Jeremia ma etwa kombanguriro
1 Kamanga Jojakim, omuzandu wa Josija, tja za nokurira ombara ya Juda, 2 Muhona otja tja nai ku ami: “Kakurame morupanda rwondjuwo ya Muhona, u kazuvarise imbi mbi mbe ku rakiza okuhungira kovandu avehe mbe za kovirongo vya Juda okuyekurikotamenena mo. O isa embo nangarire rimwe. 3 Ngahino ovandu mave puratene nave isa ozondjira zawo ozombi. Tji va tjiti nao, ami me rundurura omeripuriro wandje wotjiwonga tji mba hara okueta kombanda yawo mena rozondjito zawo azehe zourunde.”
4 Muhona we ndji raera kutja mbi tje nai kotjiwaṋa: “Ami, ngu mbi ri Muhona, mbe mu raera kutja mu kare nonḓuviro ku ami mokuṱakamisa omatwako ngu mbe mu pa, 5 na mokukara ko na tja nomambo wovakarere vandje, imba ovaprofete, mbu mba kara pokuhinda ku eṋe. Eṋe kamu na indu mwa kara nonḓuviro ku imbi owo mbi va hungira. 6 Tji mwa karerere nokuhinonḓuviro, ami me tjiti kondjuwo ndji otja tji mba tjitire ku indji oya Silo, nu me tjiti kutja otjihuro hi tji rire osengiro koviwaṋa avihe mouye.”
7 Ovapristeri novaprofete notjiwaṋa atjihe ve ndji zuva ame hungire oviṋa mbi mondjuwo ya Muhona, 8 nu kamanga tji mba mana okuhungira imbi Muhona mbye ndji rakiza, otji ve ndji kambura nave ravaere amave tja: “Ove u sokuṱa mena romambo nga! 9 Okutjavi tji wa hungire mena ra Muhona kutja ondjuwo ya Muhona ndji mai sana ku indji oya Silo nokutja otjihuro hi matji nyonwa, nokutja kape na umwe ngu ma tura mu tjo?” Tjazumba ovandu avehe otji ve ndji woronganena mondjuwo ya Muhona.
10 Ovanane vOvajuda tji va zuva imbi mbya tjitwa, otji va hakahana okuza kondjuwo youhona, ave ya kondjuwo ya Muhona nave kahaama potuveze twawo pOmuvero Omupe okupangura. 11 Tjazumba ovapristeri novaprofete otji va tja nai kovanane na kotjiwaṋa atjihe: “Omurumendu ngwi wa pu pokuṱa, tjinga a uku otjihuro tjetu navi. Eṋe mwa zuu nomatwi weṋu oveni.”
12 Ami mba tja nai kovanane na kotjiwaṋa atjihe: “Muhona we ndji hinda kutja mbi yekuzuvarisa oviṋa avihe mbi mbi mwe ndji zuva ame hungirire ondjuwo ya Muhona ndji notjihuro hi. 13 Eṋe nambano mamu sokurundurura ovikaro nozondjito zeṋu, nu mamu sokukara nonḓuviro ku Muhona, Ndjambi weṋu. Tji mwa tjiti nai, eye wina ma rundurura omeripuriro we wotjiwonga hi tja tja ma eta kombanda yeṋu. 14 Otja ku ami, mbi ri kehi youvara weṋu! Tjiteye ku ami imbi mbi mamu tjangovasi oviwa novisemba otja kouripura weṋu. 15 Nungwari ṱakamiseye nawa: Tji mwe ndji zepa, eṋe novature votjihuro hi mamu tura ondjo yokuzepa omurumendu omuhinandjo, orondu, tjiri, Muhona ongwe ndji hinda okumuronga nai.”
16 Ovanane notjiwaṋa atjihe arire tji va tja kovapristeri na kovaprofete: “Omurumendu ngwi wa hungira ku eṱe mena ra Muhona, Ndjambi wetu. Eye ke nokusokuṱa.”
