Josua ma havere ombara Jabin noverikutevakumwe na ye
1 Ombuze youtoṋi wOvaisrael ndji ya zuvaka ku Jabin, ombara ya Hasor. Neye we i tjivisa ku Jobab, ombara ya Madon, na kombara ya Simron noya Aksaf, 2 na kozombara zehi rozondundu keyuva kokunene, na kozombara nḓa ri morutjandja rwa Jordan keyuva kokumuho kwOmuronga wa Galilea, na kozombara nḓa ri morutjandja na komukuro wOmuronga Mediterania meṋe ya Dor, kuṱa kongurova. 3 Wina wa hinda ombuze ndji kOvakanaan komukuma wokomuhuka nowokongurova, na kOvaamori na kOvahetite na kOvaperesi na KOvajebusi, mba ri mehi rozondundu, na kOvahevi, mba ri meṋe yondundu Hermon, mehi ra Mispe. 4 Ozombara nḓa azehe ze ya puna ovarwe vazo wovita, otjimbumba otjinene tji tji ṱeki peheke romukuro wokuvare. Owo va ri noukambe ouingi nomatemba wovita omengi. 5 Ozo ze rikuta kumwe naze tono ozondanda pamwe pomeva wa Merom kutja ze rwise Ovaisrael.
6 Nu Muhona wa tja nai ku Josua: “O ve tira. Muhuka moruveze tjingero ndwi ami meve zepa avehe mena rOvaisrael. Konda omisepa vyovikoti vyoukambe wawo, nu hwika omatemba wawo wovita.” 7 Mokamanga Josua novarwe ve wovita avehe otji ve ve rwisira pomeva wa Merom. 8 Muhona we ve yandja mouvara wOvaisrael; owo ve ve havera nave ve ramba nga kotjihuro kOsidon Otjinene na kOmisrefot-Majim nu nga korutjandja rwa Mispe komuhuka. Notji va kara pokurwa nga tji pe ha hupire omunavita nangarire umwe. 9 Josua wa tjita otja Muhona pe mu raera: Eye wa konda omisepa vyovikoti vyoukambe wawo, na nyosa omatemba wawo wovita.
10 Josua wa yaruka na kahuura otjihuro Hasor na zepa ombara yatjo. Moruveze ndo Hasor otji tja ri otjihuro ohongora povihuro vyomauhona aehe ngo. 11 Nowo va zepa ovature avehe; kape na umwe ngwa hupa, notjihuro atjihe a tji nyosiwa.
12 Josua wa huura ozombara nḓa azehe novihuro vyazo otja Moses, omukarere wa Muhona, pe mu rakizire. 13 Nungwari Ovaisrael kave nyosire ovihuro avihe mbya ri kozondunda, posi ya Hasor otji tja nyosiwa i Josua. 14 Ovaisrael va huura ovihuze novinamuinyo avihe movihuro mbi ave vi isa po ovyawo oveni. Nungwari va zepa ovature avehe; kape hupire umwe. 15 Otja Muhona pa rakizire komukarere we Moses, Moses wina opa rakizire ku Josua; nu Josua wa tjita ngamwa atjihe Muhona tja rakizire ku Moses.
Ehi nda huurwa i Josua
16 Josua wa huura omahi aehe nga: Ehi rozondundu nora Negeb, na wina ehi arihe ra Gosen, norutjandja, nomukutu wa Jordan, nehi rozondundu ra Israel norutjandja rwaro. 17 Eye wa zepa ozombara azehe nḓa ri mehi okuza kondundu Halak, popezu na Seir, nga kObaal-Gad motjana tja Libanon, meṋe yondundu Hermon. 18 Josua wa tjita ovita kuna ozombara nḓa azehe oure wozombura ozengi. 19 Nu kapa ri otjihuro tji tja tjita ohange kuna Ovaisrael, posi ya Gibeon mu mwa ri Ovahevi. Avihe vyarwe vya huurwa movita. 20 Muhona wa kukutisa omitima vyovature vovihuro mbi kutja ve rwe nOvaisrael, kokutja ve ṱe nga tji va nyonoka. Avehe va ṱa nokuhinotjari. Imbi Muhona ombya rakizire ku Moses.
21 Moruveze ndo Josua wa ya na kanyona Ovaanakim, mba turire mehi rozondundu, mOhebron na mOdebir na mOanab na mehi arihe rozondundu ra Juda nora Israel. Josua we ve nyona avehe okumana puna ovihuro vyawo. 22 Kape hupire Ovaanakim mehi rOvaisrael, posi yaimba tjiva mba sewa mOgasa na mOgat na mOasdod.
23 Josua otja huura ehi arihe otja Muhona pa rakizire ku Moses. Josua we ri yandja kOvaisrael ri rire ouini wawo oveni, ne ri haṋa otja komihoko vyawo.
Ehi arihe otji ra kara mohange.
