Emoniko lomulumenhu e noshiyelekifongodi
1 Ndele onda lyaamena ndele nda tala. Tala, opa li omulumenhu e noshiyelekifongodi meke laye. 2 Opo ame nda tya: “Oto i peni?” Ndele ye okwa nyamukula nge: “Ame ohandi ka yeleka Jerusalem, ndi tale omutamo washo apa u fike, noule washo apa u fike.” 3 Ndele tala, omweengeli ou a popifa nge, a fikama, nomweengeli mukwao okwe mu shakeneka. 4 Ye okwe mu lombwela, ndele ta ti: “Tondoka, lombwela omumati winya u tye: ‘Oshilando Jerusalem tashi ka kala shihe nohotekuma molwouhapu wovanhu nomolwouhapu woimuna i li musho. 5 Ndelenee ohandi ka kala ohotekuma yasho yomundilo nde shi dingilila nefimano meni lasho,’ ” Omwene osho ta ti.
6 “Woo! Woo! Djeni mo onhapo medu loumbangalanhu, Omwene ta ti! Osheshi nde mu lihanifila keembinga adishe dedu, Omwene ta ti.
7 “Woo Sion, lixupifa ove ou wa kala pomona okakadona Babilon.”
8 Osheshi Omwene womatanga ovakwaita ota ti: Oye a tuma nge ndi kale efimano laye moiwana oyo ye mu hakana po. Osheshi ou te mu kumu, ota kumu ondada yeisho laye. 9 Tala, osheshi Ame ohandi ka takela okwooko kwange kombada yaavenya, opo va ninge eenghwate novapika vavo. Opo nee nye otamu ka shiiva, nokutya ame nda tumwa kOmwene womatanga ovakwaita. 10 Omona okakadona Sion, hafa, ove u nyakukwe! Osheshi Ame ohandi uya ndi kale mwoove, Omwene ta ti. 11 Mefiku tuu olo oiwana ihapu tai ke liameka kOmwene, ndele tava ka ninga ovanhu vaye, ndele ame ohandi ka kala muvo, opo nee ove to ka shiiva, nokutya Omwene womatanga ovakwaita a tuma nge kwoove. 12 Ndele Omwene ota ka fyuulula Juda monhele iyapuki nokuhoololulula Jerusalem.
13 Ombelela aishe, mwena koshipala shOmwene! Osheshi Ye okwa fikama monhele yaye iyapuki.
Emoniko lyoshiyelekithongodhi
1 Memoniko ekwawo onda mono omuntu e na oshiyelekithongodhi miikaha ye. 2 Onda pula nda ti “Oto yi peni?” Okwa yamukula a ti: “Otandi ka yeleka Jerusalem, ndi tale kutya oshi na uule u thike peni noshi na omutamo gu thike peni.”
3 Nena onda mono omuyengeli ngoka a popi nangame, okwa katuka u uka komeho, nomuyengeli omukwawo okwe ya, e mu tsakaneke. 4 Gwotango okwa ti kumukwawo: “Matuka, u ka lombwele omugundjuka ngoka e na oshiyelekithongodhi kutya muJerusalem otamu ka kala aantu oyendji niimuna oyindji notashi ka kala oshinene unene, itashi ka vula okukala nedhingililokuma. 5 Omuwa oku uvaneke kutya oye mwene ta ka kala ekuma lyomulilo lya kunduka oshilando e shi gamena noye ta ka kala mo neadhimo lye alihe.”
Aapongekwa taa ithanwa, ye ye kegumbo
6-7 Omuwa okwa ti kaantu ye: “Onde mu halakanithile koombinga adhihe. Ihe ngashingeyi, ne aapongekwa, zii ko kuBabilon, mu shune kuJerusalem. 8 Shaa ngoka te mu umpile, ota gumu keliko lyandje lyondilo.”
Onkee Omuwa Omunankondoawike okwa tumu ndje nelaka ndika kiigwana mbyoka ya yugu aantu ye: 9 “Omuwa ye mwene ote ke mu kondjitha, notamu ka yugwa kaantu mboka ya li aapika yeni.”
Uuna shika tashi ka ningwa, shaa ngoka ota ka tseya kutya Omuwa Omunankondoawike okwa tuma ndje.
10 Omuwa okwa ti: “Yantu yaJerusalem, imbeni kenyanyu! Otandi ya, ndi kale mokati keni.”
11 Pethimbo ndyoka iigwana oyindji otayi ke ya kOmuwa notayi ningi aantu ye. Ota ka kala mokati keni, notamu ka tseya kutya oye a tumu ndje kune. 12 Lumwe natango, Juda ota ka kala eliko lyOmuwa lya sheywa mevi lye eyapuki, naJerusalem otashi ka ninga oshilando shoka e shi hole unene.
13 Mweneni koshipala shOmuwa, oshoka ote ya ta ziilile kehala lyuuyapuki we.
