Omahongero wootate mukururume
(Mk 7:1-13)1 Ovafarisei nozonongo zomambo tjiva, ve ere ku Jesus okuza kOjerusalem nave mu pura ave tja: 2 “Okutjavi ovahongewa voye tji ve ha ṱakamisa ombazu yootate mukururume? Owo rutenga kave koho omake wawo tji mave ri!”
3 Jesus wa zira a tja: “Nokutjavi eṋe oveni tji mu ha ṱakamisa etwako ra Ndjambi, nu tji mu ṱakamisa ombazu yeṋu. 4 Orondu Ndjambi ma tja: ‘Yozika iho na nyoko,’ nu ‘Auhe ngu ma sengi ihe na ina nga ṱe.’ 5 Nungwari eṋe mu honga kutja omundu tje notjiṋa tji ma sora okuvatera na tjo ihe na ina, nungwari a tja: ‘Otjo otja Ndjambi,’ 6 eye ke nokuhepa okuyozika ihe. Momuhingo mbwi eṋe mu zunḓa etwako ra Ndjambi, kokutja mu ṱakamisire po ombazu yeṋu. 7 Vanatjavivi eṋe! Tjiri, omuprofete Jesaja wa ri osemba indu tja hungira omaprofetero ohunga na eṋe. Eye wa tjere nai:
8 ‘Ndjambi ma tja otjiwaṋa hi tji ndji yozika notjinyo,
nungwari omutima watjo u ri kokure na ami.
9 Omerikotameneno watjo ku ami omungandjo,
orondu owo ve honga omazikamisiro wovandu
porwe aayo owo omatwako wandje!’ ”
Oviṋa mbi zunḓa omundu
(Mk 7:14-23)10 Jesus wa isanena otjimbumba tjovandu ku ye na tja ku wo: “Purateneye nu mu zuve nawa! 11 Otjiṋa tji tji za pendje nu atji hiti motjinyo tjomundu, katji tji zunḓa omundu, nungwari ihi tji tji za motjinyo tje otji tji zunḓa omundu.”
12 Tjazumba ovahongewa arire tji ve ya ku ye nave tja: “Ove hapo nai mo tjiwa kutja Ovafarisei va pindikisiwa i omambo woye are?”
13 Jesus wa zirire a tja: “Otjihape atjihe Tate meyuru tje ha kunine matji zukurwa. 14 Amu rikende nOvafarisei! Owo ovanane ovapoṱu vovapoṱu; Nomupoṱu tji ma nana omukwao, aveyevari mave wire motjitoto.”
15 Petrus arire tja hungire a tja: “Tu handjaurira omasanekero nga.”
16 Jesus a tja ku wo: “Eṋe nangwari wina kamu nazondunge okukapita ovakweṋu are? 17 Kamu nakuzuva nawa otjiṋa hi are? Otjiṋa atjihe tji tji za pendje nu atji hiti motjinyo tjomundu, tji hita mezumo re nu atji kapitira morutu rwe. 18 Nungwari ihi tji tji pitira motjinyo tjomundu okuza momutima we otji tji zunḓa omundu. 19 Orondu momutima we omu mu za omeripura omavi nge mu popera kokuzepa nokukatuka orukupo nokutjita ouhakohoke ngamwa auhe, nokupunda ovakwao oviṋa, nokukora ovizeze, nokuyamburura ovakwao. 20 Oviṋa mbi ombi zunḓa omundu. Nungwari ingwi okurya ovikurya au hiya koha omake, otjo katjiṋa tji tji zunḓa omundu.”
Ongamburiro yomukazendu Omukanaan
(Mk 7:24-30)21 Jesus wa zire po mbo na i kehi ra Tirus nora kOsidon. 22 Nomukazendu Omukanaan ngwa turire morukondwa ndo we ere ku ye na ravaere a tja: “Muna wa David, ndji tjariparera, Muhona! Omuatje wandje omukazona u nombepo ohakohoke nu u ri mongaro ombi tjinene.”
23 Nungwari Jesus ka hungirire ko embo ku ye. Ovahongewa ve ve ya ku ye nave riyarikaṋa ave tja: “Mu hinda a yende, eye tjinga ama yende ama ravaere kombunda yetu!”
24 Jesus a ziri a tja: “Ami mba hindwa kozonḓu nḓa pandjara porwazo, ihi otjiwaṋa tja Israel.”
25 Nungwari ingwi omukazendu weya ne riwisa pozombaze za Jesus na tja: “Muhona, ndji vatera!”
26 Jesus wa zira a tja: “Kakokuwa okutoora ovikurya vyovanatje nokuviyumbira ozombwa.”
27 Omukazendu wa zira a tja: “Otjinga ape ri, Muhona, nungwari oumbona wina u rya outekero mbwa wire kehi yoviriro vyovahona vawo.” 28 Jesus ope mu zirira a tja: “Oove omukazendu wongamburiro onene! Ngape tjitwe otja punga amo vanga.” Nu moiri tjingeyo ndjo omuatje we omukazona arire tja veruka.
