Judits ǁnaetsanas
1 Os ge Juditsa hoaraga Israelǁîn aiǃâ gangantsanasa ge ǁnaetsoatsoa tsîn ge hoaraga khoena nē koatsanas ǃnâ ge ǁhao. 2 Judits ge nēti ge ǁnae:
“Ti Eloba koa, î ǁîba ǁnaeba,
ǃKhūba ǃkhomǃkharurudi tsî simbaldi ǀkha koa,
ǀasa koatsana-e ǁnaeba bi re.
Koa, î ǁîba huib ǃaroma ǂgaiǀî re.
3 ǃKhūb ge toroba ra ǀamǀam ǃkhamaoba.
ǁÎb ge ti ǃgôaǃgonaona xu ǃnoraǃnora te
tsî ǁîb khoen di hâǃkhaib ǃoa ge oasī-ū te.
4 ǀApasǀkhāb ǃhomga xun ge Asiriaǁîna,
ǁîn di disiǀoadisidi ǃnâ hâ toroǃkhamaogu ǀkha ge ǁgôaxa.
ǁÎn toroǃkhamaogu ge ǃgoaǃnāgu di ǃāga ge ǁgoeǁkhae
tsî ǁîn hātoroǃkhamaogu ge ǃhomga ge ǃgū-ai.
5 ǁÎn ge sida ǃhūba ǂhubi,
ǂkham khoega ǃgam,
ǀgôarona ǃhūb ai aoǁgui,
sida ôana ǃkhōsis ǃnâ ū
tsîn sida ǂkham khoedi hoaden nî ūǃgû, ti gere ǁē.
6 Xaweb ge ǃKhūb Hoaǀgaixaba Asiriaǁîn ǀapesa ge ǁkhae,
ǁîb ge tarekhoesa ǁîna nî ǁkhaese ge sîsenū.
7 ǁÎn ǃgari-aob Holoferneb ge ǂkham toroǃkhamaogu xa ǃgamhe
tamas ka io ǀgaisa, kaikara khoen xa ǁnāǂamhe tsî ǃgamhe tama hâ,
xaweb ge ǃoataras Judits, Merarib ôas xa
ǁîs di îsasib ǀkha ge hîkākāhe.
8 ǁÎs ge ǁgâiǀāhe hâ Israelǁîna dansa ge mā,
ǁîs ǃoatarasarana ǂgaeǂui
tsîs ge ǃkhain ǀkha dīsa sarasa ge ana,
ǁîbas nî ǂgaeǂhapuse.
ǁÎs ge ǀō-aisa ǃgâihamxūn ǀkha ǂkhausen
tsî ǃkhai-i ǀkha ǀûn âsa ge ǃgae.
9 ǁÎb ge ǁîs ǂaira ǀkhapura ǃnâ hâra xa ǃgâibahe
tsî ǀnamǀnamsas a ti ge ǂâi,
xawes ge ǁîb di gôab ǂûba ū tsî danas âba ge ǁhāǁnâ.
10 Persiaǁîn ge ǁîs ǃao-oǃnâsib xa ge ǀkhū.
Medeǁîn ge ǁîs ǁkhoaǂgaosib xa ge burugâ.
11 On ge ti khoen, ǁgâiǀāhe ge hâ ina dans xa ge ǃau;
ti khoen ǂkhabusan ge ǂgaiǂui,
on ge khākhoena ǃaob xa ge ǁnā-oa.
12 Sida ge khobon ôananôaguba xu hâ,
xawen ge sida khākhoena dabasen tsî ge ǃkhoeni;
sida ge ǁîna ǃkhoeni hâ khobon khami ge ǃgam.
ǁÎn ge ǃKhūb di toroǂnubis xa ge hîkākāhe.
13 “Tita ge ti Eloba koatsana-e nî ǁnaeba:
ǃKhūtse, sats ge kai tsî ǃgôahesa anu.
Sats ge tātsēs tsîna ge danhe tama hâ i.
14 An sa kurusaben hoana ǃoaba tsi re.
Sats ge ge mîmā, on ge hoana ge kuruhe.
Sa ǀommats ge ǁîn ai ǃnâi, on ge hoana ge ǂnubihe.
ǀGui khoe-i tsîn ge mîmās âtsa a mâǃoa ǁoa.
15 Sats ga ǀgū, o gu ge ǃhomgu tsî hurigu tsîna ra ǀkhū,
tsî gu ge ǃhaoga ǂnuruǁnuib khami ra tsuni.
Xawe ǁnān satsa ra ǁnâuǀnamnats ge ra ǀkhomxa.
16 ǃKhūb ge hoan ǃgâ-ai ǁîba ǁnâuǀnams xa ǃgâibahe,
ǃgâihamxūn ǁguibasa hā-ūs,
tamas ka io ǃgâi khauǁguibade ǁguibas xa.
17 Ti ǁaesa ra ǁnāǂam ǁaedi ge nî hîkākāhe.
ǃKhūb Hoaǀgaixab ge ǁîna ǀGoraǃgâtsēs ai nî ǁkhara.
ǁÎb ge ǀaes tsî ǂunin tsîna ǁîn sorode nî hîkākāse nî sî,
tsîn ge ǀamose tsûb xa nî ā.”
Judits di ǀuni kurigu
18 Jerusalems tawan ge hā, on ge ǃanuǃanusen tsî Eloba ge ǀgoreǀî. ǁÎn ge khauǁguibadi, māsenxa ǁguibadi tsî mādi tsîna ge ǁguiba. 19 Judits ge hoaraga xūn Holoferneb din, khoen ge ǁîsa mān tsî ǁîs ge aitsama ǁîb kharoba xu ū ǀûitsin di ǀûis tsîna ū tsî māsenxa ǁguibas ase Eloba ge ǁguiba. 20 ǃNona ǁkhâgu ǁaeban ge nē khoena Jerusalems ǃnâ, Tempeli aiǃâ Judits tsîn ǁîn ǀkha hâse gere ǁâudī.
21 ǁNās khaoǃgân ge ǁîn hâǃkhaidi ǃoa ge oa. Judits ge Betulias ǃoa oa tsî ǁnāpa ǁîs ǂhunuma ǀumiǃhūb ǃnâ ge hâ. ǁÎs ûiǁaeb ǃnâs ge hoaraga ǃhūb ǃnâ ge ǃgôahe hâ i. 22 ǂGui khoegu ge ǁîs ǀkha ge ǃgame ǂgao hâ i, xawes ge ǁîs aob, Manaseb ǁōb khaoǃgâ ǁkhawa ǃgame tama ge i. 23 ǁÎs ge hoaraga ǃhūb ǃnâ ge ǂanǂansa i tsî ǁîs aob oms ǃnâs hâse kaira tsî ge ǀguikaidisi tsî koro kurixa. Khobos âsas ge ge ǃnora kai tsîs ge Juditsa Betulias ǃnâ ǁō tsî ǁîs aob, Manaseb xōǀkhā ge ǁkhōhe. 24 Israelǁaes ge hû tsēde ǁîs ǁōb ǂama ge ǃoa. ǁŌs nîs aiǃâs ge xūn âsa ǁîs aob, Manaseb ǀgūkhoen tsî ǁîs khoen tsîn ǃnâ ge ǀgora. 25 ǀGui khoe-i tsîn ge ǁîs ge ûi hâ i ǁaeb ǃnâ tsî gaxu ǁae-e ǁîs ge ǁōs khaoǃgâs tsîna Israelǁaesa ǁnāǂamsa ge dītsâ tama hâ i.
