1 Ekuruhungi 11 - Herero Revision Bible (HRR)

David ma rire ombara mOisrael na Juda

1 Otjiwaṋa atjihe tja Israel tje ya ku David mOhebron natji tja nai ku ye: “Tara, oweṱe onyama nombinḓu yoye omuini! 2 Moruveze ndwa kapita, nangarire Saul ngunda e ri ombara yetu, ove wa hongorera otjiwaṋa tja Israel movita. Nu Muhona, Ndjambi woye, we ku kwizikira kutja mo hongorere otjiwaṋa tje, nokutja mo rire ombara yatjo.” 3 Ovanane avehe vOvaisrael otji ve ya kombara David mOhebron; neye wa tjita omazuvasaneno na wo komurungu wa Muhona, nowo ve mu twirisa kutja a rire ombara mOisrael otja Muhona pa kwizikirire notjinyo tja Samuel.

4 Ombara David nOvaisrael avehe otji va ya nave karwisa otjihuro Jerusalem; otjo tja rukirwe Jebus, nOvajebusi, ovature ovatenga vehi ndo, tjandje va tura mo. 5 Ovajebusi va raera David kutja kamaa hiti moukoto wotjihuro; nungwari David wa kambura otjiṱunga tjawo tjena Sion, notji tja isanewa kutja “Otjihuro tja David.” 6 David wa tja nai: “Auhe ngwa tenge po okuzepa Ovajebusi ma rire omuhongore wotjimbumba tjovita!” Joab, omuzandu wa Seruja, ongwa tenga po okukazepa Ovajebusi, notja rira omuhongore. 7 David tjinga a katura motjiṱunga opu tja isanenwa kutja “Otjihuro tja David.” 8 Eye wa tungurura otjihuro, nu wa utira poṋa pu pa sirwa nehi komunda wokomuhuka wozondunda, nu Joab wa kaenda komurungu okutungurura otjihuro atjihe okumana. 9 David otja ririra ko omunamasa, Muhona Omunamasaaehe, tjinga a ri puna ye.

Ovarwe ozombanḓe va David

(2Sam 23:8-39)

10 Omana wovarwe ozombanḓe va David puna Ovaisrael avehe mba vatera David okurira ombara otja Muhona pa kwizikirire, nu mba ṱakamisa ouhona we kutja u kare nomasa, owo nga:

11 Omutenga wa ri Jasobam, omuzandu wa Hakmoni, omunane wa imba “Ovetatu”, ovarwe ozombanḓe. Eye wa rwa nenga re kuna ovarumendu omasere yetatu, ne ve zepa avehe motjirwa tjimwe. 12 Omukwao wa imba “Ovetatu” ovarwe ozombanḓe wa ri Eleasar, omuzandu wa Dodo, ingwi Omuahohi. 13 Eye we rikuta kuna David okurwisa Ovafilisti motjirwa tja Pas-Damim. Nu eye omari motjikunino tjovirya, indu Ovaisrael tji va uta okutupuka, 14 neye novandu ve va kurama mokati kotjikunino hi nave rwisa Ovafilisti. Muhona we mu pa outoṋi ounene.

15 Eyuva rimwe vetatu vaimba ovarwe ozohongora “Omirongo vitatu” va ya koruuwa ku David, popezu nondimba ya Adulam, okambumba kOvafilisti ngunda aka kuturire motjana tja Refaim. 16 Moruveze ndo David wa ri motjiṱunga tjondundu; notjimbumba tjOvafilisti tja kamburire Betlehem. 17 Nu David wa yenderwa i onḓero ohimise na tja: “Owaṋi uri ngu me kendjietera omeva okunwa mondjombo, ndji ri pomuvero wa Betlehem?” 18 Imba ovarwe “Ovetatu” ovarwe ozombanḓe va tuurunga ozondanda zOvafilisti, ave kateka omeva mondjombo nave eta ku David. Nungwari eye ka nwine ko; moruveze rwanao eye we ye tirahi ye rire ombunguhiro ku Muhona, 19 na tja: “Ami himee nu ko! Mape sana aayo me nu ombinḓu yovarumendu mba mba twa ominyo vyawo moumba wokuṱa!” Komuhingo mbwi eye otja panḓa okunwa. Ihi tja ri tjimwe tjovitjitwa vyovarwe mba “Ovetatu” ozombanḓe.

