Omaronga wokuṱakamisa nawa omatwako wa Ndjambi
1 “Nambano, Israel, zuva komatwako nomazikamisiro, ngu me mu hongo okuyeṱakamisa kutja mu kare nomuinyo nu mu kahite mehi, Muhona, Ndjambi wooiho mukururume, ndi ma vanga okumupa ri rire ouini weṋu. 2 Amu weza ko okaṋa komambo ngu me mu rakiza, nu amu isa ko otjiṋa; nungwari kareye nonḓuviro komatwako wa Muhona, Ndjambi weṋu, ngu mbe mu rakiza. 3 Eṋe mwa muna nomeho weṋu oveni imbi Muhona mbya tjitira pu Baal wa Peor; orondu imba avehe mbaa ve rikotamene ku Baal wa Peor, Muhona, Ndjambi woye, we ve yandeka mokati keṋu. 4 Nungwari eṋe mbu mwa panḓera pu Muhona, Ndjambi weṋu, ingee mu nomuinyo nga ku ndinondi.
5 “Purateneye, ami mbe mu honga omatwako nomazikamisiro otja Muhona, Ndjambi wandje, pe ndji rakiza. Keyeṱakamiseye kehi ku mamu i nu ndi mari karira ouini weṋu. 6 Ye ṱakamiseye nokuyetjita; orondu mokutjita nao otji mamu raisa ounongo nozondunge zeṋu komurungu woviwaṋa. Novyo tji mavi zuu omazikamisiro nga aehe mavi tja: ‘Tjiri, otjiwaṋa otjinene hi otjinaunongo notjinazondunge.’
7 “Orondu kape notjiwaṋa tjarwe otjinene tji tji noomukuru vovisenginina mbe ri popezu na tjo tjimuna Muhona, Ndjambi wetu, tje ri puna eṱe aruhe, tji matu ku ku ye. 8 Nu kape notjiwaṋa tjarwe otjinene tji tji nomatwako nomazikamisiro omasemba tjimuna inga ngu mbe ku hongo ndinondi. 9 Ritjevera u kare katumba kutja, ngunda au nomuinyo, o ha zembi imbi mbi wa muna nomeho woye omuini. Vi tjivisa kovanatje voye na kovanatje vovanatje voye. 10 Ve tjivisa eyuva ndi, ndi wa kuramene komurungu wa Muhona, Ndjambi woye, kondundu Sinai, Muhona tja tjere nai ku ami: ‘Ndji woronganisira otjiwaṋa, nami me vanga kutja tjizuve omambo wandje ngu me vanga okuhungira kutja tji rihonge okukara nondira ku ami oruveze aruhe ngunda ave nomuinyo, nokuhonga wo kovanatje vawo.’
11 “Raereye ovanatje veṋu, eṋe tji mweya popezu, namu kakurama keṋe yondundu, nondundu ya koverwa i omuzororema wotjikamba otjinene mu mwa pita omuriro mbwaa u yaka okuyenda keyuru. 12 Veraereye omuano Muhona mbwa hungirire ku eṋe mokati komuriro. Veraereye omuano mbwaa mu zuu ombosiro yomambo, nokuhinakumuna ombunikiro yomundu, nungwari pa ri ombosiro yeraka uriri. 13 Neye we mu raera kutja mamu sokutjitavi kokutja mu ṱakamise omerikutiropamwe we, nge ri omatwako omurongo, nga tjangerwe kovitjangero vivari vyomawe. 14 Nu moruveze ndo Muhona wina we ndji rakiza kutja mbi mu honge omatwako nomazikamisiro aehe ngu mamu kaṱakamisa kehi ku mamu i, indi ehi, ndi mamu kakambura ri rire ouini weṋu.
