Eembadje daSimson omafele atatu
1 Ndelenee eshi pa pita efimbo limwe. Simson okwa ya e nokakombwena pefimbo leteyo a ka tale omukainhu waye ndele ta ti: “Ame nda hala okuya komwalikadi wange monduda yaye.” Ndelenee xemweno ine shi itavela, a ye mo. 2 Ndele xemweno ta ti: “Ame nda li ndi shii ove we mu tonda, onghee hano nde mu pa ongoleka yoye. Ndele ondenge yaye iwa i mu dule. Yo nai ninge yoye ponhele yaau.” 3 Ndelenee Simson okwe va lombwela ta ti: “Paife ndihe netimba kOvafilisti, ngeenge handi va ningile owii.” 4 Opo nee Simson okwa ya ndele ta kwata eembadje omafele atatu. Nokwa kufa eenyika nokwe di manga komishila oombali noombali ndele ta tula eenyika pokati komishila. 5 Ndele ye okwa tomeka eenyika ndele okwa efa eembadje di ye momapya Ovafilisti inaa teywa. Ndele okwa tomeka eenduba doilya noilya inai teywa, noikokola yomiviinyu nomalumono. 6 Opo nee Ovafilisti va pula: “Olyelye e shi ninga?” Ndele tava ti: “OSimson, oshitenya shOmutimni, osheshi winya a kufa po omwalikadi waye nokwe mu pa ongoleka yaye.” NOvafilisti va fikama ndele tava xwike po nomundilo omwalikadi neumbo laxe. 7 Opo nee Simson ta ti kuvo: “Eshi tamu ningi nge ngaha, ame itandi mu efa, fimbo inandi mu kwatela onghone, ndele handi i.” 8 Ndele okwe va denga unene peenho nomomipindi. Ndele ye okwa dja po, ta tula mekololo lomamanya muEtam.
9 Opo nee Ovafilisti va ehena ndele va onga onhanda muJuda ndele ve lihanena monhele yaLehi. 10 Novalumenhu Ovajuda tava pula: “Omolwashike mwe tu homona?” Ndele vo tava ti: “Fye twe uya tu mange Simson, tu mu ninge ngaashi ye e tu ningila.” 11 Opo nee ovalumenhu omayovi atatu vomuJuda va ya kekololo lemanya laEtam ndele tava pula Simson: “Ino shiiva nokutya, fye hatu pangelwa kOvafilisti, ndele we tu ningila shike?” Ndele ye ta ti kuvo: “Vo ngaashi va ninga nge, osho nde shi va ningila.” 12 Opo nee vo tava ti kuye: Fye twe uya tu ku mange, opo tu ku yandje momake Ovafilisti. Ndele Simson ta ti kuvo: Aneni nge nye vene muha dipae nge. 13 Ndele vo ove mu nyamukula tava ti: Ahowe, fye ohatu ku mange ashike, ndele hatu ku yandje momake avo, ndelenee itatu ku dipaa. Opo nee vo ve mu manga neengodi mbali dipe, ndele tave mu kufa mo mekololo.
Simson ta dipaa Ovafilisti eyovi limwe noluhamama londongi
14 Ye eshi e uya kuLehi, Ovafilisti va hafa omolwaye. Ndelenee Omhepo yOmwene ye uya muye, neengodi odo da li da manga omaoko, da ninga ngaashi eefipa da pya komundilo, neengodi da manguluka momake aye. 15 Ndele okwa mona oluhamama litalala londongi, nokwa nana eke laye ndele te li kufa, ndele ta dipaa nalo ovalumenhu eyovi limwe. 16 Ndele Simson ta ti:
“Noluhamama londongi nde va denga monduba, heeno,
meenduba mbali;
noluhamama londongi
ame nda dipaa ovalumenhu eyovi!”
17 Ndele ye eshi e shi tonga okwa ekelashi oluhamama londongi. Osho ngaha onhele oyo ya lukwa Oshikulundu sholuhamama. 18 Opo nee ye a fyenota unene ndele ta kuu kOmwene ta ti: “Ove wa yandja efindano eli linene keke lomupiya woye, ame ondi nokufya enota paife nokuwila momake aava inava pita etanda?” 19 Opo nee Kalunga okwa panda omututu moluhamama, omo mwa dja omeva; ndele ye okwa nwa, nomhepo yaye ya aluka, nokwa yambuka po. Onghee hano tave li luku Hakore. Yo i li nonena eli muLehi.
