Ondjona notjiwaṋa tjayo
1 Ami mba tarere ne munu Ondjona ndja kuramene kondundu Sion; nu pu yo pa ri ovandu omayovi esere nomirongo vine na vane, mba ri nena rayo nora ihe nga tjangerwe kovipara vyawo. 2 Nami arire tji mba zuu eraka nda zire meyuru, nu nda ri nombosiro tjimuna oyomupupo womeva, nu tjimuna oyoruṱuṱumo orunene. Nombosiro yayo wina ya ri tjimuna indji yomizumbi mbi mavi nyandwa i ovanyande vovihumba koviharpe vyawo. 3 Novandu mba omayovi esere nomirongo vine na vane, mba kuramene komurungu wotjihavero tjouhona, novinamuinyo vine novanene va imburire eimburiro epe. Nu kapa ri omundu warwe ngwa sorere okurihonga eimburiro ndi posi yovandu mba mba randerwe ave kuturwa kouye. 4 Owo va ri ovandu mba mbe ritjaera kokurara povakazendu; ve ritjinda oukohoke kozonḓuma zonyama. Owo ve kongorera Ondjona ngamwa akuhe ku mai i. Nowo ombe ri mba mba randerwe movandu, nombe ri ovatenga okuyapurirwa Ndjambi na indji Ondjona. 5 Nu movinyo vyawo kamu na indu mwa zire ovizeze; nowo ovehinaṋi.
Ovaengeri imba vetatu
6 Tjazumba e munu omuengeri ngwaa tuka kombanda mevaverwa. Eye wa ri nOmbuze Ombwa yaaruhe okuzuvarisa kovature avehe wokombanda yehi, kovanavisenginina avehe na komihoko avihe na komaraka aehe na koviwaṋa avihe. 7 Neye wa ravaerere neraka enene a tja: “Tireye Ndjambi nu mu mu pe ondjozikiro, orondu oruveze eye ndu ma pangura ovandu rweya. Rikotameneye ku ye ngwa utire eyuru nehi nokuvare notuharwi twomeva!”
8 Nomuengeri outjavari wa tukire a kongorere ingwi omutenga na tja: “Tja u! Babilon, otjihuro otjinene, tja u! Otjo tja hirire oviwaṋa avihe omavinu watjo, okutja owo nga omavinu omazeu woruvakiro rwatjo.”
9 Nomuengeri outjatatu wa tukire a kongorere imba ovatenga vevari na tja neraka enene: “Ingwi ngu me rikotamene kotjipuka na kotjiserekarera tjatjo, nu ngu ma yakura otjihako kotjipara tje poo keke re, 10 eye ma nu omavinu womapindi wa Ndjambi; Ndjambi omuini we ye tirira motjinwino tjomazenge we aye hiya rira ohambeva. Avehe mbu mave tjiti nai mave hihamisiwa nomuriro nosurungu komurungu wovaengeri ovayapuke nOndjona. 11 Nomuise womuriro mbu mau ve hihamisa mau rondo kombanda aruhe na aruhe. Novandu mba mbe rikotamena kotjipuka na kotjiserekarera tjatjo na ngamwa auhe ngu ma yakura otjihako tjena ratjo, kamaave munu orusuvo omutenya nouṱuku.”
12 Nu poṋa mba otjiwaṋa tja Ndjambi, tjiri, matji hepa onḓaro orure, imba mbe ṱakamisa omatwako wa Ndjambi nu mbe kambura mu Jesus.
13 Nokuzambo otji mba zuva eraka nda zire meyuru ari tja: “Tjanga itja: Ovaṋingandu imba okuza ku nai mbu mave ṱu mu Muhona.”
NOmbepo ai ziri ai tja: “Ii! Owo mave kasuva kozongondjero zawo, oviungura vyawo avihe tjinga amavi ve kongorere.”
Ehi re rirongerera omakondero
14 Ami mba tara ne munu otjikamba otjivapa, nu kotjikamba hi kwa haamene omundu ngwaa munika otja Omuna wOmundu. Eye wa ri nekori rouhona rongoldo kotjiuru notjikonde otjitwe meke re. 15 Nomuengeri warwe otja pita mondjuwo ya Ndjambi na ravaere neraka enene ku ingwi ngwa haamene kotjikamba, a tja: “Ungurisa otjikonde tjoye nu u konde; orondu oruveze rwomakondero rweya, nomakondero wehi ya horo!” 16 Tjazumba ingwi ngwa haamene kotjikamba a twako otjikonde tje kehi, nomakondero wehi arire tji ya utwa.
17 Nu arire tji mba munu omuengeri warwe ngwa pitire mondjuwo ndji ri meyuru; neye wina wa ri notjikonde otjitwe.
18 Nomuengeri warwe ngwa ri nouvara kombanda yomuriro we ere okuza kotjipunguhiro. Eye wa ravaerere neraka enene komuengeri ngwi ngwa ri notjikonde otjitwe, a tja: “Ungurisa otjikonde tjoye nu u konde omapunda womandjembere motjikunino tjomivite kombanda yehi, orondu omandjembere ya horo!” 19 Nomuengeri opa twira ko otjikonde tje kehi, a kondo omapunda womandjembere komivite ne ye yumbu motjikameno otjinene tjomazenge wa Ndjambi. 20 Nomandjembere ya yaterwa motjikameno pendje yotjihuro. Nu motjikameno mwa zizire ombinḓu ndja yerurukire nga kovitumbure vyoukambe, nu ndja pupire ozokirometa mangara omasere yetatu.