Omaronga otja koomukuru vovisenginina
15 “Ritjevereye nawa! Orondu meyuva ndo Muhona tja hungira kweṋe mokati komuriro kondundu Sinai, kamu munine ombunikiro yomundu, 16 kokutja amu ha tjiti ourunde mokuriungurira otjiserekarera otjihongwa, otjisanekero ngamwa atjihe tjomukuru wotjisenginina, okutja otjisanekero tjomurumendu poo tjomukazendu 17 poo tjotjinamuinyo ngamwa atjihe tji tji ri kombanda yehi poo tjangamwa onḓera 18 poo tjangamwa atjihe tji tji honahona pehi poo tjangamwa ohi aihe, ndji ri momeva kehi yehi. 19 Ororo nosaneke okurikotamena nokukarera imbi mbi wa munu kevaverwa: Eyuva nomueze nozonyose notjimbumba atjihe tjeyuru okurikotamena ku vyo nokuvikarera. Orondu Muhona, Ndjambi woye, oviṋa avihe mbi we vi yandja koviwaṋa avihe, mbi ri kehi yeyuru arihe. 20 Nungwari oweṋe otjiwaṋa Muhona tja pitisire mehi ra Engipte, mezuko romuriro kutja mu rire otjiwaṋa tjouini we otja tji mu ri ndinondi. 21 Wina Muhona wa pindikira ami mena reṋu nga tja yana kutja hi nokukonda onḓonḓu Jordan nokuhita mehi ewa Muhona, Ndjambi woye, ndi me ku pe ri rire otjirumatwa tjoye. 22 Nungwari ami me kokere mehi ndi, nu himee kondo onḓonḓu Jordan; neṋe mamu kondo namu kakambura ehi ndina ewa ri rire ouini weṋu. 23 Ṱakamiseye kutja amu ha zembi omerikutiropamwe Muhona, Ndjambi weṋu, nga tjitire kuna eṋe. Ṱakamiseye etwako re kutja amu he ritungire otjiserekarera otjihongwa, okutja otjisanekero tjangamwa atjihe Muhona, Ndjambi weṋu, tje mu tjaera. 24 Orondu Muhona, Ndjambi woye, tjinga e ri omuriro omusesete, eye Ndjambi ngu he ri yandjere otjirakaneno kuna kaaṋi.
25 “Nu tji mwa kara orure mehi ndi namu kwata ovanatje novanatje vovanatje veṋu, amu tjiti ourunde mokuriungurira otjiserekarera otjihongwa, otjisanekero tjotjiṋa ngamwa atjihe. Okutjita nai okokuvi komurungu wa Muhona, Ndjambi woye, nu ihi matji mu pindikisa. 26 Nu tji mamu tjiti nao, ami ndinondi me isana eyuru nehi vi hongonone eṋe kutja, tjiri, mu zengisiwe mehi tjimanga. Eṋe kamu nokuhupa orure mehi, ndi ri munda mbwina na nonḓonḓu Jordan, ndi mu ri pokukambura; nungwari, tjiri, mamu ṱu okumanuka. 27 Muhona me mu piza mokati koviwaṋa, nu mu eṋe mamu kahupa ovandu ouṱiṱi porwe. 28 Nu ingo mamu kakarera oviserekarera vyovisenginina, mbya ungurwa i omake wovandu pomuti na pomawe, mbe ha munu nokuzuva nokurya nokuṋuka. 29 Koṋa ngo mo kapaha Muhona, Ndjambi woye; nove tji mo mu paha nomutima nomuinyo woye auhe, otji mo mu munu. 30 Nu tji u ri mombamisiro, nomauzeu inga aehe tji maye ku wire, otji mo kotoka ku Muhona, Ndjambi woye, no zuu keraka re. 31 Orondu Ndjambi eye omunaunyaṋutima, eye ke nokuvanga okukuesa nokukunyona; nu ke nakuzemba omerikutiropamwe eye omuini nga tjita puna ooiho mukururume noruyano.
32 “Konḓonona omayuva wotuveze tu twa kapita rukuru okuza keyuva Ndjambi nda memene ovandu kombanda yehi; konḓonona okuza kotjikoro tjimwe tjeyuru nga kotjikwao kutja otjiṋa otjinene otja ihi tji na pu tja tjitirwe poo pu tja zuvakere. 33 Pe notjiwaṋa tji tja zuvire eraka ra Ndjambi okuza momuriro otja ove tji wa zuva, natji kara nomuinyo are? 34 Poo pena omukuru wotjisenginina ngwa rorere okuripahera otjiwaṋa motjiwaṋa tjarwe, nomarorero noviraisiro, novihimise novita otja Muhona, Ndjambi weṋu, tje mu tjitira mOengipte are? 35 Ove wa raisirwa oviṋa mbi avihe u tjiwe kutja Muhona eye Ndjambi; nu posi ye kape na warwe. 36 Eye we ku zuvisa eraka re nda za meyuru kutja e ku honge nu e ku munise omuriro we omunene kombanda yehi; nove wa zuva omambo we okuza momuriro. 37 Eye tjinga a suverere ooiho mukururume wa toorora ozondekurona zawo, neye omuini we ku pitisa mOengipte nomasa we omanene. 38 Nove ngunda amo ryama, eye wa ramba oviwaṋa ovinene novinamasa pove okukuhitisa nokukupa ehi ravyo ri rire otjirumatwa tjoye nga ku ndinondi. 39 Nungwari opu mo sokutjiwa nokurizemburuka momutima kutja Muhona onguri Ndjambi erike, meyuru na kombanda yehi; nu kape na warwe. 40 Nove ṱakamisa omazikamisiro nomatwako we ngu me ku rakiza ndinondi, kutja ove nozondekurona zoye mu kare nawa, nove u kare nomuinyo orure mehi Muhona, Ndjambi woye, ndi me ku pe kutja ri rire oroye nga aruhe.”
