Omadidiliko exulilo lefimbo lounyuni
(Mark. 13:1-2Luk. 21:5-6)1 Ndele Jesus okwa dja mo motembeli nokwa ya, ovalongwa vaye ove uya kuye ve mu ulikile omatungilo otembeli. 2 Ndele Ye okwa nyamukula ta ti kuvo: “Kamu a wete aeshe oo! Oshili handi mu lombwele: itapa fiwa apa emanya la tenhekwa kulikwao inali ngumaunwa po.”
3 Ndele eshi e li omutumba kOmhunda yEemono, ovalongwa vaye ove uya kuye, eshi ve li po aveshe, tava ti: “Tu lombwela: onaini hano eshi tashi ka ningwa, nedidiliko lokuuya kwoye nolexulilo lefimbo lounyuni olilipi?”
4 Ndele Jesus okwe va nyamukula ndele ta ti: “Taleni, muha pukifwe nande okulyelye. 5 Osheshi otaku uya vahapu omedina lange ndele tava ti: aame Kristus, ndele tava pukifa vahapu. 6 Ndele tamu ka uda oita nomakundano oita; taleni, muha tulwe oumbada. Osheshi osho oshi nokuningwa, ndele exulilo inali fika manga. 7 Osheshi oiwana otai fikamene oiwana, noshilongo otashi fikamene oshilongo, otaku di omakakamo edu keembinga neembinga, ondjala tai uya nomapiyaano. 8 Ndelenee aishe ei ehovelo lefeto lokudala.
Ehovelo loixuna yehanauno
(Mark. 13:9-13Luk. 21:12-19)9 “Ndelenee tave mu yandje okuhepekwa, ndele tave mu dipaa, nde tamu tondelwa edina lange koiwana aishe. 10 Opo nee vahapu tava efa ndele tava kengelelafana ndele tava tondafana. 11 Ndele otaku uya ovaxunganeki ovanaipupulu vahapu, ndele tava pukifa vahapu. 12 Oukolokoshi tau hapupala, nohole yavahapu otai talala. 13 Ndelenee ou te lididimike fiyo exulilo, oye ta xupifwa. 14 Ndele evaengeli eli louhamba otali udifilwa ounyuni aushe li ningile oiwana aishe ondobwedi, opo nee taku uya exulilo.
Ehanauno laJerusalem
(Mark. 13:14-20Luk. 21:20-24)15 “Hano ngeenge tamu mono oixuna yehanauno, ya popiwa komuxunganeki Daniel, i li ofika ponhele iyapuki (omuleshi ne shi didilike) 16 opo nee aveshe ovo ve li muJudea, nava ye onhapo keemhunda; 17 naau ta hangika kombada yongulu, aha londoloke ko a ka pitule oinima yaye meumbo, 18 naau ta hangika mepya, aha shune a ka tale elwakani laye. 19 Woo ovafimba novamwali vopomafiku enya! 20 Ndele indileni, okuya onhapo kweni kuhe mu hange okufu ile efiku lEshabata, 21 osheshi omafiku oo otapa kala oudjuu unene, inau kala ko okehovelo lounyuni fiyo opaife, ndele ngaashi itau uya vali. 22 Ndele omafiku enya ngeno inaa xupipikwa, ngeno kaku na nande ombelela imwe tai xupifwa; ndele omafiku enya otaa xupipikwa omolwovahoololwa.
Ookristus novaxunganeki ovanaipupulu
(Mark. 13:21-23)23 “Hano ngeenge ku na ou te mu lombwele: ‘Tala, Kristus oku li apa’, ile oku li kwinya, inamu mu itavela. 24 Osheshi otaku holoka, ookristus ovanaipupulu novaxunganeki ovanaipupulu, ndele tava longo omadidiliko manene noikumwifalonga, va pukife, ngeenge tashi dulika novahoololwa yo.
Efiku lOmona wOmunhu
(Luk. 17:23-24, Luk. 27)25 “Tala, onda tetekela oku shi mu lombwela. 26 Onghee hano, ngeenge tamu lombwelwa: ‘Tala, omombuwa e li’, inamu ya ko, ile: ‘Tala, omondjuwo e li’, inamu itavela. 27 Osheshi ongaashi oluvadi tali shela koushilo ndele tali monika fiyo okouninginino, nokuuya kwOmona wOmunhu osho taku ningi. 28 Osheshi koima ku noshimhu, oko taku ongala eenhwa.
