Manasse ma rire ombara mOjuda
(2Eku 33:1-20)1 Manasse wa ri notjiwondo tjozombura omurongo na mbari tja rira ombara mOjuda, neye wa honapara oure wozombura omirongo vitano nandano mOjerusalem. Ina wa ri Hefsi-Ba. 2 Eye wa tura ondjo komurungu wa Muhona, ama horere kovitjitwa oviyaukise vyoviwaṋa Muhona mbya rambere mehi, indu otjiwaṋa tje tji tje ya. 3 Manasse wa tungurura poṋa apehe pomerikotameneno kovisenginina kozondunda ihe Hiskija pa haṋene; eye wa tunga ovipunguhiro vyokurikotamenena ku Baal na ungura otjiserekarera tjomukuru wotjisenginina oserekaze Asera otja Ahab, ombara ya Israel, pa tjitire. Manasse wina we rikotamena kozonyose. 4 Eye wa tunga ovipunguhiro vyovisenginina mondjuwo ya Muhona, poṋa Muhona pa tjere opu me rikotamenenwa. 5 Motupanda tuvari twondjuwo ya Muhona Manasse wa tunga mo ovipunguhiro vyokurikotamena kozonyose. 6 Eye wina wa punguha omuzandu we okurira ombunguhiro oningiririsiwa, a tjiti ounganga noundjai na kapura kozombuke na kozombetere. Wa tura ondjo tjinene komurungu wa Muhona ne mu pindikisa. 7 Manasse wa twa otjiserekarera tjomukuru wotjisenginina oserekaze Asera mondjuwo ya Muhona, Muhona ndja raerere ku David na komuzandu we Salomo, indu tja tjere: “Imba mOjerusalem, mondjuwo ndji, opo opoṋa pu mba toorora momahi aehe womihoko omurongo na vivari vya Israel otja moṋa ami mu me rikotamenenwa. 8 Notjiwaṋa tja Israel tji matji kara nonḓuviro komarakiza wandje aehe natji ṱakamisa omazikamisiro wandje aehe ngu tja pewa i omukarere wandje Moses, nu hi nokuyandjera kutja tji rambwe mehi, ndi mba yandja kooihe mukururume.” 9 Nungwari otjiwaṋa tja Juda katji karere nonḓuviro ku Muhona, nu Manasse we tji twa mouvi ounene pu imbwi mbwa tjitwa i oviwaṋa Muhona mbya rambere, indu otjiwaṋa tje tji tje ya mehi.
10 Muhona wa hungira notjinyo tjovakarere ve, imba ovaprofete, na tja: 11 “Ombara Manasse wa tjita oviṋa oviyaukise mbi, oviṋa ovivi tjinene komurungu waimbi mbyaa vi tjitwa i Ovakanaan; neye wa katukisa otjiwaṋa tja Juda mena rovisenginina vye. 12 Komuhingo mbwi ami ngu mbi ri Muhona, Ndjambi wa Israel, otji me eta otjiwonga otja ihi kOjerusalem na kOjuda, kokutja auhe ngwa zuu, omatwi we ye kwe ongo. 13 Ami me vere Jerusalem otja pu mba tjita kOsamaria na ku Ahab, ombara ya Israel, na kozondekurona ze. Ami me zemisa ovandu va Jerusalem okumana tjimuna omundu tji ma koho otjiyaha, a yeka ne tji ṱurumanisa. 14 Ami me imbirahi ovandu imba mba hupa, ne ve yandja kovanavita na wo mbu mave ve havere nave huura ehi rawo. 15 Ami me tjiti nai kotjiwaṋa tjandje tjinga atja tura ondjo komurungu wandje na tje ndji pindikisa okuza koruveze ndwi ooihe mukururume ndu va pita mOengipte nga ku ndinondi.”
16 Manasse wa zepa ovandu ovengi tjinene nai ovehinandjo nga omivanda vya Jerusalem tjaavi pupu ombinḓu; eye wa tjita otjiṋa hi okuṋiṋikiza otjiwaṋa tja Juda kutja tjiri kotamene kovisenginina. Komuhingo mbwi otje ve pora ku Muhona.
17 Oviṋa avihe vyarwe Manasse mbya tjita puna inga omauvi nga tjita vya tjangwa mEkuruhungi rOzombara za Juda. 18 Manasse wa koka na pakwa motjikunino tjondjuwo youhona, ihi otjikunino tja Usa; nomuzandu we Amon we mu pingena mouhona.
Amon ma rire ombara mOjuda
(2Eku 33:21-25)19 Amon wa ri notjiwondo tjozombura omirongo vivari na mbari tja rira ombara mOjuda; eye wa honapara oure wozombura mbari mOjerusalem. Ina wa ri Mesulemet, omusuko wa Harus, ngwa zire kotjirongo Jotba. 20 Amon wa tura ondjo komurungu wa Muhona tjimuna ihe Manasse, 21 aa horere kozondjito zaihe ne rikotamene kovisenginina, imbi ihe kee rikotamene. 22 Eye wa imbirahi Muhona, Ndjambi wooihe mukururume, nu ka karere nonḓuviro komatwako wa Muhona.
23 Ovahongore va Amon ve rikuta kumwe okumusekamena nave mu zepere mondjuwo youhona. 24 Nungwari Ovajuda, imba mbe ha turire motjihuro, va zepa imba mba sekamena ombara Amon, nave ziki omuzandu we Josija okurira ombara.
25 Oviṋa avihe vyarwe Amon mbya tjita vya tjangwa mEkuruhungi rOzombara za Juda. 26 Amon wa pakwa motjikunino tja Usa, nomuzandu we Josija we mu pingena mouhona.
