Ouvi wa Akan
1 Ovaisrael kave karere nonḓuviro komarakiza wa Muhona wokutja ave ha toora ngamwa otjiṋa tji matji nyonwa. Akan ongwa toora po oviṋa tjiva. Eye wa ri omuzandu wa Karmi, omuzandu wa Sabdi, omuzandu wa Serak, ngwa zire momuhoko wa Juda. Muhona otja pindika tjinene nOvaisrael.
2 Josua wa hinda ovarumendu tjiva okuza mOjeriko, ve yende kOai, otjihuro tjokomuhuka wa Betel, popezu na Bet-Awen. Eye we ve raera kutja ve kahore ehi. Ovarumendu otji va ya nave kahora Ai. 3 Nu tji va kotoka va hepura nai ku Josua: “Kahepero ovarumendu avehe okuyenda. Hinda ovarumendu mangara omayovi yevari poo omayovi yetatu okukarwisa otjihuro Ai. O hindi avehe okukarwa ngo; orondu ovanavita na eṱe kavengi.” 4 Ovaisrael mangara omayovi yetatu opu va ira, nungwari ovarumendu va Ai ve ve ramba. 5 Ovarumendu va Ai va zepa Ovaisrael mangara omirongo vitatu na hamboumwe. Owo va ramba Ovaisrael okuza pomuvero wotjihuro nga kOskebarim, nave ve zepere pomuṱurukira wondundu. Ovaisrael va mumapara nave tira tjinene.
6 Josua wa nyondorora ozombanda ze e noruhoze tjinene, na u onḓurumika momurungu wOtjipwikiro tjOmerikutiropamwe wa Muhona. Ovanane vOvaisrael va wa puna ye mbo nga kongurova, nave ritirire oruuma moviuru okuraisa oruhoze rwawo. 7 Nu Josua wa kumba a tja: “Muhona Ndjambi, ove hapo we tu kondisira tjike onḓonḓu Jordan? Andakuzu twa ṱokukara munda mbwina na Jordan! 8 Hi tje vi, Muhona, nambano Ovaisrael tji va tupuka movita? 9 Ovakanaan novature avehe vehi mave zuu otjiṋa hi. Owo mave tu kovere nave tu zepa atuhe; nove mo tjiti vi kena roye enene?”
10 Nu Muhona wa tja ku Josua: “Sekama, wa wire tjike nai onḓurumika? 11 Ovaisrael va tura ondjo! Owo va teya omerikutiropamwe ngu va tjita na ami, nu ngu mbe ve rakiza kutja ve ye ṱakamise. Owo va toora ovihuurwa tjiva vyaimbi mbya sokunyonwe, ave vaka nave vi horeke moviṋa vyawo oveni. 12 Ovaisrael opu ve hi nokusora okupirukira ovanavita na wo. Owo mave tupuka movita; orondu va imbirahiwa konyonokero. Ami hi nokukara puna eṋe rukwao, ngandu indu tji mwa imbirahi oviṋa avihe, mbi mwa rakiziwa kutja amu toora. 13 Sekama! Yapura otjiwaṋa, nu ngatji rirongere Muhona, Ndjambi wa Israel, ma tja nai: ‘Vaisrael, mu novihuurwa mokati keṋu mbi mba rakiza kutja vi imbirahiwe konyonokero. Eṋe kamaamu sora okupirukira ovanavita na eṋe nga tji mwa imbirahi oviṋa mbi!’ 14 Nu muhuka omunene mamu etwa komurungu, omuhoko komuhoko. Omuhoko mbwi Muhona mbu ma toorora mau ya komurungu, onganda konganda. Nonganda Muhona ndji ma toorora mai ya komurungu, eṱunḓu keṱunḓu. Neṱunḓu Muhona ndi ma toorora mari ya komurungu, omurumendu komurumendu. 15 Nu ingwi ngwa toororwa na vazewa novihuurwa mbi nga nyosiwe puna eṱunḓu re noviṋa avihe mbye na vyo. Orondu eye wa tjita otjiṋa otjiyaukise tjinene mokuteya omerikutiropamwe otjiwaṋa tjandje ngu tja tjita na ami.”