Ealuko lOmwene
(Mark. 13:24-27Luk. 21:25-28)29 “Ndele oudjuu womafiku oo otau shikulwa diva kelauliko letango, nohani itai yela vali, neenyofi otadi u meulu, neenghono domeulu otadi kakamifwa. 30 Edidiliko lOmona wOmunhu tali monika keulu, opo nee oiwana aishe yedu tai lilaana; ndele tai ka mona Omona wOmunhu te uya kombada yoilemo yeulu e neenghono dihapu noshinge; 31 ndele ta tumu ko ovaengeli vaye ve nomanghuma e neendaka dopombada, ndele tava ongele ko ovahoololwa vaye keembinga nhee, okominghulo deulu fiyo okudikwao.
Efaneko lomukwiyu
(Mark. 13:28-29Luk. 21:29-31)32 “Ndele lilongeni omafaneko komukwiyu: Oshitai shao ngeenge tashi tende, omafo taa hape, opo nee omu shi shii, okwenye kwe uya. 33 Hano osho nanye yo, ngeenge tamu mono aishe ei, kaleni mu shi shii, oku li popepi, poshivelo.
Efimbo lealuko
(Mark. 13:30-32Luk. 21:32-33)
34 “Oshili handi mu lombwele: epupi eli itali xulu po, fiyo aishe ei tai wanifwa. 35 Eulu nedu otali xulu po, ndele eendjovo dange kadi na apa tadi xulu po.
Elilongekido
(Luk. 17:26-27, Luk. 34-35Luk. 12:39-40)36 “Ndelenee efiku olo notundi oyo kape na ou e i shii, nande ovaengeli vomeulu, ile Omona, Tate Oye aeke. 37 Ndele ngaashi sha li pomafiku aNoa, osho tuu taku ka kala pokuuya kwOmona wOmunhu. 38 Osheshi ngaashi ovanhu va li pomafiku enya a tetekela eyelu: kwa li hava li nohava nu, hava hombola nohava hombolifa, fiyo efiku olo Noa a ya monguluwato, 39 ndele vo inave shi shiiva, fiyo eyelu le uya nole va hanauna po aveshe; hano osho taku ningi yo pokuuya kwOmona wOmunhu. 40 Otaku ka kala ovalumenhu vavali mepya, umwe ota tambulwa, nomukwao ota fiwa po. 41 Ovakainhu vavali tava tu koshini, umwe ota tambulwa, nomukwao ota fiwa po. 42 Opo nee hano kaleni oupafi, osheshi kamu shi shii efiku lilipipo Omwene weni te uya. 43 Ndelenee kaleni hano mu shi shii, mwene weumbo ngeno e nowino, efimbo lilipi omulunga te uya, ngeno ta pashukile eumbo laye liha teywe. 44 Onghee hano nanye yo kaleni mwe lilongekida, osheshi Omona wOmunhu ote uya efimbo tuu olo inamu mu teelela.”
Omupiya ta pulwa oudiinini
(Luk. 12:41-48)45 “Olyelye hano omupiya omudiinini nomunaendunge, omwene waye e mu tula kombada yovapiya vaye, e va pe oikulya pefimbo lavo? 46 Omupiya ou e nelao, omwene waye ngeenge ta aluka te mu hange a ninga ngaha. 47 Oshili handi mu lombwele: Oye te mu ningi elenga loinima yaye aishe. 48 Ndelenee omupiya ou ngeenge omwii, note lipopile momwenyo waye: ‘Omwene wange ota kala ko’, 49 ndele ta hovele okudenga ovapiya vakwao ndele ta li ndele ta nu pamwe neengholwe, 50 opo nee omwene womupiya ou ote uya efiku olo ine mu teelela notundi oyo ine i shiiva, 51 ndele te mu shashaula ndele te mu pe oshipewa shovanaihelele. Omo hamu kala elilaano nelikweshelo lomayoo.