Ovihuro vyomaundiro komuhuka wonḓonḓu Jordan
41 Moruveze ndo Moses wa toorora ovihuro vitatu munda mbwina nonḓonḓu Jordan, komapitiro weyuva 42 kutja omundu ngwa zeperere omukwao ngu ha kara novita na ye a sore okutaurira ko nokuhupisa omuinyo we. 43 Ovihuro mbi vya ri ooBeser tji tja ri tjomuhoko wa Ruben, mokuti onguza morutjandja, na Ramot tjomuhoko wa Gad, tji tja ri mehi ra Gilead, na Golan tjomuhoko wa Manasse mehi ra Basan.
Omayandjero wOmatwako Omurongo
44 Moses wa yandja omatwako nomahongero kotjiwaṋa tjOvaisrael. 45 Inga onge ri omatwako nomazikamisiro nomaraerero Moses nga yandjere kOvaisrael, tji va zire mOengipte. 46 Ihi tja tjitirwa munda mbwina nonḓonḓu Jordan motjana tji tja hungama Bet-Peor mehi ra Sihon, ombara yOvaamori, ngwa turire mOhesbon. Ombara ndji Moses nOvaisrael ondji va haverere, tji va zire mOengipte. 47 Nowo va kamburire ehi re na indi ora Og, ombara ya Basan; inḓa azeyembari za ri ozombara zOvaamori, nḓa turire munda mbwina na Jordan komuhuka. 48 Indi ehi, ndi va kamburire, ra utire okuza kOaroer, tji tji ri komukuro wonḓonḓu Arnon, nga kondundu Sion, ndji ri Hermon, 49 norutjandja aruhe komuhuka wonḓonḓu Jordan nga kOmuronga wOmongwa komaṱurukiro wondundu Pisga.
Omaronga wokuṱakamisa nawa omatwako wa Ndjambi
1 “Nambano, Israel, zuva komatwako nomazikamisiro, ngu me mu hongo okuyeṱakamisa kutja mu kare nomuinyo nu mu kahite mehi, Muhona, Ndjambi wooiho mukururume, ndi ma vanga okumupa ri rire ouini weṋu. 2 Amu weza ko okaṋa komambo ngu me mu rakiza, nu amu isa ko otjiṋa; nungwari kareye nonḓuviro komatwako wa Muhona, Ndjambi weṋu, ngu mbe mu rakiza. 3 Eṋe mwa muna nomeho weṋu oveni imbi Muhona mbya tjitira pu Baal wa Peor; orondu imba avehe mbaa ve rikotamene ku Baal wa Peor, Muhona, Ndjambi woye, we ve yandeka mokati keṋu. 4 Nungwari eṋe mbu mwa panḓera pu Muhona, Ndjambi weṋu, ingee mu nomuinyo nga ku ndinondi.
5 “Purateneye, ami mbe mu honga omatwako nomazikamisiro otja Muhona, Ndjambi wandje, pe ndji rakiza. Keyeṱakamiseye kehi ku mamu i nu ndi mari karira ouini weṋu. 6 Ye ṱakamiseye nokuyetjita; orondu mokutjita nao otji mamu raisa ounongo nozondunge zeṋu komurungu woviwaṋa. Novyo tji mavi zuu omazikamisiro nga aehe mavi tja: ‘Tjiri, otjiwaṋa otjinene hi otjinaunongo notjinazondunge.’
7 “Orondu kape notjiwaṋa tjarwe otjinene tji tji noomukuru vovisenginina mbe ri popezu na tjo tjimuna Muhona, Ndjambi wetu, tje ri puna eṱe aruhe, tji matu ku ku ye. 8 Nu kape notjiwaṋa tjarwe otjinene tji tji nomatwako nomazikamisiro omasemba tjimuna inga ngu mbe ku hongo ndinondi. 9 Ritjevera u kare katumba kutja, ngunda au nomuinyo, o ha zembi imbi mbi wa muna nomeho woye omuini. Vi tjivisa kovanatje voye na kovanatje vovanatje voye. 10 Ve tjivisa eyuva ndi, ndi wa kuramene komurungu wa Muhona, Ndjambi woye, kondundu Sinai, Muhona tja tjere nai ku ami: ‘Ndji woronganisira otjiwaṋa, nami me vanga kutja tjizuve omambo wandje ngu me vanga okuhungira kutja tji rihonge okukara nondira ku ami oruveze aruhe ngunda ave nomuinyo, nokuhonga wo kovanatje vawo.’
