Simson mOgasa
1 Eyuva rimwe Simson wa ya kotjihuro tjOvafilisti Gasa. Neye wa kamuna ko omukazendu omukorondu na hiti moye. 2 Nu kwe ya ombuze kovandu va Gasa yokutja Simson weya mo. Nowo va kovera poṋa mbo nave mu tjungire ouṱuku auhe pomuvero wotjihuro. Nouṱuku auhe va porimana uriri amave ripura nai: “Tji pa tji otji matu mu zepa.” 3 Nungwari Simson wa rara nga mokati kouṱuku. Neye wa penduka na kambura imbi ovipapeko vivari vyomuvero wotjihuro ne vi zukura avihe nozongambezero zavyo notjipate. Eye we vi twa koviṱuve vye ne vi twara kondomba yondundu ndja ri ouhunga na Hebron.
Simson na Delila
4 Kombunda yanao Simson wa hura omukazendu wena Delila ngwa turire motjana tja Sorek. 5 Ozombara nḓa ndano zOvafilisti za ya ku Delila naze katja nai: “Hungirisa Simson nawa u konḓonone kutja omasa we omanene nga ye za pi, nokutja matu mu havere nomuhingo uṋe nokumungundiparisa. Auhe wetu me ku pe ovimariva ovisilveri eyovi rimwe nesere.”
6 Delila wa tja ku Simson: “Arikana, ndji raera kutja omasa woye omanene nai ye za pi, nokutja mo pandekwa na tjike u haverwe.”
7 Simson arire tje mu ziri a tja: “Tji mba pandekwa nomiko hambombari vyouta, mbi hiya kaha, otji me ngundipara ne sana otja omundu ngamwa auhe.”
8 Nozombara zOvafilisti otji za etera Delila omiko hambombari vyouta omitarazu, mbi hiya kaha, neye wa pandeka na vyo Simson. 9 Ovemutjendjereke ngunda ava haama metuwo rarwe, Delila arire tja ravaere na tja: “Simson, Ovafilisti owo mba kombanda yoye!” Neye wa pora imbi omiko vyouta tjimuna ozosepa tji maze poka tji kwa ṱunu omuriro; nomasa we kaye horokere ko.
10 Delila opa tjera nai ku Simson: “Tara, ove we ndji tikura nu we ndji korere ovizeze. Arikana, nambano ndji raera kutja u pandekwa na tjike.”
11 Neye we mu zira a tja: “Tji mba pandekwa tjinene okupamisiwa nozongoze ozombe nḓe hiya ungura otji me ngundipara ne sana otja omundu ngamwa auhe.”
12 Delila arire tja kambura ozongoze ozombe ne mu pandeke na zo na tja ku ye: “Simson, Ovafilisti owo mba kombanda yoye!” Imba ovemutjendjereke tjandje ve ri metuwo rarwe. Nungwari eye we ze pora otja ozosepa pomaoko we.
13 Nu Delila wa tja ku Simson: “Nga mba we ndji tikura nu we ndji korere ovizeze. Ndji raera kutja u pandekwa na tjike.”
Neye we mu zira a tja: “Tji wa kutire ozondjise hambombari nḓa wozewa motjiuru tjandje motjiwoze no ze papere nomboha, ami otji me ngundipara ne sana otja omundu ngamwa auhe.”
14 Delila we mu zezenga nga tja rara, tjazumba a kutire ozondjise hambombari nḓa wozewa motjiuru tje motjiwoze, ne ze papere nomboha, arire tja ravaere a tja: “Simson, Ovafilisti owo mba kombanda yoye!” Neye wa penduka mozomboṱu na zukura omboha puna ihi otjiwoze.