Josua ma havere ombara Jabin noverikutevakumwe na ye
1 Ombuze youtoṋi wOvaisrael ndji ya zuvaka ku Jabin, ombara ya Hasor. Neye we i tjivisa ku Jobab, ombara ya Madon, na kombara ya Simron noya Aksaf, 2 na kozombara zehi rozondundu keyuva kokunene, na kozombara nḓa ri morutjandja rwa Jordan keyuva kokumuho kwOmuronga wa Galilea, na kozombara nḓa ri morutjandja na komukuro wOmuronga Mediterania meṋe ya Dor, kuṱa kongurova. 3 Wina wa hinda ombuze ndji kOvakanaan komukuma wokomuhuka nowokongurova, na kOvaamori na kOvahetite na kOvaperesi na KOvajebusi, mba ri mehi rozondundu, na kOvahevi, mba ri meṋe yondundu Hermon, mehi ra Mispe. 4 Ozombara nḓa azehe ze ya puna ovarwe vazo wovita, otjimbumba otjinene tji tji ṱeki peheke romukuro wokuvare. Owo va ri noukambe ouingi nomatemba wovita omengi. 5 Ozo ze rikuta kumwe naze tono ozondanda pamwe pomeva wa Merom kutja ze rwise Ovaisrael.
6 Nu Muhona wa tja nai ku Josua: “O ve tira. Muhuka moruveze tjingero ndwi ami meve zepa avehe mena rOvaisrael. Konda omisepa vyovikoti vyoukambe wawo, nu hwika omatemba wawo wovita.” 7 Mokamanga Josua novarwe ve wovita avehe otji ve ve rwisira pomeva wa Merom. 8 Muhona we ve yandja mouvara wOvaisrael; owo ve ve havera nave ve ramba nga kotjihuro kOsidon Otjinene na kOmisrefot-Majim nu nga korutjandja rwa Mispe komuhuka. Notji va kara pokurwa nga tji pe ha hupire omunavita nangarire umwe. 9 Josua wa tjita otja Muhona pe mu raera: Eye wa konda omisepa vyovikoti vyoukambe wawo, na nyosa omatemba wawo wovita.
10 Josua wa yaruka na kahuura otjihuro Hasor na zepa ombara yatjo. Moruveze ndo Hasor otji tja ri otjihuro ohongora povihuro vyomauhona aehe ngo. 11 Nowo va zepa ovature avehe; kape na umwe ngwa hupa, notjihuro atjihe a tji nyosiwa.
12 Josua wa huura ozombara nḓa azehe novihuro vyazo otja Moses, omukarere wa Muhona, pe mu rakizire. 13 Nungwari Ovaisrael kave nyosire ovihuro avihe mbya ri kozondunda, posi ya Hasor otji tja nyosiwa i Josua. 14 Ovaisrael va huura ovihuze novinamuinyo avihe movihuro mbi ave vi isa po ovyawo oveni. Nungwari va zepa ovature avehe; kape hupire umwe. 15 Otja Muhona pa rakizire komukarere we Moses, Moses wina opa rakizire ku Josua; nu Josua wa tjita ngamwa atjihe Muhona tja rakizire ku Moses.
Ehi nda huurwa i Josua
16 Josua wa huura omahi aehe nga: Ehi rozondundu nora Negeb, na wina ehi arihe ra Gosen, norutjandja, nomukutu wa Jordan, nehi rozondundu ra Israel norutjandja rwaro. 17 Eye wa zepa ozombara azehe nḓa ri mehi okuza kondundu Halak, popezu na Seir, nga kObaal-Gad motjana tja Libanon, meṋe yondundu Hermon. 18 Josua wa tjita ovita kuna ozombara nḓa azehe oure wozombura ozengi. 19 Nu kapa ri otjihuro tji tja tjita ohange kuna Ovaisrael, posi ya Gibeon mu mwa ri Ovahevi. Avihe vyarwe vya huurwa movita. 20 Muhona wa kukutisa omitima vyovature vovihuro mbi kutja ve rwe nOvaisrael, kokutja ve ṱe nga tji va nyonoka. Avehe va ṱa nokuhinotjari. Imbi Muhona ombya rakizire ku Moses.
21 Moruveze ndo Josua wa ya na kanyona Ovaanakim, mba turire mehi rozondundu, mOhebron na mOdebir na mOanab na mehi arihe rozondundu ra Juda nora Israel. Josua we ve nyona avehe okumana puna ovihuro vyawo. 22 Kape hupire Ovaanakim mehi rOvaisrael, posi yaimba tjiva mba sewa mOgasa na mOgat na mOasdod.
23 Josua otja huura ehi arihe otja Muhona pa rakizire ku Moses. Josua we ri yandja kOvaisrael ri rire ouini wawo oveni, ne ri haṋa otja komihoko vyawo.
Ehi arihe otji ra kara mohange.
