Ombwada ya londa koshilyani Odjona otai i findi
1 Ndele umwe womovaengeli venya vaheyali ava va li ve noiyaxa iheyali e uya ndele ta popifa nge, ta ti: “Ila oku, ndi ku ulikile etokolo lombwada inene, ei ya kala omutumba kombada yomeva mahapu, 2 eehamba dopedu da haela nayo ndele ovanhu ava va kala kombada yedu va kolwa komaviinyu oumbwada waye.” 3 Ndele ye okwa twala nge mombuwa ndi li momhepo. Ame onda mona omukainhu, a kala omutumba koshilyani shitilyana, shi yadi omadina omasheko, ndele shi na omitwe heyali neembinga omulongo. 4 Nomukainhu ou okwa li a djala oikutu itilyana youhamba naitwimonghwiyu nokwa wapekwa noshingoldo nomamanya mawa e nondilo nouwe, ndele meke laye okwa li e neholo loshingoldo li yadi oixuna neenyata doluhaelo laye. 5 Ndele moshipala shaye omwa li mwa shangwa edina eli, oshiholekwa: “Babilon shinene, ina yeembwada noyoixuna aishe yedu.” 6 Ndele onda mona omukainhu a kolwa kohonde yovayapuki noyeendobwedi daJesus, ndele nda kumwa nonghumwe inene, eshi nde mu mona.
7 Opo omweengeli okwa tya kwaame: “Owa kuminwa shike? Ame ohandi ku lombwele oshiholekwa shomukainhu noshoshilyani she mu humbata, eshi shi nomitwe heyali neembinga omulongo. 8 Oshilyani we shi mona, osha li po, ndele kashi po vali, ndele oshi nokudjuuka mo vali mombwili nokuya menyonauko, novakwambadayedu ava omadina avo inaa shangelwa membo lomwenyo nghee ounyuni wa shitwa, otava ka kumwa, ngeenge tava ka mona oshilyani sha li ko, ndele kashi ko vali, ndele tashi uya:
9 “Apa otapa pulwa omayele e neendunge. Omitwe edi heyali odo eemhunda heyali, oko omukainhu a kala ko omutumba, 10 ndele odo vali eehamba heyali, nhano domudo oda teka po, imwe opo i li, ikwao inai uya natango, ndele fiku tai uya, oi nokukala po ashike okafimbo kaxupi. 11 Noshilyani shinya eshi sha li ko shito ndele kashi ko vali, osho oshitihetatu, ndele sho vene osho ngaho shimwe shaainya iheyali ndele tashi i menyonauko. 12 Neembinga odo omulongo we di mona, odo eehamba omulongo, inadi nangala natango oilongo, ndele do otadi ka mona eenghono ngaashi eehamba, di kale efimbo limwe pamwe noshilyani. 13 Do odi nomhangela imwe, notadi yandje eenghono dado nepangelo lado koshilyani. 14 Do otadi kala nokulwifa Odjona, ndele Odjona pamwe novashikuli vayo, ovaifanwa novahoololwa novadiinini, otai di findi, osheshi oyo Omwene wo vene nOhamba yeehamba.”
15 Ndele ye okwa tya kwaame: “Omeva enya we a mona, ombwada ya kala omutumba kuwo, oo oiwana neengudu dovanhu, nomaludi nomalaka. 16 Neembinga odo omulongo we di mona, noshilyani, ovo tava ka tonda ombwada ndele tave i dula, tai kala hamunghele ndele tava li ombelela yayo, ndele tave i xwike momundilo. 17 Osheshi Kalunga okwe shi tula momitima davo, va wanife omhangela yaye nokutwa omukoo umwe naye nokuyandja ouhamba wavo koshilyani, fiyo eendjovo daKalunga tadi ka wanifwa. 18 Nomukainhu ou we mu mona oye oshilando shinene shi nepangelo kombada yeehamba adishe dopedu.”
Ohonda kamana
1 Nena gumwe gwomaayengeli yaheyali mboka ye na iiyaha iheyali, okwe ya kungame nokwa lombwele ndje a ti: “Ila huka, ndi ku ulukile, nkene ohonda kamana, oshilando shiyaka oshinene sha tungilwa popepi nomilonga odhindji, tashi geelwa. 2 Aakwaniilwa yokombanda yevi oya hondele nohonda ndjika, naantu yokombanda yevi oya kolwa, sho ya nu omaviinu goluhondelo lwayo.”
