1 Ou te li tongola, ota kongo omahalo aye mwene. Neenghono adishe ta kondjifa osho shi neendunge. 2 Elai itali hokwa eendunge, ndelenee okuholola ashike omutima walo. 3 Ovahenakalunga eshi tave uya, nokudina yo taku uya. Ndele esheko tali uya pamwe nohoni. 4 Eendjovo domokanya komulumenhu odo omeva malemale, ekungulukilo lomeva taa fuluka, ofifiya younongo. 5 Okukala nokatongotongo nomuhenakalunga nokupengifa eendjovo daau ehe nombedi, itaku wapala. 6 Omilungu delai tadi eta eemhata, nokanya kalo taka ifana omadengo. 7 Okanya kelai oko ehanauno lalo, nomilungu dalo odo eemwiyo dokukalamwenyo kwalo. 8 Eendjovo domulundili da fa ouleke ndele tadi ningine mo fiyo omoukololo vomutima. 9 Ou e nounye moilonga yaye, ye omumwaina womuhanauni. 10 Edina lOmwene olo oshungongulu ya pama. Omuyuki ta hondama mo ndele ta amenwa. 11 Emona loshipuna olo oshilando shasho sha pama ngaashi ohotekuma ile momadiladilo asho. 12 Omutima womulumenhu tau linenepeke komesho yehanauno laye. Ndelenee elininipiko tali tetekele efimano. 13 Ou ta nyamukula fimbo ina uda ko, osho oulai waye ndele tashi mu fifa ohoni. 14 Omhepo yomulumenhu tai mu yambidida moudu waye, ndelenee omhepo ya teka, olyelye ta dulu oku i humbata? 15 Omutima womunaendunge tau likola eshiivo, nokutwi kwovanongo taku kongo eshiivo. 16 Oshali tai mbwalangadjifile omunhu eenhele ndele tai mu twala mokati kovanenenhu. 17 Pehovelo lomoihokolola keshe umwe e nounongo; ndelenee omuhokololifi wavo te uya ndele te mu konakona. 18 Oshihoololifo tashi lotifa eemhata ndele tashi tokola pokati kovanaenghono. 19 Omumwaina a kengelelwa te lipopile e dule oshilando sha pama, neemhata di li ngaashi oiidilifo yohotengulu. 20 Edimo lomulumenhu tali kutifwa koiimati yokanya kaye, ta kutifwa keteyo lomilungu daye. 21 Elaka li nepangelo lefyo nolomwenyo. Ava ve li hokwa, tava ka lya oiimati yalo. 22 Ou a mona omwalikadi, ye a mona elao, ndele a mona ohokwe yOmwene. 23 Omukwanaluhepo ta popi mokulininipika, ndelenee oshipuna tashi nyamukula eendjovo dikukutu. 24 Omulumenhu e nookaume vahapu ta ka mona oluhepo, ndelenee ope nookaume ve dule ovamwaina ovalumenhu mokulineekelwa.
Uukuume nombili
1 Omukunyunu oha landula omakamba ge, ota kondjitha ayihe mbyoka tayi hilile kuuwanawa.
2 Egoya inali hokwa oondunge, ihe okwiigalaleka omutima gwalyo lyene.
3 Omukeenakalunga nge te ya, nondhino otayi ya wo, nesithahoni otali etelele eshundulo.
4 Oohapu dhomokana komuntu odho omeya omale, odho omulonga tagu fuluka noluthithiya lwowino.
5 Inashi opala okwiigameka komunandjo nokupilika oshinima shomukeenandjo mompangu.
6 Omilungu dhegoya odhi na oontamanana, nokana ke otaka igidha omadhengo.
7 Okana kegoya oko ekano lyalyo, nomilungu dhe odho etavu lyomwenyo gwe.
8 Oohapu dholuhoko odho oontoye tadhi thenunukile moondjugo dhomeni.
9 Ngoka ta tonyala miilonga ye, oye omumwayina gwanakumbugaleka.
10 Edhina lyOmuwa olyo oshungo ya kola; omuyuuki ota matukile mo e ta gamenwa.
11 Eliko lyomuyamba momadhiladhilo ge olyo oshilando she sha kola, ngashika ekuma eleeleka lyaa shi kukondwa momadhiladhilo ge.
12 Omutima gwomuntu otagu inenepeke komeho gehanagulo lye, ihe eishonopeko otali tetekele esimano.
13 Ngoka ta yamukula, manga inaa uva, otashi mu nikile uugoya notashi mu sitha ohoni.
14 Ombepo ya kola otayi mu ambidhidha muuvu we, ihe olye ta vulu okutula omukumo momwenyo gwa nyanyagulwa?
15 Omutima gwomunandunge otagu likola uunongo, nokutsi kwomunamayele otaku kongo ontseyo.
16 Omulongelo gwomuntu otagu mu palele eha noku mu fala koshipala shaanenentu.
17 Nakuthika tango koompangu oku na uuthemba, ihe mukwawo ote ya note mu konakona nawa.
18 Oshihogololitho ohashi lotitha oontamanana e tashi kutha esipa pokati koombwa.
19 Omumwayina a kotokelwa oku vule oshilando sha kola mokusindwa, noontamanana odha fa omweelo gwa patekeka.
20 Koshiyimati shokokana ela lye otali kuta, ta kutithwa kiiyetwapo yomilungu dhe.
21 Eso nomwenyo oya kala moonkondo dhelaka; naangoka he li longitha, ota ka lya iiyimati yalyo.
22 Nakumona omukulukadhi oku na elago, a likola ohokwe yOmuwa.
23 Oohepele otayi indile nokwiifupipika, ihe omuyamba ota yamukula nomagandambadhi.
24 Omuntu gwookuume oyendji ota hanagulwa po, ihe kuume omudhiginini e vule omumwayina.