Jesus ta popi ehanagulo lyotempeli
(Mrk. 13:1-2Luk. 21:5-6)1 Jesus okwa zi mo motempeli nokwa yi. Aalongwa ye oye ya kuye noye mu ulukile oongulu dhotempeli. 2 Oye a ti kuyo: “Kamu dhi wete adhihe ndhika! Ongame tandi mu lombwele: Itapu thigwa mpaka emanya lya tentekwa kekwawo inaali kumunwa po.”
Omandhindhiliko gehulilo lyuuyuni
(Mrk. 13:3-13Luk. 21:7-19)3 Jesus sho a kuutumba kOndundu yooholivi, aalongwa oye ya kuye, manga ya li yi ikalela. Oyo oye mu pula ya ti: “Tu lombwela, uunake ano tashi ka ningwa, nendhindhiliko olini tali holola, uuna to ya nehulilo lyuuyuni?”
4 Jesus okwe ya yamukula a ti: “Kotokeni, mwaa pukithwe nando okulye. 5 Aantu oyendji otaa ke ya taa ti: ‘Ongame Mesias!’ notaa pukitha oyendji. 6 Otamu ka uva omalugodhi noonkundana dhomalugodhi, ihe inamu tulwa uumbanda. Oshoka mbika oyi na okuningwa, ihe ehulilo inali thikana natango. 7 Iigwana otayi ka thikama okukondjithathana, iilongo otayi ka matukilathana. Otaku ke ya oondjala nomakakamo gevi okoombinga noombinga. 8 Ayihe mbika otayi ningi ongetameko lyoshitheta, okanona ngele taka valwa.
9 “Aantu otaye ke mu kwata notaye ke mu gandja, mu hepekwe, e taye mu dhipaga. One tamu ka tondwa kaantu ayehe omolwandje. 10 Aantu oyendji otaa ka etha eitaalo, otaa ka gandjathana e taa tondathana. 11 Otaku ka za aahunganeki aafundja oyendji e taa pukitha oyendji. 12 Uulunde otau ka lunda pombanda, nohole yoyendji otayi huhwa. 13 Ihe ngoka ti idhidhimike sigo ehulilo, ota hupithwa. 14 Elaka ndika etoye lyOshilongo otali ka uvithilwa aantu ayehe, li ningile iigwana ayihe onzapo; notaku ya ihe ehulilo.”
Ehanagulo lyaJerusalem
(Mrk. 13:14-23Luk. 21:20-24)15 “Ngele tamu mono iihuna yeshunduko, mbyoka ya popiwa komuhunganeki Daniel, yi li meha eyapuki” (omuleshi na ndhindhilike nawa), 16 “nena ayehe mboka ye li muJudea, naa tembukile koondundu. 17 Ngoka ta adhika kombanda yongulu ina kuluka ko, a ka pitule iinima ye megumbo. 18 Ngoka ta adhika mepya, ina shuna, a ka tale ko onguwo ye. 19 Yayee aasimba naamwali yopomasiku ngoka! 20 Galikaneni, okufadhuka po kweni kwaa ningwe pokufu nenge mesiku lyEsabati. 21 Oshoka omasiku ngoka otaku kala uudhigu uunene inaau kala ko nale okuza ketameko lyuuyuni sigo ongashingeyi, nongaashi itau ya we. 22 Omasiku ngoka ando itaga fupipikwa, ando kaku na nando omuntu ta hupithwa. Ihe Kalunga ota fupipike omasiku ngoka omolwaahogololwa ye.
23 “Ano ngele ku na ngoka te mu lombwele: ‘Tala, Kristus oye ngu,’ nenge: ‘Oye ngwiyaka,’ inamu mu itaala. 24 Oshoka otaku ka holoka ookristus naahunganeki aafundja notaa holola po omandhindhiliko omanene niikumithalonga, opo ya pukithe, ngele tashi vulika, naahogololwa yaKalunga wo. 25 Uvii ko, onda tetekele oku shi mu lombwela. 26 Onkee ano, ngele tamu lombwelwa: ‘Tala, omombuga e li,’ inamu ya ko, nenge: ‘Tala, omondjugo e li,’ inamu itaala. 27 Oshoka ongashika olwaadhi talu adhima kuuzilo notalu monika kuuninginino, osho tuu wo tashi ka ningwa, uuna Omuna gwOmuntu te ya.
28 “Kokuma nkoka ku na omudhimba, oko haku gongala oontsa.”
