1 Meyuva oritjatatu David novarumendu ve va ya kOsiklag, tjandje nao Ovaamalek va taurire mehi rokeyuva kokumuho kwa Juda, ave rwisa Siklag nave tji nyosa. 2 Owo va huura ovakazendu na avehe mba ri motjihuro, ovaṱiṱi novanene, nu kave zepere mo omundu mu wo, nungwari va twaerera ovahuurwa mba. 3 David novarumendu tji va kotoka kotjihuro, va muna kutja tja hwikirwe, nokutja ovakazendu, novazandu vawo va huurwa. 4 David novarwe ve wovita arire tji va riri tjinene nga tji va pungara. 5 Nangarire imba ovakazendu vevari va David Ahinoam wa Jesreel, na Abigail, omuhepundu wa Nabal, Omukarmel, wina va huurirwe.
6 David wa ri mouzeu tjinene, ovarwe wovita tjinga ava ṱomazenge tjinene mena rokupandjarisa ovanatje vawo, nowo otji va tanda okumuzepa nomawe, nungwari David wa yanḓipara, tjinga e riyameka ku Muhona, Ndjambi we. 7 David wa tja nai komupristeri Abiatar, omuzandu wa Ahimelek: “Ndji etera ombanda yokoviṱuve youpristeri.” Nu Abiatar we i eta ku ye. 8 David arire tja pura ku Muhona na tja: “Hi tezere ovapunde mba? Meve vaza, poo?”
Nu Muhona wa zira a tja: “Ii, tezera! Tjiri mo ve vaza, nu mo yama ovahuurwa.”
9 David otja kumuka puna ovarwe ve wovita omasere hamboumwe nave kavaza kokaramba Besor, nu tjiva vawo va sewa mbo. 10 Nu David wa ryama komurungu mondjira ye puna ovarwe wovita omasere yane, nu imba omasere yevari va urwa tjinene okukonda okaramba nga Besor, notji va sewa kombunda. 11 Nu imba mba ri puna David, va muna Omuengipte mokuti, nave mu eta ku David. Owo ve mu pa omboroto okurya, nomeva okunwa. 12 Owo wina ve mu pa evanda romakuyu, nomavanda yevari womandjembere. Nu tja zu nokurya arire tja hara omasa, eye tjinga e ha rire ne ha nwine otjiṋa oure womayuva yetatu. 13 David we mu pura a tja: “Ove oove owauṋe, nu wa za pi?”
Neye wa zira nai: “Owami omuzandu Omuengipte, omukarere womurumendu Omuaamalek; nomuhona wandje we ndji esa kombunda, tjinga komurungu womayuva yetatu nga kapita amba vera. 14 Eṱe twa taurira mehi rokeyuva kokumuho rOvakereti na indi rOvajuda na indi rOvakaleb, nu twa hwika otjihuro Siklag.”
15 Nu David we mu pura a tja: “Mo vanga okundjihongorera kovapunde mbo?”
Neye wa zira nai: “Ii, me vanga, indu tji mo ndji yanene mena ra Ndjambi kutja ko nakundjizepa, poo ko nakundjiyandja komuhona wandje.” 16 Eye wa hongorera David ku wo.
Novapunde va rimbara poṋa apehe amave nu amave ri, nu amave nyanda tjinene, tjinga ava ri novihuurwa ovingi, mbi va huura mehi rOvafilisti norOvajuda. 17 Nu David we ve rwisa okuza komuhuka omunene nga kongurova yeyuva rarwe nu kapa ri umwe ngwa taura posi yovarumendu omitanda omasere yane, mba kavira ozongamero nave tupuka. 18 David wa yama ovandu avehe, noviṋa avihe Ovaamalek mbi va huura, nangarire ovakazendu ve vevari va yamwa wina. 19 Kapa ri otjiṋa tjimwe tji tja zenga: David wa kotora ovazandu novakazona vovandu ve, novihuurwa avihe Ovaamalek mbi va huurire. 20 Eye wina wa kotora ozonyanda nozongombe; novandu ve va hinga ovinamuiyo mbi momurungu wa David, nave tja: “Imbi ovihuurwa vya David!”
