Eendjayambo
1 “Ndele umwe ngeenge a hala okweetela Omwene eendjayambo, eyambo laye li nokukala oufila wa nakwa. Ye e noku u tila omaadi nokutula ko vali oitwiminifo, 2 ndele e noku i twaalela ovapristeli, ovana ovamati vaAron. Nomupristeli e noku kufa mo muyo shi fike peke limwe moufila wa nakwa, pamwe nomaadi noitwiminifo aishe i li mo, ndele ye e noku i xwikila po koaltari edimbulukifoyambo nokutya, omundiloyambo wedimba liwa kOmwene. 3 Ndele eshi sha xupa po keendjayambo, nashi ninge shaAron novana vaye ovamati, oshitukulwa shiyapukielela shomundiloyambo wOmwene.
4 “Ndele ye ngeenge ta eta eendjayambo da telekwa pediko, odi nokukala oufila wa nakwa, oukuki vehe nonhafi, va lungilwa momaadi, noukuki va lalakana vehe nonhafi va vaekwa omaadi. 5 Ndele eendjayambo doye ngeenge odo eyambo la yofwa moshikangwa, lo oli nokukala oufila wa nakwa wa lungilwa omaadi nouhe na onhafi. 6 Li pambaula oipambu nokutila ko omaadi: olo eendjayambo.
7 “Neendjayambo doye ngeenge eyambo lomoshikangwa, li nokukala oufila wa nakwa wa pilulilwa omaadi. 8 Opo nee ove u nokweetela Omwene eendjayambo edi da pilulilwa muwo. Vo ove noku di etela omupristeli, ndele ye e noku di twala koaltari. 9 Ndele omupristeli e nokukufa mo meendjayambo edimbulukifoyambo noku li xwikila po koaltari; olo omundiloyambo wedimba liwa kOmwene. 10 Ndele eshi sha xupa po meendjayambo, sho nashi ninge shaAron novana vaye ovamati, oshitukulwa oshiyapukielela shomundiloyambo wOmwene.
11 “Omwene ina etelwa eendjayambo di nonhafi. Kape nonhafi nomaadi eenyiki taa xwikilwa Omwene momundiloyambo. 12 Ngaashi eyambo loshipe otamu dulu oku i etela Omwene, ndelenee oyo itai tulwa koaltari ngaashi edimba liwa. 13 Ndele eendjayambo deni adishe mu noku di finga nomongwa; meendjayambo deni inamu kala muhe nomongwa wehangano laKalunga koye. Eyambo loye keshe u noku li eta nomongwa.
14 “Ove ngeenge to etele Omwene eendjayambo doshipe, ove u nokweeta ngaashi eendjayambo doshipe; omitwe doilya da kangwa komundilo nomahola a fengwa. 15 Ndele ove u nokutula po omaadi noitwiminifo. Olo eendjayambo. 16 Opo nee omupristeli e noku i xwika po edimbulukifoyambo nokutya, oshitukulwa shomahola a fengwa nomaadi noitwiminifo aishe ngaashi omundiloyambo wOmwene.
Oondjambo dhiikulya
1 Ngele oku na omuntu ta yambele Omuwa ondjambo yiikulya, na ete uusila womunziya. Ne u nothele omagadhi gooholivi nokugwedha po iitsinino. 2 Ne u pe aana yaAaron aayambi. Omuyambi na kuthe mondjambo ombinga yokuyambelwa koshiyambelo, eke limwe lyuusila u na omagadhi niitsinino ayihe, e te yi lungunithile koshiyambelo. Olyo efikilondjambo li na ezimba lya nika nawa notali opalele Omuwa. 3 Oshihupe shondjambo yiikulya otashi ningi shaAaron noyana; osho oshiyapukilela, oshoka osha za kondjambo yiikulya ya yambelwa Omuwa.
4 Ngele oto yambele Omuwa ondjambo yiikulya ya pya peziko, nayi kale oshikwiila sha mbumbwakana inaashi tulwa efulika, sha ningwa nuusila womunziya, sha tulwa omagadhi gooholivi, nenge yi kale okakwiila ka pepuka ka gwayekwa omagadhi gooholivi.
5 Ngele oto yamba oshikwiila sha pya poshikangwa, nashi kale shuusila womunziya mwa tulwa omagadhi gooholivi, ihe ino tula mo efulika. 6 Shi nyanyagula e to tile ko omagadhi, uuna to shi yamba, shi ninge ondjambo yiikulya.
7 Ondjambo yiikulya ngele oya pya mombiga, nayi kale yuusila womunziya nomagadhi gooholivi. 8 Etela Omuwa ondjambo yiikulya ya longekidhwa ngeyi; yi gandja komuyambi, ngoka te yi fala koshiyambelo. 9 Omuyambi na kuthe mondjambo ombinga yokuyambelwa koshiyambelo e te yi lungunithile koshiyambelo. Oyo efikilondjambo li na ezimba lya nika nawa notali opalele Omuwa. 10 Shoka tashi hupu kondjambo yiikulya, oshaayambi; osho oshiyapukilela, oshoka osha za mondjambo yiikulya ya yambelwa Omuwa.
11 Oondjambo dhiikulya ndhoka to yambele Omuwa, ino tula mo efulika; ino longitha efulika nenge omagadhi goonyushi moondjambo dhiikulya tadhi yambelwa Omuwa. 12 Iinima mbika otayi vulu okweetelwa Omuwa moondjambo dhoshipe, ihe inayi lungunithilwa koshiyambelo. 13 Toya ondjambo kehe yiikulya nomongwa, oshoka omongwa otagu kalele po ehangano pokati keni naKalunga. (Ou na okutoya oondjambo dhoye adhihe nomongwa.) 14 Uuna to etele Omuwa ondjambo yoshipe shiilya, yamba omaha ga yaywa nenge iilya ya hompwa. 15 Yi nothela omagadhi gooholivi nokugwedha po iitsinino. 16 Omuyambi na lungunithe po ombinga ndjoka yoomuma nomagadhi yi na okuyambelwa koshiyambelo niitsinino ayihe, yi ninge ondjambo yiikulya ya yambelwa Omuwa.