16 Tjazumba Josua wa penduka omuhuka omunene, na eta Ovaisrael komurungu, omuhoko komuhoko. Nomuhoko wa Juda ombwa toororwa. 17 Eye wa eta omuhoko wa Juda komurungu, onganda konganda nonganda ya Serak ondja toororwa. Tjazumba otja eta onganda ya Serak komurungu, eṱunḓu keṱunḓu. Nu eṱunḓu ra Sabdi onda toororwa. 18 Josua wa eta eṱunḓu ra Sabdi komurungu, omurumendu komurumendu, nu Akan ongwa toororwa. Eye wa ri omuzandu wa Karmi, omuzandu wa Sabdi, omuzandu wa Serak, womuhoko wa Juda. 19 Josua wa tja nai ku Akan: “Muatje wandje! Yandja ondjozikiro ku Muhona, Ndjambi wa Israel, nu rihepura. Nambano ndji raera oviṋa, mbi wa tjita. O roro okundjihorekera.”
20 Akan wa zira ku Josua ama tja: “Tjiri, mba tura ondjo komurungu wa Muhona, Ndjambi wa Israel. Mba tjita nai: 21 Mokati koviṋa, mbi twa huura mba muna mo ombanda yokombanda ombwa ya Babilon, na wina osilveri yondjinda mangara ozokirograma mbari, notjindimbu tjongoldo tjondjinda mangara okirograma ohinga. Ami ee vi vanga tjinene; notji mba toora ne kevisira mehi monganda yandje. Osilveri ondji ri kehi.”
22 Josua opa hindira ovarumendu tjiva kutja ve tupuke kondanda ya Akan; nowo va kamuna kutja tjiri, ovyo vya sirwa mbo. Nosilveri ondja ri kehi. 23 Owo ve vi pitisa mondanda nave vi twara ku Josua na kOvaisrael avehe. Notji ve kevitwa pehi komurungu wa Muhona. 24 Josua nOvaisrael avehe va toora Akan puna osilveri na indji ombanda yokombanda notjindimbu tjongoldo, novazandu novasuko ve nga kozongombe nousino nozonyanda, na atjihe tjarwe tja ri na tjo, nave mu twara komukutu wa Akor. 25 Nu Josua wa tja nai ku Akan: “Okutjavi tji we tu etere oumba otja imbwi? Muhona nambano wina ma eta oumba kove.” Notjiwaṋa atjihe tja zepa Akan nomawe nave mu nyosa puna eṱunḓu re nouini we auhe. 26 Nowo va tendeka omawe ku ye, nge ri ko nga ku ndinondi. Poṋa mbo opu pa za okuisanewa kutja Otjana tjOumba. Muhona otje ha karere nomazenge omavi rukwao.
Ouvi wa Akan
1 Ovaisrael kave karere nonḓuviro komarakiza wa Muhona wokutja ave ha toora ngamwa otjiṋa tji matji nyonwa. Akan ongwa toora po oviṋa tjiva. Eye wa ri omuzandu wa Karmi, omuzandu wa Sabdi, omuzandu wa Serak, ngwa zire momuhoko wa Juda. Muhona otja pindika tjinene nOvaisrael.
2 Josua wa hinda ovarumendu tjiva okuza mOjeriko, ve yende kOai, otjihuro tjokomuhuka wa Betel, popezu na Bet-Awen. Eye we ve raera kutja ve kahore ehi. Ovarumendu otji va ya nave kahora Ai. 3 Nu tji va kotoka va hepura nai ku Josua: “Kahepero ovarumendu avehe okuyenda. Hinda ovarumendu mangara omayovi yevari poo omayovi yetatu okukarwisa otjihuro Ai. O hindi avehe okukarwa ngo; orondu ovanavita na eṱe kavengi.” 4 Ovaisrael mangara omayovi yetatu opu va ira, nungwari ovarumendu va Ai ve ve ramba. 5 Ovarumendu va Ai va zepa Ovaisrael mangara omirongo vitatu na hamboumwe. Owo va ramba Ovaisrael okuza pomuvero wotjihuro nga kOskebarim, nave ve zepere pomuṱurukira wondundu. Ovaisrael va mumapara nave tira tjinene.
6 Josua wa nyondorora ozombanda ze e noruhoze tjinene, na u onḓurumika momurungu wOtjipwikiro tjOmerikutiropamwe wa Muhona. Ovanane vOvaisrael va wa puna ye mbo nga kongurova, nave ritirire oruuma moviuru okuraisa oruhoze rwawo. 7 Nu Josua wa kumba a tja: “Muhona Ndjambi, ove hapo we tu kondisira tjike onḓonḓu Jordan? Andakuzu twa ṱokukara munda mbwina na Jordan! 8 Hi tje vi, Muhona, nambano Ovaisrael tji va tupuka movita? 9 Ovakanaan novature avehe vehi mave zuu otjiṋa hi. Owo mave tu kovere nave tu zepa atuhe; nove mo tjiti vi kena roye enene?”
