Ounyenye wokombada yedu noupuna itau eta elao
1 Onde lipopila momwenyo wange: “Paife nee nda hala oku ku yelekela nehafo. Kala u udite hano ouwa!” Ndelenee tala, naasho yo ongahoelela. 2 Nda lombwela oindjola, oyo oulai. Nehafo nde lilombwela: Otashi kwafa shike? 3 Ame nda diladila momwenyo wange ndi hekeleke olutu lange nomaviinyu, fimbo ounongo otau endifa omwenyo wange, nondi kanyatele koulai, fiyo handi mono oshike shiwa kovana vovanhu, osho ve noku shi ninga koshi yeulu momafiku avo omokukalamwenyo kwavo. 4 Ame nda longa oilonga inene: nde litungila eengulu, nonde likokolela oikokola yomiviinyu.
5 Ame nde li ningila oikunino noikunino yomiti ndele muyo nda twika mo omiti di lili nadi lili doiimati. 6 Nde li ningila omatale, opo ndi tekele oixwa yomiti dipe. 7 Ame onde lilandela yo ovapika ovalumenhu novakainhu naava yo va dalelwa meumbo lange. Ame nda li yo neengobe dihapu needi dihapu di dule daava va li nge komesho muJerusalem. 8 Ame nde likongela yo oshisiliveli noshingoldo nomamona eehamba nomamona oitukulwalongo. Ame onde likongela ovaimbi ovalumenhu novakainhu, ounyenye womahafo ovana vovanhu nokutya, ovaholike vahapu. 9 Ndele nda kula nda ninga omunenenhu ndi dule aveshe va li nge komesho muJerusalem. Ounongo owa kala yo pwaame. 10 Ame inandi kelela omesho ange kwaashishe oo e shi hala. Omutima wange inandi u kelela nande ehafo limwe, osheshi omutima wange wa hafela oilonga yange aishe idjuu, ndele osho sha li oshipewa shange shomoilonga yange aishe idjuu. 11 Opo nee nda tala oilonga yange aishe omake ange a longa, noilonga yange aishe idjuu nde i longa, ndele tala, oyo aishe oyongahoelela nokushikula omhepo. Ndele ashishe shokoshi yetango kashi nekwafo.
12 Ame nda punguluka ndi tale ounongo noulai noushima, osheshi omunhu ou ta shikula ohamba, ota dulu shike mbela shimwe, osho ashike eshi sha ningwa nale! 13 Opo nee nda mona nokutya, ounongo u dule oulai, nouyelele u dule omulaulu. 14 Omunaendunge e nomesho momutwe waye, ndelenee elai tali ende momulaulu. Ndelenee nda mona yo nokutya, oshipewa shavo aveshe oshi fike pamwe. 15 Onghee hano nde lipopila momwenyo wange: “Osho tashi hange elai, otashi hange nge yo. Omolwashike hano ame nda li omunongo unene?” Ndelenee nde lipopila momwenyo nokutya, owo yo owongahoelela. 16 Osheshi edimbulukiwo lomunongo itali kala po ngaashi yo lelai, shaashi momafiku tae uya, ashishe sha dimbuwa filu. Omunongo ta fi, ndishi, ngaashi elai! 17 Onghee hano nda tonda okukalamwenyo, osheshi oshilonga osho tashi ka ningwa koshi yetango inashi wapalela nge, shaashi ashishe oshongahoelela nokushikula ashike omhepo. 18 Ndele nda tonda oshilonga shange ashishe, osho nde shi longa noudjuu koshi yetango, eshi ndi noku shi efela omunhu ou ta ka shikula nge. 19 Ndele olyelye e shi shii ye ngeenge omunongo ile elai? Ndele ye ota ka pangela oilonga yange aishe nde i longa noudjuu ndele nde i likongela nounongo koshi yetango. Nasho yo oshongahoelela.
20 Onghee hano omutima wange nde u efela mexupulo omolwoilonga yange aishe, nde i longa noudjuu koshi yetango. 21 Osheshi osho shi li: omunhu ou e liningila oupyakadi nokulonga nounongo nomayele nouladi, e noku shi yandja komunhu, ou ine lipyakidila nasho. Nasho yo oshongahoelela noshiponga shinene. 22 Osheshi omunhu ota mono shike molwoupyakadi waye aushe nomolwelalakaneno lomutima waye, nalo ye te lietele oudjuu koshi yetango? 23 Osheshi omafiku aye aeshe ouyehame noshilonga shaye oluhodi. Nomoufiku yo omwenyo waye itau tulumukwa. Nasho yo oshongahoelela. 24 Omunhu ke na nande ouwa umwe, okulya nokunwa nokushambukifa omwenyo waye nouwa mokulonga kwaye kudjuu. Ame nda mona nokutya, osho osha dja meke laKalunga. 25 Osheshi olyelye ta dulu okulya nokunwa ehe na Kalunga? 26 Osheshi omunhu ou a wapala koshipala shaye, Ye ote mu pe ounongo, omayele nehafo, ndelenee omulunde ta pewa kuye oshilonga shokulikongela nokuhapupalifa, opo shi pewe ou a wapala koshipala shaKalunga. Nasho yo oshongahoelela nokushikula ashike omhepo.
