Jesus nomukainhu Omusamaria
1 Hano Omwene eshi a shiiva nokutya, Ovafarisai ova uda kutya, Jesus okwa ninga ovalongwa vahapu, ndele ta shashe e dule Johannes, 2 nande Jesus mwene ina shasha, ndelenee ovalongwa vaye. 3 Ye okwa dja mo muJudea ndele ta shuna kuGalilea. 4 Ndelenee Ye okwa li e nokutokola Samaria.
5 Hano Ye okwe uya koshilando shomuSamaria, edina lasho Sikar, popepi nepya olo Jakob e li pele omona waye Josef. 6 Ndele oko kwa li ofifiya yaJakob. Hano Jesus eshi a li a loloka keengeda, a kala omutumba pofifiya. Ndele opa li otundi onhihamano.
7 Ndele taku di omukainhu Omusamaria, te uya okuteka omeva. Jesus ta ti kuye: “Pe nge ndi nwe mo.”Omukainhu Omusamaria te ya okuteka omeya. Jesus ta ti kuye… 8 Osheshi ovalongwa vaye va li va ya koshilando va ka lande oikulya. 9 Ndele omukainhu Omusamaria okwa tya kuye: “Oove Omujuda oto indile nge ngahelipi okunwa, aame omukainhu Omusamaria?” Osheshi Ovajuda ihava endafana nOvasamaria. 10 Jesus okwe mu nyamukula ta ti: “Ngeno wa shiiva oshali yaKalunga, nalyelye ou ta ti kwoove: pe nge okunwa, ngeno ove to mu indile, ndele ye te ku pe omeva e nomwenyo.” 11 Omukainhu okwa tya kuye: “Omwene, ove uhe na oshitoo shokuteka mo, ondungu yo oile, omeva oo e nomwenyo ou a kwete, e li peni? 12 Oove omukulunhu mbela u dule tate Jakob, ou e tu pa ondungu ei, ndele ye a nwa mo novana vaye noimuna yaye?” 13 Jesus okwe mu nyamukula ta ti: “Keshe tuu ou ta nu momeva aa, ota fi vali enota, 14 ndelenee ou ta nu momeva aa Ame handi mu pe, ita fi vali enota fiyo alushe; ndelenee omeva aa handi mu pe, otaa ningi muye ofifiya yomeva, aa taa fulukile fiyo omomwenyo waalushe.” 15 Omukainhu ta ti kuye: “Omwene, pe nge omeva oo, ndiha fye vali enota, ndele ndiha pumbwe okuuya okuteka oku.”
16 Jesus ta ti kuye: “Inda u ka ifane omulumenhu woye, ndele ileni oku.” 17 Omukainhu okwa nyamukula ndele ta ti: “Nghi nomulumenhu.” Jesus ta ti kuye: “Heeno, owa tonga sha yuka: ‘nghi na omulumenhu’, 18 osheshi ove wa kala novalumenhu vatano, naau u mu kwete paife, ke fi omulumenhu woye. Eshi we shi tonga oshili.” 19 Omukainhu ta ti kuye: “Omwene, ondi wete, oove omuxunganeki. 20 Ootate vetu va ilikanenene komhunda ei, ndele nye tamu ti muJerusalem mu nonhele yokwiilikanena mo.” 21 Jesus ta ti kuye: “Omukainhu, itavele nge, efimbo tali uya, itamu ilikana Tate komhunda ei ile muJerusalem. 22 Onye tamu ilikana eshi kamu shi shii; ofye ohatu ilikana eshi tu shi shii, osheshi exupifo otali di mOvajuda. 23 Ndelenee efimbo tali uya, ndele opo li li paife, ovailikani vashili tava ilikana Tate momhepo nomoshili; osheshi Tate a hala ava tave mu ilikana va kale va tya ngaha. 24 Kalunga Oye Omhepo, naava tave mu ilikanene ovo ve nokwiilikana momhepo nomoshili.”
25 Omukainhu ta ti kuye: “Ondi shi shii, Messias, ou ta ifanwa Kristus, ote ke uya. Oye ngeenge te uya, ote tu hololele aishe.” 26 Jesus ta ti kuye: “Aame tuu ou, ou ta popi naave.”
27 Opo tuu opo ovalongwa vaye ve uya, ndele va kumwa Oye eshi a popya nomukainhu. Ndelenee nande umwe ina tya: “Oto indile shike?” Ile: “To popi shike naye?” 28 Omukainhu okwa fiya po oshitoo shaye, ndele okwa ya koshilando, ndele a lombwela ovanhu: 29 “Ileni mu tale omulumenhu, ou a lombwela nge aishe nde i ninga. Pamwe Oye Kristus?” 30 Ovo va dja mo moshilando ndele va ya kuye.