11 “Raereye ovanatje veṋu, eṋe tji mweya popezu, namu kakurama keṋe yondundu, nondundu ya koverwa i omuzororema wotjikamba otjinene mu mwa pita omuriro mbwaa u yaka okuyenda keyuru. 12 Veraereye omuano Muhona mbwa hungirire ku eṋe mokati komuriro. Veraereye omuano mbwaa mu zuu ombosiro yomambo, nokuhinakumuna ombunikiro yomundu, nungwari pa ri ombosiro yeraka uriri. 13 Neye we mu raera kutja mamu sokutjitavi kokutja mu ṱakamise omerikutiropamwe we, nge ri omatwako omurongo, nga tjangerwe kovitjangero vivari vyomawe. 14 Nu moruveze ndo Muhona wina we ndji rakiza kutja mbi mu honge omatwako nomazikamisiro aehe ngu mamu kaṱakamisa kehi ku mamu i, indi ehi, ndi mamu kakambura ri rire ouini weṋu.
Omaronga otja koomukuru vovisenginina
15 “Ritjevereye nawa! Orondu meyuva ndo Muhona tja hungira kweṋe mokati komuriro kondundu Sinai, kamu munine ombunikiro yomundu, 16 kokutja amu ha tjiti ourunde mokuriungurira otjiserekarera otjihongwa, otjisanekero ngamwa atjihe tjomukuru wotjisenginina, okutja otjisanekero tjomurumendu poo tjomukazendu 17 poo tjotjinamuinyo ngamwa atjihe tji tji ri kombanda yehi poo tjangamwa onḓera 18 poo tjangamwa atjihe tji tji honahona pehi poo tjangamwa ohi aihe, ndji ri momeva kehi yehi. 19 Ororo nosaneke okurikotamena nokukarera imbi mbi wa munu kevaverwa: Eyuva nomueze nozonyose notjimbumba atjihe tjeyuru okurikotamena ku vyo nokuvikarera. Orondu Muhona, Ndjambi woye, oviṋa avihe mbi we vi yandja koviwaṋa avihe, mbi ri kehi yeyuru arihe. 20 Nungwari oweṋe otjiwaṋa Muhona tja pitisire mehi ra Engipte, mezuko romuriro kutja mu rire otjiwaṋa tjouini we otja tji mu ri ndinondi. 21 Wina Muhona wa pindikira ami mena reṋu nga tja yana kutja hi nokukonda onḓonḓu Jordan nokuhita mehi ewa Muhona, Ndjambi woye, ndi me ku pe ri rire otjirumatwa tjoye. 22 Nungwari ami me kokere mehi ndi, nu himee kondo onḓonḓu Jordan; neṋe mamu kondo namu kakambura ehi ndina ewa ri rire ouini weṋu. 23 Ṱakamiseye kutja amu ha zembi omerikutiropamwe Muhona, Ndjambi weṋu, nga tjitire kuna eṋe. Ṱakamiseye etwako re kutja amu he ritungire otjiserekarera otjihongwa, okutja otjisanekero tjangamwa atjihe Muhona, Ndjambi weṋu, tje mu tjaera. 24 Orondu Muhona, Ndjambi woye, tjinga e ri omuriro omusesete, eye Ndjambi ngu he ri yandjere otjirakaneno kuna kaaṋi.