17 Kombunda yanao ovakururume tjiva va sekama nave tja kotjiwaṋa tji tja woronganena mbo: 18 “Hiskija tja ri ombara ya Juda, Mika, omuprofete wa Moreset, wa raera kotjiwaṋa atjihe kutja Muhona Omunamasaaehe wa tjere nai:
‘Sion matji taurwa tjimuna otjikunino,
Jerusalem matji rire otjitambatundu,
nondundu yondjuwo ya Muhona
mai rire otjihwa.’
19 Ombara Hiskija notjiwaṋa tja Juda kave zepere Mika Moruveze rwanao Hiskija wa tira Muhona ne riyarikaṋa otjari. Nu Muhona wa rundurura omeripura we inga wokutja ma eta otjiwonga ku wo. Nambano eṱe tu ri pokuriyetera otjiwonga otjitirise.”
20 Pa ri omurumendu warwe wena Urija, omuzandu wa Semaja, ngwa zire kOkirjat-Jearim. Eye wina wa ukira otjihuro hi notjiwaṋa ouvi mena ra Muhona otja Jeremia tja tjita. 21 Ombara Jojakim novarwe ve wovita novahongore ve tji va zuva imbi Urija mbya ukire, ombara otji ya kondja kutja Urija a ṱe. Nungwari Urija wa zuva otjiṋa hi, notja tira na henene kOengipte. 22 Nungwari ombara Jojakim wa hinda Elnatan, omuzandu wa Akbor, novarumendu tjiva varwe kOengipte kutja ve kaete Urija. 23 Owo ve mu kotora kombara Jojakim, neye we mu zepa na rakiza kutja orurova rwe ru yumbwe poṋa pu pe pakwa ovandu vakauriri.
24 Nungwari ami, Jeremia, tjinga amba vaterwa i Ahikam, omuzandu wa Safan, otji mbi ha yandjerwe kotjiwaṋa kutja mbi ṱe.
Jeremia ma etwa kombanguriro
1 Kamanga Jojakim, omuzandu wa Josija, tja za nokurira ombara ya Juda, 2 Muhona otja tja nai ku ami: “Kakurame morupanda rwondjuwo ya Muhona, u kazuvarise imbi mbi mbe ku rakiza okuhungira kovandu avehe mbe za kovirongo vya Juda okuyekurikotamenena mo. O isa embo nangarire rimwe. 3 Ngahino ovandu mave puratene nave isa ozondjira zawo ozombi. Tji va tjiti nao, ami me rundurura omeripuriro wandje wotjiwonga tji mba hara okueta kombanda yawo mena rozondjito zawo azehe zourunde.”
4 Muhona we ndji raera kutja mbi tje nai kotjiwaṋa: “Ami, ngu mbi ri Muhona, mbe mu raera kutja mu kare nonḓuviro ku ami mokuṱakamisa omatwako ngu mbe mu pa, 5 na mokukara ko na tja nomambo wovakarere vandje, imba ovaprofete, mbu mba kara pokuhinda ku eṋe. Eṋe kamu na indu mwa kara nonḓuviro ku imbi owo mbi va hungira. 6 Tji mwa karerere nokuhinonḓuviro, ami me tjiti kondjuwo ndji otja tji mba tjitire ku indji oya Silo, nu me tjiti kutja otjihuro hi tji rire osengiro koviwaṋa avihe mouye.”
7 Ovapristeri novaprofete notjiwaṋa atjihe ve ndji zuva ame hungire oviṋa mbi mondjuwo ya Muhona, 8 nu kamanga tji mba mana okuhungira imbi Muhona mbye ndji rakiza, otji ve ndji kambura nave ravaere amave tja: “Ove u sokuṱa mena romambo nga! 9 Okutjavi tji wa hungire mena ra Muhona kutja ondjuwo ya Muhona ndji mai sana ku indji oya Silo nokutja otjihuro hi matji nyonwa, nokutja kape na umwe ngu ma tura mu tjo?” Tjazumba ovandu avehe otji ve ndji woronganena mondjuwo ya Muhona.
