Ovaisrael mave rirongerere ovita
1 Okuzambo Ovaisrael avehe va kumuka okuza kOdan nga kOberseba, novandu va Gilead wina, nombongo ya worongana otja omurumendu umwe komurungu wa Muhona mOmispa. 2 Novanane vomihoko avihe vyOvaisrael va ri pombongarero ndji yotjiwaṋa tja Ndjambi. Nu pa ri ovarumendu ovarwe wovita mbe kayenda pehi omayovi omasere yane mba ri nomangaruvyo. 3 Nu Ovabenjamin va zuva kutja Ovaisrael va woronganena mOmispa.
Ovaisrael va purasana nai: “Ouhasemba otja imbwi wa tjitwa vi?” 4 NOmulevi, omurumendu womukazendu ngwa ṱa, arire tja serekarere a tja: “Ami mbe ya puna omukazendu wandje omumbanda kOgibea tjomuhoko wa Benjamin okurara mo. 5 Novature va Gibea ve ndji sekamena nave kovere ondjuwo ouṱuku. Owo va vanga okundjizepa nave tjere omukazendu wandje omumbanda nga tja koka. 6 Notji mba toora orurova romukazendu wandje omumbanda, e ru kondo movindimbu omurongo na vivari ne vi hindi komihoko omurongo na vivari vya Israel, orondu owo tjinga ava tjita otjiṋa otjiyaukise mOisrael. 7 Eṋe amuhe mbu mu ri mba oweṋe Ovaisrael. Nambano ripureye notjiṋa hi, nu mu zuvasane kutja mamu tjiti vi.”
8 Notjiwaṋa atjihe tja sekama otja omundu umwe natji tja: “Kape na umwe wetu ngu ma yaruka konganda poo kondjuwo ye! 9 Nambano otjiṋa tji matu vanga okutjita kOgibea, otjo hi: Ngatu yumbe ozohanga! 10 Ovarumendu Ovaisrael omurongo kesere, nesere rimwe keyovi, neyovi rimwe komayovi omurongo, ve kapahere otjimbumba tjovita onguta. Nu kombunda yomakotokero wawo ngatu verere Gibea tjomuhoko wa Benjamin ondjito ondjaukise, ndji tja tjita kOisrael.” 11 Ovaisrael avehe otji va wongara otja omurumendu umwe okukarwisa otjihuro ho.
12 Tjazumba omihoko vya Israel vya tuma ovarumendu komuhoko wa Benjamin nombuze ndji: “Ondjito yatjike ondjaukise ndja tjitwa mokati keṋu? 13 Nambano tu peye ovarumendu mba ovarunde mOgibea tu ve zepe kutja ourunde mbwi u yandisiwe mOisrael.” Nungwari Ovabenjamin kave zuvire kOvaisrael ovakwao. 14 Nowo otji ve ya kOgibea okuza kovirongo avihe vyOvabenjamin okurwisa Ovaisrael ovakwao. 15 Nu meyuva ndo pa worongana Ovabenjamin ovarwe mbe ri pangiṋa novirwise omayovi omirongo vivari na hamboumwe okuza kovirongo vyawo, nokuhinovature va Gibea; mOgibea mwa worongana ovarumendu omasere hambombari ovatoororwa. 16 Nu mokati kovandu mba avehe mwa ri ovarumendu ovatoororwa omasere hambombari ovamoho, auhe wawo aa yumbu ewe nawa nokuhinokuparwisa. 17 Ovaisrael wina tji va varwa, nokuhinomuhoko wa Benjamin, pa munika otjivaro tjovarumendu mbe ri pangiṋa novirwise omayovi omasere yane, avehe ozombangaṋe.
Ovita kuna Ovabenjamin
18 Ovaisrael va ya kObetel okukapura ku Ndjambi kutja omuhoko uṋe mokati komihoko vyawo mbu mau tenge po okurwisa Ovabenjamin.
Nu Muhona wa zira a tja: “Omuhoko wa Juda nga rire mbwa tenge po.”