21 Nu David tja kotoka kovarumendu omasere yevari, mba urirwe tjinene okumukongorera, nu mba serwe kombunda pokaramba ka Besor, va sekama okukatjakanena David novandu ve; nu David novandu ve va ryama ku wo, nave ve minike. 22 Ovandu tjiva ovavi noviporoporo mokati kovarumendu, mba ya puna David, va uta okutja nai: “Imba tjinga ave ha ire puna eṱe, otji tu hi nokuvepa ko ovihuurwa mbi twa kahuura; nungwari auhe wawo nga toore omukazendu we novanatje ve, nu nga yende.”
23 Nu David wa tja: “Vakwetu, amu tjiti nao na ihi Muhona tja yandja ku eṱe; eye ongwe tu yama nongwe tu pe outoṋi kombanda yovapunde. 24 Owaṋi ngu ma zuu ku eṋe motjiṋa hi? Otja pu pe ṱa orukondwa rwaingwi ngwa ya kovita, opu mape ṱeki orukondwa rwaingwi ngwa sewa pomitwaro; avehe ngave haṋasane pu pe ṱeki pamwe.” 25 Notji pa kara nao okuza keyuva ndo nga komurungu; ihi David we tji zikamisa okurira omazikamisiro nomaraerero mOisrael nga ku ndinondi.
26 Nu David tja kotoka kOsiklag, otja hinda orukondwa rumwe rwovihuurwa kovanane vOvajuda ovatjiwasane, ne ve tjivisa nai: “Otjiyandjewa tjovihuurwa tjovanavita na Muhona otjo ho!” 27 Oviyandjewa mbi we vi hinda kovandu kObetel na kOramot, mehi rokeyuva kokumuho kwa Juda, na kOjatir, 28 na kOaroer na kOsifmot na kOestemoa, 29 na kOrakal na ku imba womovihuro vyOvajerakmeel na ku imba womovihuro vyOvakeni, 30 na kOhorma na kObor-Asan na kOatak 31 na kOhebron na kovirongo avihe David novandu ve mu va ryangere.
1 Meyuva oritjatatu David novarumendu ve va ya kOsiklag, tjandje nao Ovaamalek va taurire mehi rokeyuva kokumuho kwa Juda, ave rwisa Siklag nave tji nyosa. 2 Owo va huura ovakazendu na avehe mba ri motjihuro, ovaṱiṱi novanene, nu kave zepere mo omundu mu wo, nungwari va twaerera ovahuurwa mba. 3 David novarumendu tji va kotoka kotjihuro, va muna kutja tja hwikirwe, nokutja ovakazendu, novazandu vawo va huurwa. 4 David novarwe ve wovita arire tji va riri tjinene nga tji va pungara. 5 Nangarire imba ovakazendu vevari va David Ahinoam wa Jesreel, na Abigail, omuhepundu wa Nabal, Omukarmel, wina va huurirwe.
6 David wa ri mouzeu tjinene, ovarwe wovita tjinga ava ṱomazenge tjinene mena rokupandjarisa ovanatje vawo, nowo otji va tanda okumuzepa nomawe, nungwari David wa yanḓipara, tjinga e riyameka ku Muhona, Ndjambi we. 7 David wa tja nai komupristeri Abiatar, omuzandu wa Ahimelek: “Ndji etera ombanda yokoviṱuve youpristeri.” Nu Abiatar we i eta ku ye. 8 David arire tja pura ku Muhona na tja: “Hi tezere ovapunde mba? Meve vaza, poo?”
Nu Muhona wa zira a tja: “Ii, tezera! Tjiri mo ve vaza, nu mo yama ovahuurwa.”
9 David otja kumuka puna ovarwe ve wovita omasere hamboumwe nave kavaza kokaramba Besor, nu tjiva vawo va sewa mbo. 10 Nu David wa ryama komurungu mondjira ye puna ovarwe wovita omasere yane, nu imba omasere yevari va urwa tjinene okukonda okaramba nga Besor, notji va sewa kombunda. 11 Nu imba mba ri puna David, va muna Omuengipte mokuti, nave mu eta ku David. Owo ve mu pa omboroto okurya, nomeva okunwa. 12 Owo wina ve mu pa evanda romakuyu, nomavanda yevari womandjembere. Nu tja zu nokurya arire tja hara omasa, eye tjinga e ha rire ne ha nwine otjiṋa oure womayuva yetatu. 13 David we mu pura a tja: “Ove oove owauṋe, nu wa za pi?”