10 Ovanane vOvajuda tji va zuva imbi mbya tjitwa, otji va hakahana okuza kondjuwo youhona, ave ya kondjuwo ya Muhona nave kahaama potuveze twawo pOmuvero Omupe okupangura. 11 Tjazumba ovapristeri novaprofete otji va tja nai kovanane na kotjiwaṋa atjihe: “Omurumendu ngwi wa pu pokuṱa, tjinga a uku otjihuro tjetu navi. Eṋe mwa zuu nomatwi weṋu oveni.”
12 Ami mba tja nai kovanane na kotjiwaṋa atjihe: “Muhona we ndji hinda kutja mbi yekuzuvarisa oviṋa avihe mbi mbi mwe ndji zuva ame hungirire ondjuwo ya Muhona ndji notjihuro hi. 13 Eṋe nambano mamu sokurundurura ovikaro nozondjito zeṋu, nu mamu sokukara nonḓuviro ku Muhona, Ndjambi weṋu. Tji mwa tjiti nai, eye wina ma rundurura omeripuriro we wotjiwonga hi tja tja ma eta kombanda yeṋu. 14 Otja ku ami, mbi ri kehi youvara weṋu! Tjiteye ku ami imbi mbi mamu tjangovasi oviwa novisemba otja kouripura weṋu. 15 Nungwari ṱakamiseye nawa: Tji mwe ndji zepa, eṋe novature votjihuro hi mamu tura ondjo yokuzepa omurumendu omuhinandjo, orondu, tjiri, Muhona ongwe ndji hinda okumuronga nai.”
16 Ovanane notjiwaṋa atjihe arire tji va tja kovapristeri na kovaprofete: “Omurumendu ngwi wa hungira ku eṱe mena ra Muhona, Ndjambi wetu. Eye ke nokusokuṱa.”
17 Kombunda yanao ovakururume tjiva va sekama nave tja kotjiwaṋa tji tja woronganena mbo: 18 “Hiskija tja ri ombara ya Juda, Mika, omuprofete wa Moreset, wa raera kotjiwaṋa atjihe kutja Muhona Omunamasaaehe wa tjere nai:
‘Sion matji taurwa tjimuna otjikunino,
Jerusalem matji rire otjitambatundu,
nondundu yondjuwo ya Muhona
mai rire otjihwa.’
19 Ombara Hiskija notjiwaṋa tja Juda kave zepere Mika Moruveze rwanao Hiskija wa tira Muhona ne riyarikaṋa otjari. Nu Muhona wa rundurura omeripura we inga wokutja ma eta otjiwonga ku wo. Nambano eṱe tu ri pokuriyetera otjiwonga otjitirise.”
20 Pa ri omurumendu warwe wena Urija, omuzandu wa Semaja, ngwa zire kOkirjat-Jearim. Eye wina wa ukira otjihuro hi notjiwaṋa ouvi mena ra Muhona otja Jeremia tja tjita. 21 Ombara Jojakim novarwe ve wovita novahongore ve tji va zuva imbi Urija mbya ukire, ombara otji ya kondja kutja Urija a ṱe. Nungwari Urija wa zuva otjiṋa hi, notja tira na henene kOengipte. 22 Nungwari ombara Jojakim wa hinda Elnatan, omuzandu wa Akbor, novarumendu tjiva varwe kOengipte kutja ve kaete Urija. 23 Owo ve mu kotora kombara Jojakim, neye we mu zepa na rakiza kutja orurova rwe ru yumbwe poṋa pu pe pakwa ovandu vakauriri.
24 Nungwari ami, Jeremia, tjinga amba vaterwa i Ahikam, omuzandu wa Safan, otji mbi ha yandjerwe kotjiwaṋa kutja mbi ṱe.
