Ehi ewa okutura mu ro
1 “Omatwako aehe ngu mbe ku rakiza ndinondi ye ṱakamiseye nawa kutja mu kare nomuinyo, mu takavare, nu mu kahite mehi okukerikambura ri rire ouini weṋu, Muhona nda kwizikira ooiho mukururume noruyano. 2 Nu rizemburuka nondjira yoye aihe, Muhona, Ndjambi woye, me ku ryangisa oure wozombura omirongo vine mokuti onguza, okukususuparisa nokukurora, eye a tjiwe imbi mbi ri momutima woye nokutja mo ṱakamisa omatwako we. 3 Eye we ku susuparisa ne ku kayendisa nondjara. Tjazumba e ku pe otjimana okurya, ove nooiho mukururume tji mu hi na mwe tji tjivirwe. Ihi eye we tji tjitira okukuhonga kutja omundu ka hupu momboroto porwayo, nungwari u hupisiwa i embo arihe, ndi mari hungirwa i Muhona. 4 Oure wozombura nḓa omirongo vine ozombanda zoye kaze kurupire, nozombaze zoye kaze surire. 5 Rizemburuka kutja Muhona, Ndjambi woye, me ku rongo nokukuvera otja ihe tje vyure omuna we. 6 Ṱakamisa omatwako wa Muhona, Ndjambi woye, nu hupa mozondjira ze nokumutira. 7 Muhona, Ndjambi woye, me ku twara kehi ewa nde ura nomipupo vyomeva, notuharwi, nozonḓonḓu zomipupo mbi pita motutjandja na mozondundu; 8 ehi nde ura novikokotwa novirya, nomivite nomikuyumbwa nomindenya; ehi nde ura nomiṋinga, nouitji wozonyutji. 9 Mehi ndo komoo kara nouhepe wovikurya, nu komoo kaere otjiṋa; momawe waro mu novitenda, nu mozondundu zaro mo ke mo ongoporo. 10 Ove mo ri no kuta, no hivirike Muhona, Ndjambi woye, mena rehi ewa ndi nde ku pa.
11 “Ritjevera kutja o ha zembi Muhona, Ndjambi woye, mokuhinakuṱakamisa omatwako nomaraerero nomazikamisiro we, ngu mbe ku rakiza ndinondi. 12 Nu ove tji wa kara noviṋa ovingi okurya no kuta, no tungu ozondjuwo ozombwa okutura mu zo, 13 nozongombe nozonyanda zoye, nosilveri nongoldo yoye, nouini woye auhe tji wa takavara, 14 ritjevera kutja o he ritongamisa no ha zembi Muhona, Ndjambi woye ngwe ku pitisa mehi ra Engipte mouhuura. 15 Eye we ku tuurungisa mokuti okunene nokutirise onguza, mu mwa ri ozonyoka nozondje zouzuwo. Nu mehi ndi ekukutu nu ndi hi nomeva, eye we ku pupisira omeva motuuwa otukukutu. 16 Nu mokuti onguza eye we ku pa otjimana okurya, ooiho tji ve hi na ve tji tjivirwe. Eye we ku hindira omauzeu kutja e ku rore nu e ku susuparise, nu korusenina kutja e ku sere ondaya noviṋa oviwa. 17 Nu o ripura ko nai move omuini: ‘Omasa wandje nomaoko wandje onge ndji etere outumbe mbwi.’ 18 Rizemburuka kutja Muhona, Ndjambi woye, ongu yandja omasa okutumba. Eye wa tjita nao, tjinga a ri nouṱakame komerikutiropamwe nga kwizikira ooiho mukururume noruyano nga ku ndinondi. 19 Nungwari tji mo zembi Muhona, Ndjambi woye, nokukongorera oomukuru vovisenginina nokuvekarera nokurikotamena ku wo, me mu raere kutja, tjiri, mamu ṱu. 20 Muhona otja tji ma nyono oviwaṋa komurungu weṋu, eṋe wina otji mamu nyonwa, tjinga amu ha puratenene keraka ra Muhona, Ndjambi weṋu.