25 “Nu tji mwa kara orure mehi ndi namu kwata ovanatje novanatje vovanatje veṋu, amu tjiti ourunde mokuriungurira otjiserekarera otjihongwa, otjisanekero tjotjiṋa ngamwa atjihe. Okutjita nai okokuvi komurungu wa Muhona, Ndjambi woye, nu ihi matji mu pindikisa. 26 Nu tji mamu tjiti nao, ami ndinondi me isana eyuru nehi vi hongonone eṋe kutja, tjiri, mu zengisiwe mehi tjimanga. Eṋe kamu nokuhupa orure mehi, ndi ri munda mbwina na nonḓonḓu Jordan, ndi mu ri pokukambura; nungwari, tjiri, mamu ṱu okumanuka. 27 Muhona me mu piza mokati koviwaṋa, nu mu eṋe mamu kahupa ovandu ouṱiṱi porwe. 28 Nu ingo mamu kakarera oviserekarera vyovisenginina, mbya ungurwa i omake wovandu pomuti na pomawe, mbe ha munu nokuzuva nokurya nokuṋuka. 29 Koṋa ngo mo kapaha Muhona, Ndjambi woye; nove tji mo mu paha nomutima nomuinyo woye auhe, otji mo mu munu. 30 Nu tji u ri mombamisiro, nomauzeu inga aehe tji maye ku wire, otji mo kotoka ku Muhona, Ndjambi woye, no zuu keraka re. 31 Orondu Ndjambi eye omunaunyaṋutima, eye ke nokuvanga okukuesa nokukunyona; nu ke nakuzemba omerikutiropamwe eye omuini nga tjita puna ooiho mukururume noruyano.
32 “Konḓonona omayuva wotuveze tu twa kapita rukuru okuza keyuva Ndjambi nda memene ovandu kombanda yehi; konḓonona okuza kotjikoro tjimwe tjeyuru nga kotjikwao kutja otjiṋa otjinene otja ihi tji na pu tja tjitirwe poo pu tja zuvakere. 33 Pe notjiwaṋa tji tja zuvire eraka ra Ndjambi okuza momuriro otja ove tji wa zuva, natji kara nomuinyo are? 34 Poo pena omukuru wotjisenginina ngwa rorere okuripahera otjiwaṋa motjiwaṋa tjarwe, nomarorero noviraisiro, novihimise novita otja Muhona, Ndjambi weṋu, tje mu tjitira mOengipte are? 35 Ove wa raisirwa oviṋa mbi avihe u tjiwe kutja Muhona eye Ndjambi; nu posi ye kape na warwe. 36 Eye we ku zuvisa eraka re nda za meyuru kutja e ku honge nu e ku munise omuriro we omunene kombanda yehi; nove wa zuva omambo we okuza momuriro. 37 Eye tjinga a suverere ooiho mukururume wa toorora ozondekurona zawo, neye omuini we ku pitisa mOengipte nomasa we omanene. 38 Nove ngunda amo ryama, eye wa ramba oviwaṋa ovinene novinamasa pove okukuhitisa nokukupa ehi ravyo ri rire otjirumatwa tjoye nga ku ndinondi. 39 Nungwari opu mo sokutjiwa nokurizemburuka momutima kutja Muhona onguri Ndjambi erike, meyuru na kombanda yehi; nu kape na warwe. 40 Nove ṱakamisa omazikamisiro nomatwako we ngu me ku rakiza ndinondi, kutja ove nozondekurona zoye mu kare nawa, nove u kare nomuinyo orure mehi Muhona, Ndjambi woye, ndi me ku pe kutja ri rire oroye nga aruhe.”
Ovihuro vyomaundiro komuhuka wonḓonḓu Jordan
41 Moruveze ndo Moses wa toorora ovihuro vitatu munda mbwina nonḓonḓu Jordan, komapitiro weyuva 42 kutja omundu ngwa zeperere omukwao ngu ha kara novita na ye a sore okutaurira ko nokuhupisa omuinyo we. 43 Ovihuro mbi vya ri ooBeser tji tja ri tjomuhoko wa Ruben, mokuti onguza morutjandja, na Ramot tjomuhoko wa Gad, tji tja ri mehi ra Gilead, na Golan tjomuhoko wa Manasse mehi ra Basan.
Omayandjero wOmatwako Omurongo
44 Moses wa yandja omatwako nomahongero kotjiwaṋa tjOvaisrael. 45 Inga onge ri omatwako nomazikamisiro nomaraerero Moses nga yandjere kOvaisrael, tji va zire mOengipte. 46 Ihi tja tjitirwa munda mbwina nonḓonḓu Jordan motjana tji tja hungama Bet-Peor mehi ra Sihon, ombara yOvaamori, ngwa turire mOhesbon. Ombara ndji Moses nOvaisrael ondji va haverere, tji va zire mOengipte. 47 Nowo va kamburire ehi re na indi ora Og, ombara ya Basan; inḓa azeyembari za ri ozombara zOvaamori, nḓa turire munda mbwina na Jordan komuhuka. 48 Indi ehi, ndi va kamburire, ra utire okuza kOaroer, tji tji ri komukuro wonḓonḓu Arnon, nga kondundu Sion, ndji ri Hermon, 49 norutjandja aruhe komuhuka wonḓonḓu Jordan nga kOmuronga wOmongwa komaṱurukiro wondundu Pisga.
