Saul ma hakaene na Samuel
1 Pa ri omurumendu omutumbe nomutjiukwa wena Kis, omuzandu wa Abiel, omuzandu wa Seror, omuzandu wa Bekorat, omuzandu wa Afia, ngwa zire momuhoko wa Benjamin. 2 Neye wa ri nomuzandu wena Saul, omutanda nu ngwa tungwa nawa; nu mOvaisrael avehe kamwa ri omundu ngwa ri omuwa pu Saul. Eye wa ri omure pOvaisrael avehe.
3 Nousino ouzenḓu wa Kis, ihe ya Saul, tji wa pandjarere, Kis arire tja tja komuzandu we Saul: “Rirongera u toore omukarere umwe, mu kapahe ousino.” 4 Owo va tuurunga ehi rozondundu ra Efraim nehi ra Salisa, nungwari kave u mwine; nowo otji va ryama komurungu ave tuurunga ehi ra Saalim, nungwari ousino kawa ri mo. Tjazumba otji va tuurunga ehi ra Benjamin, nu wina kave u mwine. 5 Nu tji va kavaza kehi ra Suf, Saul wa tja nai komukarere ngu va ri pamwe: “Indjo tu yaruke, tjaa tate me rikende na eṱe moruveze rokurikenda nousino.” 6 Nomukarere we mu zira a tja: “Tara, motjihuro hi mwa tura omukarere wa Ndjambi, omurumendu omutengwandu tjinene, notjiṋa atjihe eye tje hungira tji rira ouatjiri. Ngatu yende ngo, nani me ketutjivisa ondjira, ndji tu sokutwara.”
7 Saul arire tja pura nai komukarere we: “Rumwe tji twa i, omurumendu ngwi matu kemupa tjike? Ozomboroto ndu twa ri na zo mondjaṱu za manuka, nu otjiyandjewa tji matu kayandja komukarere wa Ndjambi ngo, katji po. Tu na tjike?”
8 Nomukarere we mu zira a tja: “Tara, ami mbi nokamariva okasilveri, oku me kayandja komukarere wa Ndjambi kutja e tu tjivise ondjira yetu.”
9 Rukuru ovarumendu mOisrael tjaave i okukapura ku Ndjambi ave tja nai: “Indjeye tu yende komumune.” Orondu omuprofete wandino rukuru ongwaa isana omumune. 10 Saul arire tja tja nai komukarere we: “Embo roye ewa; indjo tu yende.” Owo otji va ya kotjihuro mu mwa ri omurumendu ngwi omukarere wa Ndjambi.
11 Nu ngunda amave rondo omuru okuyenda kotjihuro, arire tji va hakaene novasuko mbaa ve kateka omeva. Nowo va pura kovasuko mba ave tja: “Omumune ome ri?”
12 Novasuko ve ve zira ave tja: “Eye u ri komurungu weṋu; hakahaneye! Eye weya nambano motjihuro, otjiwaṋa ndino tjinga ama tji punguhire ombunguhiro kondunda. 13 Tji mamu kahita motjihuro, mamu kahakaena na ye, ngunda e hiya karonda kondunda okukarya; orondu otjiwaṋa kamaatji ri, eye ngunda e hiye ya. Eye rutenga u sokusera ombunguhiro ondaya; tjazumba imba ovaṋangwa otji mave ri. Twendeye mu karonde nambano, mamu kemuvaza tjimanga.” 14 Saul nomukarere we otji va ya kotjihuro; nu tji mave utu okuhita mu tjo arire tji va hakaene na Samuel, ama karonda kondunda.
15 Eyuva rokomurungu waindi Saul ngunda e hiye ya, Muhona wa tjivisa Samuel a tja: 16 “Muhuka moruveze tjingero ndwi me ku hindire omurumendu womuhoko wa Benjamin; mu twirisa a rire ombara yotjiwaṋa tjandje Israel. Eye me tji yama momake wOvafilisti. Ami mba muna ondjenda yotjiwaṋa tjandje, nondjuriro yatjo mbe i zuva.”
17 Nu Samuel tja muna Saul, Muhona arire tja tja ku ye: “Omurumendu ngu mbe ku raerere erero kutja ongu ma honaparere otjiwaṋa tjandje, eye ngwi.” 18 Nu Saul otje ya ku Samuel pomuvero ne mu pura a tja: “Arikana, ndji raera omumune kutja wa tura pi?”