Oilya ya pya
31 Ndele fimbo inave uya, ovalongwa vaye ove mu indila ndele tava ti: “Rabbi, lya.” 32 Ndelenee Ye okwa tya kuvo: “Ame ondi neendja okulya, edi muhe shii.” 33 Ndele ovalongwa va tongafana: “Mbela pe na umwe e mu etela oikulya?” 34 Jesus ta ti kuvo: “Oikulya yange ei, Ame ndi longe ehalo laau a tuma nge nondi wanife oshilonga shaye.
35 “Hanye vene tamu ti: ‘ope neehani nhee natango, eteyo fimbo inali fika?’ Taleni, ohandi mu lombwele: yeluleni omesho eni nye mu tale omapya nhumbi a pya okuteywa. 36 Ndele paife omutei ta mono ondjabi, noiimati te i ongelele omwenyo waalushe, opo omukuni a hafe pamwe nomutei. 37 Osheshi moshinima eshi eendjovo edi da ninga doshili: ‘ou ta kunu oku lili naau ta teya oku lili.’ 38 Ame nde mu tuma okuteya apa inamu longa, vamwe ve lili va longa po, ndele nye mwe uya moilonga yavo.”
Ovasamaria va itavela
39 Ndele Ovasamaria vahapu vomoshilando eshi ve mu itavela omolweendjovo domukainhu ou a hepaulula: “Ye okwa lombwela nge aishe nde i ninga.” 40 Opo Ovasamaria eshi ve uya kuye, ove mu indila a menekele puvo. Ndele Ye okwa kala ko omafiku avali. 41 Ndele vahapu ve dule venya va itavela omolweendjovo daye, 42 ova tya komukainhu: “Paife inatu itavela vali omolweendjovo doye, osheshi ofye vene twa uda ndele tu shi shii, Oye shili Omukulili wounyuni.”
Jesus ta i kuGalilea
43 Ndelenee eshi pa pita omafiku avali, Ye okwa dja ko ndele ta i kuGalilea. 44 Osheshi Jesus mwene okwa hepaulula ta ti: “Omuxunganeki ita fimanekwa moshilongo shaye.” 45 Ndelenee eshi e uya kuGalilea, Ovagalilea ove mu tambula, osheshi vo va mona aishe e i ningila muJerusalem moshivilo, osheshi navo yo va ile ko koshivilo.
Omona welenga ta velulwa
46 Ndele Jesus okwe uya vali kuKana shomuGalilea, omo a shitukifile omeva omaviinyu. Ndele muKapernaum omwa li mu nelenga lohamba li nomona ta vele. 47 Lo eshi la uda Jesus a dja kuJudea ndele e uya kuGalilea, ola ya kuye, ndele le mu indila, e uye a velule omona, osheshi okwa li pokufya. 48 Ndele Jesus okwa tya kuye: “Ngeenge itamu mono omadidiliko noikumwifalonga, itamu itavele.” 49 Elenga lohamba ola tya kuye: “Omwene, ila fimbo okaana kange inaka fya.” 50 Jesus okwa tya kulo: “Inda, omumwoye ota kala e nomwenyo.” Omulumenhu okwa itavela ondjovo ei, Jesus e i mu lombwela, ndele okwa ya. 51 Ndele fimbo e li mondjila ta shuna, ovapiya vaye ove mu shakeneka, ndele tava ti kuye: Okaana koye oke nomwenyo. 52 Ndele ye okwa pula efimbo lilipipo ka hovela okutalalelwa. Ovo ve mu nyamukula: “Onghela, potundi onhihamano olwiidi le mu fiya po.” 53 Ndele xe okwa dimbulukwa otundi oyo tuu ei Jesus eshi a tya kuye: “Okaana koye ke nomwenyo.” Ndele ye okwa itavela neumbo laye alishe.
54 Oshikumwifalonga eshi osho oshitivali, Jesus e shi ninga, eshi a dja muJudea ndele te uya kuGalilea.
Jesus nomukiintu Omusamaria
1 Aafarisayi oyu uvu kutya Jesus okwa likola nokwa shasha aalongwa oyendji ye vule mboka yaJohannes. 2 Nonando Jesus mwene ina shasha nando omuntu gumwe, ihe aalongwa ye oyo ya shasha. 3 Jesus sho u uvu shoka tashi tiwa kaantu, okwa thigi po Judea nokwa shuna kuGalilea. 4 Mondjila ye yokuya nkoka okwa li e na okupitila muSamaria.