20 Ndele ye okwa pangela Israel mefimbo lOvafilisti omido omilongo mbali.
1 Esiku limwe konima Simson okwa yi, a ka talele po omukadhi pethimbo lyeteyo lyosiima nokwa faalele onkombwena. Okwa ti kuhemweno: “Onda hala okuya kumukadhandje.”
Ihe hemweno ine mu pitika. 2 Okwa ti kuSimson: “Onda li ndi shi, owe mu tondo nokuli, nomolwashoka onde mu gandja koshinkumbi shoye. Ihe opu na omumwayina ondenge ye omwaanawa e mu vule. Oye kutha po, a ninge gwoye.”
3 Simson okwa ti: “Ngashingeyi kandi na we mbedhi, ngele tandi geele Aafilisti.” 4 Okwa yi nokuli e ta kwata oombandje omathele gatatu. Okwa kutha oombandje oombali noombali, nomishila dhadho okwe dhi mangele kumwe e ta tula ko onyeka. 5 Nena okwe dhi tidhile momapya gAafilisti e dhi tomeka omulilo. Pamukalo nguka okwa fike po oondudhi adhihe niilya wo mbyoka inaayi teywa manga, osho wo iitsambe yomiviinu nooholivi ndhoka hadhi zi omagadhi. 6 Aafilisti sho ya pulathana kutya olye a ningi ngeyi, oya koneke kutya nani oSimson e shi ningi, oshoka hemweno gwokuTimna okwa gandja omufuko gwe koshinkumbi she. Aafilisti oya yi e taa fike po omufuko negumbo lyahe.
7 Simson okwe ya lombwele. “Omwa ningi nayi! Oshili ite mwena, manga inaandi mu galulila ondjambi yeni!” 8 Okwe ya mbolokotele e te ya vunyagula, noyendji yomuyo okwe ya dhipaga. Nena okwa yi e ta kala mekololo lyemanya puEtam.
Simson ta sindi Aafilisti
9 Aafilisti oye ya noya yungu ontanda muJuda e taa matukile oshilando Lehi. 10 Aajuda oye ya pula: “Omolwashike tamu tu matukile?”
Oya yamukula ya ti: “Otwe ya, tu kwate Simson, tu mu tule meti, tu mu ningile, ngaashi e tu ningile.” 11 Nena aalumentu omayuvi gatatu gaJuda oya yi kekololo lyemanya puEtam e taa ti kuSimson: “Ku shi shi kutya Aafilisti oyo aapangeli yetu? Owe tu ningi ngiini?”
Okwa yamukula: “Onde ya ningile naanaa shoka ya ningile ndje.”
12 Aalumentu oya ti: “Otwe ya, tu ku mange, tse tu ku gandje kuyo.”
Simson okwa ti: “Ganenii ndje, mwaa dhipage ndje ne yene.”
13 Oyo ya ti kuye: “Onawa, otatu ku manga ashike e tatu ku gandja miikaha yawo. Itatu ku dhipaga.” Oye mu manga noongodhi oompe noye mu kutha mo mekololo.
14 Sho ye ya kuLehi, Aafilisti oye mu matukile taye mu igidha. Ohaluka oonkondo dhOmuwa odhe ya muye, e ta tokola oongodhi dha li dhe mu manga komaako nokiikaha dha li dha fa oondali dha pya komulilo. 15 Nena okwa mono oluyego lwokasino opo ka sile. Okwa petama e te lu toola po e ta dhipaga nalwo aalumentu eyuvi limwe. 16 Simson nokwi imbi eimbilo tali ti:
“Aalumentu eyuvi limwe onde ya dhipaga noluyego lwokasino;
onoluyego lwokasino onde ya ndumbike mondumba.”
17 Konima yaambika okwe ekelehi oluyego lwokasino. Ehala mpoka pwa ningilwa mbika, olya lukwa Ramat Lehi.
18 Simson sho a li e endjwa mo kenota, okwi ithana Omuwa e ta ti: “Ongoye wa pe ndje esindano ndika ekumithi, ihe ngashingeyi oto etha, ndi se kenota ngaye ndi kwatwe kaapagani mbano Aafilisti.” 19 Nena Kalunga okwe egulula olumbogo mevi puLehi, nomeya oga fuluka mo. Simson okwe ga nu e ta talalelwa noku uvite nawa. Oluthithiya nduka olwa lukwa Hakkore; olu li sigo onena puLehi.
20 Simson okwa wilike Israel omimvo omilongo mbali, manga Aafilisti ya li taa pangele evi.
