Ehanauno laNinive
1 Omuhanauni ote ku totele (Ninive) nokuli. Nangela ohotengulu! Kala nokunangela ondjila! Pameka oshiya shoye! Homata shili! 2 Osheshi Omwene ota shunununa Jakob oshinge ngaashi oshinge shaIsrael. Osheshi oimhulu oye va nyeka, yo ya hanauna po omiviinyu davo. 3 Oikelelifo yovaladi vasho ya vaekwa nondomo itilyana, ovalumenhu valadi ova djala oikutu yopurpuri. Ekonito loivela yomatemba oita tali konita mefiku tuu olo ye te lilongekida, nomaonga taa takwa. 4 Omatemba oita taa mashauka neendjila, taa tondoka moluhaela. Okuholoka kwavo ngaashi eenyika da xwama, ngaashi omaluvadi taa shela kombinga nombinga. 5 Ye ota dimbulukwa ovakulunhu vaye. Vo otava endelele nokupundavauka, tava totele kohotekuma, noshikelelifonduda sha longekidwa. 6 Oivelo ya ama komulonga ya yeululwa, nouhamba wa tyololoka. 7 Etokolo lasho la fika! Oshilando sha tinhwa po. Ovapika ovakainhu tava keme ngaashi eenghuti tadi kwena, ndele tave lidenge peenhulo davo. 8 Ndele Ninive osha kala ngaashi etale lomeva momafiku asho aeshe. Ndelenee vo otava i onhapo! “Kanghameni! Kanghameni!” Ndelenee kape na ou ta piluka.
9 Nyekeni oshisiliveli! Tinheni oshingoldo! Emona lihapu li li mo, itali pu mo. Oupuna woinima iwa i lili noi lili. 10 Ofilu! Hamungaho! Ashishe sha hanaunwa po! Omutima tau hemuka, eengolo tadi tifauka. Moiya aishe omu nouyehame. Noipala yavo aishe ya pemba. 11 Onghalelo yonghoshi oi li peni? Onhele yokulila yonghoshi onyasha oi li peni? Muyo onghoshi nonghoshi onghadi nonghoshona da kala nokulyangela nopehe na ou te di halwifa? 12 Onghoshi ei ya hakanena ounghoshona oshihakanwa noya dipaela eenghoshi dayo deenghadi, oyo ya yadifa ekololo layo oshihakanwa nonghalelo yayo noikwatwa yayo.
13 Tala, ame ndi nombedi naave, Omwene womatanga ovakwaita ta ti: “Omatemba oye oita ohandi ke a ninga okalungululu komwifi. Neongamukonda tali ka dipaa eenghoshi doye eenyasha. Nenyeko loye ohandi li mane po kombada yedu, nondaka yovatumwa voye itai udika vali.”
Etekopo lyaNinive
1 Ninive, oto ka ponokelwa!
Ehanagulo olye ku adha!
Indeni komahala gokwiipopila!
Langeleni ondjila!
Ilongekidhileni olugodhi!
2 (Omuwa okwa hala okugalula esimano lyaIsrael, ngaashi lya li nale,
manga aatondi ye inaaye li mu yuga.)
3 Aakwiita aatondi oya humbata iikandekitho iitiligane
noya zala omizalo dha fa ombinzi.
Otaa ilongekidhile eponokelo!
Omatembakwiita gawo otaga geta ga fa omulilo!
Uukambe wawo tau nuka omalondo!
4 Omatembakwiita otaga mbolokota momapandaanda,
otaga kolokota momahalandjandja goshilando.
Otaga adhima ngomalaka gomulilo
notage ende ga fa olwaadhi.
5 Aambala otaa hiywa ya gongale;
otaa tantala, sho taa endelele yu uka komeho.
Aaponokeli otaa matukile kekuma
e taa yelutha oshikandekitho
okushiga oshikumunithi shekuma.
6 Omiyelo dhopomulonga dha mwakuka;
uuwa wa shoshomekwa kuumbanda.
7 Omunyekadhi ota kwatwa omupika;
aadhike ye taa lili ya fa oonguti
notayi ikwata pontulo koluhodhi.
8 Aantu otaa gwaya mo muNinive
ongomeya taga panuka mondama.
Otaku igidhwa: “Kankameni! Thikameni!”
Ihe kape na ngoka ta galuka.
9 Yugeni oshisiliveli!
Hakaneni oshingoli!
Oshilando oshu udha omaliko!
10 Ninive otashi hanagulwa po,
tashi thigwa po, tashi mbugalekwa!
Omitima otadhi kukuta kuumbanda;
oongolo otadhi tifauka,
oonkondo dha kana;
iipala otayi pembe.
11 Oshilando oshi li peni ngashingeyi,
shoka sha li sha fa ekololo lyoonime,
ehala mpoka oonime oongundjuka dha paluthilwa,
mpoka oondumentunime noonyalinime dha wapa okweenda
nuunimegona wadho wu na okukala megameno?
12 Onime oya dhipaga oshihakanwa shayo
noye shi topolele oonkwawo
nuunimegona wayo;
oyu udhitha ekololo lyayo nonyama ya tudhwagulwa.
13 Omuwa Omupangelinkondoawike ota ti: “Ngame onda ningi omutondi gweni! Omatembakwiita geni otandi ga fike po! Aakwiita yeni otaa ka dhipagelwa miita, notandi kutha po shaa shoka mwe shi kutha yalwe. Oonkondo dheni itadhi ku uvika we muuyuni.”