19 Mependukirwa ra indo Ovaisrael otji va womboroka nave katona ozondanda popezu na Gibea. 20 Nowo va kayenda okukarwisa Ovabenjamin nave kakurama motuteto twomarwiro ava hungama Gibea. 21 NOvabenjamin otji va pita mOgibea nave nyono Ovaisrael omayovi omirongo vivari na yevari meyuva ndo. 22-23 Nu moruveze tjingero ndo Ovaisrael va karonda kObetel nave karirira komurungu wa Muhona nga kongurova. Owo va pura Muhona ave tja: “Ngatu karwe rukwao novakwetu votjiwaṋa tjOvabenjamin?”
Muhona wa zira a tja: “Twendeye mu keverwise!”
Notjimbumba tjOvaisrael tjovita tja yanḓipara; notjo tja kurama rukwao motuteto twomarwiro, imba pu va kuramene meyuva etenga. 24 Ovaisrael va kumuka rukwao meyuva oritjavari okukarwisa Ovabenjamin. 25 NOvabenjamin wina va pita okuza mOgibea meyuva oritjavari ndo; nu otjikando hi va zepa Ovaisrael ovarwe ovanavirwise omayovi omurongo na hambondatu. 26 Tjazumba Ovaisrael avehe va ronda kObetel. Ovo va kahaama mbo komurungu wa Ndjambi amave riri nokuhinokurya nga kongurova; nowo va punguhira Muhona ozombunguhiro ozoningiririsiwa nozohange. 27 NOvaisrael va pura Muhona, orondu omayuva ngo Otjipwikiro tjOmerikutiropamwe wa Ndjambi, tja ri mObetel. 28 Nu Pinhas, omuzandu wa Eleasar, omuzandu wa Aron, omayuva ngo aa karere Muhona otja omupristeri. Novandu va pura Muhona ave tja: “Ngatu kumuke rukwao okukarwa novakwetu Ovabenjamin poo ngatu ve ese?”
Muhona arire tja ziri a tja: “Kumukeye uri, muhuka tjinga ame ve yandja mouvara weṋu.”
29 Okuzambo Ovaisrael otji va twa ovarumendu ovarwe wovita motutatwa okukondoroka Gibea. 30 Nu meyuva oritjatatu Ovaisrael va sekamena Ovabenjamin, nave twa ovarwe vawo motuteto twomarwiro ouhunga na Gibea tjimuna ovikando imbi vivari ovitenga. 31 NOvabenjamin va pita okurwa nave hemenwa i Ovaisrael okuhumburuka kokure notjihuro. Otja tji va tjita rutenga, Ovabenjamin va uta okuzepa Ovaisrael tjiva mondjira ya Betel na mondjira ya Gibea; mehi eparanga ndi va zepa mo Ovaisrael mangara omirongo vitatu. 32 Ovabenjamin otji va tjangovasi va toṋa Ovaisrael tjimuna otjikando hi otjitenga.
Nu vari Ovaisrael va zuvasana ave tja: “Ngatu yaruke ovihahambunda okuvehemena ve ze ko kotjihuro nu ve yende kozondjira ozonene.” 33 Ovaisrael avehe opu va zira po poṋa pu va kuramene nave kaworongenena mObaal-Tamar. Nungwari Ovaisrael ovarwe, mba ṱarere motutatwa, va purukuta tjimanga motutatwa twawo tu twa ri kuṱa kongurova kwa Geba. 34 Ovarumendu ovarwe wovita omayovi omurongo mba toororwa mOvaisrael avehe va rwisa Gibea; notjirwa hi tja ri otjizeu tjinene. NOvabenjamin kave tjizire kutja ve ri pokuyandekwa. 35 Muhona wa yandja outoṋi kOvaisrael kombanda yotjimbumba tjOvabenjamin tjovita. Ovaisrael va zepa ovanavita omayovi omirongo vivari na yetano nesere rimwe meyuva ndo. 36 Ovabenjamin otji ve rimuna kutja va haverwa.