Ehi ewa okutura mu ro
1 “Omatwako aehe ngu mbe ku rakiza ndinondi ye ṱakamiseye nawa kutja mu kare nomuinyo, mu takavare, nu mu kahite mehi okukerikambura ri rire ouini weṋu, Muhona nda kwizikira ooiho mukururume noruyano. 2 Nu rizemburuka nondjira yoye aihe, Muhona, Ndjambi woye, me ku ryangisa oure wozombura omirongo vine mokuti onguza, okukususuparisa nokukurora, eye a tjiwe imbi mbi ri momutima woye nokutja mo ṱakamisa omatwako we. 3 Eye we ku susuparisa ne ku kayendisa nondjara. Tjazumba e ku pe otjimana okurya, ove nooiho mukururume tji mu hi na mwe tji tjivirwe. Ihi eye we tji tjitira okukuhonga kutja omundu ka hupu momboroto porwayo, nungwari u hupisiwa i embo arihe, ndi mari hungirwa i Muhona. 4 Oure wozombura nḓa omirongo vine ozombanda zoye kaze kurupire, nozombaze zoye kaze surire. 5 Rizemburuka kutja Muhona, Ndjambi woye, me ku rongo nokukuvera otja ihe tje vyure omuna we. 6 Ṱakamisa omatwako wa Muhona, Ndjambi woye, nu hupa mozondjira ze nokumutira. 7 Muhona, Ndjambi woye, me ku twara kehi ewa nde ura nomipupo vyomeva, notuharwi, nozonḓonḓu zomipupo mbi pita motutjandja na mozondundu; 8 ehi nde ura novikokotwa novirya, nomivite nomikuyumbwa nomindenya; ehi nde ura nomiṋinga, nouitji wozonyutji. 9 Mehi ndo komoo kara nouhepe wovikurya, nu komoo kaere otjiṋa; momawe waro mu novitenda, nu mozondundu zaro mo ke mo ongoporo. 10 Ove mo ri no kuta, no hivirike Muhona, Ndjambi woye, mena rehi ewa ndi nde ku pa.
11 “Ritjevera kutja o ha zembi Muhona, Ndjambi woye, mokuhinakuṱakamisa omatwako nomaraerero nomazikamisiro we, ngu mbe ku rakiza ndinondi. 12 Nu ove tji wa kara noviṋa ovingi okurya no kuta, no tungu ozondjuwo ozombwa okutura mu zo, 13 nozongombe nozonyanda zoye, nosilveri nongoldo yoye, nouini woye auhe tji wa takavara, 14 ritjevera kutja o he ritongamisa no ha zembi Muhona, Ndjambi woye ngwe ku pitisa mehi ra Engipte mouhuura. 15 Eye we ku tuurungisa mokuti okunene nokutirise onguza, mu mwa ri ozonyoka nozondje zouzuwo. Nu mehi ndi ekukutu nu ndi hi nomeva, eye we ku pupisira omeva motuuwa otukukutu. 16 Nu mokuti onguza eye we ku pa otjimana okurya, ooiho tji ve hi na ve tji tjivirwe. Eye we ku hindira omauzeu kutja e ku rore nu e ku susuparise, nu korusenina kutja e ku sere ondaya noviṋa oviwa. 17 Nu o ripura ko nai move omuini: ‘Omasa wandje nomaoko wandje onge ndji etere outumbe mbwi.’ 18 Rizemburuka kutja Muhona, Ndjambi woye, ongu yandja omasa okutumba. Eye wa tjita nao, tjinga a ri nouṱakame komerikutiropamwe nga kwizikira ooiho mukururume noruyano nga ku ndinondi. 19 Nungwari tji mo zembi Muhona, Ndjambi woye, nokukongorera oomukuru vovisenginina nokuvekarera nokurikotamena ku wo, me mu raere kutja, tjiri, mamu ṱu. 20 Muhona otja tji ma nyono oviwaṋa komurungu weṋu, eṋe wina otji mamu nyonwa, tjinga amu ha puratenene keraka ra Muhona, Ndjambi weṋu.
