Jeremia 9 - Herero Revision Bible (HRR)

1 Ami me zeri kutja andakuzu otjiuru

tjandje ombu yomeva,

nomeho wandje andakuzu

otuharwi twomahoze,

kokutja mbi yenene okurira omutenya nouṱuku

mena rotjiwaṋa tjandje tji tja ṱa.

2 Me zeri kutja andakuzu mbi nopoṋa

pomasuviro mokuti onguza,

etje zapo potjiwaṋa tjandje.

Owo avehe kava ṱakame,

owo otjira tjovanauvi.

3 Owo aruhe ve rirongerera okukora ovizeze;

ouhaṱakama moruveze rwouatjiri

ombu honaparera ehi.

Muhona ma tja nai:

“Otjiwaṋa tjandje tji kara pokutjita ouvi,

nu katji ndji zemburuka

otja ngu mbi ri Ndjambi watjo.”

4 Omundu auhe ma sokuritjevera kepanga re;

nu kape na umwe ngu

nongamburiro momukwao;

orondu omuzamumwe auhe u wovisa

nu auhe u yamba omapanga we.

5-6 Owo avehe ve tikura omapanga wawo,

nu kape na umwe ngu hungira ouatjiri.

Owo va iririra okukora ovizeze,

nu kave isa okutjita omauvi wawo.

Aruhe ve tjita ozondjito zoutwe,

novitjitwa avihe vyovineya vi kongorerasana.

Muhona opu ma tjere nai:

“Otjiwaṋa tjandje tji ndji nyengwa.

7 Nu ami ngu mbi ri

Muhona Omunamasaaehe

me zuzura otjiwaṋa tjandje tjimuna otjitenda,

nu me tji roro.

Otjiwaṋa tjandje tja tjita ouvi;

hi tji tjite vi?

8 Omaraka watjo ye ri otja oviku ovizepe;

aruhe ye kora ovizeze.

Omundu auhe u hungira omambo

wohange komuraranganda na ye,

nungwari eye tjandje momutima we

we mu twira po ombate.

9 Ami hi nokuveverera oviṋa mbi are?

Ami, hi nokusutisa otjiwaṋa otja ihi are?

Ami, ngu mbi ri Muhona,

owami ngu mba hungire.”

10 Ami mba tja nai:

“Ami me ṱire ozondundu oruhoze,

nu me ririre omaryo,

orondu owo ya kukuta,

nu kape na umwe ngu ma

ryanga okutuurunga wo.

Omavandarero wozongombe

kaye tji zuvaka rukwao;

ozonḓera novipuka vyokuti vya taura,

nu vya pizuka.”

11 “Muhona ma tja nai:

Ami me tjiti Jerusalem tji rire otjitambatundu,

moṋa mu mu tura ozombandje;

ovihuro vya Juda mavi rire okuti onguza,

moṋa mu mu ha tura omundu.”

12 Ami mba pura e tja: “Muhona, okutjavi ehi tji ra ṱukuṱuka nu tji ra rira ekukutu tjimuna okuti onguza, nga tji pe hi nomundu ngu ma ryanga okutuurunga ro? Owaṋi ngu nozondunge nḓa yenene okutjiwa otjiṋa hi? Ove we tji handjaurira uṋe, kokutja eye a sore okutjivisa ku varwe?”

13 Muhona wa zira a tja: “Otjiṋa hi tja tjitwa mena rokutja otjiwaṋa tjandje tja isa omahongero ami ngu mbe tji pa. Otjo katji karere nonḓuviro ku ami, nu katji tjitire imbi ami mbi mbe tji raera. 14 Moruveze rwanao otjo tja ri otjirangaranga, nu tje rikotamena koviserekarera vya Baal otja ooihe mukururume pu ve tji hongere okutjita. 15 Nambano, purateneye ku imbi ami, ngu mbi ri Muhona Omunamasaaehe, Ndjambi wa Israel, mbi me tjiti: Ami me yandja omiti omiruru kotjiwaṋa tjandje kutja tji rye, nomeva wouanga kutja tji nwe. 16 Ami meve rimbi mokati koviwaṋa, owo poo ooihe mukururume mbi ve hi na va zuvire, nu meve hindire ovanavita okuverwisa, nga tji mbe ve yandeke okumana.”

Otjiwaṋa tja Jerusalem matji ku ombatero

17 Muhona Omunamasaaehe wa tja nai:

“Ripureye na imbi mbi mavi tjitwa!

Isaneye ovakazendu vomutambo kutja ve ye;

kaisaneye ovakazendu ozonongo,

ngave ye nguno.”

18 Ovandu va tja nai:

“Ve raereye kutja ve hakahane,

ve yekututangununina omiṱanḓu vyomutambo,

ngandu omeho wetu tji ye ura nomahoze,

nomikova vyomeho tji vya

ningenisiwa i omahoze nga.”

19 Purateneye kombosiro yomutambo mOsion, ndji mai tja:

“Owee ku eṱe mbu twa yandekwa!

Eṱe twa yambururwa oparukaze!

Matu sokuisa ehi retu;

ozondjuwo zetu za haṋewa.”

20 Ami mba tja:

“Purateneye ku Muhona, oweṋe vakazendu,

nomatwi weṋu ngaye zuve omambo we.

Hongeye ovasuko veṋu omitambo,

nomapanga weṋu omiṱanḓu vyomutambo wina.

21 Onḓiro ya rondere motuiho twetu

nu ya hiti mozondjuwo zetu zouhona;

oyo ya zepa ovanatje momivanda,

novarumendu omitanda

pomarandisiro wotjihuro.

22 Oturova matu rimbara apehe

tjimuna ombumbi mokuti,

tjimuna omikuta vyovikokotwa mbya isiwa i omukonde,

nu mbi hi nomuwonge.

Imbi Muhona ombye ndji raera okuhungira.”

23 Muhona ma tja nai:

“Ovandu ozonongo ave he rihivire ounongo wawo,

novandu ovanamasa ave he rihivire omasa wawo,

novatumbe wina ave he ritongamisire outumbe wawo.

24 Omundu auhe tji ma vanga okurihiva,

u sokurihiva kutja u nondjiviro

nu u ndji tjiwa kutja owami Muhona,

ngu mbi honaparisa ouwa womutima

nouṱakame nousemba kombanda yehi.

Imbi ombi ri oviṋa mu mbi nonyuṋe.

Ami, ngu mbi ri Muhona, owami ngu mba hungire.”

25 Muhona ma tja nai: “Tareye, omayuva maye ya ami mu me vere avehe mba sukarekwa, 26 okutja otjiwaṋa tja Engipte notja Juda notja Edom notja Amon notja Moab na ihi tjokuti onguza tji tji henya ozondjise zatjo. Oviwaṋa avihe mbi, notjiwaṋa tja Israel wina, me vi vara otja mbi ha sukarekerwe mena rokutja kavi ṱakamisire omerikutiropamwe wandje.”