Omaudaneko kwaava hava diinine Eshabata
1 Omwene osho ota ti ngaha: “Diinineni epangelo liyuki ndele ningeni ouyuki, osheshi exupifo lange oli li popepi, nouyuki wange otau ka holoka. 2 Omunelao omunhu ou te shi diinine, nomona womunhu, ou e shi dama; ou ta diinine Eshabata ndele ite li nyono, ou ta kelele eke laye liha ninge owii.”
3 Ndele omunailongo ou e litula pOmwene ina tya: “Omwene ota kondo nge mo shili movanhu vaye,” naau a lutulwa ina tya: “Aame omuti wa fya.” 4 Osheshi Omwene osho ota ti: “Koonakulutulwa ava hava diinine omashabata ange, ndele hava wanifa eshi Ame nde shi hokwa, ndele hava diinine ehangano letu naave. 5 Ame ohandi ke va dikila meumbo lange nomoluumbo lange edidiliko ledimbulukifo, nedina li dule ovana ovamati noukadona ohandi li va luku edina laalushe itali dimwa mo. 6 Novanailongo ovo ve litula pOmwene, oku mu longela nokuhola edina lOmwene, ndele va hala va kale ovapiya vaye, keshe umwe ou ta diinine Eshabata, ite li nyono, ndele ta diinine ehangano letu, 7 ohandi ke va twala komhunda yange iyapuki, ndele handi ke va hafifa mongulu yange yeilikano, omaxwikiloyambo nomatomenoyambo otaa ka wapalela nge keyambelo lange, osheshi ongulu yange i nokwiifanwa ongulu yeilikano yoiwana aishe.” 8 Omwene Kalunga ou ta ongele Ovaisraeli va li ve lihana ota ti: “Navakwao vahapu ohandi va ongele natango kuye.”
Oulunde wOvaisraeli
9 Ongaleni, onye oifitukuti amushe yomofuka mu uye mu lye! Oifitukuti nye amushe yomoixwa! 10 Ovafita vaIsrael aveshe ovapofi, itava koneke sha; vo aveshe eembwa da mwena, dihe shii okuweda. Otadi nangala nokutwa eendjodi, di hole okukofa. 11 Neembwa odo oda fuka, ihadi kuta nande kusha. Novafita voovene osho ve li! Ihava shiiva okukoneka sha. Aveshe ova ya neendjila davo vene; keshe umwe ta tondokele eliko loulunde laye mwene, vo aveshe. 12 Otava ti: “Ileni, ohandi mu etele omaviinyu, tu kale nokufinyuna, efiku lomongula li kale ngaashi eli lonena, li kale la wapala unene.”
Ehupitho lyiigwana yilwe
1 Omuwa ota popi ta ti: “Dhiginineni oshili ne mu longe shoka shu uka, oshoka otandi ya ndi mu hupithe mbala. 2 Otandi ka yambeka mboka haa dhiginine Esabati aluhe noihaye li longitha pombambo. Otandi ka yambeka ayehe mboka ihaa longo uuwinayi.”
3 Omukwiilongo ngoka e li maantu yOmuwa, ina tya: “Omuwa ita pitika ndje, ndi mu longele pamwe naantu ye.”
Omulumentu ngoka a thonwa, ina dhiladhila kutya sho itaa vulu okuvala, ita vulu okukala maantu yaKalunga. 4 Molwaashika Omuwa ota ti: “Omuthonwantu ngoka ta yapula Esabati lyandje, ngoka a hogolola shoka sho opalela ndje nota dhiginine ehangano lyandje, 5 edhina lye otandi li dhimbulukwa motempeli yandje nomokati kaantu yandje shi vulithe e na aanona aamati naakadhona. Ita ka dhimbiwa nando.”
6 Omuwa ota lombwele aakwiilongo mboka ya ningi yomaantu ye, mboka ye mu hole notaye mu longele, mboka taa yapula Esabati notaa dhiginine ehangano lye nawa, ta ti: 7 “Otandi ke mu fala kuSion, ondundu yandje ondjapuki, otandi mu nyanyudhile mongulu yandje yomagalikano notandi taamba omafikilondjambo noontselelandjambo tamu dhi yamba koshiyambelo shandje. Otempeli yandje otayi ka ithanwa ongulu yokugalikanena yaantu yomiigwana ayihe.”
8 Omupangeliawike Omuwa Omunankondoawike ngoka te eta aantu ye Aaisraeli kegumbo taa zi muupongekwa, okwa uvaneke kutya ota ka kongolola wo aantu yalwe ya kale puyo.
Uuhasha waawiliki yaJuda
9 Ne iigwana yaakwiilongo, ileni ngaashi iiyamakuti mu lye aantu yOmuwa. 10 Aalangeli ayehe yaIsrael oyo aaposi, kaye uvite ko sha. Oyo ayehe oombwa oombolo, itadhi vulu okugwedha. Otadhi galauka tadhi yaguma, odhi hole oomposi. 11 Oya fa oombwa dha lumba, ihadhi kuta. Aawiliki osho ye li. Kaye uvite ko sha. Shaa ngoka ota ningi ngaashi a hala nota kongo ashike eliko lye mwene. 12 Otaa igidhathana taa ti: “Ileni, tu peni omaviinu, otatu ka kolwa komalovu! Esiku lyangula otali ka kala lya fa lyonena, nenge tu tye li vule po nokuli.”