10 Nu Muhona wa tja ku Josua: “Sekama, wa wire tjike nai onḓurumika? 11 Ovaisrael va tura ondjo! Owo va teya omerikutiropamwe ngu va tjita na ami, nu ngu mbe ve rakiza kutja ve ye ṱakamise. Owo va toora ovihuurwa tjiva vyaimbi mbya sokunyonwe, ave vaka nave vi horeke moviṋa vyawo oveni. 12 Ovaisrael opu ve hi nokusora okupirukira ovanavita na wo. Owo mave tupuka movita; orondu va imbirahiwa konyonokero. Ami hi nokukara puna eṋe rukwao, ngandu indu tji mwa imbirahi oviṋa avihe, mbi mwa rakiziwa kutja amu toora. 13 Sekama! Yapura otjiwaṋa, nu ngatji rirongere Muhona, Ndjambi wa Israel, ma tja nai: ‘Vaisrael, mu novihuurwa mokati keṋu mbi mba rakiza kutja vi imbirahiwe konyonokero. Eṋe kamaamu sora okupirukira ovanavita na eṋe nga tji mwa imbirahi oviṋa mbi!’ 14 Nu muhuka omunene mamu etwa komurungu, omuhoko komuhoko. Omuhoko mbwi Muhona mbu ma toorora mau ya komurungu, onganda konganda. Nonganda Muhona ndji ma toorora mai ya komurungu, eṱunḓu keṱunḓu. Neṱunḓu Muhona ndi ma toorora mari ya komurungu, omurumendu komurumendu. 15 Nu ingwi ngwa toororwa na vazewa novihuurwa mbi nga nyosiwe puna eṱunḓu re noviṋa avihe mbye na vyo. Orondu eye wa tjita otjiṋa otjiyaukise tjinene mokuteya omerikutiropamwe otjiwaṋa tjandje ngu tja tjita na ami.”
16 Tjazumba Josua wa penduka omuhuka omunene, na eta Ovaisrael komurungu, omuhoko komuhoko. Nomuhoko wa Juda ombwa toororwa. 17 Eye wa eta omuhoko wa Juda komurungu, onganda konganda nonganda ya Serak ondja toororwa. Tjazumba otja eta onganda ya Serak komurungu, eṱunḓu keṱunḓu. Nu eṱunḓu ra Sabdi onda toororwa. 18 Josua wa eta eṱunḓu ra Sabdi komurungu, omurumendu komurumendu, nu Akan ongwa toororwa. Eye wa ri omuzandu wa Karmi, omuzandu wa Sabdi, omuzandu wa Serak, womuhoko wa Juda. 19 Josua wa tja nai ku Akan: “Muatje wandje! Yandja ondjozikiro ku Muhona, Ndjambi wa Israel, nu rihepura. Nambano ndji raera oviṋa, mbi wa tjita. O roro okundjihorekera.”
20 Akan wa zira ku Josua ama tja: “Tjiri, mba tura ondjo komurungu wa Muhona, Ndjambi wa Israel. Mba tjita nai: 21 Mokati koviṋa, mbi twa huura mba muna mo ombanda yokombanda ombwa ya Babilon, na wina osilveri yondjinda mangara ozokirograma mbari, notjindimbu tjongoldo tjondjinda mangara okirograma ohinga. Ami ee vi vanga tjinene; notji mba toora ne kevisira mehi monganda yandje. Osilveri ondji ri kehi.”
22 Josua opa hindira ovarumendu tjiva kutja ve tupuke kondanda ya Akan; nowo va kamuna kutja tjiri, ovyo vya sirwa mbo. Nosilveri ondja ri kehi. 23 Owo ve vi pitisa mondanda nave vi twara ku Josua na kOvaisrael avehe. Notji ve kevitwa pehi komurungu wa Muhona. 24 Josua nOvaisrael avehe va toora Akan puna osilveri na indji ombanda yokombanda notjindimbu tjongoldo, novazandu novasuko ve nga kozongombe nousino nozonyanda, na atjihe tjarwe tja ri na tjo, nave mu twara komukutu wa Akor. 25 Nu Josua wa tja nai ku Akan: “Okutjavi tji we tu etere oumba otja imbwi? Muhona nambano wina ma eta oumba kove.” Notjiwaṋa atjihe tja zepa Akan nomawe nave mu nyosa puna eṱunḓu re nouini we auhe. 26 Nowo va tendeka omawe ku ye, nge ri ko nga ku ndinondi. Poṋa mbo opu pa za okuisanewa kutja Otjana tjOumba. Muhona otje ha karere nomazenge omavi rukwao.