Jesus ma verukisa ovandu ovengi
29 Jesus tja zire po mbo we ere pOmuronga wa Galilea. Eye wa ronda kondundu na kakara pehi. 30 Otjimbumba otjingi tjovandu tje ere ku ye atji eta ovaremane novapoṱu noviṱeṱu, nozomboro novikume, novakwao ovengi mba verere; nowo ve ve twa pozombaze za Jesus, neye we ve verukisa. 31 Novandu va uruma tji va muna imba mbu yave ha hungire tji mave hungire, noviṱeṱu tji vya verukisiwa nawa, novaremane tji mave ka wondja, novapoṱu tji mave munu; nowo arire tji va hivirike Ndjambi wa Israel.
Jesus ma parura ovandu omayovi yane
(Mk 8:1-10)32 Jesus wa isanene ovahongewa ve na tja ku wo: “Ami me ṱire ovandu mba ondjenda, orondu owo va kara oure womayuva yetatu puna ami nu kave notjiṋa tji mave ri. Hi nokuvanga okuveyarura kozoyawo nondjara, ngahino tjinga amave wotamene mondjira.”
33 Ovahongewa ve mu pura ave tja: “Omundu mokuti onguza mwi wa sokuisa pi ovikurya mbi mavi yenene okuparura otjimbumba hi!”
34 Jesus arire tja pura a tja: “Eṋe mu nozomboroto ngapi?”
Owo ave ziri ave tja: “Tu nozomboroto hambombari nozohi tjiva ouṱiṱi.”
35 Jesus opa rakizira ihi otjimbumba tjovandu kutja tji kare pehi. 36 Okuzambo a toora inḓa ozomboroto hambombari na inḓa ozohi, a tja okuhepa ku Ndjambi, e ze koyora ne ze yandja kovahongewa ve; novahongewa ve ze haṋa movandu. 37 Ovandu avehe va rya nave kuta. Novahongewa va wonga outekero mbwa hupa ko nave urisa na wo ovimbamba hambombari. 38 Novarumendu mba rya va ri omayovi yane nu ovakazendu novanatje kave varerwe.
39 Tjazumba Jesus arire tje ve hindi ve yaruke kozoyawo, nu a rondo mokayaha na i kehi ra Magadan.
Omahongero wootate mukururume
(Mk 7:1-13)1 Ovafarisei nozonongo zomambo tjiva, ve ere ku Jesus okuza kOjerusalem nave mu pura ave tja: 2 “Okutjavi ovahongewa voye tji ve ha ṱakamisa ombazu yootate mukururume? Owo rutenga kave koho omake wawo tji mave ri!”
3 Jesus wa zira a tja: “Nokutjavi eṋe oveni tji mu ha ṱakamisa etwako ra Ndjambi, nu tji mu ṱakamisa ombazu yeṋu. 4 Orondu Ndjambi ma tja: ‘Yozika iho na nyoko,’ nu ‘Auhe ngu ma sengi ihe na ina nga ṱe.’ 5 Nungwari eṋe mu honga kutja omundu tje notjiṋa tji ma sora okuvatera na tjo ihe na ina, nungwari a tja: ‘Otjo otja Ndjambi,’ 6 eye ke nokuhepa okuyozika ihe. Momuhingo mbwi eṋe mu zunḓa etwako ra Ndjambi, kokutja mu ṱakamisire po ombazu yeṋu. 7 Vanatjavivi eṋe! Tjiri, omuprofete Jesaja wa ri osemba indu tja hungira omaprofetero ohunga na eṋe. Eye wa tjere nai:
8 ‘Ndjambi ma tja otjiwaṋa hi tji ndji yozika notjinyo,
nungwari omutima watjo u ri kokure na ami.
9 Omerikotameneno watjo ku ami omungandjo,
orondu owo ve honga omazikamisiro wovandu
porwe aayo owo omatwako wandje!’ ”
Oviṋa mbi zunḓa omundu
(Mk 7:14-23)10 Jesus wa isanena otjimbumba tjovandu ku ye na tja ku wo: “Purateneye nu mu zuve nawa! 11 Otjiṋa tji tji za pendje nu atji hiti motjinyo tjomundu, katji tji zunḓa omundu, nungwari ihi tji tji za motjinyo tje otji tji zunḓa omundu.”
12 Tjazumba ovahongewa arire tji ve ya ku ye nave tja: “Ove hapo nai mo tjiwa kutja Ovafarisei va pindikisiwa i omambo woye are?”
13 Jesus wa zirire a tja: “Otjihape atjihe Tate meyuru tje ha kunine matji zukurwa. 14 Amu rikende nOvafarisei! Owo ovanane ovapoṱu vovapoṱu; Nomupoṱu tji ma nana omukwao, aveyevari mave wire motjitoto.”
