David ma hakaene na Siba na Simi
1 David tja za nokuryama kaṱiṱi kondomba yOndunduyomiṋinga, mokamanga otja hakaena na Siba, omukarere wa Mefiboset, ngwa ri nousino uvari ku kwa kutirwa ozomboroto ozombomba omasere yevari, nomavanda esere rimwe womandjembere, nomavanda esere rimwe womakuyu, nondjaṱu yomukova ndje urisiwa nomavinu. 2 Nombara David wa pura Siba a tja: “Oviṋa avihe mbi mo ungura na vyo tjike?”
Siba wa zira a tja: “Ousino mbwi owokukavirwa i eṱunḓu rombara, nozomboroto novihape ovyo ovikurya vyovakarere, nomavinu owokunuwa i imba mbu mave urirwa mokuti onguza.”
3 Ombara ye mu pura ai tja: “Mefiboset, omuatje womuzandu womuhona woye Saul, u ri pi?”
Siba wa zira a tja: “Eye wa sewa mOjerusalem, tjinga a tjangovasi Ovaisrael mave mu yarurire ko ouhona wa ihe mukurume Saul.”
4 Nombara ya tja nai ku Siba: “Ouini auhe wa Mefiboset owoye.”
Siba arire tja tja: “Me ripete kove! Aruhe hi mune otjari kove, muhona wandje ombara!”
5 Ombara David tje ya kObahurim, kamanga otji pa pita omurumendu weṱunḓu ra Saul, ngwa ri nena Simi, omuzandu womukazendu Gera, ngwa yenda ama tukana ombara. 6 Nu Simi wa yumba ombara David novahongore ve omawe, nandarire kutja David wa kovererwe i ovandu ve novatjevere ve vokorutu. 7 Simi we mu tukana a tja: “Twende, twende, oove omuzepe notjiporoporo! 8 Muhona we ku sutisa ombinḓu yonganda ya Saul, ove ngu wa rira ombara moruveze rwe; nambano Muhona wa yandja ouhona komuzandu woye Absalom, nove u ri moumba, tjinga au ri omuzepe!”
9 Abisai waina Seruja, wa tja nai kombara: “Okutjavi ombi yombwa tji mai tukana omuhona wandje ombara! Ndji esa mbi ryame popezu, mbi keikonde otjiuru.”
10 Nombara ya tja nai ku Abisai na kerumbi re Joab: “Ihi katjiungura tjeṋu! Eye tje ndji tukana, nu Muhona tje mu raere kutja nga tjite nao, owaṋi ngu nousemba okumupura kutja okutjavi tji mo tjiti nao?” 11 Nu David wa weza ko na tja ku Abisai na kovahongore ve avehe: “Omuzandu wandje omuini ma vanga okundjizepa; mamu kuminwa tjike nOmubenjamin ngwi! Mu eseye a tukane, orondu Muhona ongwe mu raera nao! 12 Nani Muhona ma tara kondjenda yandje, ne ndji pe ondaya mena romatuka we.” 13 David novandu ve otji va kayenda komurungu mondjira yawo, Simi ngunda ama varama na wo keṋe yondundu, ama tukana nokumuyumba omawe nehi. 14 Ombara novandu vayo avehe tjandje va urwa tjinene, tji va kavaza kOjordan; nowo va kasuva mbo.
Absalom mOjerusalem
15 Absalom nOvaisrael avehe, mba ri puna ye, ve yere kOjerusalem, Ahitofel wina tjandje u ri puna wo. 16 Omuarki Husai, epanga ra David, tje ya ku Absalom, wa ravaera nai ku ye: “Ombara ngai hupe orure! Ombara ngai hupe orure!”
17 Nungwari Absalom wa pura Husai a tja: “Indwi oorusuvero kepanga roye David are? Okutjavi tji u ha ire puna epanga roye?”
18 Husai arire tja ziri ku Absalom a tja: “Me yenene vi? Ami owami owaingwi ngwa toororwa i Muhona novarumendu mba nOvaisrael avehe. Ami me kara puna ove. 19 Norukwao, me karere uṋe, tjinangara hi nokukarera omuzandu womuhona wandje? Otja punga amba karera iho, opunga ame ku karere.”
20 Tjazumba Absalom arire tja tja ku Ahitofel: “Tu pa ondunge kutja matu tjiti vi!”
21 Ahitofel arire tje mu ziri a tja: “Karare povakazendu ovambanda vaiho, mbe ve esa kombunda okutjevera ondjuwo youhona. Ovaisrael avehe mave zuu kutja ove we ritjita omunavita na iho, novekukongorere voye avehe mave yanḓipara.” 22 Absalom otja zikirwa ondanda yerapi komututu wondjuwo youhona; neye wa karara povakazendu ovambanda vaihe momeho wOvaisrael avehe.
23 Nu ondunge ngamwa aihe ndjaa i yandjewa i Ahitofel momayuva ngo, ai zuvaka aayo embo ra Ndjambi omuini; David na Absalom wina aave zuu kondunge ndji.