Nu vari Ovaisrael ve riyarura ombunda tjinene okuza kOvabenjamin, tjinga ave riyameka kovarumendu, mba ri motutatwa tu twa kondorokere Gibea. 37 Nu imba mba ri motutatwa va ṋiṋikiza okutupuka kOgibea, ave taurire motjihuro nave zepa ovature vatjo avehe. 38 NOvaisrael va zuvasana na imba mba ri motutatwa kutja ve twimise otjikamba otjinene tjomuise motjihuro. 39 Notjimbumba tjOvaisrael tjovita tja tanauka okutupuka. NOvabenjamin va uta okuzepa tjiva motjimbumba tjOvaisrael, ovarumendu mangara omirongo vitatu. Nowo otji ve rihungirira ave tja: “Twe ve havere tjimuna rutenga.” 40 Nu mokamanga otjikamba tjomuise tja uta okuronda meyuru okuza motjihuro. NOvabenjamin tji va taviza kombunda va muna otjihuro atjihe atja rundu motururumo. 41 Notjimbumba tjOvaisrael tji tja tanauka, Ovabenjamin arire tji va uruma, tjinga ave rimuna kutja ve ri moumba. 42 Nowo va yaruka ombunda okuza po pOvaisrael nave tupuka okuhungama okuti onguza; nungwari otjimbumba tjOvaisrael tje ve vaza, nu imba mba zire movihuro ve ve kovera nave ve nyono. 43 Ovaisrael va tezera Ovabenjamin nave kevekoverera pomasuviro wawo, ombarakana na Gibea kuṱa komuhuka. 44 Nu pa ṱa ovarumendu Ovabenjamin omayovi omurongo na hambondatu, avehe ovarwe omapenda porwe. 45 Nu imba mba hupa va tanauka nave tupuka mokuti onguza kuṱa kOruuwa rwa Rimon. Omayovi yetano wawo ya ṱira mozondjira. NOvaisrael ve ve tezera nga kOgidom, nave zepa Ovabenjamin omayovi yevari. 46 Otjivaro atjihe kumwe tjOvabenjamin, mba ṱa meyuva ndo, tja ri ovarumendu omayovi omirongo vivari na yetano, avehe porwe ovanavirwise ovizeu nozombangaṋe.
47 Nungwari ovarumendu omasere hamboumwe va tanauka ave tupuka okuhungama okuti onguza kOruuwa rwa Rimon, nave kakara ngo omieze vine. 48 NOvaisrael va yaruka kOvabenjamin mba sewa mOgibea, nave zepa ovandu novinamuinyo na ngamwa atjihe tji va muna. Wina va hwika ovihuro avihe mbya ri mehi ndo.
Ovaisrael mave rirongerere ovita
1 Okuzambo Ovaisrael avehe va kumuka okuza kOdan nga kOberseba, novandu va Gilead wina, nombongo ya worongana otja omurumendu umwe komurungu wa Muhona mOmispa. 2 Novanane vomihoko avihe vyOvaisrael va ri pombongarero ndji yotjiwaṋa tja Ndjambi. Nu pa ri ovarumendu ovarwe wovita mbe kayenda pehi omayovi omasere yane mba ri nomangaruvyo. 3 Nu Ovabenjamin va zuva kutja Ovaisrael va woronganena mOmispa.
Ovaisrael va purasana nai: “Ouhasemba otja imbwi wa tjitwa vi?” 4 NOmulevi, omurumendu womukazendu ngwa ṱa, arire tja serekarere a tja: “Ami mbe ya puna omukazendu wandje omumbanda kOgibea tjomuhoko wa Benjamin okurara mo. 5 Novature va Gibea ve ndji sekamena nave kovere ondjuwo ouṱuku. Owo va vanga okundjizepa nave tjere omukazendu wandje omumbanda nga tja koka. 6 Notji mba toora orurova romukazendu wandje omumbanda, e ru kondo movindimbu omurongo na vivari ne vi hindi komihoko omurongo na vivari vya Israel, orondu owo tjinga ava tjita otjiṋa otjiyaukise mOisrael. 7 Eṋe amuhe mbu mu ri mba oweṋe Ovaisrael. Nambano ripureye notjiṋa hi, nu mu zuvasane kutja mamu tjiti vi.”
8 Notjiwaṋa atjihe tja sekama otja omundu umwe natji tja: “Kape na umwe wetu ngu ma yaruka konganda poo kondjuwo ye! 9 Nambano otjiṋa tji matu vanga okutjita kOgibea, otjo hi: Ngatu yumbe ozohanga! 10 Ovarumendu Ovaisrael omurongo kesere, nesere rimwe keyovi, neyovi rimwe komayovi omurongo, ve kapahere otjimbumba tjovita onguta. Nu kombunda yomakotokero wawo ngatu verere Gibea tjomuhoko wa Benjamin ondjito ondjaukise, ndji tja tjita kOisrael.” 11 Ovaisrael avehe otji va wongara otja omurumendu umwe okukarwisa otjihuro ho.
