David ta ningi ohamba yaJuda, ndele Isboset ohamba yaIsrael
1 Ndele David okwa pula kOmwene ndele ta ti: “Nandi ye moshilando shimwe shomuJuda?” NOmwene okwe mu nyamukula: “Inda.” Opo nee David ta pula: “Ondi nokuya peni?” Ndele Ye ta nyamukula: “KuHebron.” 2 Ndele David okwa ya ko, nosho yo ovalikadi vaye vavali, Ahinoam wokuJisreel naAbigail, omwalikadi waNabal, Omukarmel. 3 Ndele David okwa twala ko yo ovalumenhu ava va li puye, keshe umwe neumbo laye, ndele va tula moilando yopuHebron. 4 Opo nee ovalumenhu Ovajuda ve uya ndele va vaeka David a ninge ohamba yepata laJuda. Eshi va shiivifila David nokutya, ovalumenhu ovaJabes muGilead va paka Saul, 5 David okwa tuma ovatumwa kuJabes shomuGilead ve va lombwele: “Omwene ne mu nangeke noupuna, eshi mwa fila onghenda omwene weni ndele mwe mu paka. 6 Omwene ne mu file onghenda noku mu diinina, naame mwene yo handi mu ningile ouwa, eshi mwa ninga oshinima eshi. 7 Ndele paife kaleni mwa nyatipala ovalumenhweelela. Nande omwene weni Saul a fya, epata laJuda la vaeka nge ndi ninge ohamba yalo.”
8 Ndelenee Abner yaNer, ondjai yaSaul, okwa kufa Isboset yaSaul ndele e mu twala kuMahanaim, 9 nokwe mu ninga ohamba yaGilead noyOvaasuri noyaJisreel noyaEfraim noyaBenjamin noyOvaisraeli aveshe. 10 Omido daIsboset yaSaul, eshi a ninga ohamba yaIsrael, da li omilongo nhee, ndele a pangela omido mbali. Epata laJuda alike la shikula David. 11 Nomido odo David okwa li ohamba muHebron nokupangela epata laJuda, oda li di fike pomido heyali neehani hamano.
Ovaisraeli nOvajuda tave lipilukile
12 Ndele Abner yaNer pamwe novapiya vaIsboset yaSaul va dja kuMahanaim va ya kuGibeon. 13 Joab yaSeruja novapiya vaDavid va fikama yo. Ndele vo eshi va shakena kumwe pomufima waGibeon, ova kala omutumba kombinga nombinga yomufima, va taalelafana. 14 Ndele Abner ta ti kuJoab: Ovamati nava fikame va danauke olwoodi moipafi yetu. Ndele Joab ta ti: Nava fikame! 15 Opo nee va fikama. Ndele muBenjamin mwa fikama mwa dja omulongo navavali kombinga yaIsboset yaSaul. Ndele movapiya vaDavid omulongo navavali. 16 Ndelenee vo ova kwatafana komitwe ndele va twaafana nomaongamukonda meemhati. Ndele vo aveshe va fila shimwe. Onghee hano onhele oyo tai ifanwa Onhele yEongamukonda muGibeon.
Asahel ta dipawa kuAbner
17 Ndele mefiku tuu olo olwoodi la ninga lipyu unene, ndelenee Abner novalumenhu Ovaisraeli va tewa kovapiya vaDavid. 18 Ndele pa li ovana ovamati vatatu vaSeruja: Joab naAbisai naAsahel. Ndele Asahel okwa li e nonhapo ngaashi omenye yomofuka. 19 Ndele Asahel okwa taataa Abner, ina henukila kolulyo ile kolumosho mokushikula Abner. 20 Opo nee Abner ta keuka ndele ta ti: “Oove tuu Asahel?” Ndele ta nyamukula: “Aame ou.” 21 Ndele Abner ta ti kuye: “Yapukila kolulyo ile kolumosho u kwate umwe womovamati ovo u mu kufe oiti yaye.” Ndelenee Asahel ina hala oku mu aluka. 22 Ndele Abner ta ti vali lumwe kuAsahel: “Ove u nokwaaluka nge, omolwashike ndi noku ku dipaa? Ame ohandi dulu ngahelipi okutala hano oshipala shomumwanyoko Joab?” 23 Ndelenee ye a anya okudja po. Opo nee Abner te mu tu neonga oshipilamo medimo, opo eonga le mu tyuuka ndele ta wile poshi ndele ta file monhele tuu oyo. Ndele aveshe ava ve uya ponhele opo Asahel a fila, ova kanghama. 24 Ndelenee Joab naAbisai va shikula Abner, netango la ningina vo eshi ve uya koshikulundu Amma, osho sha shaama naGiah pondjila yokombuwa yaGibeon.
