Enyumuko laJesus nelihololo laye
(Mark. 16:1-10Luk. 24:1-12Joh. 20:1-10)1 Ndele Eshabata eshi la pita neluwa la tenda, olefiku lotete loshivike, Maria Magdalena, naMaria mukwao ova ka tala kombila. 2 Ndele tala, opa ninga ekakamo linene ledu, osheshi omweengeli wOmwene a dja meulu, okwe uya po ndele ta kandula po emanya ndele te li kala omutumba. 3 Ndele okufa kwaye okwa li kwa fa oluvadi noikutu yaye itoka too, ya fa eemhawe. 4 Ndele mokuhalukilila ovanangeli vombila ova kakama, va fa va fya.
5 Ndele omweengeli okwa popifa ovakainhu ndele okwa tya: “Nye inamu tila; osheshi ndi shi shii, onye tamu kongo Jesus, omuvalelwa komushiyakano. 6 Ke mo, osheshi okwa nyumuka, ongaashi a tile. Ileni, mu tale onhele, apa a li a nangala. 7 Ndele indeni nee nokweendelela mu ka lombwele ovalongwa vaye nokutya, okwa nyumuka. Ndele tala, ote mu tetekelele okuya kuGalilea; oko tamu ke mu mona. Tala, aame nde shi mu lombwela.” 8 Ndele opo nee ova dja ko kombila diva nokutila nokuhafa pombada, ndele va tondoka va ka twalele ovalongwa vaye ondaka. 9 Ndele tala, Jesus okwe va shakeneka ndele ta ti: “Kundweni!” Ovo va ehena kuye, ove mu dingatela keemhadi daye, ndele ove mu twila eengolo. 10 Ndele opo nee Jesus okwa tya kuvo: “Inamu tila, indeni mu ka lombwele ovamwatate, va ye kuGalilea, oko tava ka mona nge.”
Ovanangeli tava pewa ombubo
11 Ndele fimbo va ya ko, tala, ovanangeli vamwe ove uya koshilando ndele va hepaululila ovapristeli ovakulunhu aishe ei ya ningwa ko. 12 Ndele ovo va ongala pamwe novakulunhu, ova kundafana, ndele va pa ovakwaita oimaliwa ihapu 13 ndele va tya: “Tyeni, ovalongwa vaye ve uya oufiku, ndele ve mu vaka mo oufiku fimbo twa kofa. 14 Ndele ngeenge tashi udika komupangeli, fye ohatu mu handukulula, ndele hatu mu popile, nye mu shiive okukala muhe noshisho.” 15 Ovo va tambula oimaliwa ndele va ninga ngaashi va lombwelwa. Ndele ehepaululo eli ola tandavelifwa mOvajuda, ndele tali hepaululwa nonena.
Elombwelo loshilonga shetumo
(Mark. 16:14-18Luk. 24:36-49Joh. 20:19-23Oil. 1:1-8)16 Ndele ovalongwa ovo omulongo naumwe ova ya kuGalilea okomhunda inya, Jesus e i va lombwela. 17 Ndele ovo eshi ve mu mona, ove mu linyongamena, ndele vamwe ova limbililwa. 18 Ndele Jesus okwe uya kuvo, okwe va lombwela ndele ta ti: “Ame onda pewa eenghono adishe meulu nokombada yedu. 19 Indeni hano ka ningeni ovanhu aveshe ovalongwa vange, noku va shashela medina laXe nolOmona nolOmhepo Iyapuki, 20 noku va longa okudiinina aishe ei nde i mu lombwela. Ndele tala, Ame ondi li pamwe nanye omafiku aeshe, fiyo okexulilo lefimbo lounyuni.”
Jesus ta yumudhwa
(Mrk. 16:1-10Luk. 24:1-12Joh. 20:1-10)1 Esabati sho lya piti, meluwa lyesiku lyotango lyoshiwike Maria Magdalena naMaria mukwawo oya yi, ya ka tale ko kombila. 2 Ombaadhilila opwa ningi ekakamo enene lyevi, oshoka omuyengeli gwOmuwa okwa kuluka a zi megulu, okwa kandula po emanya e te li kuutumba. 3 Okufa kwe okwa li a fa olwaadhi, noonguwo dhe oontokele dha fa omahegele gomongwa. 4 Aalangeli yombila oya haluka noya kakama e taa ningi ya fa ya sa.
5 Omuyengeli okwa popitha aakiintu a ti: “Inamu tila, oshoka ondi shi shi, otamu kongo Jesus, ngoka a li a alelwa komushigakano. 6 Ke mo muka, okwa yumudhwa kuusi, ngaashi a tile. Ileni, mu tale eha mpoka a li a lala. 7 Indeni nokweendelela, mu ka lombwele aalongwa kutya okwa yumudhwa kuusi. Ote mu tetekele kuGalilea, oko tamu ke mu mona. Dhimbulukweni, ongame nde shi mu lombwele.”
8 Oyo ya zi kombila mbalambala ya tila, yo ya nyanyukwa pombanda noya matuka, ya ka faalele aalongwa ye elaka.
9 Ombaadhilila Jesus okwe ya tsakaneke a ti: “Mwa penduka!” Oyo ya hedha kuye, oye mu idhingile koompadhi noyi inyongamene kuye. 10 Jesus okwa ti kuyo: “Inamu tila. Indeni, mu ka lombwele aamwatate, ya ye kuGalilea, oko taa ka mona ndje.”
Aalangeli taa pewa iisimpo
11 Ano manga aakiintu ye li mondjila, yamwe yomaalangeli oye ya koshilando noya hokololele aayambi aakuluntu ayihe mbyoka ya ningwa ko. 12 Nena aayambi aakuluntu oya ningi oshigongi pamwe naakuluntu noya kundathana e taa pe aakwiita iimaliwa oyindji 13 ya ti: “Tyeni, aalongwa ye ye ya uusiku e taye mu yaka mo, manga twa kotha. 14 Pamukalo gwa tya ngeyi otatu loteke mbala omuleli gwoshilongo, opo kaa geye, ngele te shi uvu, e tatu mu popile, mu kale mwaa na oombudhi.”
15 Aalangeli oya taamba iimaliwa noya ningi ngaashi ya longwa. Ehokololo ndika olya taandelithwa mAajuda, onkee ohali hokololwa sigo onena.
Oshipango shaJesus shahugunina
(Mrk. 16:14-18Luk. 24:36-49Joh. 20:19-23Iil. 1:6-8)16 Aalongwa mboka omulongo nagumwe oya yi kuGalilea okondundu ndjiyaka Jesus e yi ya lombwelele. 17 Oyo sho ye mu mono, oye mu inyongamene, ihe yamwe oya limbililwa. 18 Jesus okwe ya kuyo nokwe ya lombwele a ti: “Ongame nda pewa epangelo alihe megulu nokombanda yevi. 19 Indeni ano, ka ningeni aantu ayehe aalongwa yandje, mu ya shashele medhina lyaHe nolyOmwana nolyOmbepo Ondjapuki. 20 Ne mu ya longe okudhiginina ayihe mbyoka nde yi mu lombwele. Ihe ngame otandi kala pamwe nane omasiku agehe sigo ehulilo lyuuyuni.”