5 Oye nokwe ya koshilando shomuSamaria, edhina lyasho Sikar, shi li popepi nepya ndyoka Jakob a pele omwana Josef. 6 Popepi nepya ndyoka opwa li pu na oluthithiya lwaJakob. Jesus okwa li a vulithwa kondjila nokwa kuutumba pomuthima. Otundi oya li lwopomulongo nambali yomutenya.
7 Omukiintu Omusamaria okwe ya komuthima okuteka omeya. Jesus okwa ti kuye: “Pe ndje wo, ndi nwe mo.” Omukiintu Omusamaria okwe ya komuthima okuteka omeya, Jesus nokwa ti kuye… 8 Aalongwa ye oya adhika ya ya koshilando, ya ka landa iikulya.
9 Omukiintu Omusamaria okwa yamukula: “Ngoye Omujuda, ihe ngame omukiintu Omusamaria. Oto vulu tuu okwiindila ndje, ndi ku pe, u nwe?” Oshoka Aajuda nAasamaria ihaa endathana.
10 Jesus okwa yamukula a ti: “Ando owa li wa tseya shoka Kalunga ha gandja naanguka olye te ku indile omeya, ando ngoye owe mu indile, e ku pe omeya omanamwenyo.”
11 Omukiintu okwa ti kuye: “Omuwa, ngoye ku na nando oshitekitho nomuthima omule. Omeya omanamwenyo oto ga adha peni? 12 Ngoye omunene nani u vule tatekulu Jakob, ngoka e tu pa omuthima nguno nokwa li ha nu mo ye mwene pamwe noyana niimuna ye?”
13 Jesus okwe mu yamukula a ti: “Kehe ngoka ta nu omeya ngaka, ota ka sa enota natango. 14 Ihe shaa ngoka ta nu omeya ngoka tandi ge mu pe, oye ita ka sa we enota sigo aluhe. Oshoka omeya ngoka tandi ge mu pe, otaga ka ninga muye oluthithiya lwomeya taga fuluka sigo omomwenyo gwaaluhe.”
15 Omukiintu okwa ti kuye: “Omuwa, pe ndje wo omeya ngoka, opo ndaa se we enota, ngame kaandi ye we nkuka komuthima okuteka.”
16 Jesus okwe mu lombwele: “Inda, u ki ithane omulumentu gwoye, ngoye u ye naye nkuka.”
17 Omukiintu okwe mu yamukula a ti: “Kandi na omulumentu.”
Jesus okwa ti kuye: “Owa popi dhoshili kutya ku na omulumentu. 18 Oshoka ngoye owa li u na aalumentu yatano, naangoka u na ngashingeyi, ke shi omulumentu gwoye. Moshinima shoka owa popi dhoshili.”
19 Omukiintu okwa ti kuye: “Omuwa, ondi ku wete kutya ngoye omuhunganeki. 20 Ootatekulu Aasamaria oya li haa galikana Kalunga kondundu ndjika, ihe ne Aajuda ohamu ti kutya Jerusalem olyo ehala moka tu na okugalikanena.”
21 Jesus okwa ti kuye: “Nekulu, itaala ndje. Ethimbo otali ya, uuna ndoka itaamu ka galikana Tate kondundu ndjika nenge muJerusalem. 22 Ne Aasamaria omu shi tuu ngoka hamu mu galikana? Tse Aajuda otu shi ngoka hatu mu galikana, oshoka ehupitho otali zi mAajuda. 23 Ihe ethimbo otali ya noli li po ngashingeyi, uuna aagalikani yashili taa ka galikana Tate mOmbepo nomoshili. Oshoka aagalikani ya tya ngaaka oyo naanaa mboka Tate e ya hala. 24 Kalunga oye Ombepo, onkee naamboka taye mu galikana, oye na okugalikana mOmbepo nomoshili.”
25 Omukiintu okwa ti kuye: “Ondi shi shi kutya Kristus, nokutya Omugwayekwa ote ke ya. Nge te ya, ote ke tu lombwela iinima ayihe.”
26 Jesus okwa ti kuye: “Ongame naanaa nguka te popi nangoye.”
27 Pethimbo olyo tuu ndyoka aalongwa ye oye ya. Oya kumwa, sho ya mono Jesus ta popi nomukiintu ngoka. Ihe kapwa li nando ogumwe e mu pula: “Owa hala shike?” nenge: “Omolwashike to popi naye?”