25 Opo nee Ovabenjamin va ongala ongudu puAbner ndele va kala ofika koxulo yoshikulundu. 26 Opo nee Abner a ifana Joab ndele ta ti: Eongamukonda li nokulya fiyo ofiyo? Ku udite ko nokutya, konima otapa ka kala oixuna? Ito lombwele nokuli ovanhu va efe okutaataa ovamwaxe? 27 Ndele Joab ta nyamukula: Oshili, ngaashi Kalunga e nomwenyo, oshili, ngeno ino shi tya, ngeno ovanhu inava efa fiyo omongula okushikula ovamwaxe. 28 Opo nee Joab a shika enghuma loluvinga lodi yomhedi, novalumenhu aveshe va kanghama ndele inava shikula vali Israel ndele inave mu lwifa vali. 29 Ndele Abner novalumenhu vaye va tauluka omaluhaela oufiku aushe ndele va taulula Jordan naBitron ashishe ndele ve uya kuMahanaim. 30 Ndele Joab okwa ongela ovalumenhu aveshe, eshi a piluka nokwa efa okushikula Abner. Ndele movapiya vaDavid mwa yongolwa ovalumenhu omulongo nomugoi naAsahel. 31 Ndelenee ovapiya vaDavid va dipaa Ovabenjamin, nokutya movalumenhu vaAbner, novalumenhu omafele atatu nomilongo hamano va fya. 32 Ndele va kufa Asahel ndele ve mu paka mombila yaxe muBetlehem. Ndele Joab novalumenhu vaye va enda oufiku aushe ndele ve uya kuHebron eshi kwa sha.
David ta ningi omukwaniilwa gwaJuda
1 Konima yaambika David okwa pula Omuwa ta ti: “Nandi ye, ndi ka lale po oshilando shimwe shomiilando yomuJuda?”
Omuwa okwa yamukula a ti: “Eeno.”
David okwa pula a ti: “Oshini?”
Omuwa okwa ti: “OHebron!”
2 David okwa kutha aakadhi yaali: Ahinoam a za kuJesreel naAbigal, ngoka a li omuselekadhi gwaNabal gwokuKarmel, nokwa yi nayo kuHebron. 3 Okwa fala ko wo aantu ye nomagumbo gawo noya tula momikunda dha kunduka Hebron. 4 Nena Aajuda oye ya kuHebron noya gwayeke David omukwaniilwa gwaJuda.
David sho u uvu kutya Aajabesh muGilgal ya fumvike Saul, 5 okwa tumu ko aantu yamwe ye na elaka tali ti: “Omuwa ne mu yambeke molwashoka mwa holola esimaneko lyokufumvika omukwaniilwa gweni. 6 Ngashingeyi Omuwa ne mu hololele ontalanteni ye nuudhiginini we. Ngame wo otandi ke mu ninga nawa molwashoka mwa ningi nawa. 7 Ikoleleleni, mu pendapale! Omukwaniilwa gweni Saul a si, nAajuda oya gwayeke ndje, ndi ninge omukwaniilwa gwawo.”
Ishboshet ta ningi omukwaniilwa gwaIsrael
8 Ondjayi yiita yaSaul, edhina lye Abner yaNer, okwa fadhuka po pamwe nomuna gwaSaul Ishboshet ya tokola omulonga Jordan yu uka muMahanaim. 9 Nkwiyaka Abner okwa ningi Ishboshet omukwaniilwa gwoshitopolwa shaGilead, Aser, Jesreel, Efraim naBenjamin, eeno, nogwaIsrael alihe. 10 Okwa li e na omimvo omilongo ne, sho a ningi omukwaniilwa gwaIsrael nokwa lele omimvo mbali.
