Omatumbulodiladilo taa popi oinima i lili nai lili
1 Eedi da fya tadi mbutike ndele tadi nyono po omaadi omupiluli womiti. Oulai munini u dule eendunge nefimano. 2 Omutima womunaendunge u li kolulyo, ndelenee omutima welai okolumosho. 3 Heeno, mokweenda kwalo nondjila elai kali neendunge. Tali hololele keshe umwe nokutya, lo elai. 4 Ehandu lomupangeli ngeenge tali ku xwamene, ino efa oshilonga shoye, osheshi elididimiko tali kelele omanyono mahapu. 5 Oku nomupya nde u mona koshi yetango nokutya, epuko la dja komupangeli: 6 Oulai tau tulwa pombada u fimanekwe, noipuna i nokukala omutumba poshi. 7 Ame nda mona ovapika va londa eenghambe, ndelenee eehamba da enda ngaashi ovapiya kolupadi pedu. 8 Ou ta fe elambo, ota wile mulo, ou ta ngumauna po ekuma, ota lika keyoka.
9 Ou ta pande omamanya, ote lilengula nao, ndele ou ta pande oikuni, ta tuwa oipute kuyo. 10 Oshivela ngeenge sha fimha, nomunhu ina upika ombinga yeememo, ye e nokulonga neenghono dihapu. Hano okudiinina oilongifo okwo eendunge. 11 Eyoka ngeenge tali li omunhu, fimbo inali fipwa, ounongo wokufipa uhe na vali oshilonga.
12 Eendjovo domokanya komunamayele odiwa, ndelenee elai tali ponwa po komilungu dalo vene. 13 Ehovelo leendjovo dokanya kalo olo oulai, nexulilo lokupopya kwalo oushima. 14 Elai tali popi eendjovo dihapu, ndelenee omunhu iha shiiva oshike tashi ke uya. Olyelye te mu hololele osho tashi holoka konima yaye. 15 Elai olo itali shiiva okuya koshilando, osheshi la lolokifwa koupyakadi walo. 16 Woo ove oshilongo! Ohamba yasho okaana, nomalenga asho eshi taa kala poitelekela eengula dinene nokuli. 17 Akutu oshilongo ove shi nelao! Ngeenge ohamba yasho omunedina, ndele ngeenge omalenga asho taa kala poililo pefimbo la wapala ngaashi ovalumenhweelela, hangaashi ovafinyuni. 18 Omolwoundede oikonde yongulu tai teka po, nongulu tai lokifwa molwounye womake. 19 Oitelekela tai telekelwa okuhafifa, nomaviinyu taa hafifa omwenyo; ndelenee aishe tai etwa po koimaliwa. 20 Ino tuka nande ohamba momadiladilo oye, ndele monduda yoye yokunangala, ino tuka oshipuna. Osheshi eedila dokeulu tadi twala ondaka yoye, naai i nomavava tai holola eendjovo doye.
Iiponga yuugoya
1 Oondhi dha sa otadhi oleke nokumbutika omugwayo gwomupiluli; uusama uushona ou na ondjundo yi vule omayele nesimano.
2 Omwenyo gwomunawino ogwa gama kolulyo, ihe omutima gwomusama okolumoho. 3 Eeno, omugoya ngele te ende mepola, oondunge otadhi mu pumbu, noti ihololele shaa ngoka kutya ye egoya.
4 Ondjahi yomukwaniilwa ngele tayi ku hwamene, ino etha iilonga yoye, oshoka engungumano otali sindi omapuko omanene.
5 Oku na epuko limwe nde li koneke kohi yetango, ombedhi ndjoka tayi zi komupangeli: 6 aasama taa yelwa pombanda unene, naayamba taa shonopekwa. 7 Onda mono aapika ya kayila uukambe, naawa taye ende kolupadhi ya fa aapika.
8 Ngoka ta fulu ekelo, ota vulu okugwila mo; ngoka ta kumuna ekuma, ota lika keyoka. 9 Ngoka ta tandula omamanya, ote ehamekwa kugo; ngoka ta panda iikuni, ota tosholwa iilalo kuyo. 10 Ngele ekuya olya simpa, nomuntu ite li upike, nena nge te li longitha, ota hepeke oonkondo; ihe omunawino ote li upike. 11 Eyoka ngele tali li omuntu, manga inaali nonomwa, nena uunkulungu womunonomi kau na we oshilonga. 12 Oohapu dha za mokana komunawino, odha simana, ihe omilungu dhomugoya otadhi mu nina po ye mwene. 13 Etameko lyoohapu dhomokana ke olyo uugoya, nehulilo lyokupopya kwe uulayi wa pitilila. 14 Egoya ohali popyagana omahapu ogendji, ihe omuntu ito tseya shoka tashi ka ningwa naashoka tashi ka kala ko konima ye nolye te ke mu lombwela shika.
15 Uupyakadhi womugoya otau mu lolokitha, oshoka ita tseya nokuli okuya koshilando.
16 Yaye shilongo ngoye, omukwaniilwa ngele okanona, nomalenga goye haga menekele omatelekela ongulangula! 17 Omunelago shilongo ngoye, ngele omukwaniilwa gwoye omunedhina, nongele omalenga goye haga ningi iituthi pethimbo lyo opala pashilumentu nohangaashi oonkolwi.
18 Omoluunyenge omitenge dhongulu otadhi teka po, nomoluunyolowe ongulu tayi kala yi na oontongo.
19 Iitelekela ohayi telekelwa okunyanyudha, omaviinu haga hangelwa okushambudha omwenyo; ihe iimaliwa ohayi eta po ayihe.
20 Omukwaniilwa ino mu tuka nando omomadhiladhilo goye, nomondunda yoye yokulala ino tuka omuyamba, oshoka oondhila dhokegulu otadhi fala ewi lyoye, niikwamawawa tayi holola oohapu dhoye.