15 Nu Delila wa tja nai ku ye: “Ove mo sora vi okutja we ndji suvera, omutima woye ngunda au he ri pu ami. Ove nga mba we ndji tikura tutatu, nu ko hororere ku ami kutja omasa woye tji ye ri omanene nai opu tjike.” 16 Delila otje mu kendisa nomambo we eyuva arihe, ne he mu pe orusuvo nga Simson tja urwa azeri kutja a koke. 17 Korusenina Simson wa raera Delila ouatjiri auhe na tja: “Nga mba kaku na indu kwa ṱunine otjikonde kotjiuru tjandje, tjinga ambi ri Omunasirite wa Ndjambi okuza kongwatero yandje. Tji mba kondwa ozondjise, omasa wandje maye piti, nami otji me ngundipara ne sana otja omundu ngamwa auhe.”
18 Nu Delila tja muna kutja Simson we mu raere ouatjiri auhe wa hinda ombuze kozombara zOvafilisti a tja: “Otjikando hi kotokeye rumwe rukwao, orondu Simson we ndji raere ouatjiri auhe.” Nozombara zOvafilisti ze ya naze eterere ovimariva. 19 Nu Delila wa zezengera Simson pomatumbo we nga tja rara, na isana omurumendu ngwe ya okukonda ozondjise hambombari nḓa wozewa motjiuru tja Simson motjiwoze. Neye wa yendayenda ama ngundipara, nomasa we ya pita. 20 Delila wa ravaera a tja: “Simson, Ovafilisti owo mba kombanda yoye!” Neye tja penduka mozomboṱu we ripura nai: “Ami me rikutura ne kayenda uriri tjimuna ovikando avihe.” Orondu ka tjivirwe kutja Muhona wa zu po pu ye. 21 NOvafilisti va kambura Simson nave mu homona omeho, notji ve mu twara kOgasa. Nowo ve mu pandeka novipandeke vyovitenda, neye wa kara pokukweya ombako motjovakamburwa. 22 Nungwari inḓa ozondjise nḓa konderwe za uta okuhapa rukwao.
Onḓiro ya Simson
23 Ozombara nḓa zOvafilisti za wongara okutjita ombunguhiro onene kotjisenginina Dagon. Nozo za yoroka aze tja: “Omukuru wetu wotjisenginina we tu pa outoṋi komunavita na eṱe Simson!” 24 Notjiwaṋa tji tje mu muna tja tanga omukuru watjo wotjisenginina atji tja: “Omukuru wetu wotjisenginina we tu pa outoṋi komunavita na eṱe Simson ngwa nyona ehi retu na zepa ovengi vetu!” 25 Nowo va yoroka tjinene ave tja: “Kaisaneye Simson e ye okutuyorokisa.” Nowo va kapaha Simson motjovakamburwa; neye we ve yorokisa. Tjazumba ve mu kuramisa pokati kozongunḓe. 26 Nu Simson wa tja nai komukarere nguye mu nana korupangu: “Ndji esa mbi ṋuṋunge ozongunḓe ku kwa kuramena ondjuwo kutja mbi yame ku zo.” 27 Ondjuwo ye urire novarumendu novakazendu; nozombara zOvafilisti azehe wina omu za ri. Nu kombanda yomututu kwa ri ovarumendu novakazendu mangara omayovi yetatu mbaa ve tarere Simson tji meve yorokisa.
28 Simson wa kumba ku Muhona a tja: “Muhona Ndjambi, arikana rizemburuka na ami, nu ndji pa omasa rukwao otjikando hi uriri kutja mbi sutise Ovafilisti mena romeho wandje ayeyevari ngu va homona.” 29 Nu Simson wa kambura ozongunḓe nḓa mbari zopokati nḓa ṱizire ondjuwo, imwe nokunene kwe nongwao nokumuho kwe na yama ku zo. 30 Neye wa ravaera nai: “Ndji esa mbi koke puna Ovafilisti!” Neye wa puka ozongunḓe nḓa nomasa we aehe, nondjuwo ya wira kombanda yozombara novandu avehe mba ri mu yo. Imba ovaṱi Simson mba zepa meyuva ronḓiro ye va kapita imba mba zepere tja ri nomuinyo.
31 Nomuhoko wa Simson noveṱunḓu re avehe ve ya okupaha orurova rwe nave ru yarura okukerupaka meyendo ra ihe Manoah pokati kooSora na Estaol. Simson wa ri omunane mOisrael oure wozombura omirongo vivari.