28 Omukiintu okwa thigi po ihe oshuma she nokwa yi koshilando. Okwa lombwele aantu: 29 “Ileni, mu tale omulumentu ngoka a lombwele ndje ayihe nde yi ninga. Pamwe oye Kristus?” 30 Oyo oya zi mo moshilando noye ya kuJesus.
31 Aalongwa oya kala taa lombwele Jesus taa ti: “Muhongi, lya.”
32 Ihe Ye okwa yamukula a ti: “Ngame ondi na iikulya mbyoka kaamu yi shi.”
33 Aalongwa ye oya pulathana ihe: “Pamwe ope na ngoka e mu etele iikulya?”
34 Jesus okwa ti kuyo: “Iikulya yandje oyo okulonga ehalo lyaanguka a tumu ndje nokutsakanitha oshilonga shoka e shi pe ndje.
35 “Ne ohamu ti: ‘Oku na natango oomwedhi ne, eteyo li thike.’ Ngame otandi mu lombwele: Yelutheni omeho geni, mu tale kutya omapya oga thika okuteywa. 36 Ngashingeyi nokuli omuteyi ota taamba ondjambi ye niilya ote yi pungulile momwenyo gwaaluhe, opo omukuni a nyanyukwe pamwe nomuteyi. 37 Oshoka moshinima shika ohapu oya tsa kutya: ‘Omukuni okwi ili nomuteyi okwi ili.’ 38 Ngame onde mu tumu okuteya mpoka inaamu longa po. Yalwe oyo ya longo, ne nomwe ya okulya iiyimati yiilonga yawo.”
39 Oyendji yomAasamaria yomoshilando shoka oyi itaale Jesus omolwoohapu dhomukiintu, ngoka a ti: “Oye okwa lombwele ndje iinima ayihe mbyoka nde yi ninga.” 40 Aasamaria sho ye ya kuye, oye mu indile, a menekele puyo. Ye okwa menekele puyo omasiku gaali.
41 Aantu oyendji ye vule mboka yotango oyi itaale Jesus omolwoohapu dhe mwene. 42 Yo noya lombwele omukiintu: “Tse otwi itaala, hamolwoohapu dhoye, ihe omolwashoka twe mu uvu tse yene notu shi shi, oye lela omuhupithi guuyuni.”
Jesus ta aludha omuna gwelenga
(Mat. 8:5-13Luk. 7:1-10)43 Omasiku ngoka gaali sho ga piti po, Jesus okwa zi ko nkoka nokwa yi kuGalilea. 44 Oshoka Jesus mwene okwa ti: “Omuhunganeki iha simanekwa moshilongo shaandjawo.” 45 Ano Jesus sho a thiki kuGalilea, Aagalilea oye mu taamba, oshoka nayo wo oya li moshituthi shOpaasa muJerusalem noya mono ashihe shoka a ningi pethimbo lyoshituthi.
46 Jesus okwe ya ishewe muKana, oshilando shomuGalilea, moka a li a shitukitha omeya ga ninge omaviinu. MuKapernaum omwa li mu na elenga lyontumba lyomukwaniilwa li na omwana omumati ta alukwa. 47 Sho lya kundana kutya Jesus okwa zi ko kuJudea e ya kuGalilea, olya yi kuye oku mu indila, e ye kuKapernaum, a aludhe omwana, oshoka okwa li e li pokusa. 48 Jesus okwe mu lombwele a ti: “Ngele itamu mono iikumithalonga niilongankondo, itamu itaale.”
49 Elenga olya ti kuye: “Omuwa, ila, manga omumwandje inaa sa!”
50 Jesus okwa ti kuye: “Inda, omumwoye oku na omwenyo.”
Omulumentu okwi itaale oohapu dhaJesus e dhi mu lombwele nokwa yi. 51 Mondjila ye yokushuna kegumbo aamati ye oye mu tsakaneke noye mu lombwele kutya omwana oku na omwenyo.
52 Okwe ya pula ethimbo, uuna a tameke okukala nawa. Yo oya ti kuye: “Ohela potundi yotango yomutenya olwiidhi olwe mu etha po.” 53 He okwa dhimbulukwa kutya opotundi naanaa ndjoka Jesus e mu lombwele a ti: “Omumwoye oku na omwenyo.” Oye nokwi itaale pamwe negumbo lye alihe.
54 Oshikumithalonga shika osho oshitiyali shoka Jesus a ningi, sho a zi kuJudea e te ya kuGalilea.