12 Tjazumba omihoko vya Israel vya tuma ovarumendu komuhoko wa Benjamin nombuze ndji: “Ondjito yatjike ondjaukise ndja tjitwa mokati keṋu? 13 Nambano tu peye ovarumendu mba ovarunde mOgibea tu ve zepe kutja ourunde mbwi u yandisiwe mOisrael.” Nungwari Ovabenjamin kave zuvire kOvaisrael ovakwao. 14 Nowo otji ve ya kOgibea okuza kovirongo avihe vyOvabenjamin okurwisa Ovaisrael ovakwao. 15 Nu meyuva ndo pa worongana Ovabenjamin ovarwe mbe ri pangiṋa novirwise omayovi omirongo vivari na hamboumwe okuza kovirongo vyawo, nokuhinovature va Gibea; mOgibea mwa worongana ovarumendu omasere hambombari ovatoororwa. 16 Nu mokati kovandu mba avehe mwa ri ovarumendu ovatoororwa omasere hambombari ovamoho, auhe wawo aa yumbu ewe nawa nokuhinokuparwisa. 17 Ovaisrael wina tji va varwa, nokuhinomuhoko wa Benjamin, pa munika otjivaro tjovarumendu mbe ri pangiṋa novirwise omayovi omasere yane, avehe ozombangaṋe.
Ovita kuna Ovabenjamin
18 Ovaisrael va ya kObetel okukapura ku Ndjambi kutja omuhoko uṋe mokati komihoko vyawo mbu mau tenge po okurwisa Ovabenjamin.
Nu Muhona wa zira a tja: “Omuhoko wa Juda nga rire mbwa tenge po.”
19 Mependukirwa ra indo Ovaisrael otji va womboroka nave katona ozondanda popezu na Gibea. 20 Nowo va kayenda okukarwisa Ovabenjamin nave kakurama motuteto twomarwiro ava hungama Gibea. 21 NOvabenjamin otji va pita mOgibea nave nyono Ovaisrael omayovi omirongo vivari na yevari meyuva ndo. 22-23 Nu moruveze tjingero ndo Ovaisrael va karonda kObetel nave karirira komurungu wa Muhona nga kongurova. Owo va pura Muhona ave tja: “Ngatu karwe rukwao novakwetu votjiwaṋa tjOvabenjamin?”
Muhona wa zira a tja: “Twendeye mu keverwise!”
Notjimbumba tjOvaisrael tjovita tja yanḓipara; notjo tja kurama rukwao motuteto twomarwiro, imba pu va kuramene meyuva etenga. 24 Ovaisrael va kumuka rukwao meyuva oritjavari okukarwisa Ovabenjamin. 25 NOvabenjamin wina va pita okuza mOgibea meyuva oritjavari ndo; nu otjikando hi va zepa Ovaisrael ovarwe ovanavirwise omayovi omurongo na hambondatu. 26 Tjazumba Ovaisrael avehe va ronda kObetel. Ovo va kahaama mbo komurungu wa Ndjambi amave riri nokuhinokurya nga kongurova; nowo va punguhira Muhona ozombunguhiro ozoningiririsiwa nozohange. 27 NOvaisrael va pura Muhona, orondu omayuva ngo Otjipwikiro tjOmerikutiropamwe wa Ndjambi, tja ri mObetel. 28 Nu Pinhas, omuzandu wa Eleasar, omuzandu wa Aron, omayuva ngo aa karere Muhona otja omupristeri. Novandu va pura Muhona ave tja: “Ngatu kumuke rukwao okukarwa novakwetu Ovabenjamin poo ngatu ve ese?”
Muhona arire tja ziri a tja: “Kumukeye uri, muhuka tjinga ame ve yandja mouvara weṋu.”