Neye wa zira nai: “Owami omuzandu Omuengipte, omukarere womurumendu Omuaamalek; nomuhona wandje we ndji esa kombunda, tjinga komurungu womayuva yetatu nga kapita amba vera. 14 Eṱe twa taurira mehi rokeyuva kokumuho rOvakereti na indi rOvajuda na indi rOvakaleb, nu twa hwika otjihuro Siklag.”
15 Nu David we mu pura a tja: “Mo vanga okundjihongorera kovapunde mbo?”
Neye wa zira nai: “Ii, me vanga, indu tji mo ndji yanene mena ra Ndjambi kutja ko nakundjizepa, poo ko nakundjiyandja komuhona wandje.” 16 Eye wa hongorera David ku wo.
Novapunde va rimbara poṋa apehe amave nu amave ri, nu amave nyanda tjinene, tjinga ava ri novihuurwa ovingi, mbi va huura mehi rOvafilisti norOvajuda. 17 Nu David we ve rwisa okuza komuhuka omunene nga kongurova yeyuva rarwe nu kapa ri umwe ngwa taura posi yovarumendu omitanda omasere yane, mba kavira ozongamero nave tupuka. 18 David wa yama ovandu avehe, noviṋa avihe Ovaamalek mbi va huura, nangarire ovakazendu ve vevari va yamwa wina. 19 Kapa ri otjiṋa tjimwe tji tja zenga: David wa kotora ovazandu novakazona vovandu ve, novihuurwa avihe Ovaamalek mbi va huurire. 20 Eye wina wa kotora ozonyanda nozongombe; novandu ve va hinga ovinamuiyo mbi momurungu wa David, nave tja: “Imbi ovihuurwa vya David!”
21 Nu David tja kotoka kovarumendu omasere yevari, mba urirwe tjinene okumukongorera, nu mba serwe kombunda pokaramba ka Besor, va sekama okukatjakanena David novandu ve; nu David novandu ve va ryama ku wo, nave ve minike. 22 Ovandu tjiva ovavi noviporoporo mokati kovarumendu, mba ya puna David, va uta okutja nai: “Imba tjinga ave ha ire puna eṱe, otji tu hi nokuvepa ko ovihuurwa mbi twa kahuura; nungwari auhe wawo nga toore omukazendu we novanatje ve, nu nga yende.”
23 Nu David wa tja: “Vakwetu, amu tjiti nao na ihi Muhona tja yandja ku eṱe; eye ongwe tu yama nongwe tu pe outoṋi kombanda yovapunde. 24 Owaṋi ngu ma zuu ku eṋe motjiṋa hi? Otja pu pe ṱa orukondwa rwaingwi ngwa ya kovita, opu mape ṱeki orukondwa rwaingwi ngwa sewa pomitwaro; avehe ngave haṋasane pu pe ṱeki pamwe.” 25 Notji pa kara nao okuza keyuva ndo nga komurungu; ihi David we tji zikamisa okurira omazikamisiro nomaraerero mOisrael nga ku ndinondi.
26 Nu David tja kotoka kOsiklag, otja hinda orukondwa rumwe rwovihuurwa kovanane vOvajuda ovatjiwasane, ne ve tjivisa nai: “Otjiyandjewa tjovihuurwa tjovanavita na Muhona otjo ho!” 27 Oviyandjewa mbi we vi hinda kovandu kObetel na kOramot, mehi rokeyuva kokumuho kwa Juda, na kOjatir, 28 na kOaroer na kOsifmot na kOestemoa, 29 na kOrakal na ku imba womovihuro vyOvajerakmeel na ku imba womovihuro vyOvakeni, 30 na kOhorma na kObor-Asan na kOatak 31 na kOhebron na kovirongo avihe David novandu ve mu va ryangere.
