1 Ena ewa oro enanḓengu poutumbe auhe, okuyozikwa i ovandu okwo okunanḓengu posilveri nongoldo.
2 Ovatumbe novasyona ivemwe motjiṋa hi, ingwi okutja aveyevari va utwa i Muhona.
3 Omunazondunge u muna oumba tji mau ya na ṱara; nu ingwi ngu hi nondjiviro u hita mu wo na kamunina po otjipo.
4 Kara nondira ku Muhona nu u risusuparise, otji mo munu outumbe nondengero nomuinyo.
5 Omakuiya nozongwehe vi ri mondjira yomunauvi, ingwi ngu vanga okuyama omuinyo we u kara ohumburuko na vyo.
6 Honga omuatje omuhingo mbu ma sokuhupa, neye me u zemburuka aruhe mounene we.
7 Omutumbe u honaparera ovasyona; omuyazeme u rira omukarere womuyazemise.
8 Ingwi ngu kuna ouhasemba ma kondo oviwonga; nokati komazenge we make yaruka mu ye omuini.
9 Ondaya i undja omundu ngu notjari, eye tjinga e haṋasana omboroto ye puna omusyona.
10 Tji wa ramba omunyekerere, otjiposa wina matji zu po, ozombata nomayamburiro tjandje vya yanda.
11 Muhona wa suvera imba mbe nomitima omikohoke; epanga rombara eye ngwi ngu nomambo omanatjari.
12 Omeho wa Muhona ye tjevera omunandjiviro; nungwari eye u nakaura omambo wovanavizeze.
13 Omunatjirweyo u tja nai: “Pe nongeyama pendje; ami ngee ṱire momuvanda.”
14 Otjinyo tjomukazendu ngu hupa moruvakiro otjo orutjiva; mu tjo mu wira omundu ngwa tondwa i Muhona.
15 Omuatje tje ri eyova momutima, oruhongwe maru isa mo ouyova.
16 Tji mo ṋiṋikiza omusyona natji mo yandja komutumbe ove omuni mo syonapara.
Omiano omirongo vitatu vyounongo
17 Puratena, ami me ku raere imbi ozonongo mbi va hungira. Rihonga omahongero wawo, 18 nove mo kara nenyando tji mo ye ṱakamisa momutima woye, natji moye hungire notjinyo tjoye. 19 Ami me vanga kutja u riyameke ku Muhona, opu me zu okukuhonga wo ndinondi. 20 Ami mbe ku tjangere omiano omirongo vitatu vyomaronga novyondjiviro 21 kutja mbi ku tjivise ouatjiri nokutja u kare nomambo omaṱakame ngu mo yenene okuzira ku imba mbu mave ku pura.
Omuano Omutenga
22 O yeka omusyona ouini we momatiku mena rokutja eye omusyona, wina o ṋiṋikiza omuhepe mombanguriro. 23 Muhona meve kuramenepo motjiposa tjawo nu a huura ovevehuure.
Omuano Outjavari
24 O tjiti oupanga nomundu ngu pindika tjinene, nu o kara puna omundu ngu pindika tjimanga 25 kutja o ha horere kotjikaro tje no ha pandjarisa omuinyo woye.
Omuano Outjatatu
26 O kwizike okusutira omundu warwe ozondjo; 27 orondu tji u hi nokuyenena okuzesuta, owo mave ku yeka nangarire ihi otjiraro tjoye.
Omuano Outjaine
28 O rundurura omawe womuruko omukuru mbwa twirwe po i ooiho mukururume.
Omuano Outjatano
29 Tji pe nomurumendu ngu tjiwa otjiungura tje, tjiri, eye ma yenene okukaungura pozombara; eye ke nokuhepa okurikuta kuna ovandu vokehi.
1 Ena ewa oro enanḓengu poutumbe auhe, okuyozikwa i ovandu okwo okunanḓengu posilveri nongoldo.
2 Ovatumbe novasyona ivemwe motjiṋa hi, ingwi okutja aveyevari va utwa i Muhona.
3 Omunazondunge u muna oumba tji mau ya na ṱara; nu ingwi ngu hi nondjiviro u hita mu wo na kamunina po otjipo.
4 Kara nondira ku Muhona nu u risusuparise, otji mo munu outumbe nondengero nomuinyo.
5 Omakuiya nozongwehe vi ri mondjira yomunauvi, ingwi ngu vanga okuyama omuinyo we u kara ohumburuko na vyo.
6 Honga omuatje omuhingo mbu ma sokuhupa, neye me u zemburuka aruhe mounene we.
7 Omutumbe u honaparera ovasyona; omuyazeme u rira omukarere womuyazemise.
8 Ingwi ngu kuna ouhasemba ma kondo oviwonga; nokati komazenge we make yaruka mu ye omuini.
9 Ondaya i undja omundu ngu notjari, eye tjinga e haṋasana omboroto ye puna omusyona.
10 Tji wa ramba omunyekerere, otjiposa wina matji zu po, ozombata nomayamburiro tjandje vya yanda.
11 Muhona wa suvera imba mbe nomitima omikohoke; epanga rombara eye ngwi ngu nomambo omanatjari.
12 Omeho wa Muhona ye tjevera omunandjiviro; nungwari eye u nakaura omambo wovanavizeze.
13 Omunatjirweyo u tja nai: “Pe nongeyama pendje; ami ngee ṱire momuvanda.”
14 Otjinyo tjomukazendu ngu hupa moruvakiro otjo orutjiva; mu tjo mu wira omundu ngwa tondwa i Muhona.
15 Omuatje tje ri eyova momutima, oruhongwe maru isa mo ouyova.
16 Tji mo ṋiṋikiza omusyona natji mo yandja komutumbe ove omuni mo syonapara.
Omiano omirongo vitatu vyounongo
17 Puratena, ami me ku raere imbi ozonongo mbi va hungira. Rihonga omahongero wawo, 18 nove mo kara nenyando tji mo ye ṱakamisa momutima woye, natji moye hungire notjinyo tjoye. 19 Ami me vanga kutja u riyameke ku Muhona, opu me zu okukuhonga wo ndinondi. 20 Ami mbe ku tjangere omiano omirongo vitatu vyomaronga novyondjiviro 21 kutja mbi ku tjivise ouatjiri nokutja u kare nomambo omaṱakame ngu mo yenene okuzira ku imba mbu mave ku pura.
Omuano Omutenga
22 O yeka omusyona ouini we momatiku mena rokutja eye omusyona, wina o ṋiṋikiza omuhepe mombanguriro. 23 Muhona meve kuramenepo motjiposa tjawo nu a huura ovevehuure.
Omuano Outjavari
24 O tjiti oupanga nomundu ngu pindika tjinene, nu o kara puna omundu ngu pindika tjimanga 25 kutja o ha horere kotjikaro tje no ha pandjarisa omuinyo woye.
Omuano Outjatatu
26 O kwizike okusutira omundu warwe ozondjo; 27 orondu tji u hi nokuyenena okuzesuta, owo mave ku yeka nangarire ihi otjiraro tjoye.
Omuano Outjaine
28 O rundurura omawe womuruko omukuru mbwa twirwe po i ooiho mukururume.
Omuano Outjatano
29 Tji pe nomurumendu ngu tjiwa otjiungura tje, tjiri, eye ma yenene okukaungura pozombara; eye ke nokuhepa okurikuta kuna ovandu vokehi.