Simson mOgasa
1 Eyuva rimwe Simson wa ya kotjihuro tjOvafilisti Gasa. Neye wa kamuna ko omukazendu omukorondu na hiti moye. 2 Nu kwe ya ombuze kovandu va Gasa yokutja Simson weya mo. Nowo va kovera poṋa mbo nave mu tjungire ouṱuku auhe pomuvero wotjihuro. Nouṱuku auhe va porimana uriri amave ripura nai: “Tji pa tji otji matu mu zepa.” 3 Nungwari Simson wa rara nga mokati kouṱuku. Neye wa penduka na kambura imbi ovipapeko vivari vyomuvero wotjihuro ne vi zukura avihe nozongambezero zavyo notjipate. Eye we vi twa koviṱuve vye ne vi twara kondomba yondundu ndja ri ouhunga na Hebron.
Simson na Delila
4 Kombunda yanao Simson wa hura omukazendu wena Delila ngwa turire motjana tja Sorek. 5 Ozombara nḓa ndano zOvafilisti za ya ku Delila naze katja nai: “Hungirisa Simson nawa u konḓonone kutja omasa we omanene nga ye za pi, nokutja matu mu havere nomuhingo uṋe nokumungundiparisa. Auhe wetu me ku pe ovimariva ovisilveri eyovi rimwe nesere.”
6 Delila wa tja ku Simson: “Arikana, ndji raera kutja omasa woye omanene nai ye za pi, nokutja mo pandekwa na tjike u haverwe.”
7 Simson arire tje mu ziri a tja: “Tji mba pandekwa nomiko hambombari vyouta, mbi hiya kaha, otji me ngundipara ne sana otja omundu ngamwa auhe.”
8 Nozombara zOvafilisti otji za etera Delila omiko hambombari vyouta omitarazu, mbi hiya kaha, neye wa pandeka na vyo Simson. 9 Ovemutjendjereke ngunda ava haama metuwo rarwe, Delila arire tja ravaere na tja: “Simson, Ovafilisti owo mba kombanda yoye!” Neye wa pora imbi omiko vyouta tjimuna ozosepa tji maze poka tji kwa ṱunu omuriro; nomasa we kaye horokere ko.
10 Delila opa tjera nai ku Simson: “Tara, ove we ndji tikura nu we ndji korere ovizeze. Arikana, nambano ndji raera kutja u pandekwa na tjike.”
11 Neye we mu zira a tja: “Tji mba pandekwa tjinene okupamisiwa nozongoze ozombe nḓe hiya ungura otji me ngundipara ne sana otja omundu ngamwa auhe.”
12 Delila arire tja kambura ozongoze ozombe ne mu pandeke na zo na tja ku ye: “Simson, Ovafilisti owo mba kombanda yoye!” Imba ovemutjendjereke tjandje ve ri metuwo rarwe. Nungwari eye we ze pora otja ozosepa pomaoko we.
13 Nu Delila wa tja ku Simson: “Nga mba we ndji tikura nu we ndji korere ovizeze. Ndji raera kutja u pandekwa na tjike.”
Neye we mu zira a tja: “Tji wa kutire ozondjise hambombari nḓa wozewa motjiuru tjandje motjiwoze no ze papere nomboha, ami otji me ngundipara ne sana otja omundu ngamwa auhe.”
14 Delila we mu zezenga nga tja rara, tjazumba a kutire ozondjise hambombari nḓa wozewa motjiuru tje motjiwoze, ne ze papere nomboha, arire tja ravaere a tja: “Simson, Ovafilisti owo mba kombanda yoye!” Neye wa penduka mozomboṱu na zukura omboha puna ihi otjiwoze.