Uuna Omuna gwOmuntu te ya
(Mrk. 13:24-27Luk. 21:25-28)29 “Uudhigu womasiku ngoka otau landulwa mbala kokuluudha kwetango, omwedhi itagu ka yela we, oonyothi otadhi ka gwa megulu, noonkondo dhomewangandjo otadhi ka tukuluka. 30 Endhindhiliko lyOmuna gwOmuntu otali ka holoka ihe kegulu. Nena aantu ayehe yokombanda yevi otaa ka lilagana, sho taa ka mona Omuna gwOmuntu te ya te ende kiikogo yokegulu e na oonkondo odhindji neadhimo. 31 Enkuma enene otali ka hikwa, oye sho ta ka tuma ko aayengeli ye, ya ka gongele aahogololwa ye koombinga ne dhevi, okuza kombinga yimwe sigo okonkwawo.”
Eyele lyomukwiyu
(Mrk. 13:28-31Luk. 21:29-33)32 “Ilongeni omayele komukwiyu. Iitayi yagwo ngele tayi hapuka nomafo taga mbunyuka, nena omu shi shi kutya othinge oyi li popepi. 33 Osho nane wo ngele tamu mono ayihe mbika, kaleni mu shi shi, ethimbo olya thikana, Omuna gwOmuntu oku li popepi posheelo.” 34 Dhimbulukweni kutya iinima mbika ayihe otayi ka ningwa omanga epipi ndyoka li na omwenyo ngashingeyi inaali hula po. 35 Egulu nevi otali hulu po, ihe oohapu dhandje kadhi na mpoka tadhi hulu po.
Kaku na ngoka a tseya esiku notundi
(Mrk. 13:32-37Luk. 17:26-30Luk. 34-36)36 “Esiku notundi ndjoka kaku na ngoka e yi shi, nando aayengeli yomegulu nenge Omwana, Tate oye awike. 37 Oshoka ngaashi sha li pethimbo lyaNoa, osho tuu taku ka kala, uuna Omuna gwOmuntu te ya. 38 Ngaashi aantu ya li pethimbo ndiyaka lya tetekele eyelu, ya kala taa li notaa nu, taa hokana notaa hokanitha, sigo esiku ndyoka Noa a yi monguluwato, 39 yo inaye shi tseya, sigo eyelu lye ya nolye ya hanagula po ayehe, osho tuu taku ka kala, uuna Omuna gwOmuntu te ya. 40 Pethimbo ndyoka aantu yaali taa longo mepya; gumwe ta kuthwa po, mukwawo ta thigwa po. 41 Aakiintu yaali taa tsu poshini: gumwe ta kuthwa po, mukwawo ta thigwa po.”
42 “Ano tonateni, oshoka inamu tseya, esiku olini Omuwa gweni te ya. 43 One omu shi shi, mwene gwegumbo ngele oku na owino kutya opethimbo lini omufuthi te ya, nena ota tonatele egumbo lye, opo lyaa gwayelwe. 44 Onkee ano nane wo kaleni mwi ilongekidha, oshoka Omuna gwOmuntu ote ke ya pethimbo tuu ndyoka inaamu mu tegelela.”
Omumati omwiinekelwa
(Luk. 12:41-48)45 “Olye ano omumati omwiinekelwa nomunandunge? Oye ngoka, omuwa gwe e mu pe, a tonatele aamati ooyakwawo, e ya pe iikulya pethimbo lyayo. 46 Omumati omunelago oye ngoka, omuwa gwe ngele te ya, te mu adha ta ningi ngaaka. 47 Oshili tandi mu lombwele: Omuwa gwe ote mu pe etonatelo lyiinima ye ayihe. 48 Ihe omumati ngoka ngele omwiinayi, oti ilombwele ye mwene ta ti: ‘Omuwa gwandje ite ya mbala.’ 49 Oye ta tameke ihe okudhenga aamati ooyakwawo, ta li e ta nu pamwe noonkolwi. 50 Nena omuwa gwomumati ngoka ote ya esiku ndyoka inee mu tegelela nethimbo ndyoka inee li tseya; 51 omuwa note mu ntimbagula e te mu pe oshipewa she pamwe naafudhime. Omo moka tamu ka kala elilagano neikokoto lyomayego.”