15 Petrus arire tja hungire a tja: “Tu handjaurira omasanekero nga.”
16 Jesus a tja ku wo: “Eṋe nangwari wina kamu nazondunge okukapita ovakweṋu are? 17 Kamu nakuzuva nawa otjiṋa hi are? Otjiṋa atjihe tji tji za pendje nu atji hiti motjinyo tjomundu, tji hita mezumo re nu atji kapitira morutu rwe. 18 Nungwari ihi tji tji pitira motjinyo tjomundu okuza momutima we otji tji zunḓa omundu. 19 Orondu momutima we omu mu za omeripura omavi nge mu popera kokuzepa nokukatuka orukupo nokutjita ouhakohoke ngamwa auhe, nokupunda ovakwao oviṋa, nokukora ovizeze, nokuyamburura ovakwao. 20 Oviṋa mbi ombi zunḓa omundu. Nungwari ingwi okurya ovikurya au hiya koha omake, otjo katjiṋa tji tji zunḓa omundu.”
Ongamburiro yomukazendu Omukanaan
(Mk 7:24-30)21 Jesus wa zire po mbo na i kehi ra Tirus nora kOsidon. 22 Nomukazendu Omukanaan ngwa turire morukondwa ndo we ere ku ye na ravaere a tja: “Muna wa David, ndji tjariparera, Muhona! Omuatje wandje omukazona u nombepo ohakohoke nu u ri mongaro ombi tjinene.”
23 Nungwari Jesus ka hungirire ko embo ku ye. Ovahongewa ve ve ya ku ye nave riyarikaṋa ave tja: “Mu hinda a yende, eye tjinga ama yende ama ravaere kombunda yetu!”
24 Jesus a ziri a tja: “Ami mba hindwa kozonḓu nḓa pandjara porwazo, ihi otjiwaṋa tja Israel.”
25 Nungwari ingwi omukazendu weya ne riwisa pozombaze za Jesus na tja: “Muhona, ndji vatera!”
26 Jesus wa zira a tja: “Kakokuwa okutoora ovikurya vyovanatje nokuviyumbira ozombwa.”
27 Omukazendu wa zira a tja: “Otjinga ape ri, Muhona, nungwari oumbona wina u rya outekero mbwa wire kehi yoviriro vyovahona vawo.” 28 Jesus ope mu zirira a tja: “Oove omukazendu wongamburiro onene! Ngape tjitwe otja punga amo vanga.” Nu moiri tjingeyo ndjo omuatje we omukazona arire tja veruka.
Jesus ma verukisa ovandu ovengi
29 Jesus tja zire po mbo we ere pOmuronga wa Galilea. Eye wa ronda kondundu na kakara pehi. 30 Otjimbumba otjingi tjovandu tje ere ku ye atji eta ovaremane novapoṱu noviṱeṱu, nozomboro novikume, novakwao ovengi mba verere; nowo ve ve twa pozombaze za Jesus, neye we ve verukisa. 31 Novandu va uruma tji va muna imba mbu yave ha hungire tji mave hungire, noviṱeṱu tji vya verukisiwa nawa, novaremane tji mave ka wondja, novapoṱu tji mave munu; nowo arire tji va hivirike Ndjambi wa Israel.
Jesus ma parura ovandu omayovi yane
(Mk 8:1-10)32 Jesus wa isanene ovahongewa ve na tja ku wo: “Ami me ṱire ovandu mba ondjenda, orondu owo va kara oure womayuva yetatu puna ami nu kave notjiṋa tji mave ri. Hi nokuvanga okuveyarura kozoyawo nondjara, ngahino tjinga amave wotamene mondjira.”
33 Ovahongewa ve mu pura ave tja: “Omundu mokuti onguza mwi wa sokuisa pi ovikurya mbi mavi yenene okuparura otjimbumba hi!”
34 Jesus arire tja pura a tja: “Eṋe mu nozomboroto ngapi?”
Owo ave ziri ave tja: “Tu nozomboroto hambombari nozohi tjiva ouṱiṱi.”
35 Jesus opa rakizira ihi otjimbumba tjovandu kutja tji kare pehi. 36 Okuzambo a toora inḓa ozomboroto hambombari na inḓa ozohi, a tja okuhepa ku Ndjambi, e ze koyora ne ze yandja kovahongewa ve; novahongewa ve ze haṋa movandu. 37 Ovandu avehe va rya nave kuta. Novahongewa va wonga outekero mbwa hupa ko nave urisa na wo ovimbamba hambombari. 38 Novarumendu mba rya va ri omayovi yane nu ovakazendu novanatje kave varerwe.
39 Tjazumba Jesus arire tje ve hindi ve yaruke kozoyawo, nu a rondo mokayaha na i kehi ra Magadan.