15 Nu Delila wa tja nai ku ye: “Ove mo sora vi okutja we ndji suvera, omutima woye ngunda au he ri pu ami. Ove nga mba we ndji tikura tutatu, nu ko hororere ku ami kutja omasa woye tji ye ri omanene nai opu tjike.” 16 Delila otje mu kendisa nomambo we eyuva arihe, ne he mu pe orusuvo nga Simson tja urwa azeri kutja a koke. 17 Korusenina Simson wa raera Delila ouatjiri auhe na tja: “Nga mba kaku na indu kwa ṱunine otjikonde kotjiuru tjandje, tjinga ambi ri Omunasirite wa Ndjambi okuza kongwatero yandje. Tji mba kondwa ozondjise, omasa wandje maye piti, nami otji me ngundipara ne sana otja omundu ngamwa auhe.”
18 Nu Delila tja muna kutja Simson we mu raere ouatjiri auhe wa hinda ombuze kozombara zOvafilisti a tja: “Otjikando hi kotokeye rumwe rukwao, orondu Simson we ndji raere ouatjiri auhe.” Nozombara zOvafilisti ze ya naze eterere ovimariva. 19 Nu Delila wa zezengera Simson pomatumbo we nga tja rara, na isana omurumendu ngwe ya okukonda ozondjise hambombari nḓa wozewa motjiuru tja Simson motjiwoze. Neye wa yendayenda ama ngundipara, nomasa we ya pita. 20 Delila wa ravaera a tja: “Simson, Ovafilisti owo mba kombanda yoye!” Neye tja penduka mozomboṱu we ripura nai: “Ami me rikutura ne kayenda uriri tjimuna ovikando avihe.” Orondu ka tjivirwe kutja Muhona wa zu po pu ye. 21 NOvafilisti va kambura Simson nave mu homona omeho, notji ve mu twara kOgasa. Nowo ve mu pandeka novipandeke vyovitenda, neye wa kara pokukweya ombako motjovakamburwa. 22 Nungwari inḓa ozondjise nḓa konderwe za uta okuhapa rukwao.
Onḓiro ya Simson
23 Ozombara nḓa zOvafilisti za wongara okutjita ombunguhiro onene kotjisenginina Dagon. Nozo za yoroka aze tja: “Omukuru wetu wotjisenginina we tu pa outoṋi komunavita na eṱe Simson!” 24 Notjiwaṋa tji tje mu muna tja tanga omukuru watjo wotjisenginina atji tja: “Omukuru wetu wotjisenginina we tu pa outoṋi komunavita na eṱe Simson ngwa nyona ehi retu na zepa ovengi vetu!” 25 Nowo va yoroka tjinene ave tja: “Kaisaneye Simson e ye okutuyorokisa.” Nowo va kapaha Simson motjovakamburwa; neye we ve yorokisa. Tjazumba ve mu kuramisa pokati kozongunḓe. 26 Nu Simson wa tja nai komukarere nguye mu nana korupangu: “Ndji esa mbi ṋuṋunge ozongunḓe ku kwa kuramena ondjuwo kutja mbi yame ku zo.” 27 Ondjuwo ye urire novarumendu novakazendu; nozombara zOvafilisti azehe wina omu za ri. Nu kombanda yomututu kwa ri ovarumendu novakazendu mangara omayovi yetatu mbaa ve tarere Simson tji meve yorokisa.
28 Simson wa kumba ku Muhona a tja: “Muhona Ndjambi, arikana rizemburuka na ami, nu ndji pa omasa rukwao otjikando hi uriri kutja mbi sutise Ovafilisti mena romeho wandje ayeyevari ngu va homona.” 29 Nu Simson wa kambura ozongunḓe nḓa mbari zopokati nḓa ṱizire ondjuwo, imwe nokunene kwe nongwao nokumuho kwe na yama ku zo. 30 Neye wa ravaera nai: “Ndji esa mbi koke puna Ovafilisti!” Neye wa puka ozongunḓe nḓa nomasa we aehe, nondjuwo ya wira kombanda yozombara novandu avehe mba ri mu yo. Imba ovaṱi Simson mba zepa meyuva ronḓiro ye va kapita imba mba zepere tja ri nomuinyo.
31 Nomuhoko wa Simson noveṱunḓu re avehe ve ya okupaha orurova rwe nave ru yarura okukerupaka meyendo ra ihe Manoah pokati kooSora na Estaol. Simson wa ri omunane mOisrael oure wozombura omirongo vivari.