29 Okuzambo Ovaisrael otji va twa ovarumendu ovarwe wovita motutatwa okukondoroka Gibea. 30 Nu meyuva oritjatatu Ovaisrael va sekamena Ovabenjamin, nave twa ovarwe vawo motuteto twomarwiro ouhunga na Gibea tjimuna ovikando imbi vivari ovitenga. 31 NOvabenjamin va pita okurwa nave hemenwa i Ovaisrael okuhumburuka kokure notjihuro. Otja tji va tjita rutenga, Ovabenjamin va uta okuzepa Ovaisrael tjiva mondjira ya Betel na mondjira ya Gibea; mehi eparanga ndi va zepa mo Ovaisrael mangara omirongo vitatu. 32 Ovabenjamin otji va tjangovasi va toṋa Ovaisrael tjimuna otjikando hi otjitenga.
Nu vari Ovaisrael va zuvasana ave tja: “Ngatu yaruke ovihahambunda okuvehemena ve ze ko kotjihuro nu ve yende kozondjira ozonene.” 33 Ovaisrael avehe opu va zira po poṋa pu va kuramene nave kaworongenena mObaal-Tamar. Nungwari Ovaisrael ovarwe, mba ṱarere motutatwa, va purukuta tjimanga motutatwa twawo tu twa ri kuṱa kongurova kwa Geba. 34 Ovarumendu ovarwe wovita omayovi omurongo mba toororwa mOvaisrael avehe va rwisa Gibea; notjirwa hi tja ri otjizeu tjinene. NOvabenjamin kave tjizire kutja ve ri pokuyandekwa. 35 Muhona wa yandja outoṋi kOvaisrael kombanda yotjimbumba tjOvabenjamin tjovita. Ovaisrael va zepa ovanavita omayovi omirongo vivari na yetano nesere rimwe meyuva ndo. 36 Ovabenjamin otji ve rimuna kutja va haverwa.
Nu vari Ovaisrael ve riyarura ombunda tjinene okuza kOvabenjamin, tjinga ave riyameka kovarumendu, mba ri motutatwa tu twa kondorokere Gibea. 37 Nu imba mba ri motutatwa va ṋiṋikiza okutupuka kOgibea, ave taurire motjihuro nave zepa ovature vatjo avehe. 38 NOvaisrael va zuvasana na imba mba ri motutatwa kutja ve twimise otjikamba otjinene tjomuise motjihuro. 39 Notjimbumba tjOvaisrael tjovita tja tanauka okutupuka. NOvabenjamin va uta okuzepa tjiva motjimbumba tjOvaisrael, ovarumendu mangara omirongo vitatu. Nowo otji ve rihungirira ave tja: “Twe ve havere tjimuna rutenga.” 40 Nu mokamanga otjikamba tjomuise tja uta okuronda meyuru okuza motjihuro. NOvabenjamin tji va taviza kombunda va muna otjihuro atjihe atja rundu motururumo. 41 Notjimbumba tjOvaisrael tji tja tanauka, Ovabenjamin arire tji va uruma, tjinga ave rimuna kutja ve ri moumba. 42 Nowo va yaruka ombunda okuza po pOvaisrael nave tupuka okuhungama okuti onguza; nungwari otjimbumba tjOvaisrael tje ve vaza, nu imba mba zire movihuro ve ve kovera nave ve nyono. 43 Ovaisrael va tezera Ovabenjamin nave kevekoverera pomasuviro wawo, ombarakana na Gibea kuṱa komuhuka. 44 Nu pa ṱa ovarumendu Ovabenjamin omayovi omurongo na hambondatu, avehe ovarwe omapenda porwe. 45 Nu imba mba hupa va tanauka nave tupuka mokuti onguza kuṱa kOruuwa rwa Rimon. Omayovi yetano wawo ya ṱira mozondjira. NOvaisrael ve ve tezera nga kOgidom, nave zepa Ovabenjamin omayovi yevari. 46 Otjivaro atjihe kumwe tjOvabenjamin, mba ṱa meyuva ndo, tja ri ovarumendu omayovi omirongo vivari na yetano, avehe porwe ovanavirwise ovizeu nozombangaṋe.
47 Nungwari ovarumendu omasere hamboumwe va tanauka ave tupuka okuhungama okuti onguza kOruuwa rwa Rimon, nave kakara ngo omieze vine. 48 NOvaisrael va yaruka kOvabenjamin mba sewa mOgibea, nave zepa ovandu novinamuinyo na ngamwa atjihe tji va muna. Wina va hwika ovihuro avihe mbya ri mehi ndo.