19 Samuel wa zira Saul a tja: “Owami ngu mbi ri omumune. Ngatu yende pamwe kondunda! Mamu karya puna ami ndinondi. Mependukirwa me ku esa u yende, nu me ku tjivisa avihe mbi ku kendisa momutima woye. 20 Imbwi ousino mbu wa zengisa oure womayuva yetatu, o rikende na wo; owo wa munika rukuru. Nungwari owaṋi ngu vangwa i Ovaisrael tjinene? Kaove nonganda yaiho are?”
21 Nu Saul wa zira a tja: “Owami owomuhoko wa Benjamin, mbu ri omuṱiṱi tjinene momihoko vya Israel, eṱunḓu randje oro orokehi tjinene momuhoko wa Benjamin. Okutjavi tji mo hungire omambo otja inga ku ami?”
22 Nu Samuel wa hitisa Saul nomukarere we metuwo enene, ne ve haamisa komurungu wa imba ovaṋangwa, ovarumendu mangara omirongo vitatu. 23 Samuel wa tja nai komutereke: “Eta onyama ndji, ndji mbe ku pe, nu ndji mba tja horeka.”
24 Nomutereke arire tja kaeta etumbo nevango ne vi twa momurungu wa Saul; nu Samuel wa tja: “Tara, onyama ndja turikirwa ove, oyo ndji. Ryaa, orondu ya turikirwa ove u rye moruveze ndwi puna ovandu mbu mba ṋanga.”
Saul otja rya puna Samuel eyuva ndo. 25 Nowo va rauka okuza kondunda okukahita motjihuro nave kaṱunina Saul omara komututu; neye wa rara mbo.
26 Nomuhuka omunene Samuel wa ravaera ku Saul komututu a tja: “Penduka mbi ku ṱike.” Saul arire tja penduka, nowo aveyevari va pita pendje. 27 Nu tji va kavaza kotjikoro tjotjihuro, Samuel wa tja nai ku Saul: “Raera omukarere woye a kayende komurungu.” Nomukarere wa ka wondja komurungu. Samuel arire tja tja: “Kurama mba, mbi ku tjivise embo ra Ndjambi.”
Saul ma hakaene na Samuel
1 Pa ri omurumendu omutumbe nomutjiukwa wena Kis, omuzandu wa Abiel, omuzandu wa Seror, omuzandu wa Bekorat, omuzandu wa Afia, ngwa zire momuhoko wa Benjamin. 2 Neye wa ri nomuzandu wena Saul, omutanda nu ngwa tungwa nawa; nu mOvaisrael avehe kamwa ri omundu ngwa ri omuwa pu Saul. Eye wa ri omure pOvaisrael avehe.
3 Nousino ouzenḓu wa Kis, ihe ya Saul, tji wa pandjarere, Kis arire tja tja komuzandu we Saul: “Rirongera u toore omukarere umwe, mu kapahe ousino.” 4 Owo va tuurunga ehi rozondundu ra Efraim nehi ra Salisa, nungwari kave u mwine; nowo otji va ryama komurungu ave tuurunga ehi ra Saalim, nungwari ousino kawa ri mo. Tjazumba otji va tuurunga ehi ra Benjamin, nu wina kave u mwine. 5 Nu tji va kavaza kehi ra Suf, Saul wa tja nai komukarere ngu va ri pamwe: “Indjo tu yaruke, tjaa tate me rikende na eṱe moruveze rokurikenda nousino.” 6 Nomukarere we mu zira a tja: “Tara, motjihuro hi mwa tura omukarere wa Ndjambi, omurumendu omutengwandu tjinene, notjiṋa atjihe eye tje hungira tji rira ouatjiri. Ngatu yende ngo, nani me ketutjivisa ondjira, ndji tu sokutwara.”
7 Saul arire tja pura nai komukarere we: “Rumwe tji twa i, omurumendu ngwi matu kemupa tjike? Ozomboroto ndu twa ri na zo mondjaṱu za manuka, nu otjiyandjewa tji matu kayandja komukarere wa Ndjambi ngo, katji po. Tu na tjike?”
8 Nomukarere we mu zira a tja: “Tara, ami mbi nokamariva okasilveri, oku me kayandja komukarere wa Ndjambi kutja e tu tjivise ondjira yetu.”