20 Abisai, omuangu wa Joab, wa ri omuhongore wovarwe ozombanḓe, imba “Omirongo vitatu.” Eye wa rwa nenga re kuna ovarumendu omasere yetatu ne ve zepa, na rire omutjiukwa mokati kaimba “Omirongo vitatu”. 21 Eye wa ri omutjiukwa tjinene pu imba “Omirongo vitatu”, notja rira omuhongore wawo; nungwari ka ri omutjiukwa pu imba “Ovetatu” ovatenga.

22 Benaja, omuzandu wa Jehojada, ngwa zire kOkabseel, wa ri omurwe omutjiukwa, eye wa tjitire ozondjito ozengi zouvanḓe puna okuzepa ovarwe vevari ovanene Ovamoab. Otjikando tjimwe meyuva ndi kwa ri nomakende wombepera, Benaja otja punda mombu ndja pwira, na kazepa ongeyama. 23 Eye wina wa zepa Omuengipte omurenaka woure wozometa mbari nohinga, ngwa ri nenga enene tjimuna otjiti. Benaja we mu rwisa nokati, a hakana enga meke rOmuengipte ne mu zepa na ro. 24 Inḓa ozo ozondjito zouvanḓe za Benaja ngwa ri umwe wa imba “Omirongo vitatu.” 25 Eye wa ri omutjiukwa tjinene pu imba “Omirongo vitatu,” nungwari ka ri omutjiukwa tjinene pu imba “Ovetatu” ovatenga. David we mu zika okurira omutjevere wovatjevere ve vokorutu.

26 Ovarwe ozombanḓe ovakwao owo mba:

OoAsahel, omuangu wa Joab,

na Elhanan, omuzandu wa Dodo, ngwa zire kObetlehem;

27 na Samot, ngwa zire kOharor;

na Heles, ngwa zire kOpelon;

28 na Ira, omuzandu wa Ikes, ngwa zire kOtekoa;

na Abieser, ngwa zire kOanatot;

29 na Sibekai, ngwa zire kOhusati;

na Ilai, ngwa zire kOahohi;

30 na Maharai, ngwa zire kOnetofa;

na Helet, omuzandu wa Baana,

ngwa zire kOnetofa;

31 na Itai, omuzandu wa Ribai,

ngwa zire kOgibea kehi ra Benjamin;

na Benaja, ngwa zire kOpiraton;

32 na Hirai, ngwa zire kOnahalae-Gaas;

na Abiel, ngwa zire kObet-Araba;

33 na Asmawet, ngwa zire kObahurim;

na Eljakba, ngwa zire kOsaalbon;

34 na Hasem, ngwa zire kOgison;

na Jonatan, omuzandu wa Sage, ngwa zire kOharar;

35 na Ahiam, omuzandu wa Sakar, ngwa zire kOharar;

na Elifal, omuzandu wa Ur;

36 na Hefer, ngwa zire kOmekerat;

na Ahija, ngwa zire kOpelon;

37 na Hesro, ngwa zire kOkarmel;

na Naarai, omuzandu wa Esbai;

38 na Joel, erumbi ra Natan;

na Mibhar, omuzandu wa Hagri;

39 na Selek, ngwa zire kOamon;

na Nakrai, ngwa zire kObeerot, ngwa ri omutjinde wovirwise vya Joab, omuzandu wa Seruja;

40 na Ira na Gareb, mba zire kOjeter;

41 na Urija, Omuhetite; na Sabad, omuzandu wa Aklai;

42 na Adina, omuzandu wa Sisa, ngwa ri otjiuru tjomuhoko wa Ruben, nu ngwa ri nokambumba ke omuini kovarwe wovita imba “Omirongo vitatu”

43 na Hanan, omuzandu wa Maaka;

na Josafat, ngwa zire kOmitna;

44 na Usija, ngwa zire kOastarot; nooSama na Jeiel, ovazandu va Hotam, mba zire kOaroer;

45 na Jediael, omuzandu wa Simri;

na Joha, omuangu we, mba zire kOtisa;

46 na Eliel, ngwa zire kOmahanaim; nooJeribai na Josava, ovazandu va Elnaam;

na Itma, ngwa zire kOmoab;

47 na Eliel na Obed na Jaasiel, mba zire kOsoba.