3 Ongame onda kwatwa kombepo nonda falwa komuyengeli mombuga. Mwiyaka onda mono mo omukiintu a kuutumba koshilikama oshitiligane sha nyolwa omadhina gomatukano kolutu lwasho aluhe. Oshilikama shika osha li shi na omitse heyali nooniga omulongo. 4 Omukiintu okwa li a zala onguwo ontiligane ya hondjelwa uulenga woshingoli nuumanya wondilo nomawe. Moshikaha she okwa li e na oshitenga shoshingoli shu udha iihuna noonyata dholuhondelo lwe. 5 Moshipala shomukiintu omwa li mwa nyolwa edhina eholekwa: “Babilon oshinene, yina yoohonda adhihe noyiihuna ayihe yomuuyuni.” 6 Nena onda dhimbulula kutya omukiintu okwa li a kolwa kombinzi yaantu yaKalunga noyaamboka ya dhipagwa molwaasho yi inekela Jesus.
Ano sho nde mu mono, onda kumwa noonkondo. 7 Nena omuyengeli okwa pula ndje a ti: “Omulwashike wa kumwa? Otandi ke ku tseyithila oshiholekwa shomukiintu nguka noshoshilikama shoka she mu humbata, oshilikama shoka shi na omitse heyali nooniga omulongo. 8 Oshilikama shoka wa mono, osha li shi na nale omwenyo, ihe ngashingeyi kashi ko we. Ihe oshi li pokwaanduka mo molumbogo lwomuule notashi ka hanagulwa po. Nena aantu ayehe yokombanda yevi okuza keshito lyuuyuni, oomboka omadhina gawo inaaga nyolelwa membo lyaanamwenyo, otaa ka kumwa, sho taa ka tala oshilikama shoka. Oshoka osha li shi na omwenyo, ihe ngashingeyi; kashi ko we, ihe otashi ka holoka natango.
9 “Shika otashi pula oondunge nomayele. Omitse heyali odho oondundu heyali hoka kwa kuutumba omukiintu. Oondundu ndhika otadhi thaneke aakwaniilwa yaheyali: 10 yatano yomuyo oya sa nale, gumwe ota pangele natango nomutiheyali ine ya. Ihe ngele te ke ya, ota ka pangela owala okathimbo okafupi. 11 Nokuli oshilikama shoka sha li ko, ihe ngashingeyi kashi ko we, osho omukwaniilwa omutihetatu. Eeno, osho gumwe gwomaakwaniilwa mbeyaka yaheyali yotango notashi ka yonagulwa po.
12 “Ooniga omulongo ndhoka wa mono, odho aakwaniilwa omulongo mboka inaa lala natango iilongo, ihe otaa ka pewa oonkondo dhokupangela ongaakwaniilwa uule wotundi yimwe pamwe noshilikama. 13 Ayehe mbaka omulongo oye na elalakano limwe alike notaa ka gandja epangelo lyawo noonkondo dhawo koshilikama. 14 Oyo otaa ka kondjitha Onzigona, ihe Onzigona pamwe naalanduli ye aayithanwa, aahogololwa naainekelwa, ote ke ya sinda, oshoka oye Omuwa gwaawa nOmukwaniilwa gwaakwaniilwa.”
15 Nena omuyengeli okwa lombwele ndje a ti: “Omeya ngeyaka wa mono hoka kwa kuutumba ohonda, ogo iigwana, oongundu, omihoko dhaantu nomalaka. 16 Ooniga omulongo we dhi mono, nosho wo oshilikama, otayi ka tonda ohonda ndjoka. Oyo otaa ke yi hula ashihe shoka yi na notaye ke yi thiga yi li olutu lwowala. Oyo otaa ka lya po onyama yayo notaa ke yi lungunitha po nomulilo. 17 Oshoka Kalunga okwa pendutha moomwenyo dhawo ehalo lye, ya tse ompango yimwe noya gandje oonkondo dhawo dhokupangela koshilikama, sigo oohapu dhaKalunga dha gwanithwa.
18 “Ano omukiintu ngoka we mu mono, oye oshilando oshinene shoka tashi pangele aakwaniilwa yokombanda yevi.”
