Okufaafana kwovayuki nokwovahenakalunga kwokombada yedu otaku fufya
1 Oinima ei aishe nde i kwatela momutima wange ndele ashishe eshi nde shi konakona shili, nokutya ovayuki novalumenhu ovanaendunge noilonga yavo ve li meke laKalunga, nosho yo ohole ngaashi ehandu. Omunhu keshi shii eshi shi li komesho yaye! 2 Aishe i fike pamwe kwaaveshe. Oshipewa shimwe ashike komuyuki nokomuhenakalunga, komukoshoki nokomulinyateki, kwaau ha yambe nokwaau iha yambe; ou muwa ta ningwa ngaashi omulunde, ou ta ane naau ha tila okwaana. 3 Mwaaishe tai ningwa koshi yetango omu noshinima inashi yuka nokutya, oshipewa shimwe ashike tashi hange aveshe, nomutima yo wovana vovanhu u yadi owii, noulai hau kala momitima davo mokukalamwenyo kwavo. Ndele konima yaashi otaku iwa koonakufya! 4 Osheshi ou fimbo e li mokati kovanamwenyo aveshe, ye e netimaumbwile. Osheshi ombwa i nomwenyo oi dule onghoshi ya fya. 5 Osheshi ovanamwenyo ove shi shii nokutya, ove nokufya. Ndelenee noonakufya inava shiiva nande osha, ndele vo vehe nondjabi vali, osheshi edimbulukifo lavo tali dimbuwa. 6 Ohole yavo ngaashi ehandu lavo nouladi wavo yo owa xula po nale. Ndelenee vo vehe na vali oshipewa mwaashishe tashi ningwa koshi yetango.
Hafela eeshali daKalunga u wanife osho Ye e ku lombwela
7 Inda hano u ka lye nehafo omungome woye, ndele nwa omaviinyu oye nomutima wa nyakukwa, osheshi Kalunga okwa hokwa nonale oilonga yoye. 8 Oikutu yoye nai kale alushe i yela, nomaadi komutwe woye aha pumbwe ko. 9 Hafifa omwenyo pamwe nomwalikadi woye ou u mu hole, omafiku aeshe omokukalamwenyo kwoye epwanga, okwo Ye e ku pa koshi yetango, heeno, omafiku oye aeshe oongahoelela. Osheshi osho oshitukulwa shoye mokukalamwenyo kwoye nomoshilonga shoye, osho to shi longo noudjuu koshi yetango. 10 Longa ashishe to shi dulu neenghono doye, osheshi moshovafi omu to i, kamu na nande oshilonga, ediladilo neshiivo ile ounongo. 11 Natango nda mona koshi yetango nokutya, okutondoka shanamutete kaku li mepangelo laau e nonhapo, haita mepangelo lovakwanyati, hamungome mepangelo lovanaendunge, haupuna mepangelo lovanamayele, hahokwe mepangelo lovanongo, ndelenee efimbo nesheyelo tali pangele aishe. 12 Heeno, nomunhu yo ina shiiva efimbo laye, ngaashi eeshi odo tadi yulwa moshiyulifo shitilifa nongaashi eedila tadi kwatwa meendjadja dokukwata. Ngaashi do osho yo ovana vovanhu tava yulwa mefimbo lii, olo tali va kwata divadiva.
13 Navali nde shi tala osho ounongo koshi yetango ndele nde shi tala osho oshinima shinene nokutya: 14 pa li oshilando shinini ndele musho mwa li ovalumenhu vanini nohamba inene ye shi homona, ye shi fitikinina, ndele ye shi tungila omatoteloshungo manene. 15 Ndele musho mwa kala omulumenhu umwe omukwanaluhepo nomunamayele. Oye ou a xupifa oshilando omolwounongo waye, ndelenee kakwa li nande umwe a ka dimbulukwa omulumenhu winya ohepele. 16 Opo nee ame nda tya: Ounongo u dule eenghono dovakwanyati. Ndelenee ounongo wohepele tau dinwa, ndele kaku na umwe a pwilikina eendjovo dayo. 17 Eendjovo domunamayele da pwilikinwa nokumwena, di dule eweelelo lomupangeli welai. 18 Ounongo u dule oilwifo yomoita, ndelenee omulunde ta nyono po oinima ihapu iwa.