Ihe ezimo lyaJuda olya landula David, 11 nokwa lele Juda muHebron omimvo heyali netata.
Iita pokati kaIsrael naJuda
12 Abner nomalenga gaIshboshet oya zi kuMahanaim yu uka koshilando Gibeon. 13 Joab, yina oZeruia, nomalenga omakwawo gaDavid oye ya tsakaneke pedhiya lyaGibeon mpoka ya kala yamwe ye li handika, manga yakwawo ye li gama handiyaka. 14 Abner okwa ti kuJoab: “Natu kuthe aagundjuka yamwe koombinga adhihe, ya ninge elolelathano lyiita.”
Joab okwa ti: “Onawa!”
15 Aamati omulongo nayaali oya kalele po Ishboshet nezimo lyaBenjamin ya kondjitha aamati omulongo nayaali yaDavid. 16 Omuntu kehe okwa kwata omukondjithi gwe komutse e ta tsu omwele gwe moombati dhomukondjithi gwe, onkee ayehe omilongo mbali nayane ya si oshita. Omolwashoka eha ndyoka muGibeon lya lukwa “Elundu lyomagongamwele.”
17 Nena olugodhi olwa tukuluka. Abner nAaisraeli oya sindwa kaantu yaDavid. 18 Oyanamati yatatu yaZeruia: Joab, Abisai naAsael oko ya li. Asael, ngoka ha vulu 19 okwa tameke okutidha Abner e mu endja mo. 20 Abner okwa tala konima e ta ti: “Ongoye Asael?”
Okwa yamukula a ti: “Eee.”
21 Abner okwa ti: “Etha okulandula ndje. Tidha gulwe gwomaakwiita, u yuge ko shoka e na.” Ihe Asael okwe mu lamba owala. 22 Lumwe natango Abner okwa ti kuye: “Etha okutidha ndje. Omolwashike to thiminike ndje, ndi ku dhipage. Otandi vulu ngiini okutsakaneka omumwanyoko Joab?” 23 Ihe Asael ina kankama, onkee Abner e mu tsu oshilwanima negonga mela e tali tunukile kombunda. Asael okwi ihata pevi omukukutu, noshaa ngoka e ya pehala mpoka a kangawala, okwa kankama.
24 Ihe Joab naAbisai oya tameke okutidha Abner. Pokuningina kwetango oye ya poshikulundundu shaAmma, shoka shi li kuuzilo waGiak mondjila yu uka kombuga yaGibeon. 25 Aantu yomezimo lyaBenjamin oya gongalele Abner ishewe noya kala kondungu yondundu. 26 Abner okwi igidha Joab ta ti: “Otatu kondjithathaneni sigo aluhe? Ku wete kutya otashi hulile ashike muuwinayi? Tse aakwashilongo aakweni. Otashi kala sigo uunake, manga inoo lombwela aantu yoye, ye ethe oku tu landula?”
27 Joab okwa yamukula ta ti: “Otandi gana kuKalunga omunamwenyo kutya ando wa li inoo popya, ando aantu yandje ye mu landula, sigo ongula taku shi.” 28 Nena Joab okwa hiki ombenda endhindhiliko lyokulombwela aantu ye, ye ethe okutidha Aaisraeli, nosho ngaaka olugodhi lwa hulu.
29 Abner naantu ye oye ende uusiku auhe ya taakana olusilu lwaJordan, oya tokola omulonga Jordan noya shuna kuMahanaim esiku lya landula ko.
30 Joab sho e etha okutidha Abner, okwa gongaleke aantu ye ayehe nokwa mono kutya aalumentu omulongo nomugoyi kaye po mwa kwatelwa Asael. 31 Aantu yaDavid oya dhipaga aantu yaAbner yomezimo lyaBenjamin 360. 32 Joab naantu ye oya kutha po omudhimba gwaAsael e taye gu fumvike mombila yahe. Nena oye ende uusiku auhe noya thiki kuHebron pokutenda kweluwa.