9 Rukuru ovarumendu mOisrael tjaave i okukapura ku Ndjambi ave tja nai: “Indjeye tu yende komumune.” Orondu omuprofete wandino rukuru ongwaa isana omumune. 10 Saul arire tja tja nai komukarere we: “Embo roye ewa; indjo tu yende.” Owo otji va ya kotjihuro mu mwa ri omurumendu ngwi omukarere wa Ndjambi.
11 Nu ngunda amave rondo omuru okuyenda kotjihuro, arire tji va hakaene novasuko mbaa ve kateka omeva. Nowo va pura kovasuko mba ave tja: “Omumune ome ri?”
12 Novasuko ve ve zira ave tja: “Eye u ri komurungu weṋu; hakahaneye! Eye weya nambano motjihuro, otjiwaṋa ndino tjinga ama tji punguhire ombunguhiro kondunda. 13 Tji mamu kahita motjihuro, mamu kahakaena na ye, ngunda e hiya karonda kondunda okukarya; orondu otjiwaṋa kamaatji ri, eye ngunda e hiye ya. Eye rutenga u sokusera ombunguhiro ondaya; tjazumba imba ovaṋangwa otji mave ri. Twendeye mu karonde nambano, mamu kemuvaza tjimanga.” 14 Saul nomukarere we otji va ya kotjihuro; nu tji mave utu okuhita mu tjo arire tji va hakaene na Samuel, ama karonda kondunda.
15 Eyuva rokomurungu waindi Saul ngunda e hiye ya, Muhona wa tjivisa Samuel a tja: 16 “Muhuka moruveze tjingero ndwi me ku hindire omurumendu womuhoko wa Benjamin; mu twirisa a rire ombara yotjiwaṋa tjandje Israel. Eye me tji yama momake wOvafilisti. Ami mba muna ondjenda yotjiwaṋa tjandje, nondjuriro yatjo mbe i zuva.”
17 Nu Samuel tja muna Saul, Muhona arire tja tja ku ye: “Omurumendu ngu mbe ku raerere erero kutja ongu ma honaparere otjiwaṋa tjandje, eye ngwi.” 18 Nu Saul otje ya ku Samuel pomuvero ne mu pura a tja: “Arikana, ndji raera omumune kutja wa tura pi?”
19 Samuel wa zira Saul a tja: “Owami ngu mbi ri omumune. Ngatu yende pamwe kondunda! Mamu karya puna ami ndinondi. Mependukirwa me ku esa u yende, nu me ku tjivisa avihe mbi ku kendisa momutima woye. 20 Imbwi ousino mbu wa zengisa oure womayuva yetatu, o rikende na wo; owo wa munika rukuru. Nungwari owaṋi ngu vangwa i Ovaisrael tjinene? Kaove nonganda yaiho are?”
21 Nu Saul wa zira a tja: “Owami owomuhoko wa Benjamin, mbu ri omuṱiṱi tjinene momihoko vya Israel, eṱunḓu randje oro orokehi tjinene momuhoko wa Benjamin. Okutjavi tji mo hungire omambo otja inga ku ami?”
22 Nu Samuel wa hitisa Saul nomukarere we metuwo enene, ne ve haamisa komurungu wa imba ovaṋangwa, ovarumendu mangara omirongo vitatu. 23 Samuel wa tja nai komutereke: “Eta onyama ndji, ndji mbe ku pe, nu ndji mba tja horeka.”
24 Nomutereke arire tja kaeta etumbo nevango ne vi twa momurungu wa Saul; nu Samuel wa tja: “Tara, onyama ndja turikirwa ove, oyo ndji. Ryaa, orondu ya turikirwa ove u rye moruveze ndwi puna ovandu mbu mba ṋanga.”
Saul otja rya puna Samuel eyuva ndo. 25 Nowo va rauka okuza kondunda okukahita motjihuro nave kaṱunina Saul omara komututu; neye wa rara mbo.
26 Nomuhuka omunene Samuel wa ravaera ku Saul komututu a tja: “Penduka mbi ku ṱike.” Saul arire tja penduka, nowo aveyevari va pita pendje. 27 Nu tji va kavaza kotjikoro tjotjihuro, Samuel wa tja nai ku Saul: “Raera omukarere woye a kayende komurungu.” Nomukarere wa ka wondja komurungu. Samuel arire tja tja: “Kurama mba, mbi ku tjivise embo ra Ndjambi.”