Ondjona notjiwaṋa tjayo
1 Ami mba tarere ne munu Ondjona ndja kuramene kondundu Sion; nu pu yo pa ri ovandu omayovi esere nomirongo vine na vane, mba ri nena rayo nora ihe nga tjangerwe kovipara vyawo. 2 Nami arire tji mba zuu eraka nda zire meyuru, nu nda ri nombosiro tjimuna oyomupupo womeva, nu tjimuna oyoruṱuṱumo orunene. Nombosiro yayo wina ya ri tjimuna indji yomizumbi mbi mavi nyandwa i ovanyande vovihumba koviharpe vyawo. 3 Novandu mba omayovi esere nomirongo vine na vane, mba kuramene komurungu wotjihavero tjouhona, novinamuinyo vine novanene va imburire eimburiro epe. Nu kapa ri omundu warwe ngwa sorere okurihonga eimburiro ndi posi yovandu mba mba randerwe ave kuturwa kouye. 4 Owo va ri ovandu mba mbe ritjaera kokurara povakazendu; ve ritjinda oukohoke kozonḓuma zonyama. Owo ve kongorera Ondjona ngamwa akuhe ku mai i. Nowo ombe ri mba mba randerwe movandu, nombe ri ovatenga okuyapurirwa Ndjambi na indji Ondjona. 5 Nu movinyo vyawo kamu na indu mwa zire ovizeze; nowo ovehinaṋi.
Ovaengeri imba vetatu
6 Tjazumba e munu omuengeri ngwaa tuka kombanda mevaverwa. Eye wa ri nOmbuze Ombwa yaaruhe okuzuvarisa kovature avehe wokombanda yehi, kovanavisenginina avehe na komihoko avihe na komaraka aehe na koviwaṋa avihe. 7 Neye wa ravaerere neraka enene a tja: “Tireye Ndjambi nu mu mu pe ondjozikiro, orondu oruveze eye ndu ma pangura ovandu rweya. Rikotameneye ku ye ngwa utire eyuru nehi nokuvare notuharwi twomeva!”
8 Nomuengeri outjavari wa tukire a kongorere ingwi omutenga na tja: “Tja u! Babilon, otjihuro otjinene, tja u! Otjo tja hirire oviwaṋa avihe omavinu watjo, okutja owo nga omavinu omazeu woruvakiro rwatjo.”
9 Nomuengeri outjatatu wa tukire a kongorere imba ovatenga vevari na tja neraka enene: “Ingwi ngu me rikotamene kotjipuka na kotjiserekarera tjatjo, nu ngu ma yakura otjihako kotjipara tje poo keke re, 10 eye ma nu omavinu womapindi wa Ndjambi; Ndjambi omuini we ye tirira motjinwino tjomazenge we aye hiya rira ohambeva. Avehe mbu mave tjiti nai mave hihamisiwa nomuriro nosurungu komurungu wovaengeri ovayapuke nOndjona. 11 Nomuise womuriro mbu mau ve hihamisa mau rondo kombanda aruhe na aruhe. Novandu mba mbe rikotamena kotjipuka na kotjiserekarera tjatjo na ngamwa auhe ngu ma yakura otjihako tjena ratjo, kamaave munu orusuvo omutenya nouṱuku.”
12 Nu poṋa mba otjiwaṋa tja Ndjambi, tjiri, matji hepa onḓaro orure, imba mbe ṱakamisa omatwako wa Ndjambi nu mbe kambura mu Jesus.
13 Nokuzambo otji mba zuva eraka nda zire meyuru ari tja: “Tjanga itja: Ovaṋingandu imba okuza ku nai mbu mave ṱu mu Muhona.”
NOmbepo ai ziri ai tja: “Ii! Owo mave kasuva kozongondjero zawo, oviungura vyawo avihe tjinga amavi ve kongorere.”
Ehi re rirongerera omakondero
14 Ami mba tara ne munu otjikamba otjivapa, nu kotjikamba hi kwa haamene omundu ngwaa munika otja Omuna wOmundu. Eye wa ri nekori rouhona rongoldo kotjiuru notjikonde otjitwe meke re. 15 Nomuengeri warwe otja pita mondjuwo ya Ndjambi na ravaere neraka enene ku ingwi ngwa haamene kotjikamba, a tja: “Ungurisa otjikonde tjoye nu u konde; orondu oruveze rwomakondero rweya, nomakondero wehi ya horo!” 16 Tjazumba ingwi ngwa haamene kotjikamba a twako otjikonde tje kehi, nomakondero wehi arire tji ya utwa.
17 Nu arire tji mba munu omuengeri warwe ngwa pitire mondjuwo ndji ri meyuru; neye wina wa ri notjikonde otjitwe.
18 Nomuengeri warwe ngwa ri nouvara kombanda yomuriro we ere okuza kotjipunguhiro. Eye wa ravaerere neraka enene komuengeri ngwi ngwa ri notjikonde otjitwe, a tja: “Ungurisa otjikonde tjoye nu u konde omapunda womandjembere motjikunino tjomivite kombanda yehi, orondu omandjembere ya horo!” 19 Nomuengeri opa twira ko otjikonde tje kehi, a kondo omapunda womandjembere komivite ne ye yumbu motjikameno otjinene tjomazenge wa Ndjambi. 20 Nomandjembere ya yaterwa motjikameno pendje yotjihuro. Nu motjikameno mwa zizire ombinḓu ndja yerurukire nga kovitumbure vyoukambe, nu ndja pupire ozokirometa mangara omasere yetatu.
