Ovaisrael mave tatumisiwa mOengipte
1 Omana wovazandu va Israel, mba tjindira kOengipte puna Jakob, auhe puna eṱunḓu re, owo nga: 2 OoRuben na Simeon na Levi na Juda; 3 na Isakar na Sebulon na Benjamin; 4 na Dan na Naftali na Gad na Aser. 5 Jakob wa ri nozondekurona omirongo hambombari. Josef tjandje weya rukuru mOengipte. 6 Moure woruveze ndo Josef novanatje vaihe nomuhoko auhe otji va koka. 7 Nungwari Ovaisrael va ri norukwato oruingi. Otjivaro tjawo tja rira otjingi, nu va kara nomasa. Va takavara, nga tji ve ura mehi.
8 Notji mwa zikwa ombara ombe mOengipte, ndji ha tjivirwe Josef. 9 Oyo ya tja nai kotjiwaṋa tjayo: “Mamu tjiwa kutja Ovaisrael nambano va takavara, nu va rire ovanamasa pu eṱe, nga tji va rire ondirisiro kweṱe. 10 Ngatu ve pahere ondunge kutja ave ha takavarere ko. Tjapo tji pe ya ovita, mave rikutu kuna ovanavita na eṱe, ave tu rwisa nave kambura ehi retu.” 11 Nu pa zikwa ovatatumise vovahuurwa okuveungurisa nomasa kutja ve mune ouzeu. Ovaisrael va tungira Farao ovihuro vyomapwikiro oOpitom na Ramses. 12 Ovaisrael nangarire kutja aave tatumisiwa nai, va yenda amave takavarere ko tjinene nga Ovaengipte tji va uta okuvenyengwa nokuvetira. 13 Owo opu va za okuungurisa Ovaisrael oviungura vyoukarere. 14 Ominyo vyawo vya tetarisiwa i oviungura vyondatumisire vyomunoko novyozohima, noviungura ngamwa avihe movikunino; ii, oviungura vyondatumisire avihe novyoukarere mbi, va ungurisiwa i Ovaengipte.
15 Ombara ya Engipte ya raera kovakazendu ovapandukise vOvaheberi, Sifra na Pua, ai tja; 16 “Eṋe tji mamu pandukisa ovakazendu Ovaheberi namu munu omuatje kutja omuzandu, mu zepeye; nungwari tje ri omukazona, mu eseye a hupe.” 17 Nungwari ovakazendu ovapandukise va ri nondira ku Ndjambi nave ha tjiti otja tji va raerwa i ombara ya Engipte, nounatje ouzandu ave u esa kutja u hupe. 18 Nombara yOvaengipte ya isana ovakazendu mba ovapandukise nai pura ku wo ai tja: “Okutjavi tji mamu tjiti nai, tji mwa isa ounatje ouzandu kutja u hupe?”
19 Novakazendu ovapandukise va zira ku Farao ave tja: “Ovakazendu Ovaheberi kave ri otja imba vOvaengipte; owo ve panduka oupupu. Omukazendu omupandukise ngunda e hiye ya ku wo, tjandje va panduka rukuru.” 20 Komuhingo mbwi otjiwaṋa tja takavarera ko natji kara nomasa tjinene. Nu Ndjambi wa yandja ouindandu kovakazendu ovapandukise. 21 Owo tjinga ava ri nondira ku Ndjambi, eye otje ve pa omaṱunḓu. 22 Korusenina Farao wa yandja omaraerero kovandu ve avehe na tja: “Okanatje okazandu akehe kOvaheberi ku make pandukwa, ke yumbeye monḓonḓu Nil. Nungwari inga okakazona akehe ke eseye kehupe.”
Ovaisrael mave tatumisiwa mOengipte
1 Omana wovazandu va Israel, mba tjindira kOengipte puna Jakob, auhe puna eṱunḓu re, owo nga: 2 OoRuben na Simeon na Levi na Juda; 3 na Isakar na Sebulon na Benjamin; 4 na Dan na Naftali na Gad na Aser. 5 Jakob wa ri nozondekurona omirongo hambombari. Josef tjandje weya rukuru mOengipte. 6 Moure woruveze ndo Josef novanatje vaihe nomuhoko auhe otji va koka. 7 Nungwari Ovaisrael va ri norukwato oruingi. Otjivaro tjawo tja rira otjingi, nu va kara nomasa. Va takavara, nga tji ve ura mehi.
8 Notji mwa zikwa ombara ombe mOengipte, ndji ha tjivirwe Josef. 9 Oyo ya tja nai kotjiwaṋa tjayo: “Mamu tjiwa kutja Ovaisrael nambano va takavara, nu va rire ovanamasa pu eṱe, nga tji va rire ondirisiro kweṱe. 10 Ngatu ve pahere ondunge kutja ave ha takavarere ko. Tjapo tji pe ya ovita, mave rikutu kuna ovanavita na eṱe, ave tu rwisa nave kambura ehi retu.” 11 Nu pa zikwa ovatatumise vovahuurwa okuveungurisa nomasa kutja ve mune ouzeu. Ovaisrael va tungira Farao ovihuro vyomapwikiro oOpitom na Ramses. 12 Ovaisrael nangarire kutja aave tatumisiwa nai, va yenda amave takavarere ko tjinene nga Ovaengipte tji va uta okuvenyengwa nokuvetira. 13 Owo opu va za okuungurisa Ovaisrael oviungura vyoukarere. 14 Ominyo vyawo vya tetarisiwa i oviungura vyondatumisire vyomunoko novyozohima, noviungura ngamwa avihe movikunino; ii, oviungura vyondatumisire avihe novyoukarere mbi, va ungurisiwa i Ovaengipte.
15 Ombara ya Engipte ya raera kovakazendu ovapandukise vOvaheberi, Sifra na Pua, ai tja; 16 “Eṋe tji mamu pandukisa ovakazendu Ovaheberi namu munu omuatje kutja omuzandu, mu zepeye; nungwari tje ri omukazona, mu eseye a hupe.” 17 Nungwari ovakazendu ovapandukise va ri nondira ku Ndjambi nave ha tjiti otja tji va raerwa i ombara ya Engipte, nounatje ouzandu ave u esa kutja u hupe. 18 Nombara yOvaengipte ya isana ovakazendu mba ovapandukise nai pura ku wo ai tja: “Okutjavi tji mamu tjiti nai, tji mwa isa ounatje ouzandu kutja u hupe?”
19 Novakazendu ovapandukise va zira ku Farao ave tja: “Ovakazendu Ovaheberi kave ri otja imba vOvaengipte; owo ve panduka oupupu. Omukazendu omupandukise ngunda e hiye ya ku wo, tjandje va panduka rukuru.” 20 Komuhingo mbwi otjiwaṋa tja takavarera ko natji kara nomasa tjinene. Nu Ndjambi wa yandja ouindandu kovakazendu ovapandukise. 21 Owo tjinga ava ri nondira ku Ndjambi, eye otje ve pa omaṱunḓu. 22 Korusenina Farao wa yandja omaraerero kovandu ve avehe na tja: “Okanatje okazandu akehe kOvaheberi ku make pandukwa, ke yumbeye monḓonḓu Nil. Nungwari inga okakazona akehe ke eseye kehupe.”
