Opaska Oitjavari
1 Nu Muhona wa hungira ku Moses mokuti onguza Sinai, momueze omutenga wombura oitjavari, Ovaisrael tji va za nokupita mOengipte, na tja; 2 “Ovaisrael ngave ṱakamise Opaska moruveze ndwa tuwa po. 3 Ngave i tjite meyuva oritjamurongo na yane romueze mbwi, komuihi, moruveze ndwa tuwa po, otja komazikamisiro nomaraerero aehe.” 4 Moses otja raera kOvaisrael kutja ve tjite Opaska. 5 Nowo otji va tjita nai meyuva oritjamurongo na yane romueze omutenga, kuṱa kongurova, mokuti onguza Sinai. Ovaisrael va tjita otja Muhona pa rakiza ku Moses.
6 Nu pa ri ovarumendu tjiva mba ri ovahakohoke, tjinga ava ṱuna korurova, nowo kava yenenene okutjita Opaska meyuva ndo. Nowo opu va ira ku Moses na Aron, 7 ave katja: “Oweṱe ovahakohoke tjinga atwa ṱuna korurova; nokutjavi tji matu tjaerwa okueta otjiyambo tjombunguhiro ku Muhona puna Ovaisrael ovakwetu?”
8 Nu Moses we ve zira a tja: “Undjeye nga tji mba zuu omaraerero ku Muhona.”
9 Muhona wa hungira ku Moses a 10 raera Ovaisrael kutja tji pe nomundu mu eṋe poo mozondekurona zeṋu ngwa zunḓarisiwa i okuṱuna korurova poo ngu ri mouyenda wokokure, nga tjitire Muhona omukandi wOpaska. 11 Meyuva oritjamurongo na yane romueze outjavari, komuihi, nga rire tji ve i tjiti, ngave i rye nozomboroto nḓe hi nosurise puna omiti omitjatise omiruru. 12 Owo ave hupisa ko okaṋa nga komuhuka weyuva rarwe, nu ave ha teya ngamwa eṱupa rondjona yOpaska; ngave tjite Opaska otja komazikamisiro aehe. 13 Nungwari omundu ngu ri omukohoke, nu ngu he ri mouyenda, nu ngu hi nokutjita omukandi wOpaska, nga kondwe kotjiwaṋa tjawo; eye tjinga e ha punguhirire Muhona ombunguhiro moruveze ndwa tuwa po. Omundu ngwi nga vererwe ourunde we.
14 “Nomundu wozonganda ngu tura mokati keṋu tji ma vanga okutjitira Muhona omukandi wOpaska, nge u tjite otja komazikamisiro nomaraerero wayo. Ngaye rire omazikamisiro tjingewo ku eṋe na kowozonganda na komukwatera wehi.”
Otjikamba tjomuriro
(Eks 40:34-38)15 Nu meyuva, ndi va zika Ondanda yOmahakaeneno, okutja ondanda mu mu nOtjipwikiro tjOmerikutiropamwe, otjikamba otji tja vandeka indji Ondanda yOmahakaeneno, nu okuza kongurova nga komuhuka weyuva rarwe otjo aatji munika tjimuna omuriro. 16 Otji pa kara nai oruveze aruhe: Ihi otjikamba tja vandeka Ondanda yOmahakaeneno, nouṱuku aatji munika tjimuna omuriro. 17 Aruhe otjikamba tji tja yeruruka okuza kOndanda, Ovaisrael otjaave haṋa ozondanda zawo rukwao. 18 Ovaisrael ave haṋa ozondanda nu ave ze ziki rukwao otja komarakiza wa Muhona. Nu otjikamba ngunda atji ri kombanda yOndanda yOmahakaeneno, owo va kara mozondanda. 19 Notjikamba tji tja kara omayuva omengi kombanda yOndanda yOmahakaeneno, Ovaisrael va kara nonḓuviro ku Muhona nave hakaenda. 20 Porumwe otjikamba aatji kara omayuva tjiva kombanda yOndanda yOmahakaeneno; owo ave ziki ozondanda poo ave ze haṋa otja komarakiza wa Muhona. 21 Nu porumwe otjikamba aatji kara okuza kongurova nga komuhuka weyuva rarwe uriri, nu tji tja zu ko, otjaave womboroka. Omutenya poo ouṱuku otjikamba tji tja zu ko, otjaave womboroka. 22 Kutja omayuva yevari poo omueze umwe poo orure komurungu wanao, otjikamba tji tja kara orure kombanda yOndanda yOmahakaeneno, Ovaisrael otjaave kara mozondanda, nave ha ka wondja; nu tji tja yeruruka, otjaave ka wondja. 23 Owo ave ziki nu ave haṋa ozondanda otja komarakiza wa Muhona ku Moses.