Manasse ma rire ombara mOjuda
(2Eku 33:1-20)1 Manasse wa ri notjiwondo tjozombura omurongo na mbari tja rira ombara mOjuda, neye wa honapara oure wozombura omirongo vitano nandano mOjerusalem. Ina wa ri Hefsi-Ba. 2 Eye wa tura ondjo komurungu wa Muhona, ama horere kovitjitwa oviyaukise vyoviwaṋa Muhona mbya rambere mehi, indu otjiwaṋa tje tji tje ya. 3 Manasse wa tungurura poṋa apehe pomerikotameneno kovisenginina kozondunda ihe Hiskija pa haṋene; eye wa tunga ovipunguhiro vyokurikotamenena ku Baal na ungura otjiserekarera tjomukuru wotjisenginina oserekaze Asera otja Ahab, ombara ya Israel, pa tjitire. Manasse wina we rikotamena kozonyose. 4 Eye wa tunga ovipunguhiro vyovisenginina mondjuwo ya Muhona, poṋa Muhona pa tjere opu me rikotamenenwa. 5 Motupanda tuvari twondjuwo ya Muhona Manasse wa tunga mo ovipunguhiro vyokurikotamena kozonyose. 6 Eye wina wa punguha omuzandu we okurira ombunguhiro oningiririsiwa, a tjiti ounganga noundjai na kapura kozombuke na kozombetere. Wa tura ondjo tjinene komurungu wa Muhona ne mu pindikisa. 7 Manasse wa twa otjiserekarera tjomukuru wotjisenginina oserekaze Asera mondjuwo ya Muhona, Muhona ndja raerere ku David na komuzandu we Salomo, indu tja tjere: “Imba mOjerusalem, mondjuwo ndji, opo opoṋa pu mba toorora momahi aehe womihoko omurongo na vivari vya Israel otja moṋa ami mu me rikotamenenwa. 8 Notjiwaṋa tja Israel tji matji kara nonḓuviro komarakiza wandje aehe natji ṱakamisa omazikamisiro wandje aehe ngu tja pewa i omukarere wandje Moses, nu hi nokuyandjera kutja tji rambwe mehi, ndi mba yandja kooihe mukururume.” 9 Nungwari otjiwaṋa tja Juda katji karere nonḓuviro ku Muhona, nu Manasse we tji twa mouvi ounene pu imbwi mbwa tjitwa i oviwaṋa Muhona mbya rambere, indu otjiwaṋa tje tji tje ya mehi.
10 Muhona wa hungira notjinyo tjovakarere ve, imba ovaprofete, na tja: 11 “Ombara Manasse wa tjita oviṋa oviyaukise mbi, oviṋa ovivi tjinene komurungu waimbi mbyaa vi tjitwa i Ovakanaan; neye wa katukisa otjiwaṋa tja Juda mena rovisenginina vye. 12 Komuhingo mbwi ami ngu mbi ri Muhona, Ndjambi wa Israel, otji me eta otjiwonga otja ihi kOjerusalem na kOjuda, kokutja auhe ngwa zuu, omatwi we ye kwe ongo. 13 Ami me vere Jerusalem otja pu mba tjita kOsamaria na ku Ahab, ombara ya Israel, na kozondekurona ze. Ami me zemisa ovandu va Jerusalem okumana tjimuna omundu tji ma koho otjiyaha, a yeka ne tji ṱurumanisa. 14 Ami me imbirahi ovandu imba mba hupa, ne ve yandja kovanavita na wo mbu mave ve havere nave huura ehi rawo. 15 Ami me tjiti nai kotjiwaṋa tjandje tjinga atja tura ondjo komurungu wandje na tje ndji pindikisa okuza koruveze ndwi ooihe mukururume ndu va pita mOengipte nga ku ndinondi.”
16 Manasse wa zepa ovandu ovengi tjinene nai ovehinandjo nga omivanda vya Jerusalem tjaavi pupu ombinḓu; eye wa tjita otjiṋa hi okuṋiṋikiza otjiwaṋa tja Juda kutja tjiri kotamene kovisenginina. Komuhingo mbwi otje ve pora ku Muhona.
17 Oviṋa avihe vyarwe Manasse mbya tjita puna inga omauvi nga tjita vya tjangwa mEkuruhungi rOzombara za Juda. 18 Manasse wa koka na pakwa motjikunino tjondjuwo youhona, ihi otjikunino tja Usa; nomuzandu we Amon we mu pingena mouhona.
Amon ma rire ombara mOjuda
(2Eku 33:21-25)19 Amon wa ri notjiwondo tjozombura omirongo vivari na mbari tja rira ombara mOjuda; eye wa honapara oure wozombura mbari mOjerusalem. Ina wa ri Mesulemet, omusuko wa Harus, ngwa zire kotjirongo Jotba. 20 Amon wa tura ondjo komurungu wa Muhona tjimuna ihe Manasse, 21 aa horere kozondjito zaihe ne rikotamene kovisenginina, imbi ihe kee rikotamene. 22 Eye wa imbirahi Muhona, Ndjambi wooihe mukururume, nu ka karere nonḓuviro komatwako wa Muhona.
23 Ovahongore va Amon ve rikuta kumwe okumusekamena nave mu zepere mondjuwo youhona. 24 Nungwari Ovajuda, imba mbe ha turire motjihuro, va zepa imba mba sekamena ombara Amon, nave ziki omuzandu we Josija okurira ombara.
25 Oviṋa avihe vyarwe Amon mbya tjita vya tjangwa mEkuruhungi rOzombara za Juda. 26 Amon wa pakwa motjikunino tja Usa, nomuzandu we Josija we mu pingena mouhona.