David ma hakaene na Siba na Simi
1 David tja za nokuryama kaṱiṱi kondomba yOndunduyomiṋinga, mokamanga otja hakaena na Siba, omukarere wa Mefiboset, ngwa ri nousino uvari ku kwa kutirwa ozomboroto ozombomba omasere yevari, nomavanda esere rimwe womandjembere, nomavanda esere rimwe womakuyu, nondjaṱu yomukova ndje urisiwa nomavinu. 2 Nombara David wa pura Siba a tja: “Oviṋa avihe mbi mo ungura na vyo tjike?”
Siba wa zira a tja: “Ousino mbwi owokukavirwa i eṱunḓu rombara, nozomboroto novihape ovyo ovikurya vyovakarere, nomavinu owokunuwa i imba mbu mave urirwa mokuti onguza.”
3 Ombara ye mu pura ai tja: “Mefiboset, omuatje womuzandu womuhona woye Saul, u ri pi?”
Siba wa zira a tja: “Eye wa sewa mOjerusalem, tjinga a tjangovasi Ovaisrael mave mu yarurire ko ouhona wa ihe mukurume Saul.”
4 Nombara ya tja nai ku Siba: “Ouini auhe wa Mefiboset owoye.”
Siba arire tja tja: “Me ripete kove! Aruhe hi mune otjari kove, muhona wandje ombara!”
5 Ombara David tje ya kObahurim, kamanga otji pa pita omurumendu weṱunḓu ra Saul, ngwa ri nena Simi, omuzandu womukazendu Gera, ngwa yenda ama tukana ombara. 6 Nu Simi wa yumba ombara David novahongore ve omawe, nandarire kutja David wa kovererwe i ovandu ve novatjevere ve vokorutu. 7 Simi we mu tukana a tja: “Twende, twende, oove omuzepe notjiporoporo! 8 Muhona we ku sutisa ombinḓu yonganda ya Saul, ove ngu wa rira ombara moruveze rwe; nambano Muhona wa yandja ouhona komuzandu woye Absalom, nove u ri moumba, tjinga au ri omuzepe!”
9 Abisai waina Seruja, wa tja nai kombara: “Okutjavi ombi yombwa tji mai tukana omuhona wandje ombara! Ndji esa mbi ryame popezu, mbi keikonde otjiuru.”
10 Nombara ya tja nai ku Abisai na kerumbi re Joab: “Ihi katjiungura tjeṋu! Eye tje ndji tukana, nu Muhona tje mu raere kutja nga tjite nao, owaṋi ngu nousemba okumupura kutja okutjavi tji mo tjiti nao?” 11 Nu David wa weza ko na tja ku Abisai na kovahongore ve avehe: “Omuzandu wandje omuini ma vanga okundjizepa; mamu kuminwa tjike nOmubenjamin ngwi! Mu eseye a tukane, orondu Muhona ongwe mu raera nao! 12 Nani Muhona ma tara kondjenda yandje, ne ndji pe ondaya mena romatuka we.” 13 David novandu ve otji va kayenda komurungu mondjira yawo, Simi ngunda ama varama na wo keṋe yondundu, ama tukana nokumuyumba omawe nehi. 14 Ombara novandu vayo avehe tjandje va urwa tjinene, tji va kavaza kOjordan; nowo va kasuva mbo.
Absalom mOjerusalem
15 Absalom nOvaisrael avehe, mba ri puna ye, ve yere kOjerusalem, Ahitofel wina tjandje u ri puna wo. 16 Omuarki Husai, epanga ra David, tje ya ku Absalom, wa ravaera nai ku ye: “Ombara ngai hupe orure! Ombara ngai hupe orure!”
17 Nungwari Absalom wa pura Husai a tja: “Indwi oorusuvero kepanga roye David are? Okutjavi tji u ha ire puna epanga roye?”
18 Husai arire tja ziri ku Absalom a tja: “Me yenene vi? Ami owami owaingwi ngwa toororwa i Muhona novarumendu mba nOvaisrael avehe. Ami me kara puna ove. 19 Norukwao, me karere uṋe, tjinangara hi nokukarera omuzandu womuhona wandje? Otja punga amba karera iho, opunga ame ku karere.”
20 Tjazumba Absalom arire tja tja ku Ahitofel: “Tu pa ondunge kutja matu tjiti vi!”
21 Ahitofel arire tje mu ziri a tja: “Karare povakazendu ovambanda vaiho, mbe ve esa kombunda okutjevera ondjuwo youhona. Ovaisrael avehe mave zuu kutja ove we ritjita omunavita na iho, novekukongorere voye avehe mave yanḓipara.” 22 Absalom otja zikirwa ondanda yerapi komututu wondjuwo youhona; neye wa karara povakazendu ovambanda vaihe momeho wOvaisrael avehe.
23 Nu ondunge ngamwa aihe ndjaa i yandjewa i Ahitofel momayuva ngo, ai zuvaka aayo embo ra Ndjambi omuini; David na Absalom wina aave zuu kondunge ndji.