Opaska Oitjavari
1 Nu Muhona wa hungira ku Moses mokuti onguza Sinai, momueze omutenga wombura oitjavari, Ovaisrael tji va za nokupita mOengipte, na tja; 2 “Ovaisrael ngave ṱakamise Opaska moruveze ndwa tuwa po. 3 Ngave i tjite meyuva oritjamurongo na yane romueze mbwi, komuihi, moruveze ndwa tuwa po, otja komazikamisiro nomaraerero aehe.” 4 Moses otja raera kOvaisrael kutja ve tjite Opaska. 5 Nowo otji va tjita nai meyuva oritjamurongo na yane romueze omutenga, kuṱa kongurova, mokuti onguza Sinai. Ovaisrael va tjita otja Muhona pa rakiza ku Moses.
6 Nu pa ri ovarumendu tjiva mba ri ovahakohoke, tjinga ava ṱuna korurova, nowo kava yenenene okutjita Opaska meyuva ndo. Nowo opu va ira ku Moses na Aron, 7 ave katja: “Oweṱe ovahakohoke tjinga atwa ṱuna korurova; nokutjavi tji matu tjaerwa okueta otjiyambo tjombunguhiro ku Muhona puna Ovaisrael ovakwetu?”
8 Nu Moses we ve zira a tja: “Undjeye nga tji mba zuu omaraerero ku Muhona.”
9 Muhona wa hungira ku Moses a 10 raera Ovaisrael kutja tji pe nomundu mu eṋe poo mozondekurona zeṋu ngwa zunḓarisiwa i okuṱuna korurova poo ngu ri mouyenda wokokure, nga tjitire Muhona omukandi wOpaska. 11 Meyuva oritjamurongo na yane romueze outjavari, komuihi, nga rire tji ve i tjiti, ngave i rye nozomboroto nḓe hi nosurise puna omiti omitjatise omiruru. 12 Owo ave hupisa ko okaṋa nga komuhuka weyuva rarwe, nu ave ha teya ngamwa eṱupa rondjona yOpaska; ngave tjite Opaska otja komazikamisiro aehe. 13 Nungwari omundu ngu ri omukohoke, nu ngu he ri mouyenda, nu ngu hi nokutjita omukandi wOpaska, nga kondwe kotjiwaṋa tjawo; eye tjinga e ha punguhirire Muhona ombunguhiro moruveze ndwa tuwa po. Omundu ngwi nga vererwe ourunde we.
14 “Nomundu wozonganda ngu tura mokati keṋu tji ma vanga okutjitira Muhona omukandi wOpaska, nge u tjite otja komazikamisiro nomaraerero wayo. Ngaye rire omazikamisiro tjingewo ku eṋe na kowozonganda na komukwatera wehi.”
Otjikamba tjomuriro
(Eks 40:34-38)15 Nu meyuva, ndi va zika Ondanda yOmahakaeneno, okutja ondanda mu mu nOtjipwikiro tjOmerikutiropamwe, otjikamba otji tja vandeka indji Ondanda yOmahakaeneno, nu okuza kongurova nga komuhuka weyuva rarwe otjo aatji munika tjimuna omuriro. 16 Otji pa kara nai oruveze aruhe: Ihi otjikamba tja vandeka Ondanda yOmahakaeneno, nouṱuku aatji munika tjimuna omuriro. 17 Aruhe otjikamba tji tja yeruruka okuza kOndanda, Ovaisrael otjaave haṋa ozondanda zawo rukwao. 18 Ovaisrael ave haṋa ozondanda nu ave ze ziki rukwao otja komarakiza wa Muhona. Nu otjikamba ngunda atji ri kombanda yOndanda yOmahakaeneno, owo va kara mozondanda. 19 Notjikamba tji tja kara omayuva omengi kombanda yOndanda yOmahakaeneno, Ovaisrael va kara nonḓuviro ku Muhona nave hakaenda. 20 Porumwe otjikamba aatji kara omayuva tjiva kombanda yOndanda yOmahakaeneno; owo ave ziki ozondanda poo ave ze haṋa otja komarakiza wa Muhona. 21 Nu porumwe otjikamba aatji kara okuza kongurova nga komuhuka weyuva rarwe uriri, nu tji tja zu ko, otjaave womboroka. Omutenya poo ouṱuku otjikamba tji tja zu ko, otjaave womboroka. 22 Kutja omayuva yevari poo omueze umwe poo orure komurungu wanao, otjikamba tji tja kara orure kombanda yOndanda yOmahakaeneno, Ovaisrael otjaave kara mozondanda, nave ha ka wondja; nu tji tja yeruruka, otjaave ka wondja. 23 Owo ave ziki nu ave haṋa ozondanda otja komarakiza wa Muhona ku Moses.