Inatu fundjwa kefaathano lyaayuuki naalunde
1 Ayihe mbika onde yi kwatele momutima gwandje, naayihe onde yi simonona, kutya aayuuki naanawino niilonga yawo oyi li miikaha yaKalunga, ohole nosho wo uutondwe omuntu ina tseya shoka tashi mu adha komeho. 2 Ayihe oyi thike pamwe kwaayehe. Oshipewa shimwe ashike komuyuuki nokomukolokoshi, komwaanawa nokomwiinayi, komuyogoki nokomwiinyateki, kungoka ta yamba omayambo nokungoka itaa yamba omayambo; omwaanawa ke vulathane nomulunde, naangoka ta gana oha ningwa ngaashi ngoka a tila egano. 3 Mwaayihe tayi ningwa kohi yetango, omu na oshiponga shika: ayehe oye na oshipewa shimwe noomwenyo dhaana yaantu odhu udha uuwinayi nomitima dhawo uugoya mokukalamwenyo kwawo akuhe; navulwa taa yi koonakusa! 4 Onkene tuu ngoka e li mokati kaanamwenyo, oku na ngaa etegameno, oshoka ombwa yi na omwenyo oyi vule onime ya sa. 5 Oshoka aanamwenyo otaa tseya kutya oye na okusa, ihe aasi itaa tseya sha nando, nokaa na we ondjambi yasha, oshoka ondhimbulukilo yawo otayi dhimbiwa. 6 Ohole yawo, uutondwe wawo nuulaadhi wawo owa kana nale nokuli, nokaa na we sha mumbyoka tayi ningwa kohi yetango.
7 Inda ano, lya oshikwiila shoye nenyanyu nou nwe omaviinu goye nomutima gwa tundulukwa, oshoka Kalunga okwa hokwa nale iilonga yoye. 8 Tokitha aluhe oonguwo dhoye, nomugwayo inagu pumba ko komutse gwoye. 9 Nyanyudha omwenyo gwoye namukadhoye, ngoka u mu holelele omasiku goye agehe ganathangwa ngoka Kalunga e ku pa kohi yetango — omasiku goye agehe ganathangwa, oshoka osho oshipewa shoye mokukalamwenyo nomiilonga yoye mbyoka to yi longo nuudhigu kohi yetango. 10 Longa ashihe to vulu niikaha yoye, shi longa noonkondo dhoye, oshoka kaku na iilonga, ompangela, uunongo nenge owino moshaasi, moka noka ya mo.
11 Naishewe kohi yetango onda mono ko kutya esindano mokumatuka kali li aluhe mepangelo lyaamboka ye na ontuku, iita hayomapenda, oshikwiila hashaanawino, uuyamba hawaanandunge nolupundi halwoonkulungu, oshoka ethimbo neuthilo otali adha ayehe. 12 Eeno, omuntu ina tseya ethimbo lye mwene ngashika oohi ndhoka dha yulwa monete yoshiponga nenge oondhila ndhoka hadhi yulwa moomwigo. Osho wo aana yaantu otaa yulwa methimbo lyoshiponga, nge taa gwile mo ohaluka.
Omadhiladhilo kombinga yowino noyuugoya
13 Naashika onde shi tala kohi yetango osho uunongo, nosha li oshinene momeho gandje: 14 Okwa li okalando okashona naalumentu aashona ya li mo. Omukwaniilwa omunene okwe ka matukile, e ka kondeke e te ka tungile etuni lyokukondekela. 15 Muko omwa li omulumentu ohepele, ihe omunawino; nguka okwa hupitha okalando nowino ye. Ihe kaku na we omuntu a dhimbulukwa omulumentu ngwiyaka ohepele. 16 Nena onda ti: Owino oyi vule oonkondo dhoofule, ihe owino yohepele oya dhinika, noohapu dhe itadhi pulakenwa. 17 Oohapu dhaanawino dha pulakenwa nengungumano, odhi vule omagandagulo gomukwaniilwa mokati komagoya. 18 Owino oyi vule omatati golugodhi, ihe omulunde gumwe ota yono po uuwanawa owindji.
