omize vyavyo mehi, navi eta ovihape. 32 Mamu kara ovandu mOjerusalem na kondundu Sion mbu mave hupu, orondu Muhona Omunamasaaehe wa zikamisa kutja oviṋa mbi vi tjitwe.
33 “Imbi Muhona ombya hungirira ombara yOvaasirie a tja: ‘Oyo kai nokuhita motjihuro hi poo okuyaha otjiku nangarire tjimwe mu tjo. Kape novarwe wovita mbe notuvao, mbu mave ya popezu notjihuro ho, nu kape notumbo twomakoverero tu matu tungwa okukondoroka tjo. 34 Oyo ya yaruka nondjira tjingeyo ndji ndji ye ya na yo, nu kai nokuhita motjihuro hi. Ami, ngu mbi ri Muhona, mba hungire. 35 Ami me yeura otjihuro hi nu me tji yama mena rondjozikiro yandje omuini na mena romakwizikiro ngu mba tjita komukarere wandje David.’ ”
36 Omuengeri wa Muhona wa ya kozondanda zOvaasirie na kazepa ovarwe wovita 185,000. Nomuhuka omunene wependukirwa tjandje va rangavara mbo ava koka! 37 Sanherib, ombara yOvaasirie, otja womboroka, a huhunuka na yaruka kOninive. 38 Eyuva rimwe, eye ngunda ame rikotamenene mondjuwo onḓere yomukuru we Nisrok, ovazandu ve vevari Adramelek na Sareser arire tji ve mu zepa nomangaruvyo wawo, nave henene kehi ra Ararat. Omuzandu we warwe, Asarhadon, we mu pingena mouhona.