Uutoye wuuyuni nuuyamba itau eta elago lyasha
1 Ondi ipopile momwenyo nda ti: “Eewa, otandi ke ku makelitha enyanyu, nyanyukilwa uuwanawa!” Ihe tala, naashika osima yowala. 2 Koondjola onda ti, shika uugoya! Kenyanyu onda ti, otashi kwatha shike? 3 Onde shi dhiladhila momwenyo gwandje, ndi nyanyudhe olutu lwandje nomaviinu — manga omwenyo gwandje tagu endithwa kowino — nondi ikwatelele kuusama, opo ndi mone shoka sho opalela aana yaantu ye na oku shi ninga kohi yegulu momukokomoko gwomwaalu gwomasiku gokukalamwenyo kwawo.
4 Onda longa iilonga iinene; ondi itungile omagumbo, nondi itsikile iitsambe yomiviinu. 5 Ondi ikunine omapya niikunino nonda tsike omiti dhiiyimati dhi ili nodhi ili. 6 Ondi ihupile omatale, opo ndi tekele iimeno nomiti omishona. 7 Ondi ilandele aapika aalumentu naakiintu, nonda likola mboka ya valelwa megumbo lyandje. Onda munu oongombe, oonzi niikombo, ndi vule ayehe mboka ya tetekelele ndje muJerusalem. 8 Ondi igongelele wo oshisiliveli noshingoli nomaliko gaakwaniilwa niilongo; ondi imonene aayimbi aalumentu naakiintu nomanyanyu gaana yaantu, aaholike oyendjiyendji.
9 Onda koko aluhe nda ningi omunene ndi vule ayehe mboka ya li ndje komeho muJerusalem. Onda kaleke owino yandje pungame. 10 Noshaa shoka omeho gandje ge shi hala, inandi ge shi indika; omwenyo gwandje inagu iyageka enyanyu nando olimwe, oshoka omwenyo gwandje ogwa nyanyukilwa iilonga yandje ayihe ndi ipyakidhile nayo, nosho sha li oshitopolwa shiilonga yuupyakadhi wandje. 11 Sho nda tala iilonga yandje ayihe mbyoka ye etwa po kiikaha yandje nuupyakadhi woonkambadhala dhandje adhihe ndhoka nda ningi — tala, ayihe oya li osima yowala nokutidha ombepo, nokaku na sha shomupondo kohi yetango.
12 Onda pungulukile owino, uugoya nuusama nde u tongolola nomeho. Omukwaniilwa ota vulu okuninga shike shoka inaashi ningwa nale komutetekeli gwe? 13 Eeno, onda tala ko, owino oyi na omwago yi vule uugoya, ngaashi uuyelele u na omwago u vule omilema. 14 Omunawino oku na omeho momutse gwe, ihe omusama ote ende momilema. Ihe onde shi dhimbulula kutya ayehe otaa ka adhika keadhiko limwe. 15 Onkee ndi ipopile momwenyo gwandje nda ti: “Shoka ngaa tashi adha omugoya, osho wo tashi ka adha ndje. Owino oye etele ndje po shike ano?” Nondi ipopile momutima gwandje kutya naashika wo osima yowala. 16 Oshoka sho shene okudhimbulukiwa kwomunawino oku thike pamwe nokwegoya, oshoka monakuyiwa ayehe otaa ka dhimbiwa; ndishi omunawino naye wo ota si ngaashi egoya. 17 Onkee ano nda ketelwa kokukalamwenyo, oshoka iilonga mbyoka hayi longwa kohi yetango, oya ehameka ndje, molwaashoka ayihe oyowala nokutidha ombepo.
18 Onda kunyukwa oonkambadhala dhandje adhihe ndhoka nda gwanitha nuudhigu kohi yetango, nondi na oku dhi thigila omuntu ngoka ta landula ndje. 19 Olye a tseya ngele ye omunawino nenge egoya? Oye ta ka lela iilonga yandje mbyoka nde yi tsakanitha nuudhigu nonde yi likola nuunongo kohi yetango. Naashika wo osima yowala. 20 Onkee ano ondi iyekelele molwiilonga ayihe mbyoka nda tsakanitha nuudhigu kohi yetango. 21 Omuntu nando ti ipyakidhile nowino, nuunongo nonuunkulungu, ayihe ote yi thigile ngoka inee yi longela. Naashika osima yowala, oshiponga nokuli. 22 Oshoka omuntu oku na ondjambi yashike momaipyakidhilo nomoonkambadhala dhe ti ihepeke nadho kohi yetango? 23 Oshoka omasiku ge agehe oge na uuwehame nomaihepeko ge agehe omalulu, nokuli uusiku omwenyo gwe itagu vululukwa nando. Naashika owaleelela.
24 Omuntu ke na elago lilwe lyaa shi okulya nokunwa nokunyanyudha omwenyo gwe niilonga ye yuupyakadhi. Onde shi mono wo kutya osha zi miikaha yaKalunga. 25 Oshoka olye ta vulu okulya nokunyanyukwa keehe mu na? 26 Oshoka omuntu ngoka e mu opalela, Kalunga ote mu pe owino, uunongo nenyanyu, ihe omulunde ote mu pe oshilonga shokugongela noshokundumbila pamwe, opo e yi gandje kungoka e mu opalela. Naashika wo owaleelela nokutidha ombepo.